E tavini tatou ia Iehova ma te ore e fariu ê i te manaˈo

¹ “E ao to te feia, o Iehova to ratou Atua.” (Sal. 144:15) Ua tano noâ anei teie mau parau a te Arii ra o Davida, i teie atoa mau mahana iino? (Eph. 5:16)? E! Te oaoa noâ ra te mau kerisetiano i te tavini ia Iehova. E ere roa ˈtu i te mea ohie no tatou. Te haafifi nei Satani ia tatou i teie mau tau “ati rahi”; aita râ tatou e haaparuparu ra (Tim. 2, 3:1, 2). E haapapuraa hau atu te mau huru tupuraa e ino noa ˈtura e te fatata nei te tau e faaore ai te Basileia a te Atua i te ao tahito e topa ra e e mono e te hoê ao apî e te viivii ore (Petero 2, 3:13). Aita te poiri o teie nei ao e haaparuparu ra e aita atoa e tupohe ra i te ihe auahi o to tatou tiaturiraa; maoti râ, te anaana rahi noa ˈtura to tatou tiaturiraa o te Basileia. Aita anei tatou e oaoa ra i te tavini ia Iehova mai te mau tiarama i roto i teie nei ao poiri?—Phil. 2:15.

² E tia ia tatou tataitahi ia tamau i te vai ara i nia i ta tatou huru taviniraa ia Iehova. No te aha? No te mea ua aravihi roa o Satani i te fariu ê i te manaˈo. Te horoa ra te hoê titionare i te auraa o te parau ra “fariu ê i te manaˈo”: “Te faafariu-ê-raa i te feruriraa o te hoê taata i te mea ta ˈna e haapao ra, ta ˈna e tâuˈa ra.” Mai to ˈna huriraahia mai i nia i te fenua nei, ua manuïa o Satani i te ‘haavareraa’ i te huitaata nei. Te faaohipa ra oia e rave rahi mau faahemaraa no te fariu ê i te ara-maite-raa o te mau taata i te mau uiraa faufaa roa o to tatou nei tau (Apo. 12:9). Oia mau, te poro nei te mau Ite no Iehova a hanere matahiti i teie nei to te mau Ite no Iehova pororaa i te Basileia, ehia râ rahiraa taata tei taa ra i te faufaaraa ia faaraa i te iˈoa o te Atua e o te haamauraa i to ˈna mana arii maoti te Basileia? E mea iti roa (Ioane 1, 5:19). Mai te peu e te manuïa nei Satani i te fariu ê i te manaˈo o te tahi tau miria taata i nia i te fenua nei, te fifi atâta oia hoi ia manuïa o ˈna i te fariu ê i to tatou ara-maite-raa ia ore tatou e tavini faahou ia Iehova. Ma te peapea hoi, te topa nei vetahi o to tatou mau taeae i roto i te marei o te mau fariu-ê-raa manaˈo pûpûhia e Satani. Te vaiiho nei ratou e ia fariu-ê-hia to ratou feruriraa na roto i te mau aveia apî. Te vai ra i teie nei mahana e rave rahi mau tumu o te fariu-ê-raa. E hiˈopoa mai tatou i te tahi noa.

³ Te mau fifi i te pae faanavairaa faufaa e te here i te mau taoˈa materia: I roto i te rahiraa o te mau fenua, te faatupu nei te ereraa i te ohipa e te moni rahi o te oraraa i te tahi mau hepoheporaa. E parau mau e e tia iho â ia tatou ia noaa mai te maa, te ahu e te vahi faaearaa, no tatou iho e no to tatou utuafare. Mai te peu râ e tapitapi rahi roa nei tatou i taua mau ohipa ra e hinaarohia, e riro mai taua mau haapeapearaa ra ei tumu matamua no to tatou mau manaˈo. E nehenehe to tatou mau hinaaro i te pae materia e na nia aˈe i ta tatou turu i te ohipa o te Basileia. Ua horoa te aposetolo Paulo i te hoê aˈoraa no nia i te reira i roto i te Hebera 13:5, 6. Te haapapu maira Iesu Mesia ia tatou e eiaha te feia e imi ra na mua i te Basileia e haapeapea; te horoa maira Iehova na tatou i te mau mea ta tatou e hinaaro mau ra (Mat. 6:25-34). E nehenehe te mau pionie e te tahi atu mau tavini ma te taime taatoa, i roto i te ao nei, e haapapu i te reira.

