Ажылдаар-даа, дыштаныр-даа үе өйлүг-шактыг боор

1. Хөй улустуң ажыл-агыйга хамаарылгазы кандыгыл?

СИЛЕРНИҢ чурттап турар чериңерде улустуң ажыл-агыйга хамаарылгазы кандыгыл? Хөй чурттарда улус кара даң бажындан орай дүнеге дээр ажылдаар апарган. Олар хөй ажылдаар дээш, өг-бүлезинче-даа, дыштанырынче-даа, чуртталганың ужур-утказының дугайында боданырынче-даа үе тыппас (Эккл. 2:23). А чамдык улус ажылдаарынга ынак эвес. Олар ажылдавас дээш, кандыг-даа чылдагаанны тып алыр (У. ч. 26:13, 14).

2, 3. Иегова биле Иисус ажыл-агыйга кандыг хамаарылгалыг?

² Иегова биле Иисустуң ажыл-агыйга хамаарылгазы, бо делегейде улуска бодаарга, көңгүс өске. Иегова ажылдаарынга ынак деп билир бис. Иисус: «Мээң Адам үргүлчү ажылдаар-дыр, Мен база ынчаар кылыр ужурлуг мен» дээни-биле ону тода көргүскен (Ин. 5:17). Бурган эңмежок дээрниң төлээлерин болгаш эгээртинмес Октаргайны чаяар дээш, кайы хире хөй ажылды кылган-дыр, бодап көрүңер даан! А чер кырында кайгамчык чараш чаяалгалар чеже-дир! Ыр күүседикчизиниң: «Дээрги-Чаяакчы, Сээң ажыл-херектериңниң хөй деп чүвезин! Бүгү чүүлдерни мерген угааның-биле чаяап каан сен, олар чер-делегейни дола берген!» — деп чугаалааны кончуг шын (Ыд. ыр. 103:24).

³ Иисус Адазын өттүнүп чораан. Угаадыглыг чугаалар номундан алырга, Бурган «дээрлерни тургузуп турда», Ооң чанынга турган «мерген угаан» Иисусту илередип турар. Ол Иегованың шевер «тудугжузу» турган (У. ч. 8:27—31). Ооң соонда Иисус чер кырынга келгеш, Иегованың берген даалгазын база дыка эки күүсеткен. Ол даалганы күүседири Иисуска, аъш-чем дег, өөрүшкүнү эккеп турган. Ол ышкаш ооң черге бүгү чуртталгазы ону Бурган чоргускан деп бадыткап турган (Ин. 4:34; 5:36; 14:10).

4. Иегова биле Иисус дыштанылгага кандыг хамаарылгалыг?

⁴ Иегова биле Иисус үргүлчү ажылдап турар болганда, бис база дыш чокка ажылдаар ужурлуг бис бе? Чок, болбайн. Иегова кажан-даа шылавас, ынчангаш Ол, кижилер дег, дыштанмас. Библияда: «Дээрги-Чаяакчы алды хүн дургузунда чер биле дээрни чаяагаш, чедиги хүнде сагыш амыр дыштанган болгай» — дээн (Хост. 31:17). Ол дээрге Иегова шупту чүвени чаяап доозупкаш, кылган ажыл-ижинге аажок таарзынган дээни ол. Иисус черге бараалгап тургаш, дыка хөйнү кылыр ужурлуг турган-даа болза, ол эш-өөрү-биле чемненип, дыштанырын утпайн чораан (Мф. 14:13; Ин. 12:2).

5. Хөй улуска чүнү таарыштырары берге?

⁵ Библия Бурганның бараалгакчыларын чалгаа болбайн, кызып ажылдаарынче оттуруп турар (У. ч. 15:19). Бистиң хөй кезиивис, өг-бүлезин хандырар дээш, ажылдап турар. Оон аңгыда бис шуптувус Христостуң өөреникчилери болганывыста, суртаал ажылынга киржип чоруур бис. Ынчалза-даа эки дыштаныры база чугула. Ажылды, Бурганга бараалгалды болгаш дыштанылганы шын таарыштырары силерге берге боор-дур бе? Ажылче болгаш дыштанырынче кайы хире үени үндүрерин канчап билип алырыл?

АЖЫЛГА БОЛГАШ ДЫШТАНЫЛГАГА ШЫН ХАМААРЫЛГА

6. Иисус ажылга болгаш дыштанылгага шын хамаарылгалыг турган деп, Марк 6:30—34-те бижээн таварылга канчаар көргүзүп турар?

