КИЧЭЭЛ 17

Иисустуң аажы-чаңы кандыг?

Чурук

Иисустуң үлегери кайгамчык. Ооң ажыл-херээн, өөредиглерин билип алгаш, олче база Адазы Иеговаже чоокшулаарын күзей бээр бис. Иисустуң кандыг шынарлары онзагай? Бурганның Оглундан канчаар үлегер алыр бис?

1. Иисус Адазынга чүзү-биле дөмей?

Дээрге миллиард-миллиард чылдар дургузунда Иисус Адазындан ынакшылды канчаар көргүзерин өөренир аргалыг турган. Ооң түңнелинде Иисус угаан-бодалы, минниишкиннери, ажыл-херээ-биле Адазынга дыка дөмей апарган. (Номчуптуңар: Иоанн 5:19.) Ол: «Мени көрген кижи Адамны көрген» — деп чугаалаар эргелиг (Иоанн 14:9). Иисусту эки билген тудум, Бурганның шынарлары силерге улам тода ажыттынар. Чижээ, кижилерге ооң кайы хире ынак чораанын номчааш, Иегова силерге дыка ынак деп билип алыр силер.

2. Иисустуң Иеговага ынакшылы чүден көскү?

Иисус мынча дээн: «Адамга ынаамны бо делегейниң улузу билип алзын дээш... Адамның айыткан чүвезин кылыр мен» (Иоанн 14:31). Иисус кезээде, эң берге байдалдарда безин, Бурганга дыңнангыр бооп, ханы ынакшылын көргүскен. Иисус Ачазының дугайында чугаалаарынга ынак чораан. Канчаар Бурганның өңнүктери апаарының дугайында база тайылбырлап берген (Иоанн 14:23).

3. Иисустуң кижилерге ынакшылы чүден көскү?

Иисуска кижилер онза үнелиг деп, Библия көргүскен (Чугаалар 8:31). Иисус күжүн харамнанмас боорга, кижилер ооң чанынга туруксаар болган. Бурганның күжүнүң ачызында ол хуулгаазыннарны кылып чораан, ынчалза-даа боду база кижилерге дузалаар улуг күзелдиг турган (Марк 1:40—42). Иисус кижилерге эки хамаарылгалыг болгаш, кымны-даа ылгай көрбээн. Ооң сөстери оожургадып, биче сеткилдиг кижилерге идегелди берип турган. Иисус шупту кижилерге ынак, олар дээш хилинчектенип, безин өлүрүнден кортпаан. Ынчалза-даа ооң өөредиглеринге дүүштүр чурттап чоруур улус аңаа оон-даа эргим. (Номчуптуңар: Иоанн 15:13, 14.)

ХАНЫ ШИНЧИЛЕҢЕР

Иисустуң аажы-чаңының дугайында эки билип алыр силер. Канчаар ынакшылдыг, беримчелиг болурун боданып көрүңер.

4. Иисус Адазынга дыка ынак

Бурганга ынакшылды канчаар илередирин Иисустуң үлегер-чижээнден көрүп болур. Лука 6:12 биле Иоанн 15:10; 17:26-ны номчуптуңар. Шүлүк бүрүзүн номчааш, харыылаптыңар:

Иисустан үлегер ап, Иеговага ынакшылды канчаар көргүзүп болур бис?

Иисус мөргүп олурар. — Иисус дээрде Адазынга ынак болгаш, үргүлчү мөргүлге чугаалажыр чораан

5. Иисус кижилерге база эң ынак

Иисуска кижилер бодунуң амыр-дыжындан артык чугула турган. Ол дыка чай чок азы шылап-даа тургаш, кижилерге дузалаар чораан. Марк 6:30—44-тү номчааш, харыылаптыңар:

Бо төөгүде Иисустуң кижилер дээш сагыш човаашкыны чүден көскү? (31, 34, 41, 42 дугаар шүлүктерни көрүңер.)
Кижилерге дузалаарынче Иисусту чүү оттурган? (34 дугаар шүлүктү көрүңер.)
Иисус Адазынга дыка дөмей болганда, бо төөгүден Иегованың дугайында чүнү өөренип алыр бис?
Иисус ышкаш бис база кижилер дээш канчаар сагыш човап болур бис?

Беш быжырган далганны, ийи бичии балыкты муң-муң кижини чемгериптеринге четчир кылдыр Иисус хуулдурупкан. Ооң өөреникчилери эр, херээжен улуска болгаш ажы-төлге чемни үлеп турар.

6. Иисус экииргек, беримчелиг

Иисус эвээш өнчү-хөреңгилиг-даа болза, беримчелиг кижи чораан. Ол бисти база харам эвес болурунга өөредип турар. Ажыл-чорудулга 20:35-ти номчааш, харыылаптыңар:

Иисустуң сөстеринден аарыглыг, аас-кежиктиг болур дизе, чүнү канчаар?

ВИДЕОНУ көргеш, айтырыгга харыылаптыңар:

ВИДЕО: «Алырынга көөрде, бээри — амыр-чыргалдыг» (үзүндү) (4:00)

Бистиң чурттап чоруурувус бөдүүн-даа болза, беримчелиг чорукту канчаар көргүзүп болур бис?

Билир силер бе?

Иисустуң адын таварыштыр Иеговага мөргүүр деп, Библия өөредип турар. (Номчуптуңар: Иоанн 16:23, 24.) Иисустуң адындан мөргүп тургаш, ол чокта Бурганның өңнүктери бооп шыдавас бис деп билип турар бис.

ЧАМДЫК УЛУС МЫНЧА ДЕП БОЛУР: «Бурган бисти каяа тоор деп».