HAAPIIRAA 6

Faaohiparaa papu i te mau Papai

Ioane 10:33-36

TE FA: Eiaha e taio noa i te hoê irava ma te ore e horoa i te faataaraa. A ara maitai ia taa i te taata te tuatiraa e vai ra i roto i te irava i taiohia e te manaˈo faufaa ta oe e hinaaro e faaite.

TE TITAUHIA IA RAVE:

A haamatara mai i te mau taˈo faufaa. Ia oti te taioraa o te irava, a haamatara mai i te mau taˈo o te tuati i te manaˈo faufaa. E nehenehe oe e taio faahou i tera mau taˈo aore ra e faahiti i te hoê uiraa o te tauturu i te taata ia ite i te mau taˈo faufaa.

Ia faahiti oe i te tahi atu mau taˈo no te faataa i te manaˈo faufaa o te irava, a maiti maitai i ta oe mau parau ia tuati noa â te reira i te irava Bibilia.
A haapapu i te manaˈo faufaa. Ia taio oe i te hoê irava taa maitai, a faataa mea nafea te mau parau i roto i te irava e haamatara ˈi i te manaˈo faufaa.

Ia matara noa ta oe Bibilia a faataa ˈi oe i te irava. E tauturu te reira i te taata ia taa mea nafea ta oe mau faataaraa e tuati ai i te mau parau i roto i te irava.
A faaite e nafea ia faaohipa. Eiaha e faataa i te mau tuhaa rii atoa. A feruri eaha ta te taata i ite ê na no nia i te tumu parau. A faataa noa i te mau manaˈo o te faaite e nafea ia faaohipa i ta te Bibilia e haapii ra.