Өөреникчилер белеткээр кыйгырыгга харыы бээр силер бе?

1. Иегова сеңээ чүнү кылган?

КАНЧАП Иегованың Херечизи апарган сен? Эгезинде Библиядан өөрүшкүлүг медээни дыңнаан чадавас сен. Ону ада-иеңден, чаңгысклассчыңдан, ажылыңда кижиден азы бажыңнар кезип суртаалдап турган Иегованың Херечилеринден дыңнаан чадавас сен (Мк. 13:10). Оон бир кижи сеңээ Библияны өөредир дээш, хөй үезин болгаш күжүн үндүрген. Соонда сен Библияны өөренип тургаш, Иеговага ынакшылың өзүп база Ол сеңээ хууда ынак деп чүүлге бүзүрей берген сен. Алыс шынның кайы хире кайгамчыын Иегова сеңээ көргүскен. Оон сен Иисустуң өөреникчизи апаргаш, келир үеде мөңге амыдыраар идегелди алган сен (Ин. 6:44). Бодунуң бараалгакчызын сээң-биле Библияны өөрензин дээш, чоргузупкан боорга база Аңаа бараалгаар арганы сеңээ бергени дээш, Иеговага аажок өөрүп четтирип турар сен.

2. Бо статьяга чүнү сайгарар бис?

² Бистер алыс шынны билип алгаш, мөңге амыдыралга чедире бээр орук-биле бар чыдар бис. Өскелерге база мөңге амыдыралче аппаар орукче туруп алырынга дузалаар хүндүткелдиг даалганы Иегова биске бүзүреп дааскан. Чамдык улус бажыңнар кезип суртаалдаарындан кортпас-даа болза, улуска библейжи кичээлдерни сүмелээринден база оларны эрттиреринден коргар. Силер база ол дээш дүвүреп турар болзуңарза, бо статьядан ажыктыг сүмелерни тып алыр силер. Өөреникчилер белеткээр ажылче бисти чүү оттуруп турарын сайгарып көөр бис. База чамдык улус библейжи кичээл эрттиреринден чүге дидинмейн турарының каш чылдагаанын база оларга чүү дузалап болурун көөр бис. А эгезинде бистер чүге чүгле суртаалчылар эвес, а башкылар база боор ужурлуувусту көрүптээлиңер.

ИИСУС БИСКЕ СУРТААЛДААР БАЗА ӨӨРЕДИР ДААЛГАНЫ БЕРГЕН

3. Чүге суртаалдап турар бис?

³ Иисус өөреникчилеринге ийи айтыышкын берген. Бирээде, олар Бурганның Чагыргазының дугайында кижилерге суртаалдаар ужурлуг турган. Иисус ону канчаар кылырын оларга өөредип каан (Мф. 10:7; Лк. 8:1). Ол медээни дыңнавас улус база бар боор деп, Иисус сагындырган (Лк. 9:2—5). Иисус оон ыңай ооң өөреникчилери бүгү чоннарга, чер-делегейниң ужу-кыдыынга чедир буянныг медээни тарадыр деп баш удур чугаалаан (Мф. 24:14; Аж.-ч. 1:8). Кижилер дыңнаар-дыңнавас-даа болза, Иисустуң өөреникчилери Бурганның Чагыргазының дугайында база ооң чүнү кылыптарын чугаалаар ужурлуг турган.

4. Бурганның Чагыргазының дугайында суртаалдаарындан аңгыда, оон ыңай чүнү канчаар ужурлуг бис? (Матфей 28:18—20).

⁴ Ийиде, Иисус биче сеткилдиг улусту «Мээң бүгү айтыышкыннарымны сагыыр кылдыр оларны өөредиңер» деп бодунуң эдерикчилеринге дагзып каан. Чамдык улустуң саналы-биле алырга, Иисус өөреникчилер белеткээр даалганы чүгле бирги векте христианнарга берген. Ынчалза-даа ол ындыг эвес. Херек кырында суртаал ажылы болгаш өөреникчилер белеткээр ажыл бистиң хүннеривиске чедир, безин «бо делегейниң төнчүзүнге чедир», уламчылаар ужурлуг. (Номчуптуңар: Матфей 28:18—20.) Иисус ол даалганы «беш чүс ажыг ха-дуңмага чаңгыс угда көзүлген» үезинде берген чадавас (1 Кор. 15:6). Ол ышкаш Ажыдыышкын номундан алырга, Христостуң шупту өөреникчилери улуска Иегованың дугайында чугаалаар ужурлуг (Ажыд. 22:17).

