Ынакшылыңар соой бербезин

1, 2. а) Матфей 24:12-де сөстер баштай кымнарга күүсеттингенил? б) Иисустуң эдерикчилериниң хөй кезии ынакшылды илередип турган деп, Ажыл-чорудулга ному канчаар көргүзүп турарыл? (Статьяның эгезинде чурукту көрүңер.)

ИИСУС «бо делегейниң төнчүзүн» бадыткап турар демдектерни айтып тургаш: «Эңдерик улустуң ынакшылы соой бээр» — дээн (Мф. 24:3, 12). Бо сөстер баштай бирги векте чурттап чораан еврейлерге күүсеттинген. Олар боттарын Бурганның чону деп санап турган, ынчалза-даа оларның Бурганга ынакшылы соой берген.

² Оларга бодаарга, Иисустуң эдерикчилериниң хөй кезии чүткүлдүү-биле «„Иисус дээрге Христос-тур“ дээн Буянныг Медээни улуска чедирип», Бурганга, бот-боттарынга болгаш өске-даа улуска ынакшылды илередип турган (Аж.-ч. 2:44—47; 5:42). Ындыг-даа болза, оларның чамдыызының ынакшылы соой берген.

3. Чамдык христианнарның ынакшылы чүге соой бергенил?

³ Иисус Христос дирлип келгеш, Эфесте христианнарга: «Ынчалза-даа силерге удур сагыжым база бар: Меңээ баштайгы ынакшылыңарны ам чидирипкен-дир силер» — дээн (Ажыд. 2:4). Олар канчап ынакшылын чидирипкенил? Чылдагааннарының бирээзи — ол христианнар бачыттыг бүдүжүнүң күзээшкиннерин хандырар улустуң салдарынга алзыпкан чадавас (Эф. 2:2, 3). Эфес — бужар херектерже дүлдүне берген хоорай турган. Ооң чурттакчылары чүгле оюн-тоглаа биле каас-коя амыдырал сонуургаар улус турган. Оон аңгыда ол хоорайда дерзии болгаш самыыраар чорук аажок нептерээн турган. Ынчангаш бодун бодаар, таалал сүрер чорук ооң чурттакчыларының чүректеринге Бурганга болгаш кижилерге бичии-даа ынакшыл арттырбаан.

4. а) Бистиң хүннеривисте улустуң ынакшылы соой берген деп кайыын көскү? б) Кандыг үш талага ынакшылывыс шенеттинип болурул?

⁴ Улустуң ынакшылы соой бээр деп, Иисустуң өттүр медеглээн сөстери бистиң хүннеривисте база күүсеттинип турар. Бурганга ынак улус ховар апарган. Бургандан хая көрнү берген миллион-миллион кижилер кижи төрелгетенниң бергелерин янзы-бүрү организациялар шиитпирлептер деп идегеп турар. Дыка хөй улустуң чүректеринде ынакшыл өжүп турар, ынчангаш, Эфестиң христианнары дег, Бурганның бараалгакчылары безин ынакшылының соой бээрин чөпшээреп болур. Бо статьяга 1) Иеговага, 2) библейжи алыс шынга болгаш 3) кады бүзүрээн ха-дуңмавыска ынакшылывыс канчаар шенеттинип болурун сайгарар бис.

ИЕГОВАГА ЫНАКШЫЛЫВЫС

5. Бурганга чүге ынак болур ужурлуг бис?

⁵ Улустуң ынакшылы соой бээр деп чугаалаанының соонда Иисус кандыг ынакшылды илередириниң чугулазын демдеглээн: «„Бодуңнуң Бурганың Дээрги-Чаяакчыга бүгү-ле чүлдү-чүрээңден, бүгү-ле сеткил-сагыжыңдан, бүгү-ле угаан-сарыылыңдан ынак бол“. Бо дээрге бирги болгаш эң чугула айтыышкын-дыр» (Мф. 22:37, 38). Шынап-ла, Иеговага ханы ынакшыл биске Ооң айтыышкыннарын дыңнаарынга, туруштуг артарынга болгаш бузутка хөңнү чок болурунга дузалап турар. (Ырлар 96:10 номчувут.) Ынчалзажок Эрлик болгаш ооң делегейи чүрээвистен ынакшылды үндүр кызарын оралдажып турар.

6. Кижи Бурганга ынакшылын чидириптер болза, чүү болур?

⁶ Бо делегейде улус ынакшылче шын эвес көрүштүг. Олар Чаяакчыга эвес, а чүгле боттарынга ынак (2 Тим. 3:2). Эрликтиң чагырып турар бо делегейи кижилерде бачыттыг бүдүштүң күзээни бүгү чүвени, көрүштүң олчалап алыксааны бүгү чүвени, амыдыралынга адыыргаарын хайныктырып турар (1 Ин. 2:16). Павел элчин христианнарны бачыттыг бүдүжүнүң күзээшкиннеринге алыспазынче кыйгырган: «Кижи бүдүжүнүң күзээшкиннерин бодаары — өлүм-дүр... бачыттыг бүдүжүнүң күзээшкиннерин бодаар кижи Бурганга удур боор» (Рим. 8:6, 7). Кижи чүгле хөй акша ажылдаарын азы мага-бот күзээшкиннерин хандырарын бодаар болза, түңнелинде ону чөгениишкин манап турар (1 Кор. 6:18; 1 Тим. 6:9, 10).

7. Христостуң эдерикчилеринче кандыг үзел-бодалдар салдар чедирип болур?

⁷ Хөй атеистер, эволюционистер, ол ышкаш агностиктер (Бурганны билип алыры болдунмас деп санаар улус) кижилерниң Бурганга ынакшылын өжүреринден аңгыда, бүзүрелин чок кылып турар. Оларның хайы-биле улус Чаяакчыга чүгле бүдүүлүк, бүзүрээчел улус бүзүрээр деп бодаар апарган. Эртемденнерниң саналы эң-не бүзүрелдиг деп санаттынып турар, а ол чүүл кижилерниң кичээнгейин Чаяакчыдан өскээр чардыктырып турар (Рим. 1:25). Ындыг үзел-бодалдарны сонуургаар болзувусса, Иеговадан хая көрнүп, Аңаа ынакшылывыс соой берип болур (Евр. 3:12).

8. а) Бурганның хөй бараалгакчылары кандыг нарын байдалдарга таваржып турарыл? б) 135-ки ыр бисти чүү чүвеге бүзүредип турарыл?

⁸ Оон аңгыда ундаралга алзыр болзувусса, бүзүреливис кошкап, Бурганга ынакшылывыс соой берип болур. Эрликтиң каржы делегейинге чурттап тургаш, бис, үе-үе болгаш-ла, бергелерге таваржып турар бис (1 Ин. 5:19). Назылап улгадырының, аарыгның азы акша чедишпезиниң ужундан бергедеп турар чадавас силер. Чок болза бодуңарны херекчок мен деп миннип, бүтпээн идегелдер дээш чөгенип, азы частырыгларыңар дээш муңчулуп турар чадавас силер. Бир эвес ындыг болза, чеже-даа муңгаранчыг байдалдар болгаш багай бодалдар хөме ап келзе, Иегова силерни каапкан деп кажан-даа бодаваңар. Ырлар 135:23-те бижээн Иегованың өскерлиш чок ынакшылының дугайында боданыңар: «Базындырып чораан бисти Ол бодап келген. Ооң энерели кезээ шагда үстүп төнмес-тир». Ынчангаш Бурган бистиң чаннып, дуза дилээн мөргүлдеривисти дыңнап, оларга харыылап турар деп чигзинмес бис (Ыд. ыр. 114:1; 135:24—26).

9. Бурганга ынакшылын чидирбезинге Павелге чүү дузалаан?

⁹ Павел, ыр күүседикчи дег, Иегова ону кезээде деткип быжыглаарынга белен деп чүүлдүң дугайында боданып тургаш, күш кирип турган. «Мээң дузалакчым — Дээрги-Чаяакчы-дыр, корткан херээм чүл: кижи амытан меңээ чүнү кылып шыдаарыл?» — деп, Павел бижээн (Евр. 13:6). Иеговага ындыг быжыг бүзүрел Павелге чуртталганың бергелерин ажып эртеринге дузалаан. Олар дээш ол ундаралга алыспаан. Кара-бажыңга олургаш, ол сорук киирер каш чагаа бижээн (Эф. 4:1; Флп. 1:7; Флм. 1). Аажок берге шенелделер үезинде безин, Павел Бурганга ынакшылын чидирбээн. Аңаа чүү дузалаан? Ол «кандыг-даа аар-берге байдалга таварышканывыста» бисти аргалап чоруур Бурганга ынанып турган (2 Кор. 1:3, 4). Бис, Павелди өттүнүп, Иеговага ынакшылывыс соой бербес кылдыр, чүнү канчап болур бис?

10. Бурганга ынакшылды кадагалаарынга биске чүү дузалаар?

¹⁰ Мөргүл — Бурганга ынакшылды кадагалаарынга дузалаар кол чүүл деп, Павел тайылбырлаан. «Соксаал чок мөргүлдеңер»; «Мөргүлден черле салдынмаңар» — деп, христианнарга ол сүмелээн (1 Фес. 5:17; Рим. 12:12). Бурган-биле чоок хамаарылганы кадагалаар дизе, Ооң-биле мөргүл таварыштыр чугаалажыры чугула (Ыд. ыр. 85:3). Сагыш-сеткиливисте эң-не чажыт бодалдарывысты болгаш минниишкиннеривисти Иеговага ажыдар болзувусса, Аңаа оон-даа чоок апаар бис (Ыд. ыр. 64:3). Оон аңгыда мөргүлдеривиске Иегованың канчаар харыылап турарын көргеш, Аңаа ынакшылывыс дам күштелир. «Дээрги-Чаяакчы Ону кый деп мөргүүр бүгү улуска... чоок» дээн сөстерге улам шынзыгар бис (Ыд. ыр. 144:18). Иегова бисти албан деткиир деп бүзүрээр болзувусса, шенелделерни туруштуг ажып эртиптер бис.

БИБЛЕЙЖИ АЛЫС ШЫНГА ЫНАКШЫЛ

11, 12. Библейжи алыс шынга ханы ынакшылды канчаар сайзырадып болур?

¹¹ Бис христианнар болгаш, алыс шынны үнелеп турар бис. Алыс шынның эң-не бүзүрелдиг үндезини — Бурганның Сөзү-дүр. Иисус Адазынга мөргүп тургаш: «Сээң сөзүң дээрге-ле алыс шын ол-дур» — дээн (Ин. 17:17). Ынчап кээрге, Бурганның Сөзүнден ылап шын билиглер чокта, алыс шынга ынакшыл чүрээвиске тыптып келбес (Кол. 1:10). Ынчалза-даа анаа чүгле билиглер алыры чедишпес. Алыс шынга ынак болуру дээрге чүл ол дээрзин билип алыр дээш, 118-ки ырда Бурганның хей-аът киирген сөстеринче кичээңгейиңерни салып көрүңер. (Ырлар 118:97—100 номчувут.) Библиядан номчаан чүүлдеривистиң дугайында ханы боданыр дээш, хүнде үени үндүрүп турар бис бе? Амыдыралывыска библейжи дүрүмнерниң ажыглалы кандыг ажык-дузаны эккээрин боданыр болзувусса, алыс шынга ынакшылывыс дам күштелир.

¹² 118-ки ырда улаштыр: «Сээң сөстериңниң дылымга амданныын — олар аксымга ары чигиринден-даа чаагай-дыр» — дээн (Ыд. ыр. 118:103). Чаагай чемни дораан ажырбайн, аксывыска ооң амданын чаагайзынып турарывыс дег, Бурганның организациязының берип турары Библияга үндезилеттинген дептерлерден билиглерни база «амданнанып» болур бис. Ынчан алыс шынның «чечен сөстерин» херек үеде сактып, өскелерге дузалап болур бис (Эккл. 12:10).

13. Ыдыктыг Бижилгеден алыс шынга ынак болурунга Иеремияга чүү дузалаан база ол аңаа кандыг салдар чедирген?

¹³ Иеремия медээчи Ыдыктыг Бижилгеден алыс шынга ынак турган. Бурганның Сөзү аңаа кандыг салдар чедиргенин эскерип көрүңер: «Сээң сөзүң мээң аъш-чемим апарып турду. Сээң сөстериң сеткил-чүрээмниң өөрүшкүзү, хөглээшкини апарды, чүге дээрге Сеңээ хамааржыр болгай мен, Дээрги-Чаяакчы, Аг-шериглиг Бурган!» (Иер. 15:16). Бурганның үнелиг сөстериниң дугайында ханы боданыры Иеремияга аъш-чемни амданнанып чиири дег турган. Ооң ачызында Иегованың адын эдилээр хүндүткел дээш, ол чүрээниң ханызындан өөрүп четтирип турган. Бургандан алыс шынга ынак болзувусса, Ооң адын эдилээри болгаш сөөлгү хүннерде Ооң Чагыргазының дугайында медээлээри — улуг алдар-хүндү-дүр деп миннип турар бис бе?

14. Библейжи алыс шынга ынакшылывысты канчаар ханыладып болур бис?

