Бот-боттарывысты чүге улам деткиир ужурлуг бис?

1. Павел элчин христианнарны улам күштүг деткижеринче чүге кыйгырган?

БИРГИ векте Павел элчин еврей христианнарга мындыг сүме берген: «Бот-боттарывыска сагыш човангыр бооп, ынакшылче база буянныг херектерже бот-боттарывысты ыдалап көрээлиңер. Чыглып, аралажырындан ойталаваалы (чамдык улус аңгыланып чаңчыга берген болгай), харын бот-боттарывысты деткип көрээли, сөөлгү хүннүң чоокшулап орарын көргеш, улам күштүг деткижээлиңер» (Евр. 10:24, 25). «Павел биске бот-боттарывысты улам күштүг деткижерин чүге сүмелээнил?» деп, олар бодап турган чадавас. Беш-ле чыл эрткенде чылдагааны билдине берген. Иерусалимде еврей христианнар Иегованың шииткел хүнү чоокшулаанын, ол ышкаш, Иисустуң айытканы ёзугаар, хоорайдан үнүп дезер ужурлуун билип кааннар (Аж.-ч. 2:19, 20; Лк. 21:20—22). Римчилер б. э. 70 чылда Иерусалимни узуткааны-биле Иегованың шииткелин күүсеткен.

2. Бот-боттарывысты деткиир дээш, чүге оон-даа артык күштү үндүрер болзувусса эки?

² Иегованың өндүр улуг болгаш аажок коргунчуг шииткел хүнү чоокшулаанынга бис база чигзинмейн турар бис (Иоил 2:11). Софония медээчи мынча дээн: «Дээрги-Чаяакчының өндүр улуг хүнү чоокшулап келген — далаштыг кел чыдар» (Соф. 1:14). Ол сөстер шупту кижилерге хамааржыр. Ынчангаш «бот-боттарывыска сагыш човангыр бооп, ынакшылче база буянныг херектерже бот-боттарывысты ыдалап көрээлиңер» деп сөстерге кичээнгейлиг болур ужурлуг бис (Евр. 10:24). Кады бүзүрээн ха-дуңмавыстың байдалын сонуургап, олар деткимчени хереглээн санында-ла, кичээнгей көргүзеринге белен боор болзувусса эки.

ДЕТКИМЧЕ КЫМГА ХЕРЕК?

3. Павел элчин деткимчеге хамаарыштыр чүнү бижээн? (Статьяның эгезинде чурукту көрүңер.)

³ Чугаалар 12:25-те: «Сагышсырал кижиниң чүрээн шагзырадыр, а эки сөс — хөгледир» — дээн. Шынап-ла, кымга-даа деткимче херек апаар. Өскелерни деткиир хүлээлгелиг улуска безин деткимче херек болу бээр деп, Павел онзалаан. Ол Римге христианнарга: «Сүлдеден келген кандыг-бир ачы-буянныг белекти силерге сөңнеп чедирер дээш база силерни ооң-биле быжыглаар дээш, шагдан бээр силерни көрүксеп келдим. Биригээр чугаалаарга, ниити бүзүреливис-биле: бодумну — силернии-биле, а силерни — бодумнуу-биле удур-дедир деткижеривис дээш, силерге ужуражыксадым» — деп бижээн (Рим. 1:11, 12). Павелге безин чамдыкта деткимче херек турган. (Римчилерге 15:30—32 номчувут.)

4, 5. Бистиң деткимчевис болгаш макталывыс кымга херек база чүге?

⁴ Бурганга чүткүлдүг бараалгап турар шупту улус макталга төлептиг. Долузу-биле бараалгаар дээш, хөй чүүлдерден ойталаан эгелекчилер оларның санынче кирип турар. Миссионерлер, кожуун хайгааракчылары болгаш оларның кадайлары, ол ышкаш салбырларның болгаш очулга офистериниң ажылдакчылары база хөй бараалгаар дээш, чуртталгазын өскертип алган. Ол дээш оларны чүге мактап болбас деп? Долу бараалгаар күзелдиг, ынчалза-даа ону кандыг-бир чылдагаан-биле уламчылап шыдавас акы-угбаларны мактаар болза, оларга өөрүнчүг болур.

