Номчукчуларның айтырыглары

Иудей өргээниң таңныылдары дээрге кымнарыл ол база оларның хүлээлгези кандыг турган?

Бурганның өргээзинге бараалгакчылавайн турган Левийниң аймааның кезии аңаа таңныылдап турган. Олар өргээге корум-чурум тудуп турган, а оларны өргээниң даргазы башкарып турган. Филон Александрийский оларның хүлээлгелерин мынчаар тайылбырлаан: «Оларның [левиттерниң] чамдыызы эжик аксынга хаалгачылап турган. Өске кезии иштинге [өргээ девискээринге], ыдыктыг өргээ-майгынче өске улус өжегерээн азы билбейн кире бербезин дээш, кадарып турган. А чамдыызы эртен-кежээ солчуп тургаш, өргээни долгандыр хынаар турган».

Өргээниң таңныылдары дээди иудей Чөвүлелиниң эргезинге турган. Римчилерниң чөпшээреп кааны чепсектиг чаңгыс иудей шериг ол турган.

Иоахим Иеремиас дээр Библия эртемдениниң саналы-биле алырга, «Иисусту өргээ таңныылдары тудуп алыр дээш, келген болза, Иисустуң: „Хүннүң-не Бурганның өргээзинге улус өөредип турумда чүге тудуп албайн турдуңар?“ дээн айтырыы билдингир апаар-дыр» (Мф. 26:55). Ооң мурнунда Иисусту тудуп алыр дээш келген улус база өргээ таңныылдары турган деп, Иоахим Иеремиас чигзинмейн турган (Ин. 7:32, 45, 46). Сөөлзүредир өргээ таңныылдарынга болгаш даргазынга дээди иудей Чөвүлелинче Иисустуң өөреникчилерин эккээрин дужааган. Оон аңгыда өргээге Павелди тудуп алган улустуң аразынга база олар турган чадавас (Аж.-ч. 4:1—3; 5:17—27; 21:27—30).