«Сээң шының ёзугаар амыдыраар мен»

1—3. а) Алыс шынга кандыг хамаарылгалыг болур ужурлуг бис? Чижектен чугаалаңар. (Статьяның эгезинде чурукту көрүңер.) б) Бо статьяга кандыг айтырыгларны көөр бис?

УЛУС бараанны садып алгаш, чамдыкта дедир эгидиптер. А интернет-садыглардан барааннарны улус болганчок дедир дужаар. Садып алыкчылар бараанның шынары багай, күзээн чүүлү эвес боорга азы анаа-ла таарзынмайн баргаш, ону солудуп ап азы акшазын дедир эгидип ап турар.

² Алыс шын-биле ындыг чүүлдү кылырын кажан-даа күзевес бис. (Номчуптуңар: Чугаалар 23:23, Чаа делегейниң очулгазыa; 1 Тим. 2:4.) Эрткен статьядан алырга, алыс шынны садып алыр дээш, үевисти үндүрген бис. Оон аңгыда алыс шын дээш, чедиишкинниг карьерадан, Бурганга таарышпас бодалдардан, херектерден, ёзу-чаңчылдардан ойталаан бис, ол ышкаш эш-өөрүвүс болгаш төрелдеривис-биле хамаарылгавыс ооң мурнунда ышкаш эвес апарган. Ынчалза-даа бистиң ап турар йөрээлдеривис бо бүгүден оранчок үнелиг.

³ Алыс шынны билип алырывыска чүү болганын Иисустуң садыгжы кижи дугайында угаадыглыг чугаазы дыка эки көргүзүп турар. Ол садыгжы чараш ак шуру дилеп чорааш, эң үнелиг шуру тып алгаш, «бодунда бар шупту чүвени» садыпкан (Мф. 13:45, 46). Бис база ынчалган бис. Алыс шынны тып алгаш, ооң үнезин билип кааш, ону садып алыр дээш, чигзинмейн-даа, бар-ла чүүлүвүстү берипкен бис. Алыс шынны үнелээр болзувусса, канчап-даа ону сатпас бис. Хомуданчыг чүүл, Бурганның чамдык бараалгакчылары алыс шынны үнелевейн барган, а чамдыктары ону садыпкан. Бис оларга дөмей болуксавас бис. Ынчангаш «алыс шынның оруун» улаштыр эдерип, ону чуртталгавыска чугула деп санап, аңаа дүүштүр чурттаар ужурлуг бис. (Номчуптуңар: 3 Иоанн 2—4.) Кижи алыс шынны чүге «садыптарыл» база канчап ындыг чүүл болу бээрил? Ону канчаар болдурбазыл? Алыс шынга дүүштүр амыдыраарынга биске чүү дузалаар?

ЧАМДЫК УЛУС АЛЫС ШЫННЫ КАНЧААР БАЗА ЧҮГЕ «САДЫП» ТУРАРЫЛ?

4. Иисустуң чамдык өөреникчилери алыс шынны чүге садыпканыл?

⁴ Бирги векте чамдык улус алыс шынны хүлээп алгаш-даа, каапканнар. Бир чижекти көрээлиңер. Иисус дыка хөй улусту хуулгаазын арга-биле чемгерген соонда, олар Галилей далайның өске эриинче ону эдерип чорупканнар. Аңаа Иисус оларга мынча дээн: «Кижи амытан Оглунуң мага-бодун чивес база Ооң ханын ишпес болзуңарза, бодуңарда амыдырал чок болур». Олар Иисустан ол сөстерниң утказын айтырып алырының орнунга, мынча дээннер: «Кандыг кончуг берге өөредиг боор! Кым ону дыңнап шыдаарыл?» Түңнелинде «Иисустуң өөреникчилериниң хөй кезии Ону каапкан база Ооң-биле кады чорбас апарган» (Ин. 6:53—66).

5, 6. а) Амгы үеде чамдык улус алыс шындан чүге ойталап турарыл? б) Кижи алыс шынны канчаар чоорту кааптып болур?

