Бурганның берип турар эртине-байлаан үнелеңер

1, 2. а) Иегова кандыг эртине-байлакты биске белекке бергенил? б) Бо статьяга чүнү сайгарар бис?

БҮДҮН Октаргайда Иеговадан бай кым-даа чок (1 Чыл. 29:11, 12). Иегова — беримчелиг Ада-дыр. Ол бодунуң үнелиг эртине-байлаан ооң үнезин билип турар улуска харам чокка берип турар. Ол дээш Аңаа аажок өөрүп четтирип турар бис! Ындыг эртине-байлакка: 1) Бурганның Чагыргазы, 2) боттарывыстың болгаш өскелерниң амы-тыны хамааржып турар бараалгалывыс, 3) Бурганның Сөзүнден үнелиг алыс шын хамааржып турар. Ынчалзажок ол эртине-байлак дээш өөрүп четтирген хөөнүвүстү чидирип ап болур айыыл бар. Ынчан оларны үнелевейн баар бис. Ындыг чүүл болбазын дээш, оларны үнелеп, ол чүүлдерге ынакшылывыс өже бербезин дээш хайгаараар ужурлуг бис. Иисус: «Силерниң эртине-байлааңар кайда болдур, чүректериңер база ында болур» — дээн (Лк. 12:34).

² Бо статьяга Бурганның Чагыргазы дээш, ол ышкаш бараалгал биле алыс шын дээш өөрүп четтиргенивисти канчаар сайзырадып база кадагалап болурувусту сайгарар бис. Ол эртине-байлакка оон-даа күштүг ынак болурунга силерге чүү дузалап болурун боданып көрүңер.

БУРГАННЫҢ ЧАГЫРГАЗЫ ДЫКА ААР ӨРТЕКТИГ АК ШУРУГА ДӨМЕЙ

3. Иисустуң угаадыглыг чугаазындан садыгжы ак шуруну садып алыр дээш, чүнү канчалганыл? (Статьяның эгезинде чурукту көрүңер.)

³ Матфей 13:45, 46-ны номчувут. Иисус ак шурулар дилеп чораан садыгжының дугайында угаадыглыг чугаа чугаалаан. Ол садыгжы хөй чылдар дургузунда чүс-чүс янзы-бүрү ак шуруларны садып-саарып чораан. Бир катап ол кайгамчык чараш ак шуруну тып алган. Чаңгыс ону көрүпкеш безин, ооң чүрээ өөрүшкүден хөлзеп турган. Ону садып алыр дээш, ол бар-ла чүвезин садыптар ужурга таварышкан. Садыгжы ону ол хире бедик үнелээн!

4. Бурганның Чагыргазын, садыгжының ак шуруну үнелеп турганы дег, үнелээр болзувусса, ол чүүл бисти чүүже оттурар?

⁴ Бо угаадыглыг чугаадан чүнү өөренип алыр бис? Бурганның Чагыргазының дугайында алыс шын шак ындыг үнелиг ак шуруга дөмей. Бис ону, садыгжының ак шуруну үнелеп турганы дег, үнелээр болзувусса, ооң албатылары болурунга шаптыктаптар чүүлдерден ойталаарынга белен боор бис. (Марк 10:28—30 номчувут.) Шак ынчаар кылган ийи кижиниң үлегерин көрээлиңер.

5. Бурганның Чагыргазы дээш, Закхей чүнү кылырынга белен турган?

⁵ Закхей үндүрүг хавырыкчыларының даргазы турган. Ол улусту мегелеп тургаш, акша хавырып ап турганының ачызында байый берген (Лк. 19:1—9). Ынчалзажок ол бузурукчу кижи Иисустуң Чагырга дугайында медээзин дыңнаан соонда, ооң үнезин билип кааш, өскерлип алырын күзей берген. Закхей Иисуска: «Эт-хөреңгимниң чартыын ам ядыыларга үлеп бериптейн, а бир эвес кандыг-бир кижиден артыкка мегелеп алган болзумза, оон дөрт катап хөйнү дедир эгидип берейн!» — деп чугаалаан. Ол мегелеп тургаш, чыып алган эт-хөреңгизин бичии-даа чайгылбайн, үлепкен. Ынчаар ол чазый чоруун ажып эрткен.

