Бурганга канчаар мөргүүр ужурлуг бис?

1, 2. Чүге мөргүлдү онзагай белек деп чугаалап болурул? Мөргүл дугайында Библияда чүү дээнин билип алыры чүге чугула?

БИСТИҢ бөмбүрзээвисти бүдүн Октаргай-биле деңнээрге көңгүс бичии, а ында кижилер оон-даа хензиг. Иеговага бүгү чоннар «кочалда дамды дег» көстүр деп Библияда бижээн (Ырлар 113:23; Исайя 40:15). Ынчалза-даа Ырлар 144:18, 19-та: «Дээрги-Чаяакчы Ону кый деп мөргүүр бүгү улуска — шынныы-биле Ону кый деп мөргүүрлерге — чоок. Оон коргар улустуң күзээн чүүлүн Ол күүседип бээр, оларның дуза дилээн кыйгызын дыңнап кааш, камгалаар» — деп бижээн. Бурганның биске мөргүүр арганы бергени дыка-ла кайгамчык! Октаргайның Чаяакчызы бистиң-биле кады болурун күзеп турар база мөргүлдеривисти дыңнаарынга белен. Мөргүл — Ооң биске, кижи бүрүзүнге, берген онзагай белээ-дир.

² Ынчалзажок Иегова бистиң мөргүлдеривисти, чүгле Ооң күзел-соруунга дүүштүр мөргүп турувуста, дыңнаар. Ынчангаш мөргүл дугайында Библияда чүү дээнин көрээлиңерем.

ЧҮГЕ ИЕГОВАГА МӨРГҮҮР УЖУРЛУГ БИС?

3. Бурганга чүге мөргүүр ужурлуг бис?

³ Иегова бисти Ооң-биле чугаалажырын күзеп турар. Ону кайыын билир бис? Филипчилерге 4:6, 7-ни номчуптаалыңар. Бодап көрүңер даан, Октаргайның Чагырыкчызы силерни ханы сонуургап, ишти-хөңнүңерни Аңаа ажыдып, бергелериңер дугайында чугаалап бээриңерни күзеп турар.

4. Иеговага үргүлчү мөргүүр болзувусса, Ооң-биле найыралывыска ол кандыг салдарлыг болур?

⁴ Мөргүл биске Иегова-биле чоок өңнүктер апаарынга дузалаар. Бир эвес өңнүктер аразында үргүлчү чугаалажып, бодалдарын, сагыш-сеткилин болгаш дүвүрелдерин үлежир болза, оларның найыралы быжыгар. Иегова Библияны таварыштыр силерге Бодунуң бодалдарын болгаш минниишкиннерин ажыдып, келир үеде чүнү кылырын дамчыткан. Силер база сагыш-сеткилиңерни Аңаа үргүлчү ажыдып берип болур силер. Ынчан Иегова-биле найыралыңар улам-на күштелир (Иаков 4:8).

БУРГАН БИСТИ ДЫҢНААР КЫЛДЫР, ЧҮНҮ КАНЧААР УЖУРЛУГ БИС?

5. Иегова чамдык мөргүлдерни дыңнавайн турар деп кайыын билир бис?

⁵ Иегова шупту мөргүлдерни дыңнап турар бе? Чок. Исайя медээчиниң үезинде Иегова израильчилерге мынча дээн: «Чеже-даа хөй катап мөргүүрүңерге, Мен силерни дыңнавас мен. Холуңар ханда кончуу сүргей борашкан-дыр!» (Исайя 1:15). Иегованың көөр хөңнү чок ажыл-херектерден база Ооң-биле найыралывысты үрепки дег багай чүүлдерден ойталаар ужурлуг бис. Оон башка Ол бистиң мөргүлдеривисти дыңнавайн барып болур.

6. Бүзүрел мөргүл-биле кандыг харылзаалыгыл? Бүзүреп турарывысты канчаар көргүзер ужурлуг бис?

⁶ Бурган бистиң мөргүлдеривисти дыңназын деп күзээр болзувусса, Аңаа бүзүрээр ужурлуг бис (Марк 11:24). Ону Павел элчин мынчаар тайылбырлаан: «А бүзүрел чок болза, Бурганның сеткилинге кирери канчап болдунарыл? Бурганче чоокшулап кел чыдар кижи бүрүзү Ол бар деп база Олче чүткүп чоруур улуска Ооң шаңналы турар деп бүзүрээр ужурлуг болгай» (Еврейлерге 11:6). «Мен бүзүрээр мен» деп анаа-ла чугаалаары эвээш. Бүзүреп турарывысты бадыткаар ужурлуг бис. Канчаар? Бурганга кезээде дыңнангырывыс-биле. (Номчуптуңар: Иаков 2:26.)