⁶ Ажылга шын хамаарылгалыг болуру чугула. Соломон хаан ыдыктыг сүлдеге бүргеткеш, мынча дээн: «Бүгү чүве өйлүг-шактыг база... бүгү-ле чүүлге үе турар». Оон ыңай ол: «Тарыыр-даа... тудуп кылыр-даа... ыглаар-даа... каттырар-даа... хөглээр-даа үе турар» — дээн (Эккл. 3:1—8). Ажыл биле дыштанылга — чуртталгавыстың чугула кезээ-дир. Иисус ол ийи чүүлге шын хамаарылгалыг чораан. Бир катап элчиннер «чемненир безин хос-чай тывылбас» кылдыр суртаалдаан соонда, Иисус оларга: «Ээн черже аңгыланып чоруптаалыңар, аңаа кезек дыштанып алыр силер» — дээн. (Номчуптуңар: Марк 6:30—34.) Иисустуң болгаш ооң өөреникчилериниң күзээни дег дыштаныр аргазы кезээде турбаан-даа болза, дыштаныры чугула деп, Иисус билип турган.

7. Амыр-дыш хүнүнүң дугайында сайгарылга биске чүзү-биле ажыктыг болур?

⁷ Үе-үе болгаш-ла, дыштанып азы өске херектерже чардыгар болза эки. Бо чүүл Бурганның израильчилерге шаанда берген Хоойлузунуң чугула кезээ турган амыр-дыш хүнүнден көскү. Амгы үеде Моисейниң хоойлузун сагывайн турар бис. Ындыг-даа болза, амыр-дыш хүнүнге хамаарыштыр берген айтыышкыннарны билип алыры биске ажыктыг болур. Ол чүүл ажылга болгаш дыштанылгага хамаарылгавысты хынаарынга дузалаар.

АМЫР-ДЫШ ХҮНҮ — БУРГАНГА БАРААЛГААР БОЛГАШ ДЫШТАНЫР ҮЕ

8. Хосталыышкын 31:12—15-тен алырга, амыр-дыш хүнүн чүү дээш аңгылап каан турган?

⁸ Библиядан алырга, «Бурган Бодунуң бүгү ажыл-херээн дооскаш», чедиги «хүнде» черге чүнү-даа чаяаваан (Э. д. 2:2—3). Иегова ажылга ынак болгаш, Ол амдыгаа чедир өске ажылдарны дөмей-ле кылып турар (Ин. 5:17). Израильчилерниң сагып чорааны амыр-дыш хүнү Эге дөсте бижээн Иегованың амыр-дыш хүнүнден үлегерлеттинген. Амыр-дыш хүнү израиль чон биле Бурганның аразында «тускай бадыткал демдээ» турган. Ол хүн «Дээрги-Чаяакчыга бараалгаткан онзагай амыр-дыш хүнү» апарган. (Номчуптуңар: Хосталыышкын 31:12—15.) Ол хүнде кымга-даа, ооң санында ажы-төлге, чалчаларга, безин мал-маганга, ажылдаары хоруглуг турган (Хост. 20:10). Ооң ачызында израильчилер Бурган-биле найыралын быжыктырарынче оон-даа хөй үени үндүрүп болур турган.

9. Иисустуң үезинде амыр-дыш хүнүнге хамаарыштыр кандыг шын эвес бодалдар турган?

⁹ Бурганның чонунга амыр-дыш хүнүнүң дугайында Хоойлу ажыктыг турган. Ынчалза-даа Иисус Христостуң үезинде шажын башкарыкчылары ол хүнге хамаарыштыр эмин эрттир шыңгыы көрүштүг турган. Олар безин тараа бажын үзе согарын азы аараан кижини экиртирин хоойлуга удур чүүл деп санаар турган (Мк. 2:23—27; 3:2—5). Оларның көрүжү көңгүс Бурганныы дег эвес турган. Иисус билип алыксаан улуска ону тайылбырлап турган.

10. Матфей 12:9—12-ден алырга, Иисустуң амыр-дыш хүнүнге хамаарылгазы кандыг турганыл?