⁴ Te faatupu nei te ao a Satani i te here i te mau taoˈa materia. Te riro nei te titauraa i te tahi atu â mau taoˈa e to ratou paruru ei tumu o te oraraa o te tahi tau mirioni taata. Ua itehia i taua ravea fariu ê i te tau o Iesu. Ua ani te hoê raatira apî taoˈa rahi ia Iesu e eaha te tia ia ˈna ia rave ia noaa mai ia ˈna te ora mure ore. Ua pahono atura Iesu e: “Ia hinaaro oe e ia maitai roa [aore ra taatoa], a tii a hoo i ta oe atoa ra, a hopoi atu ai na te taata rii, e e taoˈa ta oe i te ao i reira a haere mai ai a pee mai ia ˈu.” (Mat. 19:16-23). E au ra e ua haafifi ta ˈna mau taoˈa materia i taua taurearea ra ia tavini ia Iehova ma to ˈna [nephe] taatoa. Tei nia to ˈna mafatu i ta ˈna mau faufaa. Ua ite o Iesu e e maitai mai taua taurearea ra ia haapae oia i taua mau ravea fariu-ê-raa ra. Ua tapea te reira ia ˈna ia pûpû taatoa ia ˈna no te Atua. E tatou? Te rave rahi ra anei tatou i te ohipa, no te tapea noa i te faito oraraa tei matauhia e tatou? Te ohipa atoa ra anei te reira i nia i ta tatou taviniraa no Iehova? Te haafifi ra anei ta tatou mau taoˈa materia ia tatou ia tavini i te Basileia (Mat. 6:24)? Eita anei ta tatou e nehenehe e faaohie i to tatou oraraa no te horoa hau atu â i te taime no te mau ohipa pae varua?

⁵ Te mau ohipa i te mau mahana atoa: Mai te peu e eita tatou e vai ara, e nehenehe tatou e haapao noa i te mau ohipa o te mau mahana atoa e eita tatou e tâuˈa faahou i te mau ohipa pae varua. E haamanaˈo tatou i te mau taata i te tau o Noa. Ua tapitapi rahi roa ratou i te mau ohipa o te oraraa, te maa, te inu, te faaipoiporaa e te horoaraa i ta ratou mau tamarii ia faaipoipohia, aita ratou i haapao faahou i te faaararaa a Noa no nia i te diluvi tei fatata mai. Hou ratou i ite ai i te reira, roohia ˈtura ratou e te diluvi e pau roa ˈtura ratou. Ua roohia ratou i te haamouraa no taua mau tumu ra o tei fariu ê i to ratou manaˈo. Ua parau Iesu e: “Oia atoa te haerea mai o te Tamaiti a te taata nei.” (Mat. 24:37-39). No reira, ua haamau rahi roa te mau taata i to ratou feruriraa i nia i to ratou iho oraraa eita ˈtura ïa ratou e haapao i te poroi faaararaa ta tatou e afai atu. Aita roa ˈtu ratou e tâuˈa ra i te mau ohipa pae varua.

