Кортпаңар! Иегова силерни кагбас

1. Бодувусту чааскаанзыргай кылдыр миннип, берге байдалдан үнер арга чок деп бодап турар болзувусса, биске чүү дузалап болур? (Ырлар 117:5—7).

БЕРГЕЛЕР үезинде бодуңарны чааскаанзыргай кылдыр миннээн силер бе? Хөй кижилер ындыг чүүлге таваржып турар. Ооң аразында Иегованың шынчы Херечилери база бар (3 Хаан. 19:14). Ындыг таварылгада «Сени кажан-даа кагбас мен, сенден кажан-даа ойталавас мен» дээн Иегованың аазаашкынын утпаңар. Ынчан силер дидими-биле: «Мээң дузалакчым — Дээрги-Чаяакчы-дыр, корткан херээм чүл?» — деп чугаалап болур силер (Евр. 13:5, 6). Павел элчин бо сөстерни Иудеяда акы-угбаларга б. э. 61 хире чылда бижээн. Ооң сөстери 117-ги Ырны бижээн авторунуң минниишкиннеринге дөмей. (Номчуптуңар: Ырлар 117:5—7.)

2. Бо статьяга чүнү сайгарар бис база кандыг сорулга-биле?

² Ыр күүседикчизи дег, Павел хууда дуржулгазындан Иегова — ооң Дузалакчызы деп билир турган. Еврейлерге чагаазын бижиириниң мурнунда, ийи чыл ажыг бурунгаар, Павел корабльга чорааш, улуг хат-шуурганга таварышкан (Аж.-ч. 27:4, 15, 20). Ол аян-чоруктуң үезинде болгаш ооң мурнунда чылдарда Иегова Павел элчинге аңгы-аңгы аргалар-биле: 1) Иисус болгаш дээрниң төлээлери; 2) эрге-чагыргалыг кижилер; 3) акы-угбалар таварыштыр дузалажып чораан. Павелдиң чуртталгазындан болуушкуннарны өөренип көөрү Иегованың биске дузалаар дээн аазаашкынынга бүзүреливисти быжыктырар.

ИИСУСТУҢ БОЛГАШ ДЭЭРНИҢ ТӨЛЭЭЛЕРИНИҢ ДУЗАЗЫ

3. Павел чүнүң дугайында боданган чадавас база чүге?

³ Б. э. 56 хире чылда Павел улуг айыылга таварышкан. Ол Бурганның өргээзинге кээрге, мөөң чон ону үндүрүп аппаргаш, өлүрер деп турган. Даартагы хүнде ону Дээди иудей чөвүлелдиң мурнунга эккелген. Дайзыннар ону үзе-чаза соп кааптарынга безин белен болган (Аж.-ч. 21:30—32; 22:30; 23:6—10). Ол үеде Павел: «Ам кайы хире үр шыдажыр мен?» деп боданган чадавас.

4. Иисусту таварыштыр Иегова Павелге канчаар дузалаан?

⁴ Олар Павелге канчаар дузалаан? Туттуруп алган дүнезинде Иисус Павелге мынча дээн: «Павел, дидим бол, чүге дээрге Мээң дугайымда Иерусалимге херечилеп турганың дег, Римге база херечилээр сен» (Аж.-ч. 23:11). Иисус ол сөстерни Павелге дыка таптыг үеде чугаалаан! Павелди Иерусалимге херечилээни дээш мактааш, Римге менди-чаагай четкеш, аңаа база суртаалдаар сен деп, Иисус ону бүзүреткен. Павел ындыг аазаашкынны дыңнааш, бодун адазының холунга айыыл чок кылдыр миннип турар чаш төл ышкаш миннээн.

5. Иегова дээрниң төлээзи таварыштыр Павелге канчаар дузалаан?

⁵ Павел оон өске кандыг шенелдеге таварышкан? Иерусалимге болган болуушкуннар соонда, ийи хире чыл эрткенде, Павелди Италияже чорудупкан. Ооң чораан хемези дыка улуг хат-шуурганга таварышкан. Ында турган улус дириг артарынга безин идегевейн турган. Ынчалза-даа Павел дүвүревээн. Чүге? Павел ону оларга мынчаар тайылбырлаан: «Эрткен дүне мээң мөгейип, бараан бооп чоруурум Бурганның төлээзи меңээ келгеш барды. Ол меңээ: „Павел, кортпайн көр. Императорнуң мурнунга турар ужурлуг сен, ол дээш, Бурган Бодунуң авыралы-биле кады эжиндирип чорууруң бүгү улуска амы-тынны хайырлаар-дыр“ — диди». Иисусту таварыштыр Иегова Павелди Римге айыыл чок чедип аар сен деп бүзүреткени дег, бо удаада база дээрниң төлээзи таварыштыр ону бүзүреткен. Шак-ла ынчаар болган (Аж.-ч. 27:20—25; 28:16).

