Удуртукчулар, Гедеоннуң чижээнден өөрениңер

1. 1 Пётр 5:2-ден алырга, хуралдың удуртукчуларынга кандыг чугула даалганы даасканыл?

ИЕГОВА хуралдың удуртукчуларынга ооң үнелиг хойларының дугайында сагыш човаарын дааскан. Ол акылар алган хүлээлгезин аажок үнелеп, сагыш човангыр кадарчылар боор дээш, шыдаар шаа-биле кызып чоруур (Иер. 23:4; номчуптуңар: 1 Пётр 5:2). Иеговага ол бүзүрелдиг акылар дээш өөрүп четтирер-дир бис!

2. Удуртукчулар кандыг бергелерге таваржып болур?

² Удуртукчулар хүлээлгелерин күүседип тура, хөй бергелерге таваржып турар. Чижээ, чыыш дээш сагыш човаарынга хөй күш херек. АКШ-тан То́ни дээр удуртукчу арга-шинээ кызыгаарлыг деп чүүлге өөренир ужурга таварышкан. Ол мынча дээн: «Кажан COVID-19 деп пандемия эгелей бээрге, чыышты болгаш суртаал ажылын удуртурунга хамаарыштыр хөй чаа айтырыглар тыптып келген. Мен хүлээлгелерни кыр-кырындан ап-ла турган мен. Ынчалза-даа канчаар-даа кызарымга, ажыл эвээжевээн. Түңнелинде Библияның номчулгазы, хууда шинчилелим база мөргүлдерим аскап эгелээн». Косоводан Или́р деп удуртукчу база бир бергеге таварышкан. Ол дайын болуп турар черде чурттап турда, организациявыстың айтыышкыннарынга дыңнангыр болуру аңаа берге турган. Ол мынча дээн: «Салбыр мени айыылдыг черлерде чурттап турар акы-угбаларга дузалаар кылдыр дилээн. Аңаа дидим чорук херек, а мен коргуп турган мен. Акыларның айтыышкыннары бодал чок, угаанныг эвес ышкаш сагындырар турган». Азияда бараалгап чоруур миссионер Тим чуртталганың дүшкүүрлүг темпизинге четтикпейн турган. «Чамдыкта мен, сы тудуп каан лимон-биле дөмей, могап шылап каар турган мен» — деп, ол үлешкен. Шак ындыг бергелерге таваржып турар удуртукчуларга чүү дузалап болур?

3. Гедеон шииткекчиниң үлегери биске шуптувуска чүге ажыктыг?

³ Гедеон шииткекчиниң үлегери удуртукчуларга ажыктыг боор (Евр. 6:12; 11:32). Ол Бурганның чонунуң камгалакчызы болгаш кадарчызы чораан (Башт. 2:16; 1 Чыл. 17:6). Бурунгу үеде Гедеон ышкаш, удуртукчулар амгы дүшкүүрлүг, берге үеде Бурганның чону дээш сагыш човаар даалгалыг (Аж.-ч. 20:28; 2 Тим. 3:1). Бис шупту Гедеондан хөй чүүлге өөренип ап болур бис. Ол хире-шаан миннип, дыңнангыр болуп, өрү көрдүнмес чораан. Даалгаларын күүседиринге аңаа туруштуг чорук база херек турган. Удуртукчу-даа, удуртукчу эвес-даа болзувусса, эргим кадарчы акыларывысты оон-даа артык үнелеп болур бис. Ол кызымаккай акыларывыска деткимче болуулуңар (Евр. 13:17).

ХИРЕ-ШААН МИННИРИНИҢ БОЛГАШ БИЧЕ СЕТКИЛДИҢ ШЕНЕЛДЕЗИ

4. Гедеон хире-шаан миннип, биче сеткилди канчаар көргүскен?

⁴ Гедеон биче сеткилдиг база хире-шаан миннир чораанb. Бир катап дээрниң төлээзи аңаа Иегова ону Бурганның чонун мадианнардан хостаар кылдыр шилип алган деп чугаалаан. Гедеон аңаа: «Мээң төрел бөлүүм Манассияның аймааның аразында эң чөгенчии-ле болгай, а мен бодум өг-бүлемниң эң бичиизи-ле болгай мен» — деп биче сеткилдиг харыылаан (Башт. 6:15). Ол бодун хостакчы кылдыр бодаваан, ынчалза-даа Иегова ону эки билир турган. Бурганның ачызында Гедеон даалгазын чедиишкинниг күүсеткен.

