Истеп сүрүүшкүннерге амдыгааштан тура белеткениңер

1. Истеп сүрүүшкүннерге белеткенири чүге чугула?

ИИСУС ХРИСТОС, өлүрүнүң мурнундагы дүне, Иеговага мөргүп тургаш, ооң өөреникчилери болур күзелдиг улустуң шуптузун бо делегейниң улузу көөр хөңнү чок болур дээн (Ин. 17:14). Алыс шынның дайзыннары амдыгаа чедир Бурганның шынчы бараалгакчыларын истеп сүрүп турар (2 Тим. 3:12). Эрликтиң делегейиниң төнчүзү чоокшулаан тудум, удурланыкчыларывыс бисче дам халдаар (Мф. 24:9).

2, 3. а) Коргуушкун дугайында чүнү билип алыры чугула? б) Бо статьяга чүнү сайгарар бис?

² Истеп сүрүүшкүннерге канчаар белеткенирил? Чүге таваржып болурувусту баш удур бодаан херээ чок. Оон башка коргуушкунга болгаш дүвүрелдерге алыскаш, чүнү-даа кылыр харыывыс чок апаар. Шенелделер эгелевээнде-ле, бистиң-биле чүү бооп болурун сагыштаалаар болзувусса, күжүвүс чок каар (У. ч. 12:25; 17:22). Эрликтиң биске удур ажыглап турар чепсээниң эң-не күштүү — коргуушкун-дур (1 Пет. 5:8, 9). Истеп сүрүүшкүннерни ажып эртер күштү кайыын алырыл?

³ Иегова-биле найыралывысты канчаар быжыктырарын база ону чүге соңгаарладып болбазын бо статьяга сайгарар бис. Оон аңгыда мындыг айтырыгларга харыыны билип алыр бис: эрес-дидим болурунга биске чүү дузалаар? Бисти көөр хөңнү чок улуска кандыг хамаарылгалыг болур ужурлуг бис?

ИЕГОВА-БИЛЕ НАЙЫРАЛЫВЫСТЫ КАНЧААР БЫЖЫКТЫРАРЫЛ?

4. Еврейлерге 13:5, 6-дан алырга, чүү чүвеге чигзинмес ужурлуг бис база чүге?

⁴ Иегова силерге ынак база кажан-даа силерни кагбас деп сактып чоруңар. (Номчуптуңар: Еврейлерге 13:5, 6.) Хөй чылдар бурунгаар «Таңныыл суургазынга» мынчаар бижээн: «Бурганны эки билир кижи аар-берге шенелделер үезинде Аңаа бүрүнү-биле бүзүрээр боор». Ол сөстер дыка шын! Истеп сүрүүшкүннерни ажып эртиптер дизе, Иеговага ынак бооп, Аңаа бүрүнү-биле бүзүреп, Ооң ынакшылынга чигзинмес болзувусса эки (Мф. 22:36—38; Иак. 5:11).

5. Иегованың ынакшылын минниринге силерге чүү дузалаар?

⁵ Иегова-биле чоок хамаарылгалыг болур дээш, хүннүң-не Библияны номчуңар (Иак. 4:8). Библияны номчуп тургаш, Иегова кайы хире чылыг-чымчак болгаш ынакшылдыг-дыр, эскерип көрүңер. Бурганның чүнү чугаалап, кылып турганын номчааш, Ооң силерге ынакшылын база сагыш човаашкынын миннирин кызыңар (Хост. 34:6). Бурган оларга ынак деп бүзүрээри чамдык улуска берге, чүге дизе оларга кым-даа, кажан-даа ынак чорбаан. Силер база ындыг минниишкиннерлиг болзуңарза, Иегованың силерге энерелин болгаш буянын канчаар көргүскенин хүннүң-не бижиирин шенеп көрүңер (Ыд. ыр. 77:38, 39; Рим. 8:32). Силерниң-биле болган болуушкуннарны Библияда номчаан чүүлүңер-биле деңнээр болзуңарза, Иегованың силерге кылган буянныг херектериниң кайы хире хөйүн көрүп каар боор силер. Ол бүгүнү үнелээн тудум, Бурган-биле найыралыңар дам быжыгар (Ыд. ыр. 114:1, 2).