⁵ Хомуданчыг чүүл, амгы үеде чамдык христианнар база алыс шынны каапканнар. Чамдыктары библейжи үзүндүнүң эде көрдүнген утказынга таарзынмаан, а өскелерин удуртукчу акывыстың чугаазы азы алдынганы хомудадыпкан. Бир кижи библейжи сүме алгаш, хомудай берген, а өскези чыышта акы-угбавыстың бирээзи-биле маргышкаш, алыс шынны каапкан. Иегованың Херечилериниң өөредиглерин шын эвес кылдыр көргүзүп турар удурланыкчыларга азы ойталакчыларга каттышкан улус база бар. Ынчангаш чамдык христианнар Иеговадан болгаш чыыштан боттары-ла хая көрнү бергеннер (Евр. 3:12—14). Олар Иисуска бүзүреп, Пётр элчин ышкаш, бүзүрелин быжыктырып турган болза, ындыг чүве болбас ийик. Кажан Иисус элчиннерден: «Силер база ойлап чоруурун күзевейн-дир силер бе?» — деп айтырарга, Пётр аңаа мынча деп харыылаан: «Дээрги, кымга баар улус бис? Мөңге амыдыралды бээр сөстер Силерде-дир» (Ин. 6:67—69).

⁶ Хемениң эриктен чоорту ырай бээри дег, чамдык улус боттары безин эки медереп билбейн, алыс шынны чоорту каапканнар. «Агым бисти өскээр алгаш барбазын дээш», Библия бисти оваарындырып турар (Евр. 2:1). Алыс шынны эки туразы-биле каапкан улуска бодаарга, ындыг кижи айыылдыг байдалын эки билбейн чоруур. Ол кижи Бурган-биле найыралын чоорту чидирип ап болур. Ындыг айыылдыг байдалче кирбес дизе, чүнү канчаарыл?

АЛЫС ШЫННЫ САТПАЗЫНГА БИСКЕ ЧҮҮ ДУЗАЛААР?

7. Алыс шынны сатпазынга биске кандыг хөөн дузалаар?

⁷ Алыс шынга дүүштүр амыдыраар дизе, Иегованың шупту чугаалап турар чүүлдерин хүлээп, Ону долузу-биле дыңнаары чугула. Чуртталгавыска алыс шынны эң кол черге салып, библейжи дүрүмнерни сагыыр ужурлуг бис. Давид хаан Иеговага мөргүп тургаш, мынча дээн: «Сээң шының ёзугаар амыдыраар мен» (Ыд.ыр. 85:11). Бис база шак ындыг шиитпирлиг хөөннүг болур ужурлуг бис. Оон башка алыс шын дээш берген өртекти хараадап, оода-ла чамдык кезиин дедир эгидип алырын бодай бээр бис. Алыс шынның кайы өөредии-биле чөпшээрежир-чөпшээрешпезин шиитпирлээр эргевис чок. Алыс шын дээш кандыг өртекти төлээнивисти чугаалажып көрээлиңер. Ол өртектиң чамдык кезиин дедир эгидип алыксаар күзелге алыспазынга бо сайгарылга дузалаар (Мф. 6:19).

8. Үезин шын эвес чарып турар христиан кижи алыс шындан канчап чоорту ырай берип болур? Чижекти чугаалаңар.

⁸ Үе. Алыс шынга дүүштүр чурттаар дээш, үени шын ажыглаар херек. Кичээнгейлиг болбас болзувусса, дыштанылгаже, хоббиже, интернетче, телевизор көөрүнче дыка хөй үе үнүп болур. Ында багай чүве чок-даа болза, Библияны хууда өөрениринче болгаш суртаалче үндүрүп турган үевисти ол херектер чип болур. Эмманыңb чижээн көрээлиңер. Бичиизинден тура ол аъттарга дыка ынак турган. Үези тыптып кээрге-ле, Эмма аът мунар турган. Дыка хөй үези ынаар үнүп турар боорга, ооң арын-нүүрү аарый берген. Ынчан Эмма дыштанылгаже чарып турар үезин эде көрген. Оон аңгыда родеогаc киржип турган Кори Уэллс угбавыстың чижээ аңаа дузалаан. Ам Эмма Бурганга чүткүлдүг бараалгап, Иеговага ынак төрелдери болгаш эштери-биле аралажыр үелиг апарган. Эмманың Бурган-биле найыралы оон-даа быжыга берген. Үезин шын ажыглап өөренип алганынга ол аажок өөрүп турар.

9. Акша-хөреңгиге хандыкшыл чуртталгавыска канчаар кол черни ээлей берип болур?