7. а) Чүге биче сеткилдиг болгаш хүндүткелдиг мөргүүр ужурлуг бис? б) Шын-на сеткилинден мөргүүрү дээрге чүү дээни ол?

⁷ Бурганга биче сеткилдиг болгаш хүндүткелдиг мөргүүрү чугула. Чурттуң баштыңы-биле азы дарга кижи-биле аажок хүндүткелдиг чугаалажыр болгай бис. Иегова — Бүрүн Күчүлүг Бурган, ынчангаш Ол оон-даа улуг алдар-хүндүге төлептиг (Эге дөс 17:1; Ырлар 137:6). Оон ыңай Бурганга чүрээниң ханызындан, шын-на сеткилинден мөргүүр болза эки. Чаңгыс ол-ла сөстерни катап-катап чугаалаан ажыы чок (Матфей 6:7, 8).

8. Бургандан бир-ле чүүлдү мөргүп дилеп тургаш, бодувустуң талавыстан чүнү кылыр ужурлуг бис?

⁸ Бургандан бир-ле чүүлдү мөргүп дилеп турар болзувусса, бодувустуң талавыстан күжениишкиннер үндүрери чугула. Бурган дилээвиске дүүштүр алдынарывысты бистен манап турар. Чижээ, Иеговадан хүн бүрүнүң хереглелдери дээш сагыш човаарын мөргүп дилээн болзувусса, Ол биске шупту чүүлдү ол-ла дораан кылып бээр деп анаа-ла манап олурбас бис. Боттарывыс талавыстан кызымак болуп, кандыг-даа ажылдан чалданмайн, ажылдаар ужурлуг бис (Матфей 6:11; 2 Фессалоникчилерге 3:10). Азы кандыг-бир күткүлге-биле туржуп тургаш, Иеговадан бисти деткиир кылдыр дуза дилээн болзувусса, ол күткүлгеге алзыпкы дег байдалдардан боттарывыс дезер ужурлуг бис (Колосчуларга 3:5). Ынчангаш ам мөргүл дугайында чамдык айтырыгларга харыылаптаалыңар.

МӨРГҮЛ ДУГАЙЫНДА АЙТЫРЫГЛАР

9. Кымга мөргүүр ужурлуг бис? Иоанн 14:6-дан алырга, кымны таварыштыр мөргүүр ужурлуг бис?

⁹ Кымга мөргүүр ужурлуг бис? Иисус Христос өөреникчилерин «дээрде Адазынга» мөргүүр кылдыр өөредип чораан (Матфей 6:9). Оон ыңай ол мынча дээн: «Мен дээрге орук, алыс шын база амыдырал-дыр мен. Чүгле Мени таварты дээрден башка, кым-даа Адамга кээп шыдавас» (Иоанн 14:6). Моон көөрге, Иегова Бурганга мөргүүрде чүгле Ооң оглу Иисус Христосту таварыштыр мөргүүр ужурлуг бис. Иисус Христосту таварыштыр мөргүүрү дээрге чүү дээни ол? Ол дээрге Иегованың күзел-бодалының күүсеттинеринге Иисустуң тускай ролюн хүлээп көөрү-дүр. Ол бисти бачыт биле өлүмден хостаар дээш черже келген (Иоанн 3:16; Римчилерге 5:12). Оон аңгыда Иегова ону дээди бараалгакчы болгаш шииткекчи кылдыр томуйлаан (Иоанн 5:22; Еврейлерге 6:20).

10. Бурганга канчаар мөргүүр ужурлуг бис?

¹⁰ Канчаар мөргүүр ужурлуг бис? Олура, тура, дис кырынга болгаш кандыг-бир байдалга мөргүүрү албан деп Библияда биживээн. Эң-не кол чүүл — Иеговага хүндүткелдии-биле мөргүүрү-дүр (1 Чылдар 17:16; Неемия 8:6; Даниил 6:10; Марк 11:25). Сагыш-сеткиливисте чүнү бодап чоруурувус Иеговага дыка чугула. Каяа-даа, кандыг-даа үеде, иштивисте безин мөргүүрүвүске Иегова бисти дыңнап турар (Неемия 2:1—6).

11. Чүнүң дугайында мөргүп болур бис?

