КИЧЭЭЛ 37
Ажыл-агый, акша-төгерик дугайында Бурганның Сөзүнде чүнү чугаалаан?
Ажыл-агый азы акша-көпеек дээш дүвүрээн силер бе? Иеговага чүдүлгевис-биле ажыл-агыйывысты таарыштырып алыры чамдыкта амыр эвес. Библияда аңаа хамаарыштыр ажыктыг сүмелер бар.
1. Ажылга хамаарыштыр Библияда чүү дээнил?
Иегова үргүлчү ажылдап турар. Бисти база ажылдан өөрүшкүнү алзын деп күзээр. «Кижиге аштанып-чемнениринден болгаш бодунуң ажыл-ижинге сагыш ханып, сеткилин өөртүрүнден дээре чүве чок» — деп Библияда бижээн (Экклесиаст 2:24). Оон үлегер ап, ажылывысты шынарлыг кылыр болзувусса, Бурганны өөртүп, өөрүшкүнү миннир бис.
Ажылдаары чугула, ынчалза-даа ол чүдүлгевистен чугула болбас ужурлуг (Иоанн 6:27). Бирги черге Иегованы салыр болзувусса, бүгү херек чүүлдү бээрин Ол аазаан.
2. Акша-төгерикке шын хамаарылга кандыгыл?
Камгалалды акша бээр-даа болза, аас-кежик чүгле оон хамаарышпазын Бижилгеде чугаалаан (Экклесиаст 7:12). «Бар чүвеңерге сеткил ханыңар» — деп ында сүмелээн. (Номчуптуңар: Еврейлерге 13:5.) Ол сүме хөй эт-сеп чыырындан, херекчок өрелерден, акша салып ойнаарындан база дүрген байыыр аргаларның айыылындан бисти камгалап турар (Чугаалар 22:7).
3. Канчаар беримчелиг болур бис?
Иегова — беримчелиг Бурган. Оон үлегер алыр улус «экииргек... өске улус-биле эртине-байлаан үлежиринге белен» (1 Тимофейге 6:18). Чыыштың хереглелдери дээш өргүл салып, дуза хереглээн улуска, ылаңгыя акы-угбаларга дузалап болур бис. Өргүлдү сеткилинден кылыры чугула болганда, беримчелиивис-биле Иегованы өөртүп, аас-кежикти миннир бис. (Номчуптуңар: Ажыл-чорудулга 20:35.)
ХАНЫ ШИНЧИЛЕҢЕР
Бар чүвезинге сеткил ханып, ажылга шын хамаарылганы сайзырадырын көрээлиңер.
4. Ажылыңар Иегованы алдаржытсын
Иегова-биле найыралывыс ажыл-агыйывыска салдарлыг болур ужурлуг. ВИДЕОНУ көргеш, харыылаптыңар:
Джейсоннуң ажылынга хамаарылгазындан чүү сеткилиңерге таарышты?
Өске чугула херектери-биле ажылын шын тургузуп алырынга аңаа чүү дузалаан?
Колосчуларга 3:23, 24-тү номчааш, харыылаптыңар:
Ажылывыска хамаарылгавыс чүге чугула?
Ажыл чугула, ынчалза-даа Иеговага чүдүлгевистен чугула болбас ужурлуг
5. Бар чүвезинге сеткил ханары — камгалал
Улус хөй акша ажылдап алыр дээш кызып чоруур, а Библия оон-даа эки чүүлдү сүмелеп турар. 1 Тимофейге 6:6—8-ти номчааш, харыылаптыңар:
Ыдыктыг Бижилге чүнү сүмелеп турар?
Аас-кежик эт-хөреңгивистен хамаарышпас. ВИДЕОНУ көргеш, айтырыгга харыылаптыңар.
Чуртталгазы бөдүүн-даа болза, ол өг-бүлелер чүге аас-кежиктиг?
Эт-севивис хөй хирезинде-ле оон хөйнү күзеп турар болзувусса канчаар? Иисус ындыг хөөннүң айыылын көргүскен сагындырыглыг төөгүнү чугаалаан. Лука 12:15—21-ни номчааш, харыылаптыңар:
Бо төөгүде кандыг кичээл бар? (15 дугаар шүлүктү көрүңер.)
Чугаалар 10:22 биле 1 Тимофейге 6:10-ну деңнээш, айтырыгларга харыылаптыңар:
Иегова-биле найыралдың болгаш хөй акшаның кайызы чугула?
Хөй акша сүрүп чоруур улус кандыг бергелерге таваржып турар?
6. Хереглелдеривисти Иегова хандырар
Ажылга азы акшага бергедежи бээривиске, Иеговага бүзүреливис хынаттына бээр. Ындыг байдалда чүнү канчап болурун ВИДЕОДАН көрүңер. Оон айтырыгларга харыылаптыңар.
Акывыс кандыг бергелерге таварышкан?
Ол нарын байдалда акывыс канчаар хөделген?
Матфей 6:25—34-тү номчааш, харыылаптыңар:
Чуртталгазында Иегованы кол деп санап чоруур улуска Ол чүнү аазап турар?
ЧАМДЫК УЛУС МЫНЧА ДЕП БОЛУР: «Өг-бүлемни азыраар дээш, хөй ажылдаар ужурлуг мен. Неделя санында чыыштар барып шыдавас мен».
Иеговага бараалгалды чуртталгада эң чугула кылыры — эң дээре шиитпир деп, силерни кандыг библейжи шүлүктер бүзүредир-дир?
КОЛ БОДАЛ
Ажыл-агый база акша-көпеек херек, ынчалза-даа ол бисти Иеговага бараалгаарындан чардыктырбас ужурлуг.
Катаптаашкын
Ажылга шын хамаарылгалыг болурунга силерге чүү дузалаар?
Бар чүвезинге сеткил ханары чүге камгалал?
Иегованың сагыш човаар дээн аазаашкынынга бүзүрелиңерни канчаар көргүзүп болур силер?
НЕМЕЛДЕ
Библия акша-төгерикти каржы-бактың дөзү деп өөредип турар бе?
«Акша-төгерик шынап-ла каржы-бактың үнер дөзү бе?» (веб-статья)
Бурганны өөртүр дээш акшаны канчаар ажыглап болурун номчуп көрүңер.
«Беримчелиг чорукка хамаарыштыр Бижилгеде чүнү чугаалааныл?» (веб-статья)
Акша салыр оюннар кем чок бе?
«Библияның көрүжү. Акша салыр оюннар» («Оттуп келиңер!» март, 2015 чыл)
Акша салып мөлчүп ойнап чораан кижи чуртталгазын канчаар долузу-биле өскертип алганын номчуңар.
«Аът чарыжынга дыка ынак турган мен» («Таңныыл суургазы» ноябрь 1, 2011 чыл)