¹⁰ Иисус болгаш ооң иудей эдерикчилери Моисейниң хоойлузунга башкартып чорааннар, ынчангаш олар амыр-дыш хүнүн сагып турганb. Ынчалза-даа Иисус амыр-дыш хүнүнге хамаарылга шын болур ужурлуг деп айтып, ол хүнде улуска дузалап болур деп көргүскен. Иисус дорт мынча дээн: «Ындыг болганда, амыр-дыш хүнүнде буян кылырын чөпшээрээн-дир». (Номчуптуңар: Матфей 12:9—12.) Амыр-дыш хүнүнде буянныг ажыл-херектер кылырын хоойлуга удур чүүл деп, ол санавайн турган. Иисустуң ажыл-херектеринден алырга, Бурган чонунга амыр-дыш хүнүн чүү дээш сагыырын айытканының кол чылдагаанын ол билип турган. Израильчилер ол хүнде хүн бүрүнүң ажыл-херээнден дыштанып, Бурган-биле найыралын быжыктырып ап турган. Иисус амыр-дыш хүнүн сагып чораан өг-бүлеге өзүп келген. Ооң шынныын Иисустуң төрээн хоорайынга болган чүүлден көрүп болур. Лука номунда: «Иисус Бодунуң өзүп-доруккан хоорайы Назаретке чедип келген. Бир-ле катап Ол Бодунуң чаңчыккан аайы-биле амыр-дыш хүнүнде синагогага кирип келгеш, Бижилгени номчууру-биле улус мурнунга туруп алган» — деп бижээн (Лк. 4:15—19).

АЖЫЛ-АГЫЙГА ХАМААРЫЛГАҢАР КАНДЫГЫЛ?

11. Иисусту ажыл-агыйга кызымак хамаарылгалыг болурунга кым өөредип турган?

¹¹ Иосиф Иисуска бызаңчы мергежилди өөредип тургаш, ажыл-агыйга Бурганның ышкаш хамаарылгалыг болурунга аңаа дузалап турган (Мф. 13:55, 56). Иосифтиң хүнден хүнче өг-бүлезин азыраар дээш, кайы хире кызып ажылдап турарын Иисус көрүп чораан. Солун чүүл, соонда Иисус өөреникчилеринге: «Ажылдаан кижи төлевир алырынга төлептиг болур» — дээн (Лк. 10:7). Чугаажок, кызымак ажылдаары деп чүл ол дээрзин Иисус эки билир турган.

12. Павелдиң ажылга хамаарылгазы кандыг библейжи шүлүктерден көскү?

¹² Павел элчинниң дугайында база ынча деп болур. Иисустуң адының болгаш ооң медээзиниң дугайында чарлаары — ооң кол ажылы турган. Ынчалзажок Павел бодун хандырар дээш, ажылдап чораан. Фессалоникчилер ооң кымга-даа «аартык болбас дээш, дүне-хүндүс дивейн, карак кызыл ажылдап» чораанын билир турган (2 Фес. 3:8; Аж.-ч. 20:34, 35). Павел мында майгыннар даараарының дугайында чугаалаан чадавас. Ол Коринф хоорайга Акила биле Прискилланың бажыңынга чурттап, олар-биле кады майгыннар даарап турган. Павелдиң «дүне-хүндүс дивейн» дээн сөстери ооң ажылче бажы-биле кире бергенин айытпайн турар. Чижээ, ол амыр-дыш хүннеринде ажылдавайн турган. Ооң ачызында Павел ол хүнде дыштанып турган иудейлерге суртаалдап турган (Аж.-ч. 13:14—16, 42—44; 16:13; 18:1—4).

13. Павелдиң чижээ бисти чүге өөредип турар?

¹³ Павел элчин биске эки үлегерни арттырган. Ол ажылдап чораан. Безин Иегова ону мынчаар бижииринче оттурган: «Кым ажылдаар хөңнү чогул, ол чем чивезин!» (2 Фес. 3:10). Ындыг-даа болза, ол «Бурганның Буянныг Медээзин суртаалдаар ыдыктыг ажылга» доктаамал киржир дээш кызып чораан (Рим. 15:16; 2 Кор. 11:23). Павел өске улусту база ону кылырынче деткип турган. Чижээ, ол коринфичилерге: «Дээрги-Чаяакчының даандырган ажыл-херээнге бүгү бодуңарны бараалгадыңар» — дээн (1 Кор. 15:58; 2 Кор. 9:8). Оон ыңай ол Акила биле Прискилланы «Христос Иисуска башкарткаш, Аңаа бараан бооп келген өөрүм» деп адаан (Рим. 12:11; 16:3).