⁶ Te î ra anei to tatou oraraa e te mau ohipa o te mau mahana atoa e te iti noa ra to tatou haapao maitai i te mau uiraa i te pae varua? I te hoê mahana, ua titau-manihini-hia Iesu i ǒ Mareta e o Maria. Ua faaroo o Maria ma te haapao maitai i ta ˈna mau parau. I to ˈna ra pae, “ua peapea ihora ïa [Mareta] i te haapaoraa i te manihini”. Ua tapitapi rahi roa oia ia farii maitai i te mau manihini. Aita oia i ite i te faufaaraa ia rave i te taime no te faaroo ia Iesu. Ua parau mǎrû noa ˈtu Iesu ia ˈna e aita e faufaa ia haafifi i te ohipa; e tia râ ia haapao rahi atu â i te mau ohipa pae varua. E tia anei ia tatou ia faaohipa i taua aˈoraa ra (Luka 10:38-42)? Ua parau atoa Iesu e e tia ia tatou ia ara ia ore ia amu e ia inu hua, e haaparuparu hoi te reira i to tatou mau tumu ite. I teie nei tau ino o te aamu o te taata, e tia ia tatou ia vai ara noa.—Luka 21:34-36.

⁷ Te imiraa i te mau peu navenave: Te hoê o te mau ravea faaanaanataeraa matamua e faaohipahia e Satani no te haafariu-ê-raa i te ara-maitai-raa o te taata i te mau uiraa o te Basileia oia hoi te imiraa i te mau peu navenave. Ua faariro te tahi tau mirioni taata o te amuiraa faaroo kerisetiano i te peu imiraa i te peu navenave ei Atua no ratou. Mea au aˈe na ratou e arearea i te haapao maite i te Parau a te Atua (Tim. 2, 3:4). Parau mau, e ere i te mea ino te mau faaanaanataeraa manaˈo maitatai e te faafaaearaa. E nehenehe râ te horoa-rahi-raa i te taime i te mau hebedoma atoa i te mau peu faaanaanataeraa mai te afata teata, te hohoˈa teata, te video, te faaetaetaraa tino, te taioraa aore ra te tahi atu mau faaanaanataeraa e faatupu i roto ia tatou i te hoê mafatu haavare e e faaatea ê ia tatou ia Iehova (Ier. 17:9; Heb. 3:12). Nafea te reira e tupu ai? I te mau putuputuraa, e aita to tatou feruriraa e apee ra i te oreroraa parau; e hinaaro paha tatou e ia oti oioi te putuputuraa no te hoˈi e imi i te mau peu navenave. E oioi roa tatou i te imi i te mau otoheraa no te faaea i te fare maoti râ i te haere i te mau putuputuraa aore ra i te pororaa. I teie nei, e tia ia tatou ia hiˈopoa maitai mai te peu e ua riro mai anei taua mau peu navenave ra ei ravea haafariu-ê-raa i roto i to tatou oraraa. (Luka 8:14). Eita anei e nehenehe e faaohipa vetahi mau hora faufaa e horoahia ra no te faaanaanatae i nia i to tatou tupu-maitai-raa i te pae varua?

⁸ Te mau tumu parau iti aˈe i te faufaa e rave ra i te taime: Te faaô nei vetahi i roto i te mau taatiraa no te faatitiaifaro i te mau fifi o te totaiete i teie nei mahana. E tia i te mau kerisetiano ia faaatea ê mai ia ratou i te tauaparauraa hopea ore no nia i te mau fifi totiale aore ra te mau aroraa faufaa ore no te patoi i te parau-tia ore e faatupuhia e teie nei ao (Ioane 17:16). E mau ravea anaˈe teie na Satani no te fariu ê i te ara-maite-raa i te mau aˈoraa bibilia e te ravea otahi roa oia hoi o te Basileia o te Atua ïa. Mai te peu e e faainohia tatou aore ra e roohia tatou i te hoê ohipa tano ore, e vai ara ïa tatou ia ore e tahoo aore ra ia hepohepo e e moehia ia tatou e Ite no Iehova tatou. A tahi, o Iehova o tei faainohia, e o to ˈna iˈoa te tia ia tatou ia faaraa.—Isa. 43:10-12; Mat. 6:9.

