«Кортпа, чүге дээрге Мен — сээң Бурганың-дыр мен»

1, 2. а) Исайя 41:10-да сөстер Ёсико угбавысты канчаар деткээнил? б) Ол сөстер кымга бижиттингенил?

БУРГАНГА шынчы Ёсико дээр угбавыс коргунчуг медээ дыңнаан. Эмчи аңаа: «Чүгле каш ай чурттаарыңар арткан» — дээрге, ол канчалганыл? Ёсико дораан ынак шүлүүн сактып келген: «Кортпа, чүге дээрге Мен — сээң Бурганың-дыр мен, сүрээдеве, чүге дээрге Мен сээң-биле кады мен. Сени быжыктырып, сеңээ дузалаар мен. Мээң тиилелгелиг холум сеңээ деткимче көргүзер» (Иса. 41:10). Ол бичии-даа дүвүревейн, эмчизинге: «Иегова мени холумдан тудуп алган, ынчангаш чүүден-даа кортпас мен» — деп чугаалаанb. Ол шүлүктүң сөстери эргим угбавысты оожургадып, Иеговага бүрүнү-биле ынанырынга дузалаан. Бо-ла сөстер биске коргунчуг шенелделер үезинде оожургалдыг болурунга база дузалаар. Канчаар? Ону билип алыр дээш, Иегова Исайяга ол сөстерни чүү дээш бижидип кааныл, сайгарыптаалыңар.

² Бурган баштай бо сөстерни Вавилоннуң кулданыынче удавас туттуруп аппаар иудейлерни аргалаар дээш чугаалаан. Иегова ол сөстерни чүгле оларга эвес, а шупту бараалгакчыларынга ажыктыг боор кылдыр арттырып каан (Иса. 40:8; Рим. 15:4). Бис кажангызындан-даа артык «аар-берге үелерде» чурттап чоруур болганывыста, Исайяның номунда деткимче биске дыка херек (2Тим. 3:1).

3. а) 2019 чылдың шүлүүнде, Исайя 41:10-да, кандыг бүзүредиглер барыл? б) Ол аазаашкыннарга быжыг бүзүрелди сайзырадыры чүге чугула?

³ Исайя 41:10-да Иегованың үш бүзүредиинc бо статьяга сайгарар бис: 1) Иегова бистиң-биле кады боор; 2) Ол — бистиң Бурганывыс; 3) Ол биске дузалаар. Бо аазаашкыннарга быжыг бүзүрелди сайзырадыры чугула, чүге дээрге, Ёсико ышкаш, шенелделерге таваржып турар бис. Оон аңгыда делегейде байдалдың ужундан тывылган бергелерни база ажып эртип чоруур бис. А чамдыывысты эрге-чагыргалыг улус истеп сүрүп турар. Ам ол бүзүредиглерни чаңгыстап сайгарып көрээлиңер.

«МЕН СЭЭҢ-БИЛЕ КАДЫ МЕН»

4. а) Эгезинде кандыг бүзүредигни сайгарып көөр бис? (Немелде тайылбырны көрүңер.) б) Иегова биске минниишкиннерин канчаар илередип турарыл? в) Бурганның силерге ынакшылын көргеш, чүнү миннир-дир силер?

⁴ «Сүрээдеве, чүге дээрге Мен сээң-биле кады мен»d — деп, Иегова бисти бүзүредип турар. Ол бистиң-биле кады деп канчаар көргүзүп турарыл? Бурган биске дыка ынак болгаш хууда кичээнгейни көргүзүп чоруур. Иегова сеткилиниң ханызындан чылыг-чымчак минниишкиннерин биске канчаар илередип турарын эскерип көрүңер даан: «Сен Меңээ улуг үнелиг болгаш эргим болганыңда, сеңээ Мен ынак [мен]» (Иса. 43:4). Иегованың бараалгакчыларынга ынакшылын кым-даа, чүү-даа соодуп шыдавас. Ол биске чайгылыш чок бердинген (Иса. 54:10). Иегованың ынакшылы болгаш Ооң-биле найырал биске эрес-дидим болурунга дузалап чоруур. Амгы үеде Ол бисти, Бодунуң өңнүү Аврамны (Авраамны) ышкаш, камгалап турар. Иегова аңаа мынча дээн: «Кортпа, Аврам. Мен — сээң дозуг-камгалалың-дыр мен» (Э.д. 15:1).