14. Иоанн 14:12-де бижээн Иисустуң сөстериниң утказы кандыгыл?

¹⁴ Бо сөөлгү хүннерде кылыр эң чугула ажыл — суртаалдаары биле чаа өөреникчилер белеткээри-дир. Иисус ооң өөреникчилери бодундан-даа артык улуг ажыл-херектерни кылыр деп баш удур чугаалаан! (Номчуптуңар: Иоанн 14:12.) Бис, Иисус ышкаш, хуулгаазыннарны кылып шыдавас болгай бис. Ынчаарга ол чүнү чугаалаксааныл? Иисустуң сөстери-биле алырга, ооң эдерикчилери бүгү делегейге суртаалдап, дыка хөй өөреникчилерни белеткеп, ол ажылды элээн үр үе дургузунда кылыр.

15. Бодувуска кандыг айтырыгларны салыр болзувусса эки база чүге?

¹⁵ Ажылдап турар болзуңарза: «Мени улус кызымаккай ажылчын деп билир бе? Ажылымны шынарлыг кылдыр, өй-шаанда кылып турар мен бе?» деп бодуңардан айтырыңар. «Ийе» деп харыылаан болзуңарза, даргаңарның бүзүрелин чаалап алыр силер. Оон аңгыда кады ажылдап турар улузуңар буянныг медээни күзелдии-биле дыңнаар боор. Ам мындыг айтырыгларны салып көрүңер: «Мени улус кызымаккай суртаалчы деп билир бе? Улус-биле чугаалажырынга эки белеткенип турар мен бе? Алыс шынны сонуургаан улусче дораан барып турар мен бе? Бараалгалдың аңгы-аңгы хевирлеринге киржип турар мен бе?» «Ийе» деп харыылаан болзуңарза, суртаал ажылындан өөрүшкүнү алыр силер.

ДЫШТАНЫЛГАГА ХАМААРЫЛГАҢАР КАНДЫГЫЛ?

16. Иисус биле ооң элчиннериниң дыштанылгага хамаарылгазы амгы үеде улустан чүзү-биле ылгалып турар?

¹⁶ Иисус бодунга-даа, элчиннеринге-даа, үе-үе болгаш-ла, дыштаныры чугула деп билип турган. Бирги векте дег, амгы үеде хөй улус Иисустуң чугаалаан угаадыглыг чугаазында «чыргап-таала, ижип-чи база хөгле» дээн бай кижиге дөмей (Лк. 12:19; 2 Тим. 3:4). Ол кижи чүгле дыштанып, чыргап-таалаарын бодаар турган. А Иисустуң болгаш ооң элчиннериниң чуртталгазынга чыргал-таалал биле дыштанылга кол турбаан.

17. Ажылдан хостуг үевисти канчаар ажыглап турар бис?

¹⁷ Ажылдан хостуг үевисти чүгле дыштанылгаже эвес, а суртаал ажылынче болгаш чыыштарже үндүрүп тургаш, Иисустуң үлегерин эдерерин кызып чоруур бис. Өөреникчилер белеткээр ажыл биле чыыштарже баары биске эргежок чугула. Ол ыдыктыг ажыл-херектерже үевисти үргүлчү үндүрер дээш, бар шаавыс-биле кызып турар бис (Евр. 10:24, 25). Шөлээ үезинде безин өөренген аайывыс-биле бараалгап, каяа-даа чорааш, чыыштарже барып, улус-биле Библия дугайында чугаалажыр аргаларны дилеп чоруур бис (2 Тим. 4:2).

18. Иисус Христос Хаанывыс биске чүнү күзеп турар?

¹⁸ Иисус Христос Хаанывыс бистен болдунмас чүвени манавайн, ажыл биле дыштанылгага шын хамаарылгалыг болурунга өөредип турары дээш, дыка өөрүүр-дүр бис! (Евр. 4:15). Дыштанылгаже чогуур үени үндүреривисти ол күзеп турар. Ындыг-даа болза, бодувусту акша-төгерик-биле хандырып тургаш база өөреникчилер белеткээр ажылга өөрүшкүлүг киржип тургаш, кызып ажылдаарывысты ол күзеп турар. Дараазында статьяга бачыттың кулданыындан бисти хостаарынга Иисустуң ролюн сайгарар бис.