6. Бурганның Чагыргазының албатызы болур дээш, Роуз чуртталгазын канчаар өскерткен база чүге?

⁶ Каш чыл бурунгаар бир херээжен кижи, Роуз дижик, Чагырганың дугайында медээни дыңнаан. Роуз лесбиянка турган, ол гомосексуалистер эргези дээш туржуп турар организацияны баштап турган. Библияны өөренип эгелээш, ол Бурганның Чагыргазының дугайында алыс шынның кайы хире үнелиин билип кааш, чуртталгазын өскертип алыксай берген (1 Кор. 6:9, 10). Роуз ол организациядан үнгеш, кыс эжи-биле лесбиян харылзаазын үзүп каапкан. 2009 чылда Роуз сугга суктуруп алган, оон дараазында чылын эгелекчи бооп, бараалгап эгелээн. Ооң Иеговага болгаш Чагырганың дугайында алыс шынга ынакшылы мага-бот күзээшкиннеринден күштүг болган (Мк. 12:29, 30).

7. Бурганның Чагыргазының дугайында алыс шынга ынакшылывысты чүү өжүрүп болур?

⁷ Бурганның Чагыргазының албатылары болур дээш, бистиң хөй кезиивис чуртталгавыска улуг өскерлиишкиннерни кылган (Рим. 12:2). Ынчалза-даа демиселивис ооң-биле төнмээн. Ынчангаш моон-даа соңгаар Бурганның Чагыргазының дугайында алыс шынга ынакшылывысты эт-хөреңгиге хандыкшыл, мөзү-шынар чок күзелдер азы оон-даа өске чүүлдер өжүрбезин дээш, хайгаараар болзувусса эки (У. ч. 4:23; Мф. 5:27—29). Бурганның Чагыргазынга ынакшылывыс кыптыгып чорзун дээш, Иегова биске база бир үнелиг эртине-байлакты хайырлаан.

ҮНЕЛИГ БАРААЛГАЛЫВЫС

8. а) Павел элчин бараалгалды «бөдүүн дой савалар дег улуста шыгжаттынган» эртине-байлакка чүге деңнээнил? б) Павел суртаал ажылын үнелеп турарын канчаар көргүскенил?

⁸ Иисус Христос биске Бурганның Чагыргазының дугайында буянныг медээни суртаалдаарын болгаш улусту алыс шынга өөредирин дааскан (Мф. 28:19, 20). Павел элчин ындыг бараалгалдың кайы хире үнелиин билип турган. Бараалгалды ол «бөдүүн дой савалар дег улуста шыгжаттынган» эртине-байлак деп адаан (2 Кор. 4:7; 1 Тим. 1:12). Бисти, тергиин эвес улусту, бөдүүн дой саваларга деңнеп болур, ынчалза-даа суртаалдап турар медээвис бодувуска-даа, ону дыңнап турар улуска-даа мөңге чуртталганы чедип алырынга дузалаар. Ынчангаш Павел суртаалга аңгы-аңгы аргаларны ажыглап турган. Ол: «Буянныг Медээниң аазааны шаңналдан бодумнуң үлүүм алырын бодап, ол бүгүнү ындыг сорулга-биле кылып чор мен» — дээн (1 Кор. 9:23). Чугаажок, Павел суртаалдаарынга ынак турган, ол чүүл ону күжүн харамнанмайн, өөреникчилер белеткээринче оттуруп турган. (Римчилерге 1:14, 15; 2 Тимофейге 4:2 номчувут.) Суртаалга ынакшыл аңаа аажок күштүг удурланыышкынны ажып эртеринге дузалаан (1 Фес. 2:2). Павел ышкаш, суртаалга ынаавысты канчаар көргүзүп болур бис?

9. Суртаалды үнелеп турарывысты канчаар көргүзүп болур бис?