6. Иисустуң кайы аазаашкынны бисти күш киирип болур? Тайылбырлаптыңар.

⁶ Олар биске канчаар дузалап турар? Иисус Павелди деткээни дег, бисти база деткиир. Ол бодунуң өөреникчилеринге: «Мен кажан кезээде, бо делегейниң төнчүзүнге чедир силер-биле кады мен» — деп аазаан (Мф. 28:20). Бо сөстер бисти деткип турар, чүге дизе бистиң чуртталгавыска аар-берге хүннер туруп болур. Чижээлээрге, чоок киживис чок апаарга, сагыш-сеткиливис хөй чылдар дургузунда аарып-ыстап болур. Кырыыр назын база хөй бергелерни эккээп болур. Ол ышкаш муңгаралга база алзып болур бис. Ынчалза-даа чуртталгавыста эң-не караңгы хүннерни безин ажып эртип шыдаар бис. Чүге дизе Иисустуң «кажан кезээде» бистиң-биле дээн сөстерин сактыр болгай бис (Мф. 11:28—30).

7. Ажыдыышкын 14:6-дан алырга, Иегова биске канчаар дузалап турарыл?

⁷ Иегова бисти дээрниң төлээлери таварыштыр деткип турар деп Бурганның Сөзүнде бижээн (Евр. 1:7, 14). Чижээ, «янзы-бүрү дылдарлыг сөөк-язы, аймак-чон бүгүдезинге» Буянныг Медээни медеглеп турувуста, олар биске дузалап турар (номчуптуңар: Ажыдыышкын 14:6; Мф. 24:13, 14).

ЭРГЕ-ЧАГЫРГАЛЫГ УЛУСТУҢ ДУЗАЗЫ

8. Иегова Павелге эрге-чагыргалыг улус таварыштыр канчаар дузалаан?

⁸ Олар Павелге канчаар дузалаан? Эгезинде чугаалааны дег, б. э. 56 чылда Иисус Павелге Римге эки чедип алырын аазаан. Ынчалза-даа Иерусалимде чамдык иудейлер Павелди өлүрер деп турганнар. Чүс шериг баштыңчызы Клавдий Лисий ооң дугайында дыңнааш, Павелге дүргени-биле дуза кадарын шиитпирлээн. Клавдий Павелди Иерусалимден Кесарияже бүдүн-бүрүн чедирер дээш, ооң-биле кады каш чүс санныг шеригни чоргузупкан. Кесария биле Иерусалим аразы 105 км турган. Аңаа Феликс Павелди «Иродтуң ордузунга хоругдалга тударын дужааган». Ынчалдыр Павел өлүмден камгалаттынган (Аж.-ч. 23:12—35).

9. Фест Павелге канчаар дузалаан?

⁹ Ийи чыл эрткенде, б. э. 58 чылда Павел Кесарияда хоругдалга хевээр турган. Ол үеде Феликстиң орнунга Фест чагырып эгелээн. Иудейлер Павелди Иерусалимче апаргаш, шиидер кылдыр дилээрге, Фест ынавайн барган, чүге дизе олар Павелди «орук ара өлүрүп каарын дугуржуп алганын» ол билип турган чадавас (Аж.-ч. 24:27—25:5).

10. Павел императорнуң шииткелин негээрге, Фест канчалган?

¹⁰ Соонда Павелди шиидер дээш, Фесттиң мурнунга эккелген. «Фест иудейлерге эки кижи бооп көстүр бодаан, ынчангаш ол Павелден: „Сеңээ удур буруудадыышкыннар ёзугаар сени аңаа шиидейн, Иерусалимче баар сен бе?“ — деп айтырган». Ынчалза-даа Иерусалимче баар болза, ону өлүрүп кааптар деп, Павел билир турган. Амы-тынын камгалап, Римге бараалгалын уламчылаар дээш, ол Фестке мынча дээн: «Императорнуң бодунуң шиитпирин негеп тур мен!» Фест бодунуң чөвүлели-биле чугаалашкаш: «Императорнуң шиитпирин негээн болганыңда, императорже чоруур сен» — деп харыылаан. Фесттиң шиитпири Павелдиң амы-тынын камгалаан. Удатпаанда Павелди Римче чоргузупкан. Ооң өлүмүн күзеп турган дайзыннар аңаа хора чедирип шыдавас турган (Аж.-ч. 25:6—12).

