Иеговадан хоргадалды дилеп турар силер бе?

1. Бачыттың ужундан Бурганның шынчы бараалгакчылары чамдыкта кандыг минниишкиннерни миннип турар?

«ААС-КЕЖИК чок күжүр-дүр мен!» (Рим. 7:24). Бо сөстерни Павел элчин бодунуң дугайында чугаалаан. Бурганның шынчы бараалгакчыларының хөй кезии шак ындыг минниишкиннерни болганчок миннип турар. Шупту бачыттыг бис, ынчангаш Иегованы херектеривис-биле өөртүп шыдавайн баргаш, боттарывысты чөгенчиг кылдыр миннип болур бис. Чамдык христианнар аар бачыт кылыпкаш, Бурган оларны кажан-даа өршээвес деп бодап турар.

2. а) Бурган бараалгакчыларының сеткилин буруузунар минниишкиннер хилинчектевес кылдыр күзеп турарын Ырлар 33:23 канчаар көргүзүп турар? б) Бо статьяга чүнү сайгарар бис? («Ажыктыг кичээлдер бе азы өттүр медеглелдиг үлегер-чижектер бе?» деп көзенекти көрүңер.)

² Хоргадалды Иеговадан тып алган улустуң сеткилин буруузунар минниишкин хилинчектевес деп, Библия бисти бүзүредип турар. (Ырлар 33:23 номчувут.) Хоргадалды Иеговадан дилээри дээрге чүү дээни ол? Бурган биске энерелин көргүзүп, өршээр кылдыр, кандыг базымнарны кылыр болзувусса эки? Бо айтырыгларның харыызын бурунгу израильчилерге берген хоргадал-хоорайларның дугайында хоойлуну көргеш, билип алыр бис. Ынчалза-даа: «Хоргадал-хоорайларның дугайында айтыышкын Моисейниң хоойлузунга хамааржыр, а ол чагыг-керээ б. э. 33 чылда Беженги хүннүң байырлалында күш чок апарган болгай» — деп бодаар чадавас силер. Ындыг-даа болза Хоойлуну Иегова берген деп сактыры чугула. Ынчангаш ында хоргадал-хоорайларның дугайында чүнү бижээнин өөренип көргеш, Иегованың бачытка болгаш бачыт кылган кижиге, ол ышкаш буруузунуп турар кижиге хамаарылгазын билип ап болур бис. Эгезинде ол хоорайларның чүге херек турганын сактып кээлиңер.

«ХОРГАДАЛ-ХООРАЙЛАРДАН КЫЛЫП АЛЫҢАР»

3. Бир кижи сагыштыы-биле өлүрүүшкүн кылган болза, израильчилер чүнү канчаар ужурлуг турган?

³ Иегова бурунгу Израильге кандыг-даа өлүрүүшкүннү дыка аар херек кылдыр көөр турган. Бир эвес бир кижи сагыштыы-биле өлүрүүшкүн кылган болза, өлүрткен кижиниң чоок төрели эр кижи — «өжээн негекчизи» — өлүрүкчүнү өлүрүп каар ужурлуг турган (Сан. 35:19). Ону актыг кижиниң ханын төккени дээш, бачыттың орнун төлээри-биле кылыр турган. Өжээнни дораан негээри Аазаттынган черни бужартаашкындан камгалап турган, чүге дизе Иегова: «Чурттап турар чериңерни ооң-биле бужартатпаңар; [кижиниң] төгүлген ханы черни бужартадып каар болгай» — дээн (Сан. 35:33, 34).

4. Өске кижини билбейн, өлүрүп каан кижи чүнү канчаар ужурлуг турган?

⁴ Өске кижини билбейн, өлүрүп каан кижи чүнү канчаар ужурлуг турган? Хоойлу ёзугаар, актыг черге төгүлген хан дээш, ол дөмей-ле харыы тудар турган (Э. д. 9:5). Ынчалзажок Иегова энерелди көргүзүп, аңаа өжээн негекчизинден камгаланып, алды хоргадал-хоорайларның бирээзинче дезе бээрин чөпшээрээн. Ол өлүрүкчү дээди бараалгакчының өлүмүнге чедир ол хоорайга артып каар ужурлуг турган (Сан. 35:15, 28).

5. Хоргадал-хоорайларның дугайында хоойлу Иегованы оон-даа эки билип алырынга биске канчаар дузалап турар?

⁵ Хоргадал-хоорайларның дугайында хоойлуну кижилер чогаатпаан. Израильчилерге дамчыдар кылдыр, Иегова Нуннуң оглу Иисуска: «Хоргадал-хоорайлардан кылып алыңар» — дээн. Ол хоорайларны тускай аңгылап, ыдыктап каан турган (Иис. 20:1—2, 7, 8). Иегова оларны тускай сорулга-биле шилип алган. Ынчап кээрге, хоргадал-хоорайларның дугайында хоойлуну шинчилеп тургаш, Бурганның энерелиниң дугайында хөйнү билип ап болур бис. Оон аңгыда амгы үеде Иеговадан хоргадалды канчаар дилеп болурувусту көөр бис.

«ОЛ... БАШТЫҢНАРГА ЧҮҮ БОЛГАНЫН... ЧУГААЛАП БЕРЗИН»

6, 7. а) Душ бооп өлүрүүшкүн кылган кижиниң херээн шиидеринге баштыңнарның ролю кандыг турган? (Статьяның эгезинде чурукту көрүңер.) б) Өлүрүкчү баштыңнарже чүге баар ужурлуг турган?