6. Ырлар 93:17—19-тан алырга, сагыш-сеткиливисти ажыдып мөргүүрү чүге чугула?

⁶ Үргүлчү мөргүңер. Ачазының чылыг-чымчак куспаанда чаш кижи чүнү миннип турарын сагыштаалап көрүңер даан. Оолчугаш чүүден-даа кортпайн, бодун айыыл чок кылдыр миннип турар болгаш, хүнзедир болган эки-даа, багай-даа болуушкуннарын ачазынга ажыы-биле чугаалап турар. Иегова-биле шак-ла ындыг хамаарылгалыг болуксаар силер бе? Ындыг болза хүннүң-не сеткилиңерниң ханызындан Аңаа мөргүңер. (Номчуптуңар: Ырлар 93:17—19.) Дээрде ынакшылдыг Адаңарга бар-ла коргуушкуннарыңарны болгаш дүвүрелдериңерни чугаалап, «хөңнүңер төп», мөргүңер (Ыы. 2:19). Түңнелинде «улустуң угаап-билиптер шаандан ажа бээр Бурганның амыр-тайбыңын» чүрээңерге миннир силер (Флп. 4:6, 7). Сеткил-сагыжыңарны ажыдып, хөй мөргээн тудум, Иеговага оон-даа чоок апаар силер (Рим. 8:38, 39).

7. Бурган Чагыргазынга хамаарышкан аазаашкыннарын күүседиптер деп чүге ыяк бүзүрээр ужурлуг бис?

⁷ Бурганның Чагыргазының эккээр йөрээлдеринге чигзинмеңер (Сан. 23:19). Бурганның аазаашкыннарынга бүзүрелиңер кошкак болза, Эрликке болгаш ооң талалакчыларынга силерни коргудуп алыры белен болур (У. ч. 24:10; Евр. 2:14—15). Бурганның Чагыргазынга бүзүрелиңерни канчаар быжыктырып ап болур силер? Хууда шинчилел үезинде Бурганның Чагыргазының аазаашкыннарынга хамаарышкан теманы шинчилеп, аңаа чүге бүзүреп болурунуң бадыткалдарын тып алыңар. Ооң дузазы кандыгыл? Бүзүрели дээш, чеди чыл дургузунда кара-бажыңга олурган Стэнли Джоунз акывыстың чижээн көрээлиңерb. Бурганга шынчы артарынга акывыска чүү дузалааныл? Ол мынча дээн: «Бурганның Чагыргазының дугайында билиглер мени быжыктырып турган. Ол Чагырганың барынга хензиг-даа чигзинмээн мен, ынчангаш мени өскээр бүзүредири болдунмас турган». Бурганның аазаашкыннарынга ыяк бүзүрээр болзуңарза, Иегова-биле хамаарылгаңар оон-даа быжыгар, ынчангаш коргушка алыспас силер (У. ч. 3:25, 26).

8. Чыыштарга хамаарылгавыстан чүнү билип ап болур? Тайылбырлаптыңар.

⁸ Чыыштарже доктаамал барыңар. Чыыштарывыс Иеговага чоок болурунга дузалаар. Истеп сүрүүшкүннерни ажып эртип шыдаарывыс чыыштарга хамаарылгавыстан көскү боор (Евр. 10:24, 25). Ындыг-ла чугула эвес чылдагааннар-биле чыыштарны үзүп турар болзувусса, келир үеде, ха-дуңма-биле ужуражыры айыылдыг апаарга, канчаар бис? Хуралдарны үспес кылдыр шыңгыы хөөнненип алыр болзувусса, дайзыннар биске чыглырынга шаптыктаарга-даа, дүжүп бербес бис. Ынчап кээрге, амдыгааштан эгелеп, чыыштарга ынакшылды сайзырадыры чугула. Чыыштарывыска ынак болзувусса, кандыг-даа удурланыышкын, кандыг-даа хоругдал бисти: «Кижилерге эвес, а Бурганга колдадыр чагыртыр ужурлуг бис» дээн дүрүмнү хажыдарынче албадап шыдавас (Аж.-ч. 5:29).