11. Исайяның номундан Павел кандыг сөстерни сактып келген чадавас?

¹¹ Павел Италияже баарының мурнунда Иегованың дайзыннарынга хамаарыштыр Исайя медээчиниң чугаалаан сөстерин сактып келген чадавас: «Бодалдарыңар бодап алыңар, ынчалза-даа олар болдунмайн баар; сөзүңер чугаалаңар, ынчалза-даа ол бүтпес, чүге дээрге Бурган бистиң-биле!» (Ис. 8:10). Иегованың дузазынга Павел бичии-даа чигзинмейн турган, ынчангаш келир үеде таваржыр бергелерден ол кортпайн турган.

12. Юлийниң Павелге хамаарылгазы кандыг болган база Павел ооң дугайында чүү деп бодап болур турган?

¹² Удатпаанда Павелди чүс шериг баштыңы Юлий-биле Италияже чоргузупкан. Ам Павелдиң амы-тыны Юлийден хамааржыр апарган. Чүге дизе Юлий ону эки-даа, багай-даа аажылап болур турган. Ынчалза-даа чүс шериг баштыңы канчалган? Эртенги хүнде корабль бир дугаар доктаар черинге туруптарга, «Юлийниң Павелге хамаарылгазы кижизиг болган. Ол Павелдиң хереглээн чүвезин тып берип, сагыш човаашкынын көргүзер дээн эш-өөрүнге баргаш кээр арганы аңаа берген». Юлий Павелдиң амы-тынын безин камгалаан. Канчаар? Оларның эжиндирип чораан хемези улуг айыылга таваржы бээрге, хоругдаттырганнарның чаңгызы-даа дезе бербезин дээш, шериглер оларның шуптузун өлүрер деп шиитпирлеп алган. Ынчалза-даа Юлий «Павелдиң амы-тынын камгалаар дээш, оларның ол сагыжын күүседиринге шаптыктап каан». Павел Юлийниң эки хамаарылгазындан Иегованың дузазын көргени чигзиниг чок (Аж.-ч. 27:1—3, 42—44).

13. Иегова эрге-чагырга ээлээн кижилерге кандыг салдарны чедирип болур?

¹³ Олар биске канчаар дузалап турар? Херек үеде Иегова ыдыктыг сүлдези таварыштыр эрге-чагырга элээн улусту Бодунуң күзел-соруун күүседир кылдыр оттуруп болур. Соломон хаанның угаадыглыг чугаазының бирээзинде мынча дээн: «Дээрги-Чаяакчының холунга хаанның чүрээ — агым суг дег: Ол ону күзээн-не уг-шиинче аксыптар» (У. ч. 21:1). Бо сөстерниң утказы кандыгыл? Агып бар чыдар сугнуң уг-шиин өскертирде, кижилер каналдарны казар. Шак ынчаар Иегова база ыдыктыг сүлдези-биле эрге-чагыргалыг улустуң бодалдарын Бодунуң чонунга ажыктыг кылдыр углап болур. (Деңнеңер: Эзра 7:21, 25, 26.)

14. Ажыл-чорудулга 12:5-те сөстерни херекке ап тургаш, оон аңгыда кымның дугайында мөргүп болур бис?

¹⁴ Бис чүнү кылып болур бис? Кажан «хааннар болгаш эрге-чагырга ээлээннер» Иегованың Херечилеринге хамаарыштыр шиитпирни үндүрер деп баарга, олар дээш мөргүп болур бис (1 Тим. 2:1, 2; Неем. 1:11). Бирги вектиң христианнары дег, хоругдалда олурар акы-угбалар дээш күштүг мөргүп турар бис (номчуптуңар: Ажыл-чорудулга 12:5; Евр. 13:3). Оон аңгыда, Иегова кара-бажыңда охранниктерниң чүрээн чымчадып, Юлийниң Павелди эки аажылааны дег, олар база кады бүзүрээн акы-угбаларывыска чылыг-чымчак хамаарылгалыг боор кылдыр, мөргүп болур бис (Аж.-ч. 27:3).

АКЫ-УГБАЛАРНЫҢ ДУЗАЗЫ

15, 16. Иегова Аристарх биле Луканы таварыштыр Павелге канчаар дузалашкан?

¹⁵ Олар Павелге канчаар дузалаан? Павел Римче бар чыдырда, Иегова аңаа акы-угбалар таварыштыр чаңгыс эвес удаа дузалашкан. Каш чижекти көрүптээлиңер.