⁹ Акша-хөреңги. Алыс шынга дүүштүр амыдыраар дизе, акша-хөреңгиниң эмин эрттир чугула апаарын болдурбас ужурлуг бис. Алыс шынны билип алырывыска, чуртталгавыска кол чүүл акша-хөреңги эвес, а Бурганга бараалгал апарган. Ол дээш чамдык чүүлдерден ойталаан бис. Ынчалзажок чаа үнген электроннуг херекселдерни азы күзээн-не чүвезин өскелерниң садып ап турарын эскерип, «олардан дора мен бе» деп бодалдар тыптып болур. Өскелерден чыда калбас дээш, Бурганга бараалгалче чогуур кичээнгей салбайн, бар чүүлүвүске сеткиливис ханмайн барып болур. Шак ындыг чүүл Димас-биле болган. «Ол амгы бо делегейге хандыкшааш», Павел элчинни каапкан (2 Тим. 4:10). Аңаа акша-хөреңги чугула апарган, чок болза Павелдиң бараалгалынга Димастың дузалаар күзели чиде берген чадавас. Библияда ооң дугайында чүнү-даа биживээн. Ооң мурнунда акша-хөреңгиге хандыкшып чораан чадавас бис. Оваарымчалыг болбас болзувусса, ол хандыкшылывыс катап өөскүп, алыс шынга ынакшылывысты соодуп болур.

10. Алыс шынның оруу-биле чоруур дизивиссе, кымның салдарынга алыспас ужурлуг бис?

¹⁰ Эш-өөр болгаш төрелдер. Алыс шынның оруу-биле чоруур дизивиссе, Бурганга бараалгавайн турар улустуң салдарынга алыспас ужурлуг бис. Алыс шынны билип алырывыска, Иеговага бүзүревес эш-өөрүвүс болгаш төрелдеривис-биле хамаарылгавыс өскерилген. Чамдыызы бүзүреливисти хүндүлээр, а өскелери аажок удурланыр апарган (1 Пет. 4:4). Төрелдеривис-биле эки хамаарылгалыг болурун кызып, экииргек бооп, хүндүткелди көргүзүп чоруур бис. Ынчалза-даа, оларның сеткилинге кирер дээш, Иегованың негелделерин хажытпас бис. 1 Коринфичилерге 15:33-те сагындырыгны утпайн, чүгле Иеговага ынак улус-биле чоок аралажыр бис.

11. Мөзү-шынар чок бодалдардан болгаш херектерден ойталаарынга биске чүү дузалаар?

¹¹ Бурганга таарышпас бодалдар болгаш херектер. Алыс шынга дүүштүр амыдыраар улус ыдыктыг, азы арыг, боор ужурлуг (Номчуптуңар: 1 Пётр 1:14—16; Иса. 35:8). Алыс шынны билип алгаш, Библияның чөптүг-шынныг негелделеринге дүгжүр дээш, чуртталгавысты өскерткен бис. Чамдыывыс дыка улуг өскерлиишкиннер кылган. Алыс шынның арыг амыдыралын мөзүзү куду делегейниң хиринге канчап-даа орнавас дээш, оваарымчалыг болур ужурлуг бис. Мөзү-шынар чок чорукка алыспазынга чүү дузалаар? Бисти ыдыктыг болзун дээш, Иегова кайы хире улуг өртекти төлээнин бодап көрүңер даан! Ол ынак Оглу Иисус Христостуң үнелиг амы-тынын бис дээш берген (1 Пет. 1:18—19). Иегованың мурнунга арыг артар дизивиссе, Христостуң өргүлүн үнелеп, ону кажан-даа утпас ужурлуг бис.

12, 13. а) Байырлалдарга хамаарылгавыс чүге Иегованыы дег, болур ужурлуг? б) Ам чүнү сайгарар бис?

¹² Бурганга таарышпас ёзу-чаңчылдар. Төрелдеривис, кады ажылдап турар улузувус, чаңгысклассчыларывыс Иеговага таарымча чок байырлалдарны азы ёзу-чаңчылдарны сагыырын бистен негеп болур. Оларның салдарынга алыспазынга чүү дузалаар? Иегованың ол ёзу-чаңчылдарга чүге таарзынмайн турарын эки билип алыры чугула. Бо делегейде нептереңгей байырлалдарның дугайында дептерлеривисте чүү дээнин кызып шинчилээр болза эки. Оларны чүге эрттирбейн турарывыстың библейжи чылдагааннарының дугайында боданыр болзувусса, Бурганга таарымчалыг алдынып турарывыска чигзинмес бис (Эф. 5:10). Иеговага болгаш Ооң Сөзүнге бүзүреп турар болзувусса, улустан кортпас бис (У.ч. 29:25).