9. Библейжи шүлүктерни доктаадыры — истеп сүрүүшкүннерге белеткенип алыр эки арга деп чүге чугаалап болур?

⁹ Ынак библейжи шүлүктериңерни шээжилеп алыңар (Мф. 13:52). Ону сактып алыры белен эвес-даа болза, Иегова ыдыктыг сүлдези таварыштыр шүлүктерни үезинде сактып кээр кылдыр, силерге дузалаар (Ин. 14:26). Чөөн Германияга чаңгыс кижи олурар камерага чыткан акывыс мынча дээн: «Ооң мурнунда-ла 200 ажыг библейжи шүлүктү доктаадып алганым дыка эки болган! Ол үеде аңгы-аңгы библейжи темалар дугайында боданып олурган мен». Бурганның Сөзүнден шүлүктерниң дугайында ханы боданып турганының ачызында акывыс Иегова-биле чоок хамаарылгазын чидирбейн, Аңаа шынчы арткан.

10. Чүге ырларны доктаадыр болзувусса эки?

¹⁰ Иегованы алдаржыдар ырларны доктаадып, ырлажыңар. Кажан Павел биле Силаны Филиппыга кара-бажыңче суп каарга, олар Бурганны алдаржыдып, ырлажып эгелээннер (Аж.-ч. 16:25). Совет Эвилелинге акы-угбаларывысты Сибирьже шөлүптерге, туруштуг болурунга оларга чүү дузалаан? Мария Федунь дээр угбавыс мынча дээн: «Бистиң ыры номувустан сактып шыдаан-на ырларның шуптузун ырлажып турдувус». Ол ырлар оларны аажок деткип, Иегова-биле быжыг харылзаалыг болурунга дузалаан деп, угбавыс чугаалаан. Ыры номувуста силерни сорук киирер ынак ырларыңар база бар чадавас. Оларны чүге өөренип ап болбас деп? («Дидим болур күштен берем» деп көзенекти көрүңер.)

ООН-ДАА ЭРЕС-ДИДИМ БОЛУРУНГА БИСКЕ ЧҮҮ ДУЗАЛААР?

11, 12. а) 1 Хааннар 17:37, 45—47-ден алырга, Давидке эрес-дидим болурунга чүү дузалааныл? б) Давидтиң чижээ бисти чүү чүвеге өөредип турарыл?

¹¹ Истеп сүрүүшкүннер үезинде эрес-дидим чорук дыка херек. А бир эвес эрес-дидим чорууңар чедишпес болза канчаар? Ёзулуг эрес-дидим чорук кижиниң узун-шыраандан азы салым-чаяанындан хамаарышпас деп утпаңар. Голиафка удур демисежип үнген элээди Давидтиң дугайында боданып көрүңер. Давид, ол шыырак мөгеге бодаарга, хензиг, кошкак болгаш багай чепсегленген ышкаш сагындырган! Ооң селемези безин чок турган. Ындыг-даа болза, ол оолак дыка эрес-дидим болган. Давид кортпайн, туразы улуг дайзынга удур чаалажып үнген.