5, 6. а) Бергелерни ажып эртеринге Иегова биске дузалаар деп кайыын билир бис? б) Ёсиконуң чижээ бисти чүү чүвеге өөредип турарыл?

⁵ Иегова биске бергелерни ажып эртеринге дузалаар деп билир бис. «Суглар кежип туруңда, Мен сээң-биле боор мен, хемнер кежип туруңда, суг сени хөме албас. От өттүр эртип тургаш, өрттенмес сен, чалбыыш сени чивес» — деп, Ол чонунга аазаан (Иса. 43:2). Бо сөстерниң утказы кандыгыл?

⁶ Чуртталгавысты нарыыдадып турар бергелерниң шуптузун чайладыптарын Иегова аазавайн турар. Ынчалза-даа шенелделер, шапкын хем дег, бисти хөме алырын база, от дег, биске эттинмес хора чедирерин Ол болдурбас. Ындыг берге үелерде Иегова бистиң-биле кады боорун аазап турар. Амы-тынывыс айыылга турда безин, коргушка алыспайн, Аңаа шынчы артарынга Ол биске дузалаар (Иса. 41:13). Бо чүүлдүң шынныын Ёсико көрген. Ооң уруу мынчаар үлешкен: «Авам дүвүревес боорга, аажок кайгаан бис. Шынап-ла, Иегова ооң сагыш-сеткилинге оожургалды берген. Авам сөөлүнге чедир медсестраларга-даа, чыдар улуска-даа Иегованың болгаш Ооң аазаашкыннарының дугайында чугаалап келген». Ёсиконуң чижээ бисти чүү чүвеге өөредип турарыл? Иегова бистиң-биле кады болур деп бүзүрээр болзувусса, чүнү-даа туруштуг, эрес-дидим ажып эртиптер бис.

«СЭЭҢ БУРГАНЫҢ-ДЫР МЕН»

7, 8. а) Иегова чонунга оон ыңай кандыг бүзүредигни бергенил база ооң утказы кандыгыл? б) Вавилончулар еврей чонну кулданыгже тудуп аппаарының мурнунда, Иегова оларга чүге «кортпа» дээнил? в) Бурганның чонунга дүвүревезинге Исайя 46:3, 4-те кандыг сөстер дузалааныл?

⁷ «Кортпа, чүге дээрге Мен — сээң Бурганың-дыр мен» деп Иегованың бүзүредиин сайгарыптаалыңар. Ол чүү дээни ол? Библияның эң баштайгы бижээн дылында «кортпа» деп сөс «айыылга таваржырындан коргуп-девидеп, хая көрнүр» азы «айыылга таваржы бергеш, кортканындан долгандыр көөр» дээн уткалыг.

⁸ Вавилонче еврей чонну 70 чыл ишти кулданыгже тудуп аппаарының мурнунда Иегова оларга чүге «кортпа» дээнил? 70 чыл эртерге, Мидия биле Персияның күштүг аг-шерии Вавилонну эжелеп алыр турган. Ынчангаш Вавилоннуң чурттакчылары корга бээр деп, Иегова билген. Ынчалдыр чонун кулданыгдан Ол хостаар деп турган (Иса. 41:2—4). Вавилончулар болгаш өске язы-сөөктүг улус дайзынның чоокшулап келгенин билип кааш, бот-боттарын: «Эрес-дидим бол!» деп деткижерин кысканнар. Олар камгалал алырын идегеп, оон-даа хөй дүрзү-бурганнарны кылып эгелээн (Иса. 41:5—7). А кулданыгда израильчилер Иегованың: «О, Мээң чалчам Израиль... Кортпа, чүге дээрге Мен — сээң Бурганың-дыр мен» дээн сөстерин сактып, дүвүревээннер (Иса. 41:8—10). Иегова «Сээң Бурганың-дыр мен» дээни-биле бердинген бараалгакчыларын утпаан дээрзинге бүзүреткен. Ол ам-даа оларның Бурганы, а олар — Ооң чону турган. Иегова оларга: «Силерни Мен... чүктеп... камгалаар мен» — дээн. Бо оожургалдыг сөстер туттуруушкунга турган еврейлерни дыка-ла сорук киирген. (Номчуптуңар: Исайя 46:3, 4.)