5. Суртаал ажылын болгаш өөреникчилер белеткээр ажылды Павел элчин кандыг чижекке дөмейлээн? (1 Коринфичилерге 3:6—9).

⁵ Павел элчин өөреникчилер белеткээр ажылды ногаа-чимис тарыырынга дөмейлээн. Дүжүт алыр дизе, үрезинни чүгле тарып каары чедишпес. «Мен үрезин тарыдым, Аполлос ону суггарып турган, а Бурган өстүрүп каан» деп чугаалааны-биле Павел элчин бодун база Аполлосту шөлде ажылдап турар улуска дөмейлээн. А коринфичилерни ол ногаа-чимис тарып каан шөлге деңнээн. (Номчуптуңар: 1 Коринфичилерге 3:6—9.) «Бис Бурган-биле чаңгыс ажыл-херек кылып» суртаалдап тургаш, үрезиннерни олуртуп турар бис. А библейжи кичээл эрттирип тургаш, оларны суггарып турар бис (Ин. 4:35). Ынчалза-даа ол үрезиннерни Бурган өстүрүп турар деп билип турар бис. Чүге дизе кижилерни Бодунче Ол хаара тудуп турар болгай.

6. Бистиң кижи бүрүзүнде кандыг харыысалга бар?

⁶ Мөңге амыдыралга шын хамаарылгалыг улусту дилеп турар бис (Аж.-ч. 13:48). Кижиге Христостуң өөреникчизи апаарынга дузалаар дээш, аңаа Библиядан алыс шынны: 1) билип алырынга, 2) ону хүлээп аарынга, 3) алган билиглерни ажыглаарынга дузалаар болзувусса эки (Ин. 17:3; Кол. 2:6, 7; 1 Фес. 2:13). Чыышта кижи бүрүзү өөренип турар кижиге Бурганга чоокшулаарынга дузалап болур. Чижээлээрге, ол чыышка кээрге, чылыг-чымчак уткуп болур бис. Ха-дуңмавыска ынакшылды илередип турарывыс-биле аңаа эки чижекти көргүзүп болур бис (Ин. 13:35). Библейжи кичээл эрттирип турар улус өөренип турар улуска шын эвес үзел-бодалдардан болгаш багай чаңчылдардан адырлып алырынга дузалаар дээш, хөй үени болгаш күжениишкиннерни үндүрер апаар (2 Кор. 10:4, 5). Өөренип турар кижи Христостуң өөреникчизи апарып, сугга суктурарынга белен апаарынга чедир хөй айлар негеттинип болур. Ынчалза-даа ол бүгү хилис барбас дээрзинге чигзинмейн барып болур бис!

ӨӨРЕНИКЧИЛЕРНИ БЕЛЕТКЭЭРИНГЕ БИСТИ ЫНАКШЫЛ ОТТУРУП ТУРАР

7. Суртаалдаарынче болгаш өөреникчилер белеткээринче бисти чүү оттуруп турар?

⁷ Суртаалдаарынче болгаш өөреникчилер белеткээр ажылга киржиринче силерни чүү оттуруп турар? Бирээде, Иеговага ынакшыл. Бир эвес силер суртаал ажылынга болгаш өөреникчилер белеткээринге шын сеткилиңер-биле кызып киржип турар болзуңарза, Иеговага ынакшылыңарны ынчаар көргүзүп турар боор силер (1 Ин. 5:3). Мындыг чүүлдүң дугайында боданып көрүңер. Бажыңнар кезип суртаалдаарынче силерни Иеговага ынакшыл оттурган. Ол айтыышкынны күүседири силерге белен турган бе? Чок, боор оң. Эң-не бир дугаар суртаалдаар дээш, эжикти соктапкаш, чүнү миннип турганыңарны сактыр-дыр силер бе? Девидеп турган чадавас силер. Ынчалза-даа силерге суртаалдаарын Иисус дагзып каан деп билип турган болгаш, ону күүседип турган силер. Чоорту суртаал ажылынга киржири силерге берге эвес апарган. А өөреникчилер белеткээр айтыышкынга кандыг хамаарылгалыг силер? Бир кижи-биле библейжи кичээл эрттирер деп бодап келгеш, девидээр-дир силер бе? Чадавас. Ындыг болза улуска библейжи кичээлдер сүмелээринден кортпас кылдыр, Иеговадан дузаны дилеңер. Ынчан Ол силерге өөреникчилер белеткээр ажылга долузу-биле киржир күзелдиг апаарынга дузалаар.