⁵ Оон ыңай деткимче кымга херек? Чүгле «Дээрги-Чаяакчыга бүзүрээр» кижи-биле өг-бүле тудар айтыышкынны сагып чоруур бот акы-угбаларга (1 Кор. 7:39). Ашактары кадайларын кызымаккай ажылы дээш мактаарга, оларга кайы хире өөрүнчүг деп! (У.ч. 31:28, 31). Истеп сүрдүрүп азы аарып турар хирезинде, Бурганга шынчы артып турар улуска база деткимче дыка чугула (2 Фес. 1:3—5). Иегова болгаш Иисус ол шупту шынчы бараалгакчыларны аргалап турар. (2 Фессалоникчилерге 2:16, 17 номчуптуңар.)

УДУРТУКЧУЛАРГА ӨСКЕЛЕРНИ ДЕТКИИРИ ЧУГУЛА

6. Исайя 32:1, 2-ден алырга, удуртукчуларның ролю кандыгыл?

⁶ Исайя 32:1, 2-ни номчуптуңар. Бо нарын үеде Иисус Христос муңгараан улусту «чагырыкчылар», өскээр чугаалаарга, шилип чагдырган акылар биле өске хойлардан шынчы удуртукчулар таварыштыр сорук киирип турар. Олар хуралдың кежигүннериниң бүзүрелин башкарбайн, харын-даа акы-угбаларның өөрүшкүзү дээш «кады ажылдап» турар (2 Кор. 1:24).

7, 8. Удуртукчулар чыыштың кежигүннерин канчаар деткип болур?

⁷ Павел удуртукчуларга кайгамчыктыг үлегерни көргүскен. Истеп сүрдүрүп турган Фессалоникада христианнарга мындыг сөстерни ол бижээн: «Силерге ындыг күштүг ынак болгаш, чүгле Буянныг Медээни эвес, а амы-тынывысты силерге хүлээдип бээринге белен турдувус. Биске ол хире эргим болдуңар!» (1 Фес. 2:8).

⁸ Анаа чылыг сөстер чедишпес деп көргүзер дээш, Павел Эфесте удуртукчуларга чугаалаан: «Дээрги Иисустуң сөстерин сактып, кошкак улуска дузалажыр ужурлуг бис дээрзин силерге көргүзүп келген мен. Ол: „Алырынга көөрде, бээри — амыр-чыргалдыг“ — дээн болгай» (Аж.-ч. 20:35). Акы-угбаларны деткииринден аңгыда, Павел олар дээш бүгү чүүлдү чарыгдаарынга, бодун безин бүрүнү-биле бериптеринге белен турган (2 Кор. 12:15). Павелдиң үлегерин эдерип, удуртукчулар өскелерни чүгле сөстер-биле деткип, аргалаарындан аңгыда, ажыл-херээ-биле сагыш човаашкынын илередир ужурлуг (1 Кор. 14:3).

9. Удуртукчулар акывысты азы угбавысты деткивишаан, оларга канчаар сүме кадып болур?

⁹ Чамдыкта удуртукчулар акы-угбаларны деткиир дээш, оларга сүме кадар. Ындыг-даа болза, удуртукчулар сорук киирер кылдыр сүме кадып өөренир ужурлуг. Библияда Иисус Христостуң кайгамчык үлегери бар. Ол дирилгениниң соонда, Асияның кезек чыыштарынга шыңгыы сүме берген. Ол ону канчаар кылган? Эфесте, Пергамда болгаш Фиатирада чыыштарны эдип-чазаарының мурнунда ол оларны сеткилинден мактаан (Ажыд. 2:1—5, 12, 13, 18, 19). Лаодикияда чыыштарга ол: «Ынак улузумну чемелээш, кезедир мен. Ынчангаш чүткүлдүг болуңар база бачыттарыңар миннип, Бурганче эглиңер» — деп чугаалаан (Ажыд. 3:19). Удуртукчулар Христостуң үлегерин өттүнүп болур.