5. Кандыг таварылгаларда удуртукчуларга биче сеткилдиг бооп, хире-шаан миннири амыр эвес?

⁵ Удуртукчулар бүгү талазы-биле хире-шаан миннип, биче сеткилдиг боорун кызып турар (Мих. 6:8; Аж.-ч. 20:18, 19). Олар салым-чаяанын азы чедиишкиннерин хөөтпес, ол ышкаш чазыг бүрүзү дээш бодун буруудадып турбас. Ынчалза-даа чамдыкта оларга хире-шаан миннири база биче сеткилди илередири берге. Чижээ, удуртукчу акый элээн каш даалганы кылыптар мен деп бодап, ап алгаш, ону арай деп төндүр кылыр. База бир байдал: удуртукчуну кандыг-бир даалганы кылып турары дээш мактап азы шүгүмчүлеп болур. Ындыг таварылгаларда Гедеоннуң чижээ удуртукчуларга канчаар дузалаарыл?

6. Гедеоннуң чижээ удуртукчуларны чүге өөредип болур? (Ол ышкаш чурукту көрүңер.)

⁶ Дузадан дилеңер. Хире-шаан миннир кижи шупту чүвени шыдаар мен деп бодавас. Гедеон арга-шинээн билир болгаш, дуза дилээринден ыятпас турган (Башт. 6:27, 35; 7:24). Мерген угаанныг удуртукчулар база шак ынчаар алдынып турар. Кырында чугаалашканывыс Тони мынча дээн: «Меңээ кандыг-бир даалганы бээрге, чок деп шыдавас турган мен. Мени ынчаар кижизидип каан. Ынчангаш өг-бүле мөгейиишкининде хире-шаан миннириниң дугайында теманы ханы шинчилээр деп бодап алган мен. Оон ол шынарны кайы хире эки илередип турарымны хайгаарап көөрүн кадайымдан дилээн мен. Оон ыңай „Обучайте других, доверяйте им и передавайте полномочия, подражая Иисусу“ деп видеону сайтывыстан көрген мен». Тони чамдык даалгаларын өске акыларга берип эгелээн. Байдал канчаар өскерилген? Ол үлешкен: «Чыыштың ажылы эки чоруп турган, а мээң Иегова-биле найыралымны быжыктырар үем хөй апарган».

7. Удуртукчулар шүгүмчүлел дыңнааш, Гедеондан канчаар чижек ап болур? (Иаков 3:13).

⁷ Силерни шүгүмчүлеп турда, чылыг-чымчак харыылаңар. Удуртукчуларга шүгүмчүлел дыңнаары белен эвес. Ынчалза-даа олар Гедеоннуң чижээн өттүнүп болур. Ол чаңгыс эвес удаа частырыгларны кылып турганын билип турган. Ынчангаш эфремчилер ону шүгүмчүлеп эгелээрге, ол чылыг-чымчак харыылаан (Башт. 8:1—3). Гедеон хорадавайн, биче сеткилдии-биле оларны дыңнап, оожургаткан. Мерген угаанныг удуртукчулар Гедеонну өттүнүп турар. Олар шүгүмчүлелди кичээнгейлиг дыңнап, чылыг-чымчак харыылап турар. (Номчуптуңар: Иаков 3:13.) Шак ынчаар олар чыышка амыр-тайбыңны тургузуп турар.

8. Удуртукчулар макталды канчаар хүлээп алыр болза эки? Чижекти чугаалаңар.