⁹ Oia mau, te hinaaro nei te taata tataitahi ia fanaˈo i te oraora-maitai-raa, e nehenehe râ te haapao-rahi-raa i te mau manaˈo e te mau ravea rapaauraa e rave rahi e aratai i te hoê taata ia tapitapi rahi roa i te mau tumu parau no te oraora-maitai-raa. Noa ˈtu e te turu nei te tahi feia i te mau haapaeraa maa huru rau, te mau rapaauraa e te tahi mau ravea no te arai i te mau maˈi, mea taa ê hoi te rahiraa, no te mau fifi i te pae tino e i te pae o te mau manaˈo hohonu. No te oraora-maitai-raa, tei te taata taitahi te faaotiraa no ˈna iho ia aurarohia ra te mau faaueraa tumu bibilia. E tapea noa tatou i te hoê tiaturiraa taatoa i roto i te Basileia o te Atua, te ravea otahi roa no te huitaata tei roohia i te maˈi.—Isa. 33:24; Apo. 21:3, 4.

¹⁰ Ia mau papu tatou, e te aueue ore: A piri noa mai ai te hopea, e tataipiti o Satani i ta ˈna mau tutavaraa no te fariu ê ia tatou i ta tatou taviniraa no Iehova. ‘E patoi tatou ia ˈna ma te faaroo turori ore.’ (Petero 1, 5:9). Nafea? E tia ia tatou ia faaî i to tatou feruriraa i te mau manaˈo o te Atua (Mat. 4:4). Eiaha roa ˈtu tatou e vaiiho i te mau faaanaanataeraa o teie nei ao ia eiâ i te taime ta to tatou utuafare e tatou iho e hinaaro nei no te feruri hohonu e feruri ma te ru ore i nia i te Parau a te Atua. I te taime tamaaraa, e aparau tatou e te utuafare no nia i te mau faatiaraa faaitoito e te mau tumu parau pae varua. Ia apee tamau tatou i te hoê porotarama o te haapiiraa tataitahi e te faaineineraa i te mau putuputuraa.

¹¹ Ia haapeapea te mau fifi i to tatou feruriraa, e huri atu tatou i to tatou mau peapea i nia ia Iehova na roto i te pure. Ia papu ia tatou e te haapao nei oia ia tatou (Petero 1, 5:7). Ia faaitoito te hau a te Atua i to tatou mafatu e to tatou feruriraa (Phil. 4:6, 7). Eiaha tatou e vaiiho i te mau tumu o te ravea faaanaanataeraa ia haapoiri i te mau ohipa e tupu a muri aˈe. Ia au i te hiˈoraa o Iesu, e tuu noa tatou i te mau taime atoa ia Iehova i mua ia tatou (Ohipa 2:25). E tamau noa tatou i te hiˈo i mua i nia i ta tatou fa, mai ta te Maseli 4:25-27 e faaitoito maira ia tatou e: “E hiˈo tia ˈtu to mata i mua ia oe, e fariu i to opani mata i mua ˈtu ia oe. E haamanaˈo maitai i te eˈa i haerehia e to avae, e e haapapuhia to oe atoa ra mau haerea. Eiaha e fariu i te pae atau e te pae aui, e tapea ra i to avae eiaha ei ino.”

¹² E apiti tamau tatou ma te haapao maitai i te mau putuputuraa, e e aˈo tatou ia tatou iho no te vai ara i nia i te haapiiraa a te Parau a te Atua (Heb. 2:1; 10:24, 25). Maoti râ i te imi i te mau peu navenave ta te ao ino e pûpû ra, ia riro ei fa na tatou te tapearaa i te hoê taviniraa hotu mau. E maoro to tatou oaoa e e mauruuru tatou (Tes. 1, 2:19, 20). Ia ore roa ˈtu te hoê mea aore ra te hoê taata ia fariu ê i to tatou manaˈo i ta tatou taviniraa moˈa! ‘Ia itoito tatou, eiaha e aueue, ia rahi â te rave i te ohipa a te Fatu eiaha e faaea, ua ite hoi tatou e, e ere i te mea faufaa ore te ohipa a te Fatu ta tatou e rave na.’—Kor. 1, 15:58.