УДУРТУКЧУЛАРДАН АҢГЫДА КЫМНАР ДЕТКИП БОЛУР?

10. Бис шуптувус бот-боттарывысты канчаар деткижип болур бис?

¹⁰ Акы-угбаларны деткиир хүлээлге чүгле удуртукчуларда эвес. Павел шупту христианнарны «чүгле кандыг-даа байдалдарда улустуң хереглелдерин хандырарынга ажыктыг, дыңнакчыларга ачылыг сөстерни» чугаалаарын кыйгырган (Эф. 4:29). Кижи бүрүзү өскелерниң хереглелдерин эскерер болза эки. Павел еврей христианнарга: «Сула салдынган холдарыңар болгаш сирилээн дискектериңер быжыктырыңар. Аскак бут кадырлы бербезин, а эттинзин дээш, буттарыңар дорт орук-биле кылаштазын» — деп бижээн. Бистер өскелерниң «салдынган холдарын» болгаш «сирилээн дискектерин» быжыктырып болур бис (Евр. 12:12, 13). Бис шуптувус, бичии уруглар безин, бот-боттарывысты эки сөстер-биле деткижип болур бис.

11. Депрессия-биле аарып турган Марта кандыг дузаны алган?

¹¹ Депрессия-биле аарып турган Мартаa дээр угбавыс мынча деп бижээн: «Бир катап мени бир кижи деткээн болза деп мөргүп турган мен. Ол-ла хүн, душ бооп, улгады берген угбавыска таваржы бердим. Ол мээң ынчан хереглеп турганым чылыг-чымчак, кээргээчел хамаарылганы меңээ көргүскен. Шак ындыг чүүлдү ол боду чурттап эрткенин ол мээң-биле үлешкен соонда меңээ дыка чиик апарган». Ол улгады берген угбавыс Мартага ооң сөстери кайы хире салдарлыг болганын эскербээн чадавас.

12, 13. Филипчилерге 2:1—4-те сүмени канчаар ажыглап болур бис?

¹² Филиппыда христианнарга Павел мындыг сүме берген: «Христоска башкарткан амыдырал силерни канчаар-даа сорук киирер болза, Ооң ынакшылы силерге кандыг-даа аргалалды хайырлаар болза, Сүлде-биле кандыг-даа харылзаалыг болзуңарза, кандыг-даа энерел болгаш кээргээр сеткил силерде бар болза, мени мынчалдыр бүрүн аас-кежиктиг кылып каар силер: чаңгыс бодалдыг, чаңгыс ынакшылдыг болуңар, сеткил-сагыжыңар эвин кадып, чаңгыс эчис сорулгалыг болуңар. Чүгле кандыг-даа чүвени бот тогдунгаш база адыыргааш, кылбайн көрүңер. Харын томаарып, куду көрдүнгеш, өскелерни боттарыңардан өрү көрүңер. Силерниң кижи бүрүзү чүгле бодунуң эвес, а өскелерниң эрге-ажыының дугайында сагыш човаар ужурлуг» (Флп. 2:1—4).

¹³ Ийе, бис шуптувус акы-угбаларны сорук киирер дээш, оларны аргалап, оларның дугайында сагыш човап, «энерелди болгаш кээргээр сеткилди» көргүзүп болур бис.

ДЕТКИМЧЕНИ КАЙЫЫН АП БОЛУР?

14. Иегованың бараалгакчыларын чүү деткип болур?

¹⁴ Алыс шынны билип алырынга дузалаан улузувус Иеговага шынчы бараалгап турар хевээр деп дыңнааш, дыка өөрүүр бис. Иоанн элчин шак-ла ындыг минниишкиннерлиг турган. «Ажы-төлүм алыс шынның оруун эдерген деп билип аарындан артык өөрүшкү меңээ турбас!» — деп, ол бижээн (3 Ин. 4). Хөй эгелекчилерге Библияны кады өөренип турган улузу хөй чылдар дургузунда Бурганга шынчы артып, безин эгелекчи кылдыр бараалгап турарын дыңнаары дыка өөрүнчүг. Бир эвес муңгарай берген эгелекчиге ооң улуска кайы хире хөй буянныг херектер кылганын сагындырар болза, ол чүүл аңаа хей-аът киреринге дузалаар.