9, 10. Чүге кортпас ужурлуг бис? Чижектен чугаалаңар.

⁹ Делегейде байдалдың кажангызындан-даа артык баксырап турары улусту дүвүредип турар. Бис база бергелерге таваржып чоруур-даа болзувусса, корткан херээвис чок. Иегова биске «Сээң Бурганың-дыр мен» — дээн болгай. Бо сөстер чүге бисти оожургадып турарыл?

¹⁰ Чижектен көрээлиңер. Буян биле Орлан дээр ийи пассажирниң ужуп бар чыткан самолёду хенертен күштүг хатка таваржы берген. «Ремениңер шарыттынып алыңар. Самолётту ам силгиир» деп чарлаптарга, Буян девидеп эгелээн. База бир чарлал дыңналган: «Экипажтың командири-дир мен. Шупту чүве эки, кортпаңар». Буян тургаш: «Канчап кортпас чүвел?» — деп кайгап чугаалаан. Ужудукчунуң сөстери ону оожургатпаан. Орланның бичии-даа дүвүрел чогун көргеш, Буян: «Көңгүс кортпас-тыр силер бе?» — деп айтырарга, оозу хүлүмзүрүп, мынча дээн: «Чок, бо ужудукчу — мээң ачам-дыр. Силерге ооң дугайында бичии чугаалап бээйн. Ону улуг дуржулгалыг ужудукчу деп билип кааш, кортпайн баар силер».

11. Көрген чижээвис бисти чүге өөредип турарыл?

¹¹ Ол чижек бисти чүге өөредип турарыл? Бис дээрде Адавысты, Иегованы, эки билир болгаш, Орлан ышкаш, кортпас бис. Бо делегейниң сөөлгү хүннеринде таваржып турарывыс, хат-шуурган дег, бергелерни ажып эртеринге Бурган дузалаар дээрзинге бүзүрээр бис (Иса. 35:4). Бурганны билбес улус коргушка алзып турда, бис Иеговага ынанып, оожургалды миннип чоруур бис (Иса. 30:15). Орланга оон ыңай чүвүс дөмей? Бурганга чүге бүзүреп болурун долгандыр улуска тайылбырлап чоруур бис. Иегова кандыг-даа берге байдалда деткиптер дээрзинге олар база шынзыгып болур.

«СЕНИ БЫЖЫКТЫРЫП, СЕҢЭЭ ДУЗАЛААР МЕН»

12. а) Ам кандыг бүзүредигни сайгарып көөр бис? б) «Чагырга Ооң холунда-дыр» дээн сөстер чүнү көргүзүп турар?

¹² «Сени быжыктырып, сеңээ дузалаар мен» — дээн Иегованың үшкү бүзүредиин сайгарыптаалыңар. Бурган чонун канчаар быжыктырарын Исайя 40:10-да-ла тайылбырлаан турган: «Күчү-күштүг Дээрги-Бурган-Чаяакчы кел чыдыр. Чагырга Ооң холунда-дыр». Библияда «хол» деп сөс күштү болганчок илередир. Ынчап кээрге, «Чагырга Ооң холунда-дыр» дээн сөстер Иегованы күчү-күштүг Хаан деп көргүзүп турар. Ол кызыгаар чок күштүг болгаш, бурунгу үеде бараалгакчыларын деткип, камгалап чораан. Бөгүн база Аңаа идегээр улусту Ол быжыктырып, камгалап чоруур (Ы.х.к. 1:30, 31; Иса. 43:10).

13. а) Иегова бисти ылаңгыя кандыг таварылгада быжыктырарынга белен? б) Иегованың кандыг сөстери бисти быжыктырып, сорук киирип турарыл?

¹³ Иегова бисти ылаңгыя истеп сүрүүшкүннерге таварышканывыста быжыктырып турар. Чамдык чурттарда дайзыннарывыс суртаал ажылын соксадыр дээш азы организациявысты хоруур дээш, чүнү-даа кылырынга белен. Ынчалза-даа кортпас бис, чүге дизе Иегова: «Сенче углаан кандыг-даа ок-чепсек тиилелгеге чедирбес» — дээн болгай (Иса. 54:17). Бо сөстер бисти быжыктырып, сорук киирип турар. Оон үш чугула түңнелди үндүрүп болур.