¹² Ол чүге эрес-дидим болганыл? Иегова ооң-биле кады деп, Давид быжыг бүзүреп чораан. (Номчуптуңар: 1 Хааннар 17:37, 45—47.) Ол бодун улуг-шыырак Голиафка деңневейн, а харын-даа күчүтенниң, Иеговага бодаарга, кайы хире хензиинче кичээнгей салган. Бо таварылгадан чүнү өөренип ап болурул? Иегова бистиң-биле кады база дайзыннарывыс, Аңаа бодаарга, чүү-даа эвес деп бүзүрээр болзувусса, коргушка алыспас бис (2 Чыл. 20:15; Ыд. ыр. 15:8). Ынчалза-даа амгы үеде, истеп сүрүүшкүннер эгелевээнде, эрес-дидим чорукту сайзырадырынга биске чүү дузалаар?

13. Чүнүң ачызында оон-даа эрес-дидим апарып болур бис? Тайылбырлаптыңар.

¹³ Оон-даа эрес-дидим болур дизе, Бурганның Чагыргазының дугайында медээни суртаалдаар херек. Чүге? Суртаал ажылы Иеговага ынанырынга болгаш улустан кортпазынга биске дузалап турар (У. ч. 29:25). Үргүлчү маңнаар кижиниң шыңганнары быжыг болур. Ооң-биле дөмей, бажыңнар кезип, хөй-ниити черлеринге, ажыл-агый девискээринге база, арга тыптып кээрге-ле, суртаалга киржип тургаш, оон-даа эрес-дидим апаар бис. Ынчан бисти хоругдап каар-даа болза, суртаалдаарын соксатпас бис (1 Фес. 2:1, 2).

14, 15. Нанси Юэн биле Валентина Гарновскаяның чижээнден чүнү өөренип ап болур бис?

¹⁴ Кайгамчык быжыг бүзүрелдиг ийи угбавыстың чижээ бисти быжыктырып болур. Коммунистиг Кыдатка чурттап чораан Нанси Юэн угбавыстың дурту 1,5 метр ашпас турган-даа болза, ол эрес-дидими-биле ылгалып турганc. Угбавыска Чагырга дугайында буянныг медээни суртаалдаарын хоруп каан-даа болза, ол дүжүп бербээн. Суртаал дээш ол ниитизи-биле 20 чыл иштинде кара-бажыңга олурган. Юэн угбавысты байысаап турган улус: «Бүдүн Кыдатта сенден артык дедир кижи чок» дижип турган.

¹⁵ Совет Эвилелиниң үезинде Валентина Гарновская угбавысты үш удаа кара-бажыңнаан. Ол аңаа ниитизи-биле 21 чыл эрттиргенd. Ону чүү дээш буруудадып турган? Валентина суртаалдаарын черле соксатпас боорга, суд ону «эң айыылдыг кем-херек үүлгедикчизи» деп санаан. Ол ийи угбавыска эрес-дидим болурунга чүү дузалаан? Иегова олар-биле кады дээрзинге угбаларывыс бичии-даа чигзинмээннер.

16. Ёзулуг эрес-дидим апаарынга биске чүү дузалаар?

¹⁶ Көрген чижектеривистен алырга, бодувустуң күжүвүске болгаш салым-чаяанывыска идегээн херээ чок. Иегова бистиң-биле кады база бистиң талавыска чаалажыр дээрзинге бүзүрээри чугула (Ы. х. к. 1:29, 30; Зах. 4:6). Чүгле ынчалдыр ёзулуг эрес-дидим апаар бис.

УЛУС БИСТИ КӨӨР ХӨҢНҮ ЧОК БОЛЗА КАНЧААР?

17, 18. Иоанн 15:18—21-ден алырга, Иисус бисти чүү деп сагындырганыл? Тайылбырлаптыңар.

¹⁷ Кым-даа болза хүндүткелдиг хамаарылганы күзээр. Ынчалза-даа улус биске ынак эвес болза, «херекчок кижи-дир мен» деп бодаары шын эвес апаар. Иисус мынча дээн: «Кижи амытан Оглу дээш улус силерге көөр хөөн чок болуп, силерни дорамчылаар база үндүр-киир сывыртаар, ат-алдарыңарны бужартадыр болза, ынчан амыр-чыргалдыг силер» (Лк. 6:22). Иисус чүнү чугаалаксааныл?