8. Марк 6:34-тен алырга, улустарга алыс шынны өөредиринче оон ыңай бисти чүү оттуруп турар?

⁸ Ийиде, бисти суртаалдаарынче болгаш өөреникчилер белеткээринче улустарга ынакшыл оттуруп турар. Иисус болгаш ооң өөреникчилери-биле болган болуушкунну сактып кээлиңер. Бир хүн суртаалдаан соонда, олар могап-шылааш, ээн озалааш черге дыштанып алыр деп шиитпирлээннер. Ынчалза-даа улус оларны мурнай ол черже чеде берген болган. Иисус оларны көргеш, кээргей бергеш, «хөй чүвеге өөредип эгелээн». (Номчуптуңар: Марк 6:34.) Иисус шылап калган хирезинде, чүге бодун кээргевээн? Чүге дээрге ол улустуң кайы хире берге байдалда турарын көргеш, база оларның идегели чок боорга, дузалажыксай берген. Амгы үеде кижилер шак ындыг берге байдалда — оларның кандыг-даа идегели чок. Сактырга, оларның шупту чүвези эки-даа ышкаш. Ынчалза-даа олар херек кырында кадарчызы чок хойларга дөмей. Бо делегейде улусту, Павел элчин «идегел болгаш Бурган чок амыдырап» чоруур дээн (Эф. 2:12). Ийе, ажыы-биле чугаалаар болза, олар өлүм оруу-биле бар чыдар! (Мф. 7:13). Силерниң чурттап турар чериңерде улуска Бурганның дугайында дыңнаары кайы хире чугулазын боданып көрүңер. Ынчан ынакшыл болгаш кээргээчел чорук оларга дузалажырынче силерни оттурар. А эң эки дуза — оларга Библияны өөренирин сүмелээри-дир.

9. Филипчилерге 2:13-тен алырга, Иегова биске канчаар дузалап болур?

⁹ Библейжи кичээлге белеткениринден база олче үени үндүреринден түвексингеш, улустарга ону сүмелевейн турар чадавас силер. Ындыг болза, Иеговага ооң дугайында ажыы-биле чугаалап бериңер. База Библия өөренир кижини тып алыр күзелдиг апаарынга дузалаар кылдыр, Оон дилеңер. (Номчуптуңар: Филипчилерге 2:13.) Бурганның күзел-соруунга чүүлдештир чүнү-даа дилээр болзувусса, харыылап бээр деп, Библия бисти бүзүредип турар (1 Ин. 5:14, 15). Ынчангаш Иегова өөреникчилер белеткээр күзелди силерге албан оттуруптар деп чигзинмеңер.

ООН ӨСКЕ БЕРГЕЛЕРНИ КАНЧААР АЖЫП ЭРТИП БОЛУР?

10, 11. Чамдык улус чүге библейжи кичээлдер эгелеп алырындан дидинмейн турар?

¹⁰ Библейжи алыс шынга улусту өөредир даалгавыска шыңгыы хамаарылгалыг бис. Ындыг-даа болза, ону долузу-биле кылыр дээривиске, бергелер шаптыктап болур. Ол кандыг бергелерил база ону канчаар ажып эртерил?