¹¹ Чүнүң дугайында мөргүп болур бис? Бурганның күзел-соруунга удурланышкак эвес-ле болза, чүнүң-даа дугайында мөргүп болур. «Ооң күзел-соруунга чүүлдештир кандыг-бир чүүлдү Оон мөргүп дилээр болзувусса, Ол бисти дыңнаар» деп Библияда бижээн (1 Иоанн 5:14). Кижи бодунга бир-ле чүүлдү Бургандан дилеп болур бе? Ийе. Иегова бисти чоок өңнүүвүске дег, сагыш-сеткиливисти Аңаа чугаалаарывысты күзеп турар. Бодалдарывысты болгаш сеткил-чүрээвисти ажыдып, ыятпайн мөргүп болур бис (Ырлар 61:9). Биске шын алдынарынга дузалаар кылдыр, Бургандан ыдыктыг сүлдени дилеп болур бис (Лука 11:13). Эки шиитпирни хүлээп алыр кылдыр мерген угаанны, а бергелерни ажып эртер дээш күштү дилеп болур (Иаков 1:5). Ол ышкаш бачыттарывысты өршээрин Иеговадан дилээри эргежок чугула (Эфесчилерге 1:3, 7). Оон аңгыда өскелер дээш, чижээ, бодунуң чоок улузу азы чыышта акы-угбалар дээш, база мөргүп болур (Ажыл-чорудулга 12:5; Колосчуларга 4:12).

12. Бирги ээлчегде чүнүң дугайында мөргүүр ужурлуг бис?

¹² Бирги ээлчегде чүнүң дугайында мөргүүр ужурлуг бис? Иегованың адының болгаш Ооң күзел-соруунуң дугайында. Ооң биске кылып чорууру бүгү чүүлдери дээш сеткиливис ханызындан четтиргенивисти илередир ужурлуг бис (1 Чылдар 29:10—13). Иисус черге турган үезинде өөреникчилеринге шак-ла ооң дугайында мөргүүрүн өөредип чораан. (Номчуптуңар: Матфей 6:9—13.) Иисус оларга бир дугаарында, Бурганның адын алдаржыдарын, ийиде, Бурганның Чагыргазының чедип кээрин база Иегованың күзел-соруу бүгү чер кырынга күүсеттинериниң дугайында мөргүүр кылдыр чагып чораан. Чүгле ооң соонда, амы-хууда бодунга бир-ле чүүлдү Бургандан дилеп болур. Бирги ээлчегде Иеговага хамааржыр чүүлдерниң дугайында мөргүүр болзувусса, Ооң-биле хамаарылгавыс биске эң-не чугула деп чүүлдү көргүзүп турар боор бис.

13. Кайы хире үр мөргүүр ужурлуг бис?

¹³ Кайы хире үр мөргүүр ужурлуг бис? Библияда ооң дугайында чүнү-даа биживээн. Шупту чүве байдалдан хамааржыр. Чем мурнунда кысказы-биле мөргүүр чадавас бис. А кажан Иеговага четтиргенивисти илередип азы дүвүрелдеривисти чугаалап турар болзувусса, мөргүлүвүс узай берип болур (1 Хааннар 1:12, 15). Ынчалза-даа өскелерниң мурнунга бүзүрели күштүг кижи бооп көстүр дээш, үр мөргээн херээ чок. Иисустуң үезинде база ындыг улус турган (Лука 20:46, 47). Шын эвес хөөннүг мөргүүр болза, Иегова дыңнавас. Бурган сеткил-чүрээвистиң ханызындан мөргүүрүвүстү күзеп турар.

14. Хүнде каш катап мөргүүр ужурлуг бис база чүге?

¹⁴ Хүнде каш катап мөргүүр ужурлуг бис? Иегова бисти, аргалыг-ла болза, үргүлчү мөргүүрүвүстү күзеп турар. Библия бисти «соксаал чок мөргүлдеңер», «мөргүлден черле салдынмаңар» деп кыйгырып турар (Матфей 26:41; Римчилерге 12:12; 1 Фессалоникчилерге 5:17). Чүге? Чүге дизе Иегова кезээде бисти дыңнаарынга белен. Хүннүң-не Бурганга Ооң ынакшылы болгаш беримчелии дээш четтиргенивисти илередип болур бис. Оон ыңай бисти удуртуп башкарарын, деткиирин база күштү бээрин дилеп болур бис. Шынап-ла, Иеговага мөргүүр аргавысты үнелээр болзувусса, Ооң-биле чугаалажыр үени черле тып алыр бис.

15. Мөргүл соонда чүге «аминь» дээрил?