¹³ Алыс шынга дүүштүр кезээ-мөңгеде чурттаарын күзээр бис. Алыс шынның оруундан өскээр чорбазынга биске чүү дузалаар? Үш чүүлдү сайгарыптаалыңар.

АЛЫС ШЫНГА ДҮҮШТҮР АМЫДЫРААРЫНГА ЧҮҮ ДУЗАЛААР?

14. а) Библияны доктаамал шинчилеп тургаш, алыс шынны чүге кажан-даа сатпас бис? б) Мерген угаанны, сургаалды, угаан-сарыылды садып алыры чүге чугула?

¹⁴ Бирээде, Бурганның Сөзүн доктаамал шинчилеп, номчаан чүүлүңерниң дугайында ханы боданып, олче үени үндүрүңер. Ынчаар кылып тургаш, алыс шынга ынак апарып, ону кажан-даа кагбас силер. Чугаалар 23:23-тен алырга, алыс шындан аңгыда, «мерген угаанны, сургаалды, угаан-сарыылды» садып алыр ужурлуг бис. Чүгле алыс шынның дугайында билиглер чедишпес. Аңаа дүүштүр амыдыраар херек. Угаан-сарыыл Бурганның Сөзүнде шупту өөредиглерниң аразында харылзааны тодарадып алырынга дузалаар. Мерген угаан билиглерни амыдыралывыска ажыглаарынче деткип турар. А сургаал кошкак талаларывысты эскереринге дузалаар. Ынчангаш ындыг сургаалды кезээде тооп дыңнаалыңар, чүге дээрге ооң үнези мөңгүнден бедик (У.ч. 8:10).

15. Алыс шын бисти канчаар камгалап турарыл?

¹⁵ Ийиде, хүн бүрүде алыс шынга дүүштүр чурттаарын кызыңар. Библияда алыс шынны дайынчы кижиниң курунга дөмейлээн (Эф. 6:14). Кур ооң белин болгаш иштики органнарын камгалап турган. Дайынчы ону так куржанып алыр ужурлуг турган, оон башка ооң ажыы чок болур ийик. А алыс шын бисти канчаар камгалап турарыл? Библейжи алыс шынны «куржанып» аар болзувусса, ол бисти шын эвес бодалдардан камгалап, мерген угаанныг шиитпирлер хүлээринге, ол ышкаш шенелде азы күткүлге үезинде шын алдынар хөөннүг болурунга дузалаар. Чаңгыс-даа дайынчы кижи кур чокка тулчуушкунче үнмес ийик. Шак ынчаар бис база алыс шынны кажан-даа кагбас ужурлуг бис. Оон ыңай дайынчы кижи курунга хылышты астып аар турган. Ону канчаар кылып болурувусту көрээлиңер.

16. Улусту алыс шынга өөредип турарывыс аңаа дүүштүр чурттаарывыска канчаар дузалап турар?

¹⁶ Үште, улусту алыс шынга өөредир дээш, шыдаар шааңар-биле үени үндүрүңер. Ол чүүл силерге хылыш-биле деңнээн «Бурганның сөзүн» мергежилдиг ажыглаарынга дузалаар (Эф. 6:17). Бис шуптувус өөредир арга-мергежиливисти бедидип, «алыс шынныг медээни» шын дамчыдар ужурлуг бис (2 Тим. 2:15). Библияны ажыглавышаан, улусту алыс шынга өөредип, меге өөредиглерден ойталаарынга дузалаар болзувусса, Бурганның сөстери угаан-чүрээвиске таңмаланып артып калыр. Ынчан алыс шынга дүүштүр чурттаар күзеливис оон-даа күштүг апаар.

17. Алыс шынны чүге үнелеп турар силер?

¹⁷ Алыс шын дээрге Иегованың үнелиг белээ-дир. Ооң ачызында дээрде Адавыс-биле чоок хамаарылгалыг бооп болур бис. Иегова бисти дыка хөй чүүлдерге өөреткен-даа болза, ол дээрге чүгле эгези-дир. Ол бисти кезээ-мөңгеде өөредирин аазап турар. Ынчангаш алыс шынны, эң үнелиг ак шуру дег, үнелеңер. Ону кажан-даа сатпаңар. Ынчан силер, Давид ышкаш, Бурганга: «Сээң шының ёзугаар амыдыраар мен» дээн аазаашкыныңарны күүседип шыдаар силер (Ыд.ыр. 85:11).