⁶ Бир кижи билбейн, өске кижини өлүрүп каан болза, ол хоргадал-хоорайже дезип чоруткаш, «хоорайның баштыңнарынга чүү болганын» чугаалап бээр ужурлуг турган. Ооң соонда аңаа чурттаар черни бээр турган (Иис. 20:4). Кезек үе эрткенде, ону өлүрүүшкүн болган хоорайның баштыңнарынче чоргузуптарга, олар ол херекке хамаарыштыр шиитпир үндүрер ужурлуг турган. (Саннар 35:24, 25 номчувут.) Ол баштыңнар өлүрүүшкүннү душ бооп болган деп шиитпир үндүрер болза, чүгле ынчан өлүрүкчү хоргадал-хоорайже эглип болур турган.

⁷ Баштыңнарның киржилгези чүге херек турган? Олар израиль чонга Бурганның караанга арыг артарынга дузалап чораан. Оон аңгыда Иегова өлүрүүшкүн кылган кижиге энерелин чүгле кажан ол баштыңнар-биле чугаалашкан соонда көргүзүп болур турган. Бир Библия эртемдени бир эвес өлүрүкчү баштыңнарже барбайн баар болза, «ол амы-тынын айыылга таварыштырып турар» деп бижээн. Ол: «Бир эвес ону өлүрүп каар болза, ол боду буруулуг боор, чүге дизе ол Бурганның ынакшылы-биле белеткээн хоргадалдан камгалалды дилевээн» деп немээн. Душ бооп өлүрүкчү болган кижи камгалал алыр дизе, дуза дилээш, ону хүлээп алыр ужурлуг турган. Ол хоргадал-хоорайже дезер ужурлуг турган, оон башка өлүрткен кижиниң чоок төрели ону өлүрүп каап болур турган.

8, 9. Аар бачыт кылган христианнар удуртукчулардан чүге дуза дилээр ужурлуг?

⁸ Аар бачыт кылган христианнар база удуртукчуларга баар ужурлуг. Ону кылыры чүге чугула? Бирээде, Иегова ындыг херектерни сайгарарын оларга дааскан (Иак. 5:14—16). Ийиде, удуртукчулар бачыт кылган кижиге Бурган-биле харылзаазын катап тургузарынга болгаш частырыгларын катаптавазынга дузалап турар (Гал. 6:1; Евр. 12:11). Үште, удуртукчулар дуржулгалыг болгаш, бачыдын миннип турар кижини канчаар деткиирин болгаш ооң сагыш-сеткилиниң балыгларын канчаар экиртирин билир. Иегова оларны «шуургандан чаглакка» дөмейлээн (Иса. 32:1, 2). Шынап-ла, удуртукчулар — энерелдиг Бурганывыс Иегованың белээ-дир!

⁹ Бурганның хөй бараалгакчылары удуртукчулардан дуза дилээш, сагыш-сеткилинге амыр-тайбыңны миннинген. Дэниелдиң таварылгазын көрээлиңер. Ол аар бачыт кылгаш, каш ай дургузунда удуртукчуларга ону чугаалаарындан коргуп турган. «Ынча хөй үе эрте бээрге, удуртукчулар меңээ ам канчап-даа дузалап шыдавас деп бодап турган мен. Үүлгедиим дээш кеземчени кажан алырымны манап, мөргүүрде-ле, баштай Иеговадан өршээл дилеп, сагыжымда амыр-дыш чок чурттап турган мен» — деп, ол үлешкен. Сөөлүнде Дэниел удуртукчуларга баргаш, шупту чүвени чугаалап берген. «Бачыдын ажыы-биле чугаалаары белен эвес. Ынчалза-даа ооң соонда сеткилим ажый берген! Ам Иегова-биле хостуг чугаалажып болур мен» — деп, ол чугаалаан. Дэниелдиң арын-нүүрү ам арыг. Чоокта чаа ону хуралдың дузалакчызы кылдыр томуйлаан.

ХООРАЙЛАРНЫҢ КАЙЫ-БИРЭЭЗИНЧЕ ОЛ ДЕЗЕР УЖУРЛУГ

10. Душ бооп кижи өлүрген кижи аңаа энерел көргүссүн деп бодаар болза, чүнү кылыр ужурлуг турган?

¹⁰ Душ бооп кижи өлүрген кижи шиитпирлиг хөделип, чоокку хоргадал-хоорайже дезер ужурлуг турган. Чүгле ынчан ол энерелди манап болур турган. (Иисус 20:4 номчувут.) Амы-тыны айыыл кырынга турда, хөделбейн, олурган кижини кым көрген боор! Ындыг кижи дүргени-биле хоргадал-хоорайже дезипкеш, аңаа артып каар ужурлуг турган. Ол бодун камгалаар дээш, бажыңын болгаш ажыл-херээн каап, аай-дедир чоруур аргазындан ойталаар ужурлуг турган. А бо бүгү дээди бараалгакчының өлүмүнге чедир уламчылап кээр турган (Сан. 35:25)a. Ынчалзажок ону ындыг-ла кончуг улуг когарал деп болбас. Өлүрүкчү хоргадал-хоорайдан үнүп чоруптар болза, ол амы-тын үскенинге тоомча чок хамаарылгазын көргүзүп, бодунуң амы-тынын айыылга чыгадып турар апаар.

11. Буруузунуп турар христиан кижи Бурганның энерелин үнелеп турарын кандыг херектери-биле көргүзер?

¹¹ Ооң-биле дөмей, бөