Иегованы чүге алгап-мактаар ужурлуг бис?

1—3. а) 146 биле 147-ги ырлар кажан бижиттинген бооп чадавас? б) Ол ырлардан чүнү билип ап болур бис?

КАЖАН улус даалгаларын эки күүседирге азы эки шынарларны илередирге, оларны мактаар болгай бис. А Иегованы алгап-мактаар чылдагааннарывыс оон-даа хөй! Чижээ, Иегованы Ооң бүгү чаяалгаларында көстүп турар кызыгаар чок күчү-күжү дээш азы Бодунуң Оглун бис дээш бергени-биле өндүр улуг ынакшылды көргүскени дээш алгап-мактап болур бис.

² 146 биле 147-ги ырларның автору Иегованы алгап-мактап турган. Оон аңгыда ол ооң-биле кады Бурганны алгап-мактаарынче өскелерни база кыйгырган. (Ырлар 146:1, 7; 147:1 номчувут.)

³ Ол ырны кым бижээнин билбес бис. Ынчалза-даа ол ыр күүседикчизи Иегованың израильчилерни вавилон туттуруушкунундан Иерусалимче эгиткениниң үезинде чурттап чораан чадавас (Ыд. ыр. 146:2). Бурганның чону төрээн чуртунга катап Бурганга бараалгап болур аргалыг апарганынга өөрээш, ыр күүседикчизи Иегованы алгап-мактаан. Ынчалзажок ооң, ырже кииргени, Бурганны алгап-мактаар өске чылдагааннары база турган. А силерниң Иегованы алгап-мактаар кандыг чылдагааннарыңар барыл?

ИЕГОВА СЕТКИЛ-ХӨҢНҮ КАРАРГАН УЛУСТУ СЕГИДИП ТУРАР

4. Кир израильчилерни хостаптарга, олар чүнү миннингенил?

⁴ Вавилонда туттурган израильчилерниң чүнү миннип турганын бодап көрүңер даан. Вавилончулар оларны кыжырып: «Сионнуң ырлары-биле биске аян тудуңар!» — деп турганнар. Иерусалим ол үеде буурап калган турган, ынчангаш израильчилерниң өөрүүр чылдагааннары чок турган (Ыд. ыр. 136:1—3, 6). Олар ырлаар хамаанчок, муңгаралга алзып, аргалалды хереглеп турган. Оон Бурганның чугаалааны дег, оларны Персияның хааны Кир хостапкан. Вавилонну эжелеп алган соонда, ол мынча дээн: «Дээрги-Бурган-Чаяакчы меңээ... Иерусалим хоорайга Аңаа өргээ тударын дааскан. Ооң чонунга хамааржыр кым-даа бар болза — Бурганы Дээрги-Чаяакчы ооң-биле кады болзун! — ынаар чоруй барзын» (2 Чыл. 36:23). Кирниң үндүрген дужаалынга израильчилер дыка-ла өөрээн!

5. Иегованың бисти деткип турарынга хамаарыштыр ыр күүседикчизи чүнү бижээнил?

⁵ Иегова чонун чүгле ниитизи-биле эвес, а кижи бүрүзүн аргалаан. Иегова амгы үеде база ынчаар кылып турар. Бурганның дугайында ыр күүседикчизи: «Ол сеткил-хөңнү карарган улусту сегидип, оларның балыгларын шарып берип турар» — деп бижээн (Ыд. ыр. 146:3). Иегова могап шылаан, сагыш-сеткили ундараан улусту деткип турар. Ол бисти аргалаарынга болгаш сагыш-сеткиливистиң балыгларын экиртиринге белен (Ыд. ыр. 33:19; Иса. 57:15). Кандыг-даа бергелерни ажып эртер кылдыр, Иегова биске мерген угаанны болгаш күштү берип турар (Иак. 1:5).

6. Ырлар 146:4-те кандыг ажыктыг чүүл бар? (Статьяның эгезинде чурукту көрүңер.)

⁶ Оон ыр күүседикчизи дээрже кичээнгейни угландырып: «Ол [Иегова] сылдыстарның санын билип, оларның шуптузун аттары-биле адап турар» — деп чугаалаан (Ыд. ыр. 146:4). Ол сылдыстарны көрүп-даа турган болза, оларның санын билбес турган. Бөгүн кижилер оон-даа хөй сылдыстарны көрүп болур аргалыг. Чамдык эртемденнерниң саналы-биле алырга, бистиң Сылдыс Оруу деп галактикада миллиард-миллиард сылдыстар бар. А Октаргайда триллион-триллион галактикалар бар чадавас. Кижилер сылдыстарны санап шыдавас. Ынчалзажок Чаяакчы сылдыс бүрүзүн дыка эки билир болгаш, оларга аттарны тывыскан (1 Кор. 15:41). А кижилерни ол кайы хире эки билир? Иегова бо шакта сылдыс бүрүзүнүң кайда турарын безин билир болганда, Ол силерниң бо шакта кайда турарыңарны, чүнү миннип турарыңарны болгаш силерге чүү херегин дыка эки билир.

