«Ол могап турупкан улусту күштүг кылып каар»

1. Кандыг бергелерге таваржып турар бис база Иегова бараалгакчыларының Аңаа шынчы артып чоруурунга чүге өөрүп турар? (Статьяның эгезинде чурукту көрүңер.)

АМЫДЫРАЛ-ЧУРТТАЛГА берге деп кым-даа билир. Эргим ха-дуңма, силерниң кайыңар-даа хууда бергелерлиг. Чамдыывыс аар аарыглар-биле тулчуп чоруур. А чамдыывыс боттары улгады берген-даа болза, чөнүй берген төрелдерин ажаап чоруур. Оон аңгыда өг-бүлезиниң оода-ла хырны тодуг, идик-хептиг чорзун дээш чилчиин үзүлдүр ажылдап чоруур ха-дуңмавыс-даа бар. А хөй акы-угбалар бо бергелерни хары угда ажып эртер ужурга таваржып турар! Ындыг демисел хөй акша болгаш үе чип, кижиниң ырымазын сыгар. Ынчалза-даа, чеже-даа берге болза, силер Бурганның аазаашкыннарынга чигзинмейн, аас-кежиктиг келир үеге идегеп чоруур силер. Ол чүүл Иегованы аажок өөртүп турар!

2. Бисти Исайя 40:29-та сөстер канчаар быжыглап турар база кандыг шын эвес көрүштен ойталаар ужурлуг бис?

² Амыдырал-чуртталганың бергелери дээш аажок могап турупканыңарны эскерип турар болзуңарза, силер чааскаан эвес силер. Бурунгу үеде база Бурганның бараалгакчылары аар-бергелер дээш өйлеп-өйлеп ундарап турган (3 Хаан. 19:4; Иов 7:7). Ынчалзажок олар дүжүп бербейн, Иеговадан деткимчени дилеп турган. Бурган оларны чөгендирбээн, чүге дизе «Ол могап турупкан улусту күштүг кылып» турар (Иса. 40:29). Харааданчыг чүүл, бистиң үевисте Бурганның чамдык бараалгакчылары амыдыралдың бергелерин ажып эртер дээш, «алыс шындан дыштанып алыр» деп шиитпирлээн. Сактырга, христиан болуру дыка хилинчектиг чүве ышкаш. Ол акы-угбалар Бурганның Сөзүн номчуурун, чыыштарже баарын болгаш суртаалдаарын соксаткан. Олар Эрликти дыка-ла амыраткан!

3. а) Эрлик бисти күш чок болдурбас кылдыр, чүнү кылыры чугула? б) Бо статьяга чүнү сайгарар бис?

³ Бараалгалга идепкейлиг болзувусса, ол чүүл бисти күш киирер. Эрлик ону билир болгаш, бисти күштүг болзун деп күзевейн турар. Ынчангаш могап-шылап, сеткилиңер хоозурай берген үеде Иеговадан черле ыраваңар. Харын Олче чоокшулаңар, ынчан Ол «күштү болгаш шыдамык чорукту силерге бээр» (1 Пет. 5:10; Иак. 4:8). Бо статьяга бараалгаар чүткүлүвүстү өжүрүп болур ийи бергени сайгаргаш, оларны ажып эртеринге кандыг библейжи дүрүмнер дузалаарын көөр бис. А эгезинде Иегованың бисти канчаар күш киирип болурунуң дугайында Исайя 40:26—31-де чүү дээнин көрээлиңер.

«ДЭЭРГИ-ЧАЯАКЧЫГА ИДЕГЭЭР УЛУС ЧАА КҮШ КИРИП АЛЫР»

4. Исайя 40:26-да сөстерден чүнү өөренип ап турар бис?

⁴ Исайя 40:26-ны номчуптуңар. Октаргайда шупту сылдыстарны кым-даа санап шыдавас. Эртемденнерниң саналы-биле алырга, чүгле Сылдыс Оруу деп галактикавыста безин 400 миллиард хире сылдыс бар. Иегова сылдыс бүрүзүнге ат тыпсып каан. Оон чүнү өөренип ап турар бис? Бурган амы чок чаяалгаларга безин ол хире кичээнгейлиг болганда, силерге Ооң кайы хире ынаан бодап көрүңер даан! Чүге дизе силер албадал-биле эвес, а Аңаа ынак болгаш, бараалгап турар болгай силер (Ыд.ыр. 18:2, 4, 15). Дээрде Адавыс бистиң дугайывыста шупту чүвени билир. Матфей 10:30-де: «Бажывыстың дүгүн безин санап каан болдур ийин!» — дээн. А Ырлар 36:18-те: «Дээрги-Чаяакчы кем-буруу чок улустуң амыдыраар хүннерин билир» — деп бижээн. Оон алырга, Иегова кандыг бергелер-биле демисежип турарывысты көрүп турар база оларны ажып эртеринге херек күштү биске бээр деп көскү.

5. Иегова биске күштү берип шыдаар деп чүге чигзинмес бис?

⁵ Исайя 40:28-ти номчуптуңар. Иегова — аажок улуг күштүң үнер дөзү. Чижээ, Хүн кайы хире хөй энергияны үндүрүп турар? Эртем номнарының автору Дэвид Боданистиң сөстери-биле алырга, Хүн секунда санында-ла, миллиард-миллиард атомнуг бомбаларның частыышкынынга дең энергияны үндүрүп турар. А өске эртемденниң шинчилелдери-биле алырга, «Хүн бир секундада кижилерге 200000 хире чыл иштинде чедер энергияны үндүрүп турар»! Хүннү «кыпсыпкан» Бурган биске кандыг-даа бергени ажып эртеринге херек күштү берип шыдавас деп бе?

6. Иисустуң хомуду чиик деп чүге чугаалап болур? Ону билип турарывыс бисче кандыг салдар чедирер ужурлуг?

⁶ Исайя 40:29-ту номчуптуңар. Иеговага бараалгал бисти аас-кежиктиг кылып турар. Иисус өөреникчилеринге: «Мээң чагыгларымны бодуңарга хомут дег ке[дип алыңар]... [...] Чүге дээрге Мээң чагыгларым хомуду чиик база Мээң чүдүртүр чүъгүм аар эвес» — дээн (Мф. 11:28—30). Ол шынап-ла ындыг! Чамдыкта чыышче азы суртаалче баар күжүвүс чок боор, ынчалза-даа кандыг чанып кээр ийик бис? Өөрүшкүлүг болгаш бергелерни улаштыр ажып эртер хөөннүг, күш кире берген боор бис. Шынап-ла, Иисустуң хомуду чиик!

7. Матфей 11:28—30-де Иисустуң сөстерин бадыткап турар таварылганы чугаалаңар.

⁷ Бир угбавыс, Кейла дижик, үргүлчү шагзыраар аарыгдан аарып турар. Ол депрессиядан болгаш баш аарыындан үргүлчү хилинчектенип турар. Ынчангаш чыыштарже баары аңаа чамдыкта ёзулуг шенелде апаар. Ынчалза-даа ол бодун база катап албадапкаш, Хурал залынче барган соонда мынчаар бижээн: «Ундарал дугайында илеткел болуп турган. Илеткелчи аажок чылыг-чымчак, сагыш човангыр кылдыр чугаалаарга, караам чажын тудуп шыдаваан мен. Христиан ужуражылгалар меңээ эргежок чугула деп база катап билдим». Кейла ынаар баар күштү тып алганынга аажок өөрээн!

8, 9. «Кошкак тургаш, ылап-ла күштүг мен» дээн Павелдиң сөстери кандыг уткалыг?

⁸ Исайя 40:30-ни номчуптуңар. Кандыг-даа салым-чаяанныг болзувусса, күш-шыдалывыс кызыгаарлыг дээрзин сактыр ужурлуг бис. Ону Павел элчин бодунга көрген: ол салым-чаяанныг турган-даа болза, бодунуң күзээни дег, хөй чүвени кылып шыдавас турган. Кажан ол ооң дугайында Бурганга чугаалаарга, Ол: «Сээң кошкааң дамчыштыр Мээң күжүм илерээр» — дээн. Павел ол кичээлди эки шиңгээдип алган. Ол: «Кошкак тургаш, ылап-ла күштүг мен» — деп түңнээн (2 Кор. 12:7—10). Ол сөстерниң утказы кандыгыл?

⁹ Павел бодунуң күжүн кызыгаарлыг деп билип турган. Хөйнү кылырынга аңаа өрүтен күш херек турган. Павел шылап эгелээрге, ону Бурганның ыдыктыг сүлдези күш киирип турган. Бодунуң күжүнге бодаарга, ол күш-биле Павел анаада кылып шыдавас чүүлдерин кылып шыдап турган. Бистиң дугайывыста база ынча деп болур. Иегова ыдыктыг сүлдезин биске бээрге, ёзулуг күштүг апарып турар бис!

10. Иегова Давидке бергелерни ажып эртеринге канчаар дузалап турганыл?

¹⁰ Ыр күүседикчизи Давид Бурганның ыдыктыг сүлдезиниң күжүн чуртталгазынга чаңгыс удаа эвес көрген. Ол: «Сээң ачыңда аг-шеригни базып каар мен, Бурганым ачызында шивээлер ханаларын ажа халыыр мен» — деп бижээн (Ыд.ыр. 17:30). Ажа халып шыдавазывыс, «ханалар» дег, бергелер турар. Ындыг таварылгаларда Иегованың дузазы чокка шыдавас бис.

11. Ыдыктыг сүлде бергелерни ажып эртеринге канчаар дузалап турар?

¹¹ Исайя 40:31-ни номчуптуңар. Эзирлер чалгыннарын херипкеш, ырак-узак черлерже безин ужуп чеде бээр. Ынчалза-даа олар бодунуң күжү-биле эвес, а өрү көдүрлүп турар чылыг агаарның агымын ажыглап, шак шагы-биле дээрге ужуп турар. Шак ынчаар олар шоолуг күш үндүрбес. Кажан силерге берге даалга дагзырга, эзирлерниң дугайында сактып келиңер. «Чалгыннарыңарны херип-чайып, ужар» дээш, Иеговадан ыдыктыг сүлдени дилеңер (Ин. 14:26). Ону 24 шак иштинде, дүне-хүндүс-даа дивейн, дилеп болур бис. Ылаңгыя акы-угбаларывыстың бирээзи-биле билишпейн барган болзувусса, Бурганның дузазы биске дыка херек. Ындыг чөрүлдээлер чүү дээш тургустунуп болур?

12, 13. а) Чүге чамдыкта акы-угбаларның аразында чөрүлдээлер тыптып болурул? б) Иосиф-биле болган таварылгадан Иегованың дугайында чүнү билип ап турар бис?

¹² Шупту тергиин эвес болганывыста, бот-боттарывысты билишпейн барып болур бис. Чамдыкта кады бүзүрээн ха-дуңмавыстың сөстери бисти бужургандырып болур азы боттарывыс-даа оларны хомудадып болур бис. Ол чүүл биске ёзулуг шенелде бооп болур. Ынчалзажок акы-угбаларывыстың четпес талалары турза-даа, оларның-биле тайбың болурун кызып чоруур бис, чүге дизе Бурган оларга база ынак. Ол дээрге Бурганга бердингенивисти көргүзер арга-дыр.

¹³ Иегова бараалгакчыларын шенелделерден хоставайн турар деп Иосифтиң чижээнден көскү. Ол элээди турда, ооң чаңгыс ададан төрээн акылары ону Египетче кул кылдыр садыпкан (Э.д. 37:28). Иеговага ооң өңнүү Иосифти кайы хире багай аажылаанын көөрү аарышкылыг турган. Ынчалза-даа Бурган ол байдалче киришпээн. Кажан Иосифти Потифарның кадайын күштээр деп турганынга меге буруудаткаш, кара-бажыңче октаптарга, Иегова ынчан база киришпээн. Ынчаарга Бурган Иосифти каапканы ол бе? Чок! Библияда: «Дээрги-Чаяакчы Иосиф-биле кады... турган» — дээн (Э.д. 39:21—23).

14. Кылыктанырга чүге багай?

¹⁴ База бир эки үлегерниң бирээзи — Давид-тир. Ол дыка багай хамаарылганы бодунга көрген. Ындыг шенелдеге таварышкан улус ховар боор. Ынчалзажок Давид Бурган-биле чоок хамаарылгалыг турган болгаш, ооң сеткилинге хомудал турумчуй бээрин болдурбаан. Ол мынча деп бижээн: «Килеңнээриң соксат, калчаарааже ажынма, бузут үүлгедиринге чедир хорадава» (Ыд.ыр. 36:8). Чүге килеңнээрин күзевес бис? Кол чылдагаан — Иегованы өттүнүксеп турар бис. Ол «бисти бачыттарывыс ёзугаар» кезетпейн турар болгай (Ыд.ыр. 102:10). Оон аңгыда оожум аажы-чаң кадыкка эки. Чижээ, кылыктыг кижиниң хан базыышкыны улгадыр азы тыныш органнарының аарыы тыптып болур. Ол ышкаш кылыктаныр чаң чем хайылдырылгазын баксырадып, баарга болгаш бестиг баарзыкка хора чедирип болур. Кылык боданырынга шаптыктап турар. Бичии када безин кылыктаныптар болзувусса, үр үе иштинде хөөнүвүс баксырап калган чоруп турар боор бис. А Библияда: «Сеткил дыштыгда, мага-бот кадык» — дээн (У.ч. 14:30). Силерни улус хомудадыр болза, канчаарыл? Хомудадыкчы-биле канчаар эптежип алырыл? Аңаа хамаарыштыр Библия биске эң-не эки сүмелерни берген.

ЧЫЫШТАН БИР КИЖИ БИСТИ ХОМУДАДЫПКАН БОЛЗА

15, 16. Чыыштан бир кижи бисти хомудадыпкан болза, чүнү канчап болур?

¹⁵ Эфесчилерге 4:26-ны номчуптуңар. Иеговага бараалгавайн турар улустуң талазындан кадыг-дошкун хамаарылганы көргеш, кайгавас бис. Ынчалзажок чоок киживистиң азы кады бүзүрээн ха-дуңмавыстың кайы-бирээзиниң аарышкылыг сөзүн азы кылган чүвезин дыка үр уттуп чадап туруп бээр бис. Ындыг таварылгада хомудал шыгжап чоруп бээр бис бе, безин чадаарда хөй чылдар дургузунда? Азы библейжи сүмени эдерип, эптежиринче далажыр бис бе? Бергени шиитпирлээрин соңгаарлаткан тудум, тайбыңны катап тургузары берге апаар.

¹⁶ Чижээ, чыыштан бир кижи силерни хомудадыпкан, а силер ону анаа арттырып шыдавас дижик силер. Эптежип алыр дээш, чүнү канчап болур? Эгезинде силерни дүвүредип турар чүүлдү Иеговага ажыдып, сеткилиңерни тө каап бериңер. Хомудадыкчы-биле эптиг-чымчак чугаалажыр дээш, Оон дузадан дилеңер. Иегова аңаа ынак, ол ышкаш Ол — ооң өңнүү деп утпаңар (Ыд.ыр. 24:14). Иегова өңнүктеринге чылыг-чымчак, буянныг хамаарылгалыг, ынчангаш Ол ону бистен база манап турар (У.ч. 15:23; Мф. 7:12; Кол. 4:6). Оон чүнү чугаалаарын эки боданып алыңар. Кады бүзүрээн акыңар азы угбаңар силерни өжегээр хомудадыпкан деп бодаваңар. Анаа билишпейн барган чадавас силер. Болган чүүлге силерниң бурууңар база бар чадавас деп утпаңар. Чугааны мынчаар эгелеп ап болур силер: «Хамык чүвени хөлүн эрттир чоок хүлээп ап турар чадавас мен. Дүүн чугаалашканывыс соонда бодаарымга...» Дораан эптежири болдунмаан болза, дүжүп бербеңер. Ол кижиниң эки шынарларынче кичээнгей салырынга Иегова силерге дузалаар кылдыр база Ол ону йөрээр кылдыр мөргүңер. Түңнели кандыг-даа боор болза, силерниң эптежир дээш кызып турарыңарны Иегова көргеш, өөрүп турар.

ООҢ МУРНУНДАГЫ ЧАСТЫРЫГЛАРЫҢАР СЕТКИЛИҢЕРНИ ӨЙҮП ЧОРУУР БОЛЗА

17. Аар бачыт кылган улуска Иегова канчаар дузалап турар база Ооң дузазын хүлээп алыры чүге чугула?

¹⁷ Чамдык аар бачыт кылган христианнар Иеговага бараалгаарынга моон соңгаар төлеп чок апарган мен деп бодаар. Ындыг байдалда буруузунар, ыядыр минниишкиннер кижиниң сагыжын амыратпас. Давид хаан арын-нүүрүнүң хилинчээн мынчаар илереткен: «Бачыдымны чугаалавайн турумда, хүн бүрүдеги уё-човуурумдан ишти-хөңнүм ирип калды. Дүне-даа, хүндүс-даа Сээң холуң меңээ халалыг бооп келди». Давид дидимненгеш, харын-даа болза, шын алдынган. Ол: «А мен Сээң мурнуңга бачыттыымны миннип... чугааладым. Сен ынчан бачыдымның кем-буруузун өршээдиң» — деп бижээн (Ыд.ыр. 31:3—5). Аар бачыт кылыпкан болзуңарза, Иегова силерни өршээринге белен база Ол силерге дузалаарын күзеп турар деп утпаңар. Ынчалза-даа Ооң чыыш таварыштыр берип турар дузазын хүлээр болзуңарза эки (У.ч. 24:16; Иак. 5:13—15). Соңгаарлаткан ажыы чок, оон келир үеңер хамааржыр болгай! А бир эвес Иегова силерни өршээпкен, ынчалза-даа арын-нүүрүңер силерни хилинчектеп турар хевээр болза канчаарыл?

18. Бодун төлеп чок кылдыр миннип турар улуска Павелдиң чижээ канчаар дузалап болур?

¹⁸ Павел эрткен үеде кылган частырыглары дээш, үе-үе болгаш-ла, аажок муңгараар турган. Ол: «Мен хамык элчиннерниң эң бичиизи болгай мен, христиан ниитилелди истеп-сүрүп турган болгаш» — деп бижээн. Ынчалзажок ол улаштыр: «Ынчалза-даа мен Бурганның авыралы-биле, ам кандыг-дыр мен, ындыг кижи болганым ол-дур» — дээн (1 Кор. 15:9, 10). Павелди бачыттыг кижи деп, Иегова билир турган. Ындыг-даа болза Ол ону элчин боорунга төлептиг деп санап турарын Павел билзин деп күзеп турган. Бачыттарыңарны сеткилиңерден миннингеш, оларны Иеговага болгаш хуралдың удуртукчуларынга чугаалаан болзуңарза, Бурганның энерелинге кажан-даа чигзинмеңер. Иегова силерни өршээпкен деп быжыг бүзүреңер! (Иса. 55:6, 7).

19. 2018 чылдың шүлүү кандыгыл база ону чүге шилип каан?

¹⁹ Бо каржы делегейниң төнчүзү кел чыдар, ынчангаш чуртталгавыс оон-даа нарыыдаар деп билип турар бис. Ынчалзажок Бурган «могап турупкан улусту күштүг кылып каар, шаа төнген улусту быжыктырар» деп утпаңар (Иса. 40:29; Ыд.ыр. 54:23; 67:20). 2018 чылда Хурал Залынче келгеш-ле, ооң дугайында сактып кээр бис, чүге дизе ында чылдың шүлүүн азып каан болур: «Дээрги-Чаяакчыга идегээр улус чаа күш кирип алыр» (Иса. 40:31).