⁹ Суртаал ажылынга ынакшыл Павелди, арга эрттирбейн, Чагырганың дугайында медээни улуска чугаалаарынче оттуруп турган. Элчиннер биле баштайгы христианнар дег, бис база хөй-ниити черлеринге азы бажыңнар кезип, чок болза арга тыптып кээрге-ле, суртаалдап турар бис (Аж.-ч. 5:42; 20:20). Байдалывыс чөпшээреп турар болза, хөйнү кылырын кызып, чижээ, доктаамал азы дузаламчы эгелекчи бооп бараалгап турар бис. Оон аңгыда даштыкы дыл өөренип азы суртаалчылар чедишпес черже — чуртувус иштинде өске черже азы шуут өске чуртче — көжүп болур бис (Аж.-ч. 16:9, 10).

10. Айринниң бараалгалга чүткүлүн Иегова канчаар йөрээгенил?

¹⁰ Каттышкан Штаттардан Айрин дээр бот угбавыстың үлегерин көрээлиңер. Ол өске чурттан көжүп келген орус дылга чугааланыр улуска дыка суртаалдаксаар турган. Ол 1993 чылда Нью-Йоркта орус бөлүкче шилчип кээрге, аңаа 20 хире кижи турган. Айрин орус дылдыг улуска барык 20 ажыг чыл ишти чүткүлдүү-биле суртаалдап турар. «Дылды эки билир мен деп шыдавас мен» — деп, ол үлешкен. Ындыг-даа болза ол чүткүлдүг угбавыстың болгаш өске суртаалчыларның күжүн Иегова йөрээген. Ам Нью-Йоркта алды орус чыыш бар. Айрин-биле Библия өөренип турган 15 кижи сугга суктуруп алган. Оларның чамдыызы вефилчилер, эгелекчилер болгаш удуртукчулар бооп бараалгап чоруур. Айрин: «Мен өске чүүлдерже чүткүп болур турган мен, ынчалза-даа оларның чаңгызы-даа меңээ улуг өөрүшкү эккелбес деп билир мен» — деп үлешкен. Айрин бараалгалын, шынап-ла, үнелеп турар.

11. Истеп сүрүүшкүннер турза-даа, суртаалдаарын уламчылап турарывыс кандыг түңнелдерге чедирип турарыл?

¹¹ Павел ышкаш, бараалгалывысты үнелээр болзувусса, кандыг-даа истеп сүрүүшкүннер турза, суртаалдаарын уламчылаар бис (Аж.-ч. 14:19—22). 1930—1944 чылдарда Каттышкан Штаттарда акыларывыс аажок каржы-дошкун истеп сүрүүшкүннерге таваржып турган. Ындыг-даа болза олар, Павел ышкаш, Бурганга шынчы артып, суртаалдаарын уламчылаан. Суртаалдаар эргезин камгалап, акылар суд черлеринге хөй херектерни тиилеп ап турган. 1943 чылда Нейтан Норр акый илеткелинге АКШ-тың Дээди судунга тиилелгелерниң бирээзин чугаалап тургаш, мынча дээн: «Бир эвес акылар суртаалдаарын уламчылаваан болза, судка чаңгыс-даа херек көрдүнмес турган; оларның суртаалдап турганының ачызында бүдүн делегейде акы-угбалар хостуг суртаалдаар эргелиг апарган». Өске чурттарда Иегованың Херечилери база туруштуг чоруунуң ачызында судтарга ындыг тиилелгелерни чедип ап турган. Ийе, бараалгалывыска ынак боор болзувусса, истеп сүрүүшкүннер суртаал ажылын соксадып шыдавас.

12. Суртаал ажылынга кандыг хамаарылгалыг силер?

¹² Бир эвес суртаал ажылынга, Иегованың биске берип турар үнелиг белээнге дег, хамаарылгалыг болур болзувусса, отчётта бижип турар шактарывыстың дугайында бодавас бис. Харын-даа «Буянныг Медээни улуска дыңна[дыр]» дээш, шупту күжениишкиннерни үндүрер бис (Аж.-ч. 20:24; 2 Тим. 4:5). Ынчалза-даа улуска кандыг алыс шынны өөредип турар бис? Бургандан алганывыс база бир эртине-байлактың дугайында чугаалажыылыңар.

ЭРТИНЕ-БАЙЛАК ШЫГЖААР ШЫГЖАМЫРЫВЫС

13, 14. Матфей 13:52-де Иисус кандыг «шыгжамырның» дугайында чугаалааныл? Ону канчаар долдуруп болур бис?

¹³ Бистиң база бир эртине-байлаавыс — Бурганның биске ажытканы библейжи алыс шын-дыр. Иегова — алыс шынның Бурганы (2 Хаан. 7:28; Ыд. ыр. 30:6). Ол беримчелиг Ада болгаш, биске алыс шынны ажыдып берип турар. Алыс шынны бир дугаар дыңнаан соовуста, Бурганның Сөзүн болгаш аңаа үндезилээн дептерлерни номчуп, ол ышкаш шуулганнарже болгаш неделя санында болур чыыштарже барып тургаш, Бурганның берип турар эртине-байлаан чыып эгелээн бис. Шак ынчаар чоорту эртине-байлак шыгжаар «шыгжамырлыг» апарган бис. Иисустуң сөстери-биле алырга, ында «эрги-даа, чаа-даа» алыс шын билиглер шыгжаттынган. (Матфей 13:52 номчувут.) Бир эвес алыс шынны эртине-байлак шыгжаан черни дег, кызып дилээр болзувусса, Иегова ол «шыгжамырывысты» долдурарынга дузалаар. (Чугаалар 2:4—7 номчувут.) Оларны канчаар дилээрил?

¹⁴ Библияны болгаш дептерлеривисти үргүлчү ханы шинчилээр болзувусса эки. Ындыг шинчилел үезинде бодувуска чаа алыс шынны тып ап болур бис (Иис. 1:8, 9; Ыд. ыр. 1:2, 3). 1879 чылдың июль айда үнген «Таңныыл суургазының» бир дугаар үндүрүлгезинге алыс шынны чашпаннар аразында үнүп орар чечекке дөмейлеп бижээн. Ындыг чечекти тып алыр дизе, кижи ону дүн-хүн дивейн, дилээр ужурлуг. Оон ону тып алгаш, ол чаңгыс чечек четчир деп санавайн, улаштыр чечектерни дилээр ужурлуг. Ооң-биле дөмей «шыгжамырывысты» алыс шын билиглер-биле долдурар изиг күзелдиг боор ужурлуг бис.

15. Чамдык алыс шын билиглерни чүге эрги деп болурул база оларның кайызы силерге эргим?

¹⁵ Чүрээвиске эргим чамдык алыс шын билиглерни Бурганның чону-биле аралажып эгелээн үевисте билип алган бис. Ындыг утка-биле оларны эрги деп чугаалап болур. Ол кандыг билиглерил? Иегова — бистиң Чаяакчывыс, Ол кижилерге хамаарыштыр күзел-бодалдыг деп билип алган бис. Оон ыңай Бурган бисти бачыт биле өлүмден хостаар дээш, амы-тынын бериптер кылдыр, Оглун чоргузупканы-биле ынакшылын көргүскен деп билип алган бис. Оон аңгыда Бурганның Чагыргазы бүгү хилинчек-човалаңны соксадыр база ооң башкарылгазының адаанга кезээ-мөңгеде аас-кежиктиг чурттаар идегелдиг бис деп билип алган бис (Ин. 3:16; Ажыд. 4:11; 21:3, 4).

16. Кандыг-бир алыс шынның билиишкини өскерли бээрге, чүнү канчаар болзувусса эки?

¹⁶ Чамдыкта өттүр билген медеглелдерни азы библейжи үзүндүлерни билип турарывыс өскерлип турар. Ынчан ооң чаа тайылбырын эки билип алыр дээш, ону ханы сайгарып, боданырынче үени үндүрери чугула (Аж.-ч. 17:11; 1 Тим. 4:15). Бис алыс шынның чүгле кол өскерлиишкиннерин эскереринден аңгыда, эрги биле чаа билиишкинниң бичии кезектериниң ылгалынче кичээнгей салыр болзувусса эки. Ынчан ол алыс шын «эртине-байлак шыгжамырывыска» артып каар. Ындыг күжениишкиннер чүге хилис барбазыл?