7, 8. а) Биске хамаарыштыр Иегова чүнү билип турарыл? б) Иегова тергиин эвес кижилерни кээргеп, оларга канчаар дузалап турарыл? Чижектен чугаалаңар.

⁷ Иегова силерни чүгле сонуургап турарындан аңгыда, силерни сеткилинден кээргеп турар, ол ышкаш Ол амыдыралдың шаптараазыннарын ажып эртеринге силерге дузалаар күчү-күштүг. (Ырлар 146:5 номчувут.) Сактырыңарга, байдалыңар дыка берге, ону ажып эртери болдунмас ышкаш бооп болур. Ынчалза-даа Бурган бистиң күш чедер шаавысты билип, «довурактан тывылганывысты бодап чоруур» (Ыд. ыр. 102:14). Бачыттыг болгаш, ол-ла частырыгларны катап-катап кылыптар бис. Чамдыкта чугаалаан чүүлүвүс дээш хараадап азы шын эвес күзээшкинивис тыптып кээрге, чок болза бир кижиге адааргай бергеш, ыяды бээр бис. Иегова ындыг чүүлдү Боду миннивээн-даа болза, Ооң бисти кайы хире эки билип турарын бодап безин шыдавас бис (Иса. 40:28).

⁸ Шенелдеге таварышкаш, Иегованың күчүлүг холунуң деткимчезин көрген таварылгалар чуртталгаңарга турган чадавас (Иса. 41:10, 13). Кёко дээр эгелекчи угбавыстың чижээн көрээлиңер. Өске девискээрде чыышче томуйлатканының соонда ол ундарап эгелээн. Иегова ооң бергелерин билип турарын канчаар көргүскенил? Чаа чыышка Кёко, ооң минниишкиннерин эки билип турган, хөй акы-угбалар-биле таныжып алган. Ынчан аңаа Иегова мынча деп турар ышкаш болган: «Мен сеңээ чүгле эгелекчи бооруңга эвес, а уруум бооруңга база чуртталгаңны меңээ бараалгаткан бооруңга ынак мен. Сени өөрүшкүлүг чурттазын деп күзеп тур мен, чүге дизе сен — мээң Херечим сен!» А силерниң байдалыңарга Бүрүн Күчүлүг Бурган силерни кымдан-даа артык эки билип турарын канчаар көргүскенил?

ИЕГОВА БИСТИҢ ХЕРЕГЛЕЛДЕРИВИС ДЭЭШ САГЫШ ЧОВАП ТУРАР

9, 10. Иегова биске бир дугаарында канчаар дузалап турар? Таварылгадан чугаалаңар.

⁹ Кижи бүрүзүнге аъш-чем, чурттаар оран-сава болгаш идик-хеп херек. Чамдыкта аъш-чем четчир болур бе деп, сагышсырап болур бис. Ынчалза-даа Иегова амылыг чүве бүрүзү тодуг-догаа чурттазын дээш, Черни элбек дүжүттү берип турар кылдыр чаяап каан. Безин чадаарда, Ол «кыйгы салып алгырган кускун төлдеринге аъш-чемни берип турар». (Ырлар 146:8, 9 номчувут.) Иегова кускуннар дээш безин сагыш човап турар болганда, Ол силерниң хереглелдериңерни хандырар дээрзинге бүзүреп болур силер (Ыд. ыр. 36:25).