¹¹ Белен эвес байдалдар. Назы-харыңар улгады берген азы кадыыңар кошкак болза, COVID-19 үезинде өөренип алган эки чүүлдеривистиң дугайында боданып көрүңер. Библейжи кичээлди, бажыңдан-даа үнмейн, интернет таварыштыр чедиишкинниг эрттирип болур! Оон ыңай база бир эки талазы — хөй улус Библияны өөрениксеп турар, ынчалза-даа бистиң суртаалдап турар үевис оларга эпчок бооп турар. Оларга кара даң бажында азы орай кежээ Библияны өөренири эптиг. Ындыг болганда силер суртаалдаар үеңерни эде көрүп ап шыдаар силер бе? Чижээ, Никодимге дүне када өөренири эптиг боорга, Иисус ону дүне өөредип турган (Ин. 3:1, 2).

12. Өскелерни өөредип шыдаар бис деп бисти чүү бүзүредип болур?

¹² Улусту өөредип шыдавас мен деп бодаары. Улусту өөредириниң бетинде баштай хөй билиглер ап алгаш, дуржулгам бедидип алыр болзумза эки деп, чамдык улус боданып болур. Бир эвес силер база ынчаар чигзинип турар болзуңарза, бо үш чүүлдү боттарыңарга сагындырып чоруңар. Бирээде, Иегова силерни ол ажылды кылып шыдаар деп бүзүреп турар (2 Кор. 3:5). Ийиде, «дээрге база черге бүгү эрге-чагырганы» алган Иисус ол даалганы силерге дагзып каан (Мф. 28:18). Үште, Иегова биле акы-угбалар силерге боттарының дузазын кадар дээрзинге чигзинмеңер. Улусту канчаар өөредирин, чүнү чугаалаарын Иегова Иисуска өөредип каан. Ол амгы үеде бисти база өөредип турар (Ин. 8:28; 12:49). Библейжи кичээлди канчаар эгелеп ап болурун база канчаар эрттирерин удуртукчулардан, дуржулгалыг суртаалчылардан болгаш эгелекчилерден айтырып ап болур. Олар боттарының эрттирип турар библейжи кичээлдеринче силерни чалап алыр кылдыр дилеңер, ынчан арга-дуржулгаңарны бедидип алыр силер.

13. Кандыг чаа аргаларга чаңчыгып өөренир болзувусса эки?

¹³ Чаа аргалар болгаш херекселдер. Амгы үеде библейжи кичээлдерни ооң мурнундаазындан өске кылдыр эрттирер апарган бис. Ам болза бис «Аас-кежиктиг мөңге чуртта!» деп номнуң дузазы-биле улусту өөредип эгелээн бис. Библейжи кичээлге белеткел-даа, ону эрттирер аргалар-даа өскерилген. Ам хөй абзацтар номчувайн, колдуунда хөй үени теманы сайгарарынче үндүрүп турар апарган бис. Оон аңгыда, кичээлдеривиске видеороликтерни, сайтывыстан ном-дептерлерни база JW Library^® деп капсырылганы база немей ажыглаар апарган бис. Бир эвес ол бүгүнү ам-даа ажыглап чаңчыкпаан болзуңарза, арга-дуржулгалыг кижиден дузадан дилеңер. Чаа идикти эгезинде кедерге, эпчок боор. Ооң-биле дөмей, чаа аргаларны ажыглап өөренири эгезинде черле берге. Ынчалза-даа Иегованың болгаш акы-угбаларның дузазы-биле чаа аргаларны ажыглап өөренип алыр силер база библейжи кичээлдерни эрттиргеш, ооң мурнундаазындан-даа артык өөрүшкүнү миннир силер. Бир эгелекчи мынча деп үлешкен: «Чаа арганың дузазы-биле библейжи кичээлдер эрттирерге, өөренип турар кижиге-даа, суртаалчыга-даа солун апарган».

14. Силерниң чериңерде улус алыс шынга тоомча чок болза, чүнүң дугайында сактыры чугула? 1 Коринфичилерге 3:6, 7-де кандыг чугула бодалдар барыл?