¹⁶ Павелдиң шынчы эштери Аристарх биле Лука ооң-биле катай Римче чоруурун шиитпирлээнb. Павелге бодаарга, олар Римге чедир айыыл чок чедип алыр бис деп билбес турганнар. Ынчалза-даа олар бодунуң амы-тынын безин артынга каарынга белен турганнар. Аристарх биле Лука дириг артып каарын чүгле хат-шуурган үезинде Павелден билип алганнар. Олар Кесарияже баар корабльга олуруптарга, ооң-биле кады эрес-дидим акыларны чорутканы дээш, Павел Бурганга сеткилиниң ханызындан четтиргенин илереткен (Аж.-ч. 27:1, 2, 20—25).

17. Иегова Павелге акы-угбалар таварыштыр канчаар дузалааныл?

¹⁷ Римче бар чыткаш, Павел акы-угбаларның дузазын чаңгыс эвес удаа көрген. Сидон хоорайга Юлий Павелге «сагыш човаашкынын көргүзер дээн эш-өөрүнге баргаш кээр арганы аңаа берген». Соонда Павел болгаш ооң кады чораан улузу Путеолы хоорайда акы-угбаларны тып аарга, демгилери чеди хүн хире кады турарын олардан дилээннер. Ол хоорайларда акы-угбалар Павелдиң болгаш ооң кады чораан улузунуң хереглелдерин хандырып турган. А Павел оларны суртаалга болган солун таварылгалары-биле деткип турган. (Деңнеңер: Ажыл-чорудулга 15:2, 3). Бичии дыштанып алгаш, Павел, Аристарх, Лука оруун уламчылааннар (Аж.-ч. 27:3; 28:13, 14).

18. Павел чүге «Бурганга өөрүп четтиргеш, сорук кире берген»?

¹⁸ Римче бар чыда, Павел үш чыл бурунгаар ол чыышка: «Хөй чылдарда күзеп чораан күзелимни боттандырып, силерге дужар бодап тур мен» деп бижээн сөстерин сактып келген чадавас (Рим. 15:23). Ынчалза-даа ол хоругдаттырып алгаш кээр деп безин бодаваан. Римче чоокшулап турда, ону уткуп келген акы-угбаларын көргеш, ол дыка өөрээн. Библияда: «Оларны көргеш, Павел Бурганга өөрүп четтиргеш, сорук кире берген» — дээн (Аж.-ч. 28:15). Эскерип көрүңер даан, Павел Бурганга өөрүп четтиргенин илереткен. Чүге? Чүге дизе акы-угбаларның аңаа көргүскен деткимчезинден ол Бурганның дузазын эскерген.

19. 1 Пётр 4:10-дан алырга, Иегова бисти таварыштыр деткимче хереглээн улуска канчаар дузалап болур?

¹⁹ Бис чүнү кылып болур бис? Хуралда аарып-аржып азы оон-даа өске бергелерге таваржып чоруур, чок болза чоок кижизин чидирип алган кижини билир силер бе? Деткимче хереглеп турар кижини билир болзуңарза, силерниң сөстериңер болгаш ажыл-херээңер аңаа херек дузаны чедирер боор кылдыр, Иеговадан дилеңер. (Номчуптуңар: 1 Пётр 4:10.)c Дузаңарны көргеш, олар: «Сени кажан-даа кагбас мен, сенден кажан-даа ойталавас мен» дээн Иегованың сөстеринден сорук кирип болур. Ол чүүл силерниң чүрээңерге өөрүшкүнү эккелбес деп бе?

20. «Мээң дузалакчым — Дээрги-Чаяакчы-дыр» деп чүге дидими-биле чугаалап болур бис?

²⁰ Павел, Аристарх, Лука ышкаш, бис база хат-шуурган дег бергелерге таваржып болур бис. Ынчалза-даа оон корткан херээвис чок, чүге дизе Иегова бистиң-биле. Ол биске Иисус болгаш дээрниң төлээлери таварыштыр дузалап турар. База херек үеде Иегова эрге-чагырга элээн улус таварыштыр дузаны кадып турар. Оон аңгыда, Иегова ыдыктыг сүлдези-биле хуралда акы-угбаларны бистерге дузалажыр кылдыр оттуруп болур. Ынчангаш бистер Павел дег: «Мээң дузалакчым — Дээрги-Чаяакчы-дыр, корткан херээм чүл: кижи амытан меңээ чүнү кылып шыдаарыл?» — деп дидими-биле чугаалап болур бис (Евр. 13:6).