¹⁸ Христианнар көөр хөңнү чок хамаарылганы күзээр ужурлуг деп, Иисус чугаалаваан. Ындыг-даа болза, бистиң-биле чүү болурун ол чажырбаан. Бис «бо делегейге хамаарышпас» бис, ол ышкаш Иисустуң өөредиглеринге дүүштүр чурттап, Бурганның Чагыргазының дугайында суртаалдап турар бис. Ынчангаш бо делегей бисти көөр хөңнү чок. (Номчуптуңар: Иоанн 15:18—21.) Биске эң-не чугула чүүл — Иегованы өөртүрү. Дээрде Адавыска ынак боорувуска, улус бисти көрбес болза, хөлүн эрттир муңгараан херээ чок.

19. Элчиннер биске кандыг үлегерни көргүскенил?

¹⁹ Улус чүнү-даа чугаалаза, чүнү-даа кылза, чүдүлгеңерден кажан-даа эпчоксунмаңар (Мих. 4:5). Кижилерден кортпас дээш, Иисустуң шаажылалының соонда элчиннерниң Иерусалимге кылып турган чүүлүнүң дугайында боданыңар. Элчиннер иудей шажын башкарыкчыларының оларга кайы хире көөр хөңнү чогун билип турган (Аж.-ч. 5:17, 18, 27, 28). Ынчалзажок олар хүн бүрүде Бурганның өргээзинче баарын уламчылап, боттарын Христостуң өөреникчилери деп чажырбайн, ажыы-биле суртаалдап турганнар (Аж.-ч. 5:42). Олар коргушка алыспааннар. Кады ажылдап турар улузувуска, чаңгысклассчыларывыска болгаш кожаларывыска, чажырбайн, Иегованың Херечилери бис деп ажыы-биле чугаалаар болзувусса, коргуушкунну тиилеп шыдаар бис (Аж.-ч. 4:29; Рим. 1:16).

20. Улус элчиннерни көөр хөңнү чок турган-даа болза, олар өөрүшкүзүн чүге чидирбээнил?

²⁰ Улус элчиннерни чеже-даа көөр хөңнү чок болза, олар өөрүшкүзүн чидирбээннер. Улустуң багай хамаарылгазының чылдагаанын олар билир болгаш, Иегованың күзел-соруун күүседип турары дээш хинчектенип чоруурунга чоргаарланыр турган (Лк. 6:23; Аж.-ч. 5:41). Пётр элчин сөөлзүредир мынча деп бижээн: «Чөптүг-шынныг чорук дээш хилинчек көрүп-даа турзуңарза, херек кырында амыр-чыргалдыг силер» (1 Пет. 2:19—21; 3:14). Улус бисти шын алдынып чоруурувус дээш көрбес. Ону эки билип турар болзувусса, кажан-даа коргушка алыспас бис.

БЕЛЕТКЕЛДИҢ АЖЫКТЫЫ

21, 22. а) Истеп сүрүүшкүннерге белеткенип алыр дээш, чүнү канчаарын шиитпирлеп алдыңар? б) Дараазында статьяга чүнү сайгарар бис?

²¹ Бисти истеп сүрүүшкүннер кажан хөме ап кээрин азы Иеговага чүдүүрүн кажан хоруп кааптарын билбес бис. Ындыг-даа болза, амдыгааштан эгелеп, аңаа белеткенири чугула деп билир бис. Иегова-биле найыралды быжыглап, эрес-дидим чорукту сайзырадып, көөр хөөн чок хамаарылгага таварышкаш-даа, өөрүшкүлүг артып өөренир болзувусса, шенелделерге белен боор бис.

²² А бир эвес чурттап турар черивисте чүдүлгевисти хоруп каан болза канчаар? Хоругдал үезинде Иеговага бараалгаарынга дузалаар библейжи дүрүмнерни дараазында статьяга сайгарар бис.