15. Бурганга шынчы бараалгап турар улусту канчаар деткип болур бис?

¹⁵ Чыыштарны кезип чорааш, оларга болгаш кадайларынга четтиргенин илереткен бичии открыткалар алыры безин дыка өөрүнчүг деп, элээн хөй кожуун хайгааракчылары үлешкен. Удуртукчуларга, миссионерлерге, эгелекчилерге болгаш вефилчилерге шынчы бараалгалы дээш мактал сөстерин дыңнаары база өөрүнчүг болур.

ШУПТУВУС ДЕТКИП БОЛУР БИС

16. Бир-ле кижини деткиир деп бодап турар болзувусса, чүнү кылып болур бис?

¹⁶ «Мен ышкаш чугаакыр эвес, пөрүк кижи кайыын улусту деткип шыдаар мен» деп бодап турар чадавас силер. Ынчаар бодаары шын эвес. Чүге дээрге силерниң чылыг хүлүмзүрүүңер безин кижини чазыктырып болур. А бир эвес кижи силерге удур хүлүмзүрбээн болза, ооң-биле бир-ле чүве болган, ынчангаш ол дуза хереглеп, аргалалды манап турар чадавас (Иак. 1:19).

17. Бир аныяк акывыс муңгарап турган үезинде кандыг дузаны алган?

¹⁷ Анри деп аныяк акывыс чоок улузу, ооң санында удуртукчу бооп бараалгап чораан ачазы, чыышты кааптарга, дыка муңгарап турган. Анриге дуза кадар дээш, кожуун хайгааракчызы ону кафеже чалааш, ону кичээнгейлиг дыңнаан. Бир эвес ол Иеговага боду шынчы артып каар болза, ол чоок улузунга чыышче эглиринге дузалап шыдаар деп, Анри билген. Оон аңгыда ол аргалалды 45-ки Ырдан, Софония 3:17-ден болгаш Марк 10:29, 30-ден ап турган.

18. а) Соломон хаан чүүже кичээнгейни салган? б) Павел элчин христианнарга кандыг сүмени берген?

¹⁸ Марта болгаш Анри-биле болган чүүлден чүнү өөренип ап болур бис? Аргалалды хереглеп турар акывыска азы угбавыска деткимчени кижи бүрүзү көргүзүп шыдаар. Соломон хаан: «Харыылаптар аас-сөзүң бар болза, өөрүнчүг-ле, чогуур үезинде сөглээн сөс эки-ле! Чырык көрүш чүректи өөртүр, эки медээ кижиниң ишти-хөңнүн быжыглаар» — деп бижээн (У.ч. 15:23, 30). Ундараан кижини деткиир дээш, дептерлеривистен бир-ле чүүлдү номчуп берип болур бис. Павелдиң сөстеринден алырга, Иеговага мактал ырларын кады ырлаар болза, ундараан кижини чазыктырып болур. Ол мынча деп бижээн: «Бот-боттарыңарны чедишкен мерген угаан-биле өөредип база сургап, а ол ышкаш сеткилиңер ханызындан өөрүп четтирип чорууруңар Бурганга ыдыктыг ырлар, йөрээлдер болгаш Сүлдеге хамааржыр ырлар ырлап шыдаар силер» (Кол. 3:16; Аж.-ч. 16:25).

19. Бот-боттарывысты деткижери чүге оон-даа артык чугула апарган база чүнү канчаар болзувусса эки?

¹⁹ Иегованың хүнү чоокшулаан тудум, бот-боттарывысты деткижери оон-даа артык чугула апарып турар (Евр. 10:25). «Ам ынчалдыр кылып турарыңар дег, бот-боттарыңарны моон-даа соңгаар аргалаңар база быжыглаңар» деп Павелдиң сүмезин күүседиилиңер (1 Фес. 5:11).