⁸ Иегованы алдаржыдыңар. Мадианнарны удуп каапканы дээш, ону алгап-мактап эгелээрге, Гедеон кичээнгейни Иеговаже углаан (Башт. 8:22, 23). Удуртукчулар Гедеонну канчаар өттүнүп болур? Олар бир-ле чүүлдү дыка эки кылып турар болза, Иегованы алдаржыдар ужурлуг (1 Кор. 4:6, 7). Чижээ, удуртукчу акывыс өөредир арга-мергежили дээш мактадып болур. Ынчан удуртукчу: «Бис шуптувус өөредилгени Бурганның Сөзүнден болгаш ооң организациязындан ап турар болгай бис» деп харыылап болур. «Бодумче хөй кичээнгей салып турар мен бе?» деп, удуртукчу бодун өйлеп-өйлеп хынаар болза эки. Ти́мотиниң чижээн көрүптээлиңер. Чаа-ла удуртукчу апаргаш, ол хөй улус мурнунга илеткел чугаалаарынга ынак турган. Ол мынча дээн: «Мен нарын киирилделер болгаш чижектер чогаадып аар турган мен. Ол дээш улус мени аажок мактаар турган. Харааданчыг чүүл, мен ындыг илеткелдерим-биле кичээнгейни Иеговаже болгаш Библияже эвес, а бодумче хаара тудуп турган мен». Түңнелинде Тимоти кичээнгейни бодунче эвээш салыр дээш, илеткелдерниң аянын өскертип аар ужурлуун билип каан (У. ч. 27:21). Ол мынча деп уламчылаан: «Ам мээң чугаалаан илеткелдерим шенелделерни болгаш бергелерни ажып эртеринге азы Иегова-биле чоокшулаарынга канчаар дузалаанын акы-угбалар чугаалаар апарган. Салым-чаяаным дээш мактал дыңнаарының орнунга, ындыг үнелел дыңнаары меңээ улуг өөрүшкүнү эккеп турар».

ДЫҢНАНГЫР БОЛГАШ ЭРЕС-ДИДИМ ЧОРУКТУҢ ШЕНЕЛДЕЗИ

9. Гедеонга чүге дыңнангыр болгаш эрес-дидим чорук херек турган? (Журналдың даштында чурукту көрүңер.)

⁹ Гедеонну Израильдиң шииткекчизи кылдыр томуйлап каан соонда аңаа дыңнангыр болгаш эрес-дидим чорук херек турган. Ол ачазының Ваал бурганга тейлээр өргүл салыр бедигээжин буза шавар айыылдыг даалга алган (Башт. 6:25, 26). Оон Иегова аңаа аг-шерииниң санын ийи катап эвээжедир айтыышкын берген (Башт. 7:2—7). Төнчүзүнде ол дайзынче халдаар ужурлуг турган (Башт. 7:9—11)

10. Кандыг байдалдарда удуртукчуларга дыңнангыр болуру амыр эвес?

¹⁰ Хуралдың удуртукчулары дыңнангыр боор ужурлуг (Иак. 3:17). Дыңнангыр удуртукчу Библияда бижээн чүүлдү үргүлчү эдерип, Бурганның организациязының айтыышкыннарын күзелдии-биле күүседир. Ынчаар ол өскелерге эки үлегерни көргүзүп чоруур. Ынчалза-даа дыңнангыры берге апаар байдалдар тургустунуп болур. Чижээ, удуртукчу акывыс алган айтыышкыннарын күүседип четтикпейн барып болур. Азы чамдык айтыышкыннар аңаа ажык чок, бодал чок ышкаш сагындырар. Чок болза, хосталгазын чидирип ап болур даалганы ол алган чадавас. Удуртукчулар ындыг байдалдарда Гедеонну канчаар өттүнүп болур?

11. Удуртукчуларга дыңнангыр болурунга Гедеоннуң үлегери канчаар дузалап турарыл?

¹¹ Айтыышкыннарны кичээнгейлиг дыңнап, оларны эдериңер. Бурган Гедеонга ачазының өргүл салыр бедигээжин канчаар узуткаарын база чаа өргүл салыр бедигээшти каяа тударын, ол ышкаш аңаа кандыг дириг амытанны өргүлге эккээрин чугаалаан. Гедеон ол айтыышкыннарга удурланмайн, Бурганның айытканы ёзугаар кылган. Амгы үеде хуралдың удуртукчулары Иеговадан айтыышкыннарны чагаалар, чарлалдар болгаш аңгы-аңгы инструкциялар таварыштыр ап турар. Ооң ачызында Бурган-биле харылзаавыс быжыг артып, мага-бодувусту айыыл чок кылдыр миннип турар бис. Хуралдың удуртукчулары айтыышкыннарны кызымак күүседирге, оларны аажок үнелээр бис. Түңнелинде бүдүн чыыш сайзырап турар (Ыд. ыр. 118:112).

12. Организация чаа айтыышкыннар бээрге, удуртукчулар Еврейлерге 13:17-ни канчаар ажыглап болур?

¹² Өскерлиишкиннерге чаңчыгып өөрениңер. Иегованың айтыышкыны-биле Гедеон шерииниң санын 99 хуу ажыр эвээжеткенин сактыр бис (Башт. 7:8). Ол: «Таанда ону кылыры албан бе? Ынчаарга оларны канчаар удуп аар бис?» деп бодап болур турган. Ындыг-даа бол, Гедеон дыңнангыр болган. Амгы үеде удуртукчулар база Гедеонну өттүнүп, бир-ле чүүлдү өскээр кылыр дээн организацияның айтыышкыннарын дыңнангыр күүседип турар. (Номчуптуңар: Еврейлерге 13:17.) Чижээ, 2014 чылда Удуртукчу чөвүлел Хурал залдарын болгаш Шуулган залдарын тударынга хамаарыштыр хандырылганы өскертирин шиитпирлээн (2 Кор. 8:12—14). Чыыштар моон соңгаар чээли албас апарган. Ооң орнунга бүгү делегейде чыыштарның бар акша-төгериин ниити фондуже курлавырлап эгелээн. Ооң ачызында акша-төгерии чедишпес чыыштарга херек тудугларны тудар арга тыптып келген. Хосе́ ол айтыышкынны билип кааш, кезек чигзинип турган. «Мынчаар бис чаңгыс-даа Хурал залын тудуп шыдавас бис. Бистиң чурттап турар черивиске ол чүүл болдунмас» деп, ол бодап турган. Чаа айтыышкынны деткииринге Хосеге чүү дузалааныл? Ол үлешкен: «Чугаалар 3:5, 6-да сөстер Иеговага бүзүрээр болза эки деп меңээ сагындырган. Түңнели мээң манап турганымдан ушчок кайгамчык болган. Ам бис оон-даа көвей Хурал залдарын тудуп эгелээн бис. Ол айтыышкыннарның ачызында өргүлдеривис өске черлерде ха-дуңмавыска дузаны чедирип турар. А акша-төгериивис дең кылдыр чарыттынып турар».

13. а) Гедеон чүге бүзүреп турган? б) Удуртукчулар Гедеондан канчаар чижек ап болур? (Ол ышкаш чурукту көрүңер.)

¹³ Иегованың күзел-соруун эрес-дидим күүседиңер. Гедеоннуң алган айтыышкыны айыылдыг боорга, ол коргуп турган. Ынчалза-даа ол Иеговага дыңнангыр болган (Башт. 9:17). Бурган Гедеонну деткиир мен деп бүзүреткен. Ынчангаш Гедеон Бурганның чонун камгалап шыдаарынга долузу-биле бүзүреп турган. Бөгүн бистиң ажыл-чорудулгавысты чамдык чурттарда хоруп каан. Ында чурттап турар удуртукчулар Гедеоннуң чижээн өттүнүп турар. Олар хоругдаттырарындан, байысаадырындан, ажылын чидирип алырындан азы эттедип-соктурарындан-даа кортпайн, чыыштарны эрттирип, суртаал ажылын удуртуп, боттары аңаа идепкейлиг киржип турарc. Коргунчуг хилинчек үезинде удуртукчуларга алган айтыышкыннарын эдереринге эрес-дидим чорук херек боор. Ол айтыышкыннар долу дег медээни чарлаарынга, Магогтан Гогтуң халдаашкынындан канчаар камгаланырынга хамааржып болур (Иез. 38:18; Ажыд. 16:21).

ТУРУШТУГ ЧОРУКТУҢ ШЕНЕЛДЕЗИ

14. Гедеоннуң туруштуу канчаар шенеттингенил?

¹⁴ Гедеоннуң даалгазын күүседиринге хөй күжениишкиннер херек турган. Кажан мадианнар дүнеки тулчуушкун соонда дезиптерге, Гедеон оларны сүрүп чорупкан. Олар дайзыннарын Изреель шынаазындан Иордан хемге чедир сүрүп келген. А ол хемниң эриинге шыргай хараганнар өзүп турган (Башт. 7:22). Гедеон Иорданның чанынга доктаап турупкан бе? Чок! Ол 300 дайынчызы-биле шылап калган-даа болза, хемни кешкеш, дайзыннарын сүрерин уламчылаан. Түңнелинде олар мадианнарга чыпшыр четкеш, оларны кыра шаап каапкан (Башт. 8:4—12).

15. Хуралдың удуртукчузунуң туруштуу канчаар шенеттинип болур?

¹⁵ Чамдыкта удуртукчулар чыышта база өг-бүлезинде хөй хүлээлгелери дээш, чаза кара могап-шылап, сагыш-сеткили хоозурай берип болур. Ындыг байдалда Гедеоннуң чижээ оларга канчаар дузалап болурул?

16, 17. а) Гедеон даалгазын чүнүң ачызында күүседип шыдааныл? б) Удуртукчулар чүү чүвеге бүзүреп болур? (Исайя 40:28—31). (Ол ышкаш чурукту көрүңер.)

¹⁶ Иегова силерге күштү бээр деп бүзүреңер. Иегова күштү бээр деп, Гедеон бүзүреп турган. А ол ону чөгендирбээн (Башт. 6:14, 34). Гедеон шерии-биле мадиан хааннарны сүрүп турда, демгилери тевелерге олурупкаш, дезип бар чыткан. А израильчи шериглер оларны чадаг сүрүп чораан (Башт. 8:12, 21). Ындыг-даа болза, израильчилер Бурганның дузазы-биле дайзыннарынга четкеш, оларны кыра шаап кааннар. Амгы үеде удуртукчулар Иегова херек үеде оларга күштү бээр деп чигзинмес, чүге дизе, «Ол могавас, шаа төнмес» болгай. (Номчуптуңар: Исайя 40:28—31.)

¹⁷ Мэтью деп удуртукчу эмнелгелер-биле харылзажыр комитетте бараалгап турар. Даалгаларын эки күүседиринге аңаа чүү дузалап турарыл? Ол мынча деп үлешкен: «Филипчилерге 4:13-те сөстерниң ажыын херек кырында көрген мен. Аажок могап-шылап каан үемде Иеговага сеткилимден чаза мөргүүр чордум. Акы-угбаларны деткиир дээш, угаан-бодалым-даа, мага-бодум-даа шылавас кылдыр, күштү Иеговадан чаннып дилеп турдум. Ындыг үелерде Бурганның сүлдези мени сорук киирип, шупту чүүлге дузалажып турган деп миннип турдум». Чамдыкта чеже-даа берге апарза, удуртукчулар Гедеоннуң чижээн өттүнүп, Бурганның хойлары дээш сагыш човап турар. Олар боттарының күжү-биле ону кылып шыдавас бис деп миннир ужурлуг. Ынчалза-даа Иегова оларның шупту чүвени ажып эртер күштү болгаш дузаны дилээн мөргүлдерин дыңнап турар деп чигзинмейн барып болур (Ыд. ыр. 114:1; Флп. 2:13).

18. Гедеоннуң чижээ удуртукчуларга чүзү-биле ажыктыг?

¹⁸ Амгы үениң удуртукчуларынга Гедеоннуң чижээ дыка ажыктыг деп көрдүвүс. Кайы хире хөй хүлээлгелерни ап, шүгүмчүлелге азы макталга шын хамаарылгалыг болурунга биче сеткил болгаш хире-шаан миннири оларга дузалаар. Удуртукчуларга ылаңгыя бо делегейниң төнчүзү келген үеде дыңнангыр болгаш эрес-дидим болуру чугула. Оон аңгыда, бүгү ажыл-херээн Бурганның дузазы-биле күүседип шыдаар бис деп, олар бүзүрээр ужурлуг. Кызымак кадарчыларывысты үнелеп чоруулуңар! (Флп. 2:29).