¹⁴ Библияны болгаш библейжи дептерлерни номчуурундан аңгыда Бурганның Сөзүнге ханы ынакшылды сайзырадарынга биске чүү дузалап турарыл? Чыыштарже доктаамал баары. Неделя санында Библияны өөренир статьяларның дузазы-биле сайгарылга өөредилгевисте кол рольду ойнап турар. Өөренир теманы эки билип алыр дизе, сайгарылга бүрүзүнге эки белеткенир херек. Чижээ, статьяда бердинген библейжи шүлүктерниң шуптузун ажыдып болур. Сайгарар брошюраларны бөгүн организациявыстың интернет-курлавырларындан аңгы-аңгы дылдарга тып ап болур. Чамдык электроннуг хевирлерге өөренир статьяларда библейжи шөлүглерни дүрген ажыдып болур. Кандыг-даа арганы ажыглазывысса, ол шүлүктерни кичээнгейлиг номчувушаан, ханы боданыр болзувусса, библейжи алыс шынга оон-даа күштүг ынак апаар бис. (Ырлар 1:2 номчувут.)

ЧЫЫШТА АКЫ-УГБАЛАРГА ЫНАКШЫЛ

15, 16. а) Иоанн 13:34, 35-тен алырга, чүнү кылыр ужурлуг бис? б) Бурганга болгаш Библияга ынакшыл биле акы-угбаларывыска ынакшылдың аразында кандыг харылзаа барыл?

¹⁵ Өлүмүнүң мурнундагы кежээзинде Иисус өөреникчилеринге: «Чаа чагыгны силерге берип тур мен: бот-боттарыңарга ынак болуңар. Силерге Мээң ынаам ышкаш, силер база бот-боттарыңарга ынчаар ынак болуңар. Силерниң араңарга ынакшыл-ла турар болза, силерни Мээң өөреникчилерим-дир деп делегейде хамык улус танып алыр» — дээн (Ин. 13:34, 35).

¹⁶ Акы-угбаларывыска ынакшылывыс Иеговага ынакшылывыс-биле тудуш харылзаалыг — бирээзи өскези чокта болдунмас. «Көрүп чорууру эжинге ынак эвес кижи көрүп көрбээни Бурганга канчап ынак боорул?» — деп, Иоанн элчин бижээн (1 Ин. 4:20). Иеговага болгаш акы-угбаларга ынакшыл Библияга ынакшыл-биле база харылзаалыг. Чүге? Чүге дээрге библейжи алыс шынга ынакшыл Бурганга болгаш ха-дуңмага ынак болуңар дээн айтыышкыннарга чүрээвистиң ханызындан чагыртырынче оттуруп турар (1 Пет. 1:22; 1 Ин. 4:21).

17. Ынакшылды канчаар илередип болур бис?

¹⁷ 1 Фессалоникчилерге 4:9, 10-ну номчувут. Чыышта акы-угбаларывыска ынакшылды херек кырынга канчаар көргүзүп болур бис? Чижээ, назылай берген христианнарны чыышче чедирип азы ашаан чидирген угбавыстың бажыңынга бир-ле чүвени септеп берип болур бис (Иак. 1:27). Назылай берген-даа, аныяк-даа ха-дуңмавыс ундаралга алзып азы бергелерге таваржып болур. Олар шупту бистиң кичээнгейивисти, деткимчевисти болгаш аргалалывысты хереглеп турар (У. ч. 12:25; Кол. 4:11). «Бүзүрели чаңгыс ха-дуңмавысты» сөстеривис-биле деткип, оларга дуза кадып тургаш, ёзулуг ынаавысты оларга көргүзер бис (Гал. 6:10).

18. Чыыш иштинге бичии чөрүлдээлерни шиитпирлээринге биске чүү дузалаар?

¹⁸ «Сөөлгү хүннерде» улус бодун бодаар, харам болур деп Библияда баш бурунгаар чугаалаан (2 Тим. 3:1, 2). Ынчангаш Бурганга, библейжи алыс шынга болгаш бот-боттарынга ынак болур дээш, христианнар хөй күжениишкиннерни үндүрер болза эки. Чамдыкта акы-угбаларывыс-биле бичии чөрүлдээлер туруп болур, ынчалза-даа ынакшыл бисти эптежиринче оттуруп турар (Эф. 4:32; Кол. 3:14). Ынчангаш ынакшылывыс соой бээрин чөпшээревейн, моон-даа соңгаар Иеговага, Ооң Сөзүнге болгаш ха-дуңмавыска ынак болуулуңар!