14. Бурганның дайзыннары бисче халдаарга, чүге кайгавас бис?

¹⁴ Бирээде, Христостуң талалакчылары болганывыста, улус бисти көрбес боор деп билир бис (Мф. 10:22). Өөреникчилерин сөөлгү хүннерде каржызы-биле истеп сүрер дээрзин Иисус баш удур чугаалаан (Мф. 24:9; Ин. 15:20). Ийиде, дайзыннар бисти көөр хөңнү чок боорундан аңгыда, биске удур янзы-бүрү «ок-чепсектерни» ажыглаар деп, Исайяның өттүр билген медеглели сагындырып турар. Чижээ, олар бистиң дугайывыста кажар мегени тарадып, ажыы-биле нүгүлдеп, безин дерзии истеп сүрүп турар (Мф. 5:11). Биске удур дайынга ол «ок-чепсекти» ажыглаарынга Иегова оларга шаптыктавас (Эф. 6:12; Ажыд. 12:17). Ынчалза-даа оон кортпас ужурлуг бис. Чүге?

15, 16. а) Дайзыннарывыстың кандыг-даа ок-чепсээ тиилелгеге чедирбес деп сактыры чүге чугула база Исайя 25:4, 5-те ооң дугайында чүү дээнил? б) Исайя 41:11, 12-ден алырга, биске удур улусту чүү манап турарыл?

¹⁵ Үште, Иегованың сөстеринден алырга, дайзыннарывыстың биске удур ажыглап турар «кандыг-даа ок-чепсээ тиилелгеге чедирбес». Иегова, «чайык-чаъстан чаглак-хоргадал» дег, бисти дайзыннарывыстың «тыныжындан» камгалап турар. (Номчуптуңар: Исайя 25:4, 5.) Олар биске эттинмес хораны кажан-даа чедирип шыдавас (Иса. 65:17).

¹⁶ Оон ыңай Иегова бүзүреливисти канчаар быжыктырып турарыл? Бисче «килеңнээн бүгү улусту» чүү манап турарын Ол тодаргай көргүскен. (Номчуптуңар: Исайя 41:11, 12.) Дайзыннарывыс бисти тиилеп алыр дээш канчаар-даа кызарга, түңнели билдингир: Бурганның чонунуң удурланыкчылары «чүү-даа эвес апаар, өлүп чидер».

ИЕГОВАГА БҮЗҮРЕЛИН КАНЧААР БЫЖЫКТЫРАРЫЛ?

17, 18. а) Иеговага бүрүнү-биле бүзүрээринге Библияны номчууру канчаар дузалаар? Чижектен чугаалаңар. б) 2019 чылдың шүлүүнүң дугайында ханы боданыры биске чүге ажыктыгыл?

¹⁷ Иеговага бүрүнү-биле ынаныр дизе, Ону эки билип алыр херек. Аңаа Библияны кичээнгейлиг номчууру база ооң дугайында ханы боданыры дузалаар. Эрткен үеде Иегова чонун канчаар камгалап чораанын Библияда бижээн. Ол бистиң дугайывыста база сагыш човаар деп, бо чүүл бүзүредип турар.

¹⁸ Исайя медээчи Бурганның бисти канчаар камгалап турарын көргүзер дээш, чүрекке дээштиг, кайгамчык чижекти чугаалаан. Ол Иегованы «кадарчы» кылдыр, а бараалгакчыларын «хураганнар» кылдыр көргүскен. «Хураганнарны холунга тудуп, кужактап ал[ыр]» деп Бурганның дугайында медээчи чугаалаан (Иса. 40:11). Иегова бисти күштүг холдары-биле дыңзыг куспактап алган чоруур деп номчааш, бодувусту айыыл чок кылдыр миннир-дир бис. Бисти бергелерге торулбайн, оожургалдыг болзун дээш, шынчы болгаш сарыылдыг чалча Исайя 41:10-да: «Кортпа, чүге дээрге Мен — сээң Бурганың-дыр мен» дээн сөстерни 2019 чылдың шүлүү кылдыр шилээн. Мооң дугайында ханы боданыңар. Шенелделер үезинде ол сөстер силерни оожуктуруп, сорук киирер.