17, 18. Ыдыктыг сүлде биске канчаар дузалап турарыл?

¹⁷ Ыдыктыг сүлде ооң мурнунда билип алган билиглеривисти херек үеде сагындырар деп, Иисус Христос чугаалаан (Ин. 14:25, 26). Буянныг медээни суртаалдап турар үевисте Бурганның сүлдези биске канчаар дузалап болурул? 1970 чылда Питер дээр акывыс-биле мындыг чүүл болган. Ынчан ол 19 харлыг турган. Великобританияда Вефилге ооң чаа-ла бараалгап эгелээн үези турган. Кажан ол бажыңнар кезип, суртаалдап чорда, бежен хире харлыг салдыг эр кижи эжикти ажыдыпкан. «Библияны эки билип алырын күзеп турар силер бе?» — деп, Питер оон айтырган. Ол айтырыг эр кижини аажок кайгадыпкан. Оон ол Питерге ооң бажыңында иудей башкылар чурттап турар деп чугаалааш, Питерни хынап: «Оглум, Даниилдиң номун кандыг дылга бижээн ийик?» — деп айтырарга, ол: «Чамдык кезиин арамей дылга» — деп харыылаан. «Ол башкы харыымны дыңнааш, аскы ажыттына берген! Бодум безин кайгап калган мен! Ону кайыын билир турган кижи боор мен? Оон бажыңга келгеш, «Таңныыл суургазы» биле «Оттуп келиңер!» деп сеткүүлдерниң эрткен айларында Даниилдиң номунуң чамдык кезиин арамей дылга бижээниниң дугайында статьяны тып алган мен» — деп, Питер сактып чугаалаан (Дан. 2:4, немелде тайылбыр). Бо чижектен алырга, ыдыктыг сүлде бистиң ооң мурнунда номчааш, «эртине-байлак шыгжамырывысче» шыгжап алган билиглеривисти херек үеде сагындырып болур деп көстүп турар (Лк. 12:11, 12; 21:13—15).

¹⁸ Иеговадан мерген угаанны үнелеп турар болзувусса, «эртине-байлак шыгжамырывысты» библейжи алыс шын-биле долдурарынче чүрээвис бисти оттурар. Ол алыс шын билиглерге ынак бооп, оларны үнелээн тудум, суртаал ажылынга улам мергежиир бис.

БУРГАННЫҢ БЕРИП ТУРАР ЭРТИНЕ-БАЙЛААН КАДАГАЛАҢАР

19. Бурганның берип турар эртине-байлаан чүге кадагалаар ужурлуг бис?

¹⁹ Бурганның берип турар эртине-байлаан үнелевейн баар кылдыр, Эрлик болгаш ооң делегейи бисче үргүлчү салдар чедирип турар. Оваарымчалыг болбас болзувусса, хөй акшалыг ажыл биле каас-коя амыдырал дугайында бодалдарга азы өскелерге бай-шыдалын көөргедиксээр күзелдерге алзып болур бис. «Бо делегей ооң тывылдырганы хамык күзээшкиннери-биле катай-хаара эстип-хайлы бээр» — деп, Иоанн элчин бижээн (1 Ин. 2:15—17). Ынчангаш Бурганның берип турар эртине-байлаан бар шаавыс-биле кадагалап, олар дээш өөрүп четтирер болзувусса эки.

20. Бурганның берип турар эртине-байлаан кадагалап алыр дээш, чүнү кылырынче хөөнендиңер?

²⁰ Бурганның Чагыргазының дугайында алыс шынга ынак болурунга шаптыктаар бүгү чүүлдерден ойталаарынга белен болуңар. Бараалгалга чүткүлдүг киржип, ону кезээде үнелеп чоруңар. Чаа алыс шынның эртине-байлаан дилээр дээш, бүгү күжүңерни үндүрүңер. Шак ынчаар «оор-даа чоокшулавас, үзүт-ховаган-даа ону үгдередип чивес» «эртине-байлакты дээрлерге чыып» алыр силер. «Чүге дээрге силерниң эртине-байлааңар кайда болдур, чүректериңер база ында болур» (Лк. 12:33, 34).