¹⁰ Ынчалза-даа Иегова бир дугаарында бистиң бүзүреливисти быжыг болзун дээш сагыш човап, «улустуң угаап-билиптер шаандан ажа бээр Бурганның амыр-тайбыңын» берип турар (Флп. 4:6, 7). Япониядан Муцуо дээр акывыс-биле болгаш ооң кадайы-биле мындыг таварылга болган. 2011 чылда оларның чуртунга цунами (океанда аажок улуг чалгыг) болган. Ынчан олар Иегованың деткимчезин көргеннер. Олар бажыңының кырынче үне бергениниң ачызында дириг артканнар. Ынчалза-даа олар ол хүн барык шупту эт-хөреңгизин чидирип алган. Олар чартыы буступ калган бажыңының ийи дугаар каъдында соок, караңгы өрээлге дүннү эрттирген. Эртенинде олар сорук киириптер хире дептерни дилеп эгелээш, чүгле 2006 чылдың «Иегованың Херечилериниң чылдың үнер номун» тып алганнар. Муцуо номну ажыткаш, «Төөгүде эң-не өлүмнүг цунами» деп биче эгени дораан эскерип каан. Ында 2004 чылда Суматрага болган чер шимчээшкининиң дугайында бижээн болган. Ол чер шимчээшкини төөгүде бооп көрбээн цунамини тывылдырган. Ол коргунчуг бойдус халавын көрген ха-дуңманың чүнү ажып эрткенин номчааш, Муцуо кадайы-биле ыглап турган. Олар Иегованың чылыг-чымчак сагыш човаашкынын миннинген, чүге дээрге Ол оларга ол үеде херек турган деткимчени берген. Ол ышкаш Иегова оларга ха-дуңма таварыштыр материалдыг дузаны база каткан: Японияның өске девискээрлеринден ха-дуңма аъш-чемни болгаш идик-хепти оларга берген. Ынчалза-даа оларның чыыжынга салбыр комитединден акыларның келгени ылаңгыя өөрүнчүг болган. Муцуо чугаалаан: «Сактырымга, Иегова кижи бүрүзүнүң чанында туруп алган, сагыш човап, дузалап турар ышкаш болган. Ол чүүл биске аажок улуг аргалал болган!» Моон алырга, Иегова баштай бүзүреливисти быжыглап турар, а ооң соонда материалдыг хереглелдеривис дээш сагыш човап турар.

ИЕГОВА СИЛЕРНИ ДЕТКИИРИНГЕ БЕЛЕН

11. Иегованың дузазын алыксаан улустан чүү негеттинип турарыл?

¹¹ Иегова биче сеткилдиглерге болчурунга болгаш оларны деткииринге кезээде белен (Ыд. ыр. 146:6а). Ынчалза-даа бистен чүү негеттинип турар? Бис Ооң-биле чоок хамаарылганы кадагалаар ужурлуг бис. А ону кылырынга биче сеткил херек (Соф. 2:3). Биче сеткилдиг улус, Бурган чөптүг чорукту тургускаш, оларга чедирген хораны ап кагбаан шаанда, шыдамык манаарлар. Иегова биче сеткилдиг улусту көргеш, аажок өөрүп турар.

12, 13. а) Бурганның дузазын алыр дизивиссе, чүүден ойталаар ужурлуг бис? б) Иегованы кандыг кижилер өөртүп турарыл?

¹² Ынчалза-даа өске талазында Иегова «бузуттуг улусту черге чедир куду базып турар» (Ыд. ыр. 146:6б). Бистиң-биле ындыг чүүл болурун күзевейн турар бис! Иегова биске бердинген ынакшылын көргүзер кылдыр, Ооң көөр хөңнү чок чүүлдеринге, чижээ, самыыраар чорукка көөр хөңнүвүс чок боор ужурлуг бис (Ыд. ыр. 96:10). Ындыг болур дизивиссе, бисти бачытче чыгаптар бүгү чүведен, ооң санында порнографиядан, ойталаар ужурлуг бис (Ыд. ыр. 118:37; Мф. 5:28). Ол демисел аажок берге бооп болур, ынчалзажок Иегованың йөрээлдерин чедип алыр дээш, бар күжүвүстү үндүрер болзувусса эки.

¹³ Бо демиселге бодувуска эвес, а Иеговага идегээр ужурлуг бис. Бир эвес кижилерниң ынанып турар чүүлдеринге ынанып, олардан камгалал дилээр болзувусса азы камгалал бодувустан, чок болза өскелерден хамааржыр ышкаш кылдыр хөделир болзувусса, Иегова аңаа таарзынар бе? Ырлар 146:10-да Бурганның дугайында мынча дээн: «Дээрги-Чаяакчы аъттың күш-шыдалын херекке албас; кижиниң буттарының дүргени Аңаа хамаан чок». Бис Иеговадан дузаны дилээр ужурлуг бис. Кижилерге бодаарга, Иегова, Оон дузаны катап-катап дилээр-даа болзувусса, кажан-даа дилеглеривисти дыңнаарындан бужурганмас. Иегованың сеткилинге «Оон коргар, Ооң энерелинге идегээр улус» кирер (Ыд. ыр. 146:11). Иегова биске Бодунуң бердинген ынакшылын көргүзер деп, чигзинмейн барып болур бис. Ол бисти кагбас база шын эвес күзелдеривисти ажып эртеринге дузалаар.