¹⁴ Улустуң тоомча чогу. Силерниң чериңерде улус буянныг медээни сонуургавас азы безин силерге удурланып турар чадавас. Ындыг байдалда өөрүшкүвүстү канчаар чидирбейн барып болур бис? Бо делегейде шупту чүве, улустуң байдалы база, дыка дүрген өскерлип турар деп чүүлдү утпаңар. Ооң мурнунда алыс шынга тоомча чок турган улус ону сонуургай берип болур (Мф. 5:3). Безин дептерлеривисти албайн турган улустарга Библияны өөренирин сүмелээрге, чөпшээрежип турар апарган. Оон аңгыда, дүжүт ажаалдазының ээзи — Иегова деп сактып чоруулуңар (Мф. 9:38). Ол бисти үрезинни олурткаш, суггарарын дилеп турар, а ооң өзүлдези дээш Ол Боду харыылаар (1 Кор. 3:6, 7). Амгы үеде библейжи кичээлди эгелеп алыры берге, ындыг-даа бол, Иегова бисти түңнелдеривис дээш эвес, а үндүрген күжениишкиннеривис дээш, шаңнаарb. Ону билири дыка өөрүнчүг!

ӨӨРЕНИКЧИЛЕР БЕЛЕТКЭЭР АЖЫЛДАН ӨӨРҮШКҮНҮ АЛЫҢАР

15. Кажан кижи Библияны өөренирин чөпшээрешкеш, ол өөредиглерниң аайы-биле чурттап эгелээрге, Иегова чүнү миннип турар?

¹⁵ Бир кижи алыс шынны билип алгаш, өскелер-биле үлежип эгелээрге, Иегова аажок өөрүп турар (У. ч. 23:15, 16). Бодунуң кызымак чонун дээрден хайгаарап көргеш, Ол дыка амырап турар! Чижээ, 2020 чылдың хамчык аарыг коронавирус үезинде безин 7 705 765 библейжи кичээлдерни эрттирип турган бис. Түңнелинде 241 994 кижи Иеговага чуртталгазын бараалгадып алгаш, сугга суктуруп алган. А ол акы-угбалар боттарының ээлчээнде чаа библейжи кичээлдерни эрттирип, өөреникчилерни база белеткээр (Лк. 6:40). Өөреникчилер белеткээр ажылга киржип турарывыс-биле Иегованы өөртүп турар бис деп чүүлдү сактып чоруңар.

16. Кандыг сорулгаже чүткүүр болзувусса эки?

¹⁶ Бир кижиге Иеговага ынакшылды өстүрүп база Иисустуң өөреникчизи болурунга дузалаар дээш, хөй күжениишкиннерни үндүрер апаар бис. Ынчалза-даа бистиң дээрде Адавыс бисти Бодунуң деткимчези чокка черле арттырбас. Оода-ла бир библейжи кичээлди тып алгаш, эрттирер деп сорулганы чүге салып ап болбас деп бис? Оон таарымчалыг байдал тургустунуп кээрге-ле, улуска Библияны өөренирин сүмелээр болзувусса, түңнели бисти кайгадып болур. Чугаажок, Иегова бистиң үндүрген күжениишкиннеривисти албан шаңнаар!

17. Библейжи кичээл эрттирип тургаш, кандыг минниишкиннерни миннир бис?

¹⁷ Улуска алыс шынны суртаалдаары база өөредири — биске дыка-ла улуг алдар-хүндү-дүр! Ол даалганы күүсеткеш, кижи ёзулуг аас-кежикти миннир! Фессалоникада дыка хөй улуска Христостуң өөреникчилери апаарынга дузалаан Павел элчин бодунуң минниишкиннерин мынчаар илереткен: «Силер эвес болза, өске кымнар идегеливис, өөрүшкүвүс боорул? Дээргивис Иисус чедип келгеш, шаңнал кылдыр оваадай бээрге, өске кымнарга чоргаарланып болур бис? Ийет, ылап-ла силер — чоргааралывыс болгаш өөрүшкүвүс силер!» (1 Фес. 2:19, 20; Аж.-ч. 17:1—4). Павелдиң ол сөстери-биле амгы үеде дыка хөй акы-угбалар чөпшээрежип турар. Ашаа-биле кады хөй улуска Иегованың сугга суктурган бараалгакчылары апаарынга дузалашкан Стефани мынча дээн: «Бир кижиге Бурганның бараалгакчызы апаарынга дузалашкаш, кижи чүнүң-биле-даа деңнеп четпес өөрүшкүнү миннир».