Бөгүн Бурганның чонун кым удуртуп турарыл?

1, 2. Иисус дээрже чоруптарга, элчиннер чүнү бодап турган чадавас?

ИИСУСТУҢ элчиннери Елеон даанда дээрже көрүп турар. Олар ам чаа дээргизи болгаш өңнүү Иисус Христостуң дээрже көдүрлүп үнгеш, булутче ажытталы бергенин көрүп турган (Аж.-ч. 1:9, 10). Иисус оларны ийи хире чыл иштинде удуртуп, өөредип, деткип келген. Ам ол чокта олар канчаарыл?

² Иисус эдерикчилеринге: «Иерусалимге, бүгү Иудеяга, Самарияга база чер-делегейниң кыдыынга чедир Мээң херечилерим боор силер» — деп даалга берген (Аж.-ч. 1:8). Олар ону канчап күүседирил? Оларже ыдыктыг сүлде бадып кээр деп, Иисус аазаан (Аж.-ч. 1:5). Ынчалзажок христианнар чер-делегейниң кыдыынга чедир суртаалдаар кылдыр, оларны удуртур улус херек турган. Бурунгу үеде Иегова чонун башкарар кылдыр, ооң аразындан бодунуң төлээлекчилерин шилип турган. Ынчангаш элчиннер: «Иегова чаа удуртукчуну томуйлаар ирги бе?» — деп бодап турган чадавас.

3. а) Иисустуң дээрже чорупканының соонда элчиннер кандыг шиитпир хүлээп алганыл? б) Бо статьяга чүнү сайгарар бис?

³ Ийи хире неделя эрткенде Иисустуң өөреникчилери Ыдыктыг Бижилгени көргеш, Бурганга мөргээш, Иуда Искариоттуң орнунга 12 дугаар элчинни шилип алган. Ол Матфий болган (Аж.-ч. 1:15—26). Ол шиитпир христианнарга-даа, Иеговага-даа чүге ындыг чугула турган? Чүге дизе элчиннерниң саны 12 болур ужурлуг турганa. Иисус элчиннерни суртаал үезинде ооң-биле анаа-ла кады чоруур кылдыр шиливээн. Олар Бурганның чонунга хамаарыштыр келир үеде чугула рольду күүседир ужурлуг турган. Ол кандыг роль турганыл база Иисусту таварыштыр Иегова оларга канчаар дузалааныл? Бөгүн Бурганның чонунуң аразында ындыг рольду күүседип турар акылар бар бе? Удуртукчу акыларны, ылаңгыя «шынчы болгаш сарыылдыг чалчаны», канчаар утпайн барып болур бис? (Евр. 13:7; Мф. 24:45).

КӨЗҮЛБЕС УДУРТУКЧУЛУГ ЧӨВҮЛЕЛ

4. Бирги векте Иерусалимде элчиннер болгаш өске-даа удуртукчулар кандыг рольду күүседип турганыл?

⁴ Б. э. 33 чылдың Беженги хүннүң байырлалында элчиннер христиан чыышты удуртуп эгелээн. «Пётр өске он бир элчин-биле кады туруп келгеш», чыылган чонну, иудейлерни болгаш прозелиттерни, оларның амы-тынын камгалаар алыс шынга өөредип эгелээн деп Библияда бижээн (Аж.-ч. 2:14, 15). Оларның хөй кезии христианнар апарып, элчиннерниң өөредиин билип алыр дээш кызып турган (Аж.-ч. 2:42). Элчиннер чыыштың акшазын хереглел ёзугаар үлеп турган (Аж.-ч. 4:34, 35). Оон ыңай олар Бурганның чонун өөредип, олар дээш мөргүп турган (Аж.-ч. 6:4). Оон аңгыда элчиннер дуржулгалыг христианнарны буянныг медээни өске черлерге тарадыр кылдыр чоргузуп турган (Аж.-ч. 8:14, 15). Чоорту христиан чыыштың ажыл-херээн чүгле элчиннер эвес, а өске-даа шилип чагдырган удуртукчулар кылып эгелээн. Олар, шупту чыыштарга айтыышкыннар берип турган, удуртукчу чөвүлелдиң кежигүннери турган (Аж.-ч. 15:2).

5, 6. а) Удуртукчу чөвүлелди ыдыктыг сүлде бүргеп турган деп чүге чугаалап болур? (Статьяның эгезинде чурукту көрүңер.) б) Удуртукчу чөвүлелге дээрниң төлээлери канчаар дузалап турган? в) Удуртукчу чөвүлел Бурганның Сөзүн кичээнгейге ап турган деп чүүден көскү?

⁵ Бирги вектиң христианнары удуртукчу чөвүлелди Иисус Христосту таварыштыр Иегова башкарып турган деп чүге бүзүреп турганыл? Бирээде, удуртукчу чөвүлелди ыдыктыг сүлде бүргеп турган (Ин. 16:13). Ыдыктыг сүлдени шупту шилип чагдырган христианнар алган-даа болза, ол тускай арга-биле элчиннерге болгаш Иерусалимде өске-даа удуртукчуларга хайгааракчы хүлээлгелерни күүседиринге дузалап турган. Чижээ, б. э. 49 чылда ыдыктыг сүлде удуртукчу чөвүлелге кыртыжап демдектээринге хамаарыштыр шиитпир хүлээринге дузалаан. Ол айтыышкынны эдергениниң ачызында «христиан ниитилелдерниң бүзүрели быжыгып, улузу хүн санай немежип турган» (Аж.-ч. 16:4, 5). Удуртукчу чөвүлелдиң шиитпир илереткен чагаазындан алырга, ол акылар, ынакшыл болгаш бүзүрел дээн ышкаш, Бурганның сүлдезиниң үре-түңнели болур шынарларны илередип турган деп көстүп турган (Аж.-ч. 15:11, 25—29; Гал. 5:22, 23).

⁶ Ийиде, удуртукчу чөвүлелге дээрниң төлээлери дузалап турган. Дээрниң төлээзи Корнилийге Пётр элчинни тып эккээрин чугаалаан. Оон Пётр келгеш, суртаалдап эгелээрге, Корнилийже болгаш ооң төрелдеринче, олар кыртыжадып демдектетпээн-даа турда, ыдыктыг сүлде бадып келген. Шак ынчаар Корнилий бир дугаар кыртыжадып демдектетпээн еврей эвес христиан кижи апарган. Ол болуушкуннуң соонда элчиннер болгаш өске-даа акылар, Бурганның күзел-соруунга чагыртып, кыртыжадып демдектетпээн еврей эвес улусту христиан чыышче хүлээр ужурлуг деп билип каан (Аж.-ч. 11:13—18). Оон аңгыда дээрниң төлээлери удуртукчу чөвүлелдиң харыылап турганы суртаал ажылын идепкейлиг деткип турган (Аж.-ч. 5:19, 20). Үште, удуртукчу чөвүлел Бурганның Сөзүн кичээнгейге ап турган. Ыдыктыг сүлде-биле шилиттинген ол удуртукчулар Ыдыктыг Бижилгеге даянып алгаш, христиан өөредиглер айтырыгларын шиитпирлеп, организастыг айтыышкыннарны берип турган (Аж.-ч. 1:20—22; 15:15—20).

7. Баштайгы христианнарны Иисус Христос удуртуп турган деп, чүге чугаалап болурул?

⁷ Удуртукчу чөвүлелдиң кежигүннери чыышта эрге-чагыргалыг-даа турган болза, оларның Баштыңы Иисус Христос деп, олар билип турган. Павел элчин «кымга — элчиннер» боорун Христос боду айыткан деп бижээн. «А Ол дээрге — мага-боттуң Бажы-дыр» — деп, Павел немээн (Эф. 4:11, 15). Иисустуң өөреникчилери кандыг-бир элчинниң ады-биле адаттынып албаан. Библияда оларны «христианнар деп адай берген» деп бижээн (Аж.-ч. 11:26). Чыышты удуртуп турган элчиннер биле өске акыларның, Ыдыктыг Бижилгеге даянгаш, берип турган «өөредиин» олчаан эдерер болза эки деп, Павел билип турган. «Ынчалза-даа мону билип аарыңарны күзеп тур мен: Христос эр кижи бүрүзүнге [удуртукчу чөвүлелге база] „баш“ боор... а Бурган — Христоска „баш“ боор» — деп, Павел бижээн (1 Кор. 11:2, 3). Ийе, Иегова бодунуң Оглун Иисус Христосту чыышты удуртур кылдыр томуйлаан.

«БО ДЭЭРГЕ КИЖИНИҢ АЖЫЛ-ХЕРЭЭ ЭВЕС-ТИР»

8, 9. XIX вектиң төнчүзүнде Рассел акый кандыг чугула ажылды кылып эгелээнил?

⁸ XIX вектиң төнчүзүнде Чарлз Тейз Расселл болгаш ооң талалакчылары алыс шын христиан шажынны катап тургузар дээш, күш үндүрүп эгелээн. Аңгы-аңгы дылдарга библейжи алыс шынны тарадыр дээш, 1884 чылда Сионнуң таңныыл суургазының болгаш трактаттарның ниитилели үндезилеттингенb. Ооң президентизи Расселл акый апарган. Ол Библияны чүткүлдүг шинчилеп, үш арынныг бурган биле өлүм чок сүнезин дээн ышкаш меге өөредиглерни дидими-биле сойгалап турган. Христостуң кээри көзүлбес боор база «өске чоннар улузунуң тергиидээр үези» 1914 чылда төнер деп, Рассел билип каан (Лк. 21:24). Расселл акый өскелер-биле ол билиглерни үлежир дээш, үезин, күжүн, акша-төгериин-даа харамнанмайн турган. Ол тускай үеде ону Иегова болгаш чыыштың Баштыңы Христос деткип турган деп чигзиниг чок.

⁹ Рассел акый алдар сүрбейн чораан. 1896 чылда ол мынчаар бижээн: «Бисти болгаш кылган ажылывысты бир-ле тускай арга-биле хүндүлезин деп күзевейн турар бис...» Чижээ, ону «башкы» дээн ышкаш ат дужаалдар-биле адаарын азы кандыг-бир шажын бөлүү ооң адын эдилээр кылдыр, ол күзевейн турган. Соонда ол мынча дээн: «Бо дээрге кижиниң ажыл-херээ эвес-тир».

10. а) Иисус «шынчы болгаш сарыылдыг чалчаны» кажан томуйлааныл? б) Удуртукчу чөвүлел биле Таңныыл суургазының ниитилели ылгалдыг деп, акылар канчаар билип кааныл?

¹⁰ Расселдиң чок апарганының соонда, үш чыл эрткенде, 1919 чылда Иисус Христос, «аъш-чемни чогуур үезинде» эдерикчилеринге бээр кылдыр, «шынчы болгаш сарыылдыг чалчаны» томуйлаан (Мф. 24:45). Ол чылдарда-ла Бруклинде (Нью-Йорк) кол башкарылга черинге бараалгап турган шилип чагдырган акыларның бичии бөлүү Христостуң эдерикчилеринге библейжи дептерлерни белеткээш, үлеп турган. 1940 чылдардан эгелеп, дептерлеривиске «удуртукчу чөвүлел» деп сөстерни ажыглап эгелээн, ынчан ол сөс каттыжыышкыны Таңныыл суургазының, Библияның болгаш трактаттарның ниитилели-биле сырый харылзаалыг турган. Ынчалза-даа 1971 чылда Удуртукчу чөвүлел Таңныыл суургазының ниитилелинден ылгалдыг апарган. Ол чылдан эгелээш, Таңныыл суургазының ниитилели чүгле юридиктиг талазын харыылап эгелээн. А Удуртукчу чөвүлелче Ниитилелдиң директорларынга хамаарышпас, өске-даа шилип чагдырган акылар кирип турар апарган. Сөөлгү чылдарда Таңныыл суургазының ниитилелиниң болгаш Бурганның чонунуң ажыглап турары өске юридиктиг эвилелдерниң директорлары кылдыр «өске хойлардан» акылар бараалгап турар апарган. Ооң ачызында Удуртукчу чөвүлел Бурганның чонун алыс шынга өөредиринче база Библияга үндезилеттинген айтыышкыннар бээринче кичээнгейни салып болур апарган (Ин. 10:16; Аж.-ч. 6:4). 2013 чылдың июль 15-тиң «Таңныыл суургазында» «шынчы болгаш сарыылдыг чалча» дээрге Удуртукчу чөвүлелче кирип турар, эвээш санныг шилип чагдырган акылар-дыр деп тайылбырлаан.

11. Удуртукчу чөвүлел канчаар ажылдап турар?

¹¹ Удуртукчу чөвүлелдиң кежигүннери, чугула айтырыгларны кады шиитпирлээр дээш, неделя санында чыглып турар. Ол чүүл чаңгыс аай, демниг ажылдаарынга дузалап турар (У. ч. 20:18). Удуртукчу чөвүлелдиң кежигүннери шупту дең эргелиг болганда, кежигүн бүрүзү бир чыл болгаш-ла, ээлчег ёзугаар, ооң даргазы бооп бараалгап турар (1 Пет. 5:1). Шак-ла ынчаар Удуртукчу чөвүлелдиң алды комитединиң даргалары база солчуп турар. Удуртукчу чөвүлелде бараалгап турар акылар боттарын өскелеринден бедик деп санавайн турар, чүге дизе ооң кежигүннери база тус-тузунда шынчы чалчадан алыс шын билиглерни ап, ооң айтыышкыннарын эдерип чоруур.

«ШЫНЧЫ БОЛГАШ САРЫЫЛДЫГ ЧАЛЧА КАНДЫГ БОЛУРУЛ?»

12. Кандыг айтырыгларны сайгарар бис?

¹² Удуртукчу чөвүлелдиң кежигүннери өрүтен ажыдыышкыннар албайн турар база оларны часпас деп чугаалап болбас. Ынчангаш олар библейжи өөредиглерге чазып, организастаарынга хамаарыштыр шын эвес шиитпирлер хүлээп болур. «Таңныыл суургазының дептерлер айтыкчызында» (орус дылда) «Уточнение в понимании» деп биче эгеде, 1870 чылдан тура эде көрдүнүп турган билиишкиннерге хамааржыр библейжи айтырыгларның даңзызы бар. Ийе, Иисус ооң шынчы чалчазы четпес-дудуу чок «аъш-чем» бээр деп аазаваан. Ынчалза-даа Иисустуң: «Шынчы болгаш сарыылдыг чалча кандыг болурул?» деп айтырыының харыызы кандыгыл? (Мф. 24:45). Ол рольду Удуртукчу чөвүлел күүседип турар деп, кайыын билир бис? Статьяның эгезинге көргенивис үш барымдааны сайгарыптаалыңар.

13. Удуртукчу чөвүлелге ыдыктыг сүлде канчаар дузалап турар?

¹³ Ыдыктыг сүлдениң салдары. Ыдыктыг сүлде Удуртукчу чөвүлелге мооң мурнунда чажыт турган библейжи алыс шынны билип алырынга дузалап турар. Чижек кылдыр эрткен абзацта чугаалаан, тодараттынган өөредиглерниң дугайында боданып көрүңер. Чаңгыс-даа кижи өрүтен дуза чокка, ол «Бурганның бодалдарының ханы дүвүн» билип-даа, тайылбырлап-даа шыдавас ийик! (1 Коринфичилерге 2:10 номчувут.) Удуртукчу чөвүлел Павел элчинниң сөстеринге катчып, «ол дугайында кижиниң мерген угааны өөреткен сөстер-биле эвес, а Сүлдениң биске шиңгээттиргени сөстер-биле суртаалдап турар бис» деп турар (1 Кор. 2:13). Чүс-чүс чылдар дургузунда ойталакчы чорук нептереп, кижилер «караңгы дүмбейге» турган. Ынчалза-даа 1919 чылдан эгелээш, библейжи алыс шынны билип турарывыс тодаргай апар чыдар. Бо бүгү ыдыктыг сүлдениң ачызында болдунуп турар деп, көскү эвес-тир бе?

14. Ажыдыышкын 14:6, 7-ден алырга, Бурганның чонунга дээрниң төлээлери канчаар дузалап турарыл?

¹⁴ Дээрниң төлээлериниң дузазы. Удуртукчу чөвүлел аажок берге даалганы күүседип турар. Ол 8 миллион ажыг суртаалчылар киржип турар делегей чергелиг суртаал ажылын удуртуп турар. Ол ажылдың чедиишкини чүдел? Чылдагааннарының бирээзи — аңаа дээрниң төлээлери дузалап турар. (Ажыдыышкын 14:6, 7 номчувут.) Хөй таварылгаларда суртаалчылар улуска оларның Бургандан дуза дилеп, мөргүп турган үезинде кээп турган. Чамдык чурттарда Иегованың бараалгакчыларынга күштүг удурланып-даа турар болза, суртаал биле өөреникчилер белеткээр ажыл үргүлчү хөгжүп турар. Ол чүүл дээрниң төлээлериниң дузазы чокка болдунмас деп көскү-дүр.

15. Христиан хүрээниң башкарыкчыларындан Удуртукчу чөвүлел чүзү-биле ылгалып турарыл? Чижектен чугаалап көрүңерем.

¹⁵ Бурганның Сөзүнге хүндүткел. (Иоанн 17:17 номчувут.) 1973 чылда болган таварылганы көрээлиңер. Ол чылдың июнь 1-ниң «Таңныыл суургазынга»: «Таакпыны кагбаан кижи сугга суктуруп болур бе?» деп айтырыгны салып турган. Библияның «чок» деп харыызын аңаа берген турган. Таакпылаарын кагбас кижи чыыштан үндүртүр ужурлуг деп көргүскен кезек библейжи шүлүктерни статьяга сайгарган (1 Кор. 5:7; 2 Кор. 7:1). «Ол хемчээлди эмин эртир шыңгыы деп болбас. Чүге дизе ындыг негелдени Бурган бодунуң Сөзүнде илереткен» деп статьяда тайылбырлаан. Чамдык кежигүннеринге бергелер тургузуп болур-даа болза, Бурганның Сөзүнге бүгү талазы-биле үргүлчү ынанып чоруур оон өске шажын организациязы бар деп бе? АКШ-ка чоокта чаа үнген номда мынча дээн: «Христиан хүрээниң башкарыкчылары өөредиглерин кээп турар улузунуң үзел-бодалдарынга болгаш ниитилелде сайзырап турар көрүштерге дүгжүр кылдыр үргүлчү эде көрүп ап турар». А Удуртукчу чөвүлел шиитпирлер хүлээрде кижилер аразында нептерээн үзел-бодалдарны эвес, а Бурганның Сөзүн херекке ап турар. Кандыг түңнел үндүрүп болур? Бөгүн Бурганның чонун кым удуртуп турарыл?

«УДУРТУКЧУЛАРЫҢАРНЫ УТПАҢАР»

16. Удуртукчу чөвүлелди утпазының бир аргазы кандыгыл?

¹⁶ Еврейлерге 13:7 номчувут. Библияда: «Удуртукчуларыңарны утпаңар» — дээн. Ону кылыр аргаларның бирээзи — Удуртукчу чөвүлелдиң дугайында мөргүүрү-дүр (Эф. 6:18). Кайы хире чугула хүлээлгелерни оларга даасканын бодап көрүңер: «аъш-чемни» белеткээри, делегей чергелиг суртаал ажылын удуртуру болгаш өргүлдерни таарыштыр хуваары. Чугаажок, бистиң үзүк-соксаал чок мөргүлдеривис Удуртукчу чөвүлелге дыка херек.

17, 18. а) Удуртукчу чөвүлел-биле канчаар кады ажылдап турар бис? б) Суртаал ажылынга чүге чүткүлдүг киржир ужурлуг бис?

¹⁷ Удуртукчу чөвүлелдиң дугайында мөөргүүрүнден аңгыда, дептерлеривисте, чыыштарда болгаш шуулганнарда ооң берип турар айтыышкыннарын эдерер ужурлуг бис. Удуртукчу чөвүлел кожуун хайгааракчыларын, а хайгааракчылар чыыштарда удуртукчуларны томуйлап турар. Удуртукчулар болгаш кожуун хайгааракчылары Удуртукчу чөвүлелди ооң айтыышкыннарындан сырый туттунуп турары-биле утпайн турар. Баштыңчывыс Иисус Христоска хүндүткеливисти ооң чыышта ажыглап турар эр улузунга дыңнангырывыс-биле көргүзер бис (Евр. 13:17).

¹⁸ Удуртукчу чөвүлелди оон ыңай канчаар утпайн барып болур бис? Суртаал ажылынга идепкейлиг киржип тургаш. Павел христианнарны удуртукчуларның бүзүрелин эдерер кылдыр деткип турган. А шынчы чалча буянныг медээни чүткүлдүг суртаалдап, ону тарадып турары-биле улуг бүзүрелди көргүзүп турар. Амы-тынны камгалаар бо ажылга шилип чагдырганнарны деткип турар силер бе? Иисустуң: «Мээң бо эң бичии дуңмаларымның бирээзинге ол бүгүнү кылганыңар дээрге-ле ону Меңээ база кылганыңар ол-дур» дээн сөстерин дыңнаары дыка-ла аянныг болур ийик! (Мф. 25:34—40).

19. Баштыңчывыс Иисусту чүге эдерер деп шиитпирлеп алдыңар?

¹⁹ Иисус дээрже эглип келгеш, эдерикчилерин утпаан (Мф. 28:20). Кажан ол черге турда, аңаа удуртулга алырынга ыдыктыг сүлде, дээрниң төлээлери болгаш Бурганның Сөзү дузалап турган. Бөгүн шынчы чалчага база ол шак ынчаар дузалап турар. Шилип чагдырган христианнардан тургустунган шынчы чалча «Хураган кайнаар-даа баар болза, Ону эдер[ип]» чоруур (Ажыд. 14:4). Оларның айтыышкыннарын эдерип турарывыс-биле Иисусту дыңнап турар бис. Удавас ол биске мөңге чуртталганы чедип алырынга дузалаар (Ажыд. 7:14—17). Ындыг аазаашкынны оон өске кандыг чагырыкчы берип шыдаарыл?!