14. Ыр күүседикчизи чүү чүвеге быжыг бүзүреп турганыл?

¹⁴ Иегова чонун аар-берге байдалда черле кагбас деп бүзүрээр шупту үндезиннер бисте бар. Иерусалимни катап тудуп турганының дугайында ыр күүседикчизи мынчаар бижээн: «Дээрги-Чаяакчы сээң хаалгаларыңның дээктерин быжыглап, чурттакчы чонуңга ачы-буян хайырлап турар; сээң кызыгаарларың иштинге тайбыңны догуннадып... турар» (Ыд. ыр. 147:2, 3). Бараалгакчыларын камгалаар дээш, Бурган хоорайның хаалгазын быжыглаар деп бодал ыр күүседикчизин аажок оожуктурган!

15—17. а) Бергелерге таварышкаш, чамдыкта бодувусту канчаар миннип турар бис, ынчалза-даа Иегова бисти Бодунуң Сөзүн таварыштыр канчаар деткип турарыл? б) Иегованың Сөзү канчаар «дүргени кончуг» күүсеттинип турарыл? Чижектен чугаалаңар.

¹⁵ Чамдыкта бергелер дээш амыр-дыш чок каар бис. Ындыг-даа болза Иегова оларны ажып эртиптер кылдыр, биске мерген угаанны берип болур. Иегова «Бодунуң айтыышкынын черже чорудуп бээрге, Ооң сөзү дүргени кончуг күүсеттинер», Ол «харны чада салыр... хырааны черже тө чажар... дош-долузун черже... октап бадырар» деп 147-ги ырның автору бижээн. Оон ыр күүседикчизи: «Ооң соогун шыдажыр кижи бар бе?» деп айтыргаш, Иегова «Бодунуң сөзүн чорудупкаш, ол бүгүнү эргизиптер» деп немээн (Ыд. ыр. 147:4—7). Долу биле харны чагырып шыдаар, мерген угаанныг, Бүрүн Күчүлүг Бурганывыс биске кандыг-даа бергелерни ажып эртеринге дузалап шыдаар.

¹⁶ Бөгүн Иегова бисти Бодунуң Сөзү, Библияны, таварыштыр уштап-баштап турар. Иегованың Сөзү «дүргени кончуг» канчаар күүсеттинип турарыл? Ол бичии-даа саадал чокка биске херек удуртулганы берип турар. Чижээ, Библияның номчулгазы, «шынчы болгаш сарыылдыг чалчаның» дептерлерин өөренири, организациявыстың интернет-курлавырларында материалдарны көөрү, удуртукчуларның дузазы болгаш ха-дуңмавыс-биле аралажыры биске кайы хире улуг дузаны чедирип турарын боданып көрүңер (Мф. 24:45). Херек үеде Иегованың силерге «дүргени кончуг» удуртулга бергенин сактып кээп болур силер бе?

¹⁷ Симон дээр угбавыс Бурганның Сөзүнүң күштүг салдарын бодунуң чуртталгазынга көрген. Ол бодун аажок чөгенчиг кижи кылдыр миннип, Бурганны өөртүп турарынга чигзинип чораан. Аажок бергедей берген үелеринде ол соксаал чок мөргүп, Иеговадан дузаны чаннып-дилеп турган. Оон аңгыда Симон Библияны кызымаккай шинчилеп турган. Ол Иегованың дугайында мынча деп турар: «Бурганның деткимчезин миннивээним, ол ышкаш Ооң удуртулгазын көрбээним таварылгалар меңээ чаңгыс-даа турбаан». Ол бүгү аңаа эки хөөннү чидирбезинге дузалап турар.

18. Иегова силерни үнелеп турар деп, чүге бүзүреп турар силер? Иегованы алгап-мактаар кандыг чылдагааннар силерде барыл?

¹⁸ Бурган Бодунуң чонунга тускай хамаарылгалыг турган деп, ыр күүседикчизи билир турган. Ол Бурганның Сөзүн болгаш «дүрүм-хоойлузун» алган кара чаңгыс чон турган. (Ырлар 147:8, 9 номчувут.) Бөгүн чүгле Иегованың Херечилеринге Бурганның адын эдилээр алдар-хүндүнү бүзүреткен. Иегованы билиривистиң ачызында, ол ышкаш Ооң Сөзүнден сүмелерни амыдыралывыска ажыглап турарывыстың ачызында Ооң чоок өңнүктери бооп турар бис. 146 биле 147-ги ырларның авторунуң ышкаш, Иегованы алгап-мактаар чылдагааннар бисте хөй.