¹⁵ Мөргүл соонда чүге «аминь» дээрил? «Аминь» деп сөс «шын» азы «ындыг-ла болзунам» дээн уткалыг. Мөргүл соонда «аминь» деп турарывыс-биле сөстеривисти шын-на сеткиливистен чугаалаанывысты бадыткап турарывыс ол (Ырлар 40:14). Ниити мөргүл соонда «аминь» дээривис, мөргүп турар кижиниң сөстери-биле чөпшээрежип турарывысты көргүзер. «Аминь» деп сөстү иштивисте азы ыыткыр чугаалап болур бис (1 Чылдар 16:36; 1 Коринфичилерге 14:16).

БУРГАН МӨРГҮЛДЕРГЕ КАНЧААР ХАРЫЫЛАП ТУРАР?

16. Иегова бистиң мөргүлдеривиске харыылап турар деп чүге чугаалап болур?

¹⁶ Иегова бистиң мөргүлдеривиске харыылап турар деп чүге чугаалап болурул? Чүге дээрге Библияда Ону «Мөргүлдү дыңнап турар Бурган» дээн (Ырлар 64:3). Иегова кижилерниң шын-на сеткилинден мөргээн мөргүлдерин дыңнап база харыылап турар.

17. Иегова мөргүлдерге канчаар харыылап турарыл? Чижектерден чугаалаңар.

¹⁷ Иегова мөргүлдерге харыылаарда, дээрниң төлээзин азы Бодунуң кайы-бир бараалгакчызын дуза кадар кылдыр чорудуп турар (Еврейлерге 1:13, 14). Библияны эки билип алыр дээш мөргүп олурган кижиге Иегованың Херечилери келген таварылгалар кайы хөй. Бо чүүл дээрниң төлээлериниң «буянныг медээни» бүгү чер кырынга тарадыр ажылда идепкейлиг киржип турарын көргүзүп турар. (Номчуптуңар: Ажыдыышкын 14:6.) Оон аңгыда Иегова биске ёзулуг дуза херек апарган үеде акы-угбаларны дузалаар кылдыр чорутканы-биле бистиң мөргүлдеривиске харыылап турар (Чугаалар 12:25; Иаков 2:16).

18. Иегова мөргүлдерге оон ыңай канчаар харыылап турарыл?

¹⁸ Бурган мөргүлдерге оон ыңай канчаар харыылап болурул? Кандыг-ла бир берге айтырыгны шиитпирлээринге удуртулга азы күш херек апарганда, Иегова биске ыдыктыг сүлдени берип болур (2 Коринфичилерге 4:7). А кажан бир-ле шиитпир хүлээр апарзывысса, Иегова биске Бодунуң Сөзүнден таарымчалыг бодалдарны тып алырынга дузалап болур. Канчалдыр? Библияны хууда номчуп орар үевисте бир-ле бодалче кичээнгейни салып болур бис. Иегова чыыш үезинде кым-бир кижиниң харыызын таварыштыр биске херек бодалды дамчыдып болур. Оон ыңай удуртукчуларның кайы-бирээзи Библиядан херек бодалды бистиң-биле үлежип болур (Галатчыларга 6:1).

19. Иегова бистиң мөргүлүвүске харыылавайн турар ышкаш болза, чүнүң дугайында сактыры чугула?

¹⁹ Чамдыкта Иегова бистиң мөргүлүвүске харыылавайн турар ышкаш кылдыр сагындырып болур. Иегова биске чүү херегин, кажан база канчаар бистиң дилээвиске харыылаарын Ол Боду билир деп утпаңар. Чамдыкта Бургандан катап-катап дилеп мөргүүр херек, чүгле ынчан Иегова бистиң дилээвисти шынап-ла чугула деп көрүп каар. Ынчаар ээрежип дилээнивис-биле Бурганның биске харыылап бээринге чигзинмейн турарывысты көргүзер бис (Лука 11:5—10). Чамдыкта мөргүлүвүстүң харыызы бистиң манап турганывыстан өске бооп болур. Чижээ, чуртталгавыста тургустунуп келген бергелерни шуут ап кааптарын Иеговадан дилээривиске, Ол ооң орнунга ону ажып эртер күштү берген. (Номчуптуңар: Исайя 40:28, 29.)

20. Иеговага чүге үргүлчү мөргүүр ужурлуг бис?

²⁰ Иеговага мөргүүр аргалыг болганывыс кандыг кончуг кайгамчык чоор! Иегова силерни дыңнап турар деп черле чигзинмеңер (Ырлар 144:18). Иеговага үргүлчү мөргүүр-ле болзувусса, Ооң-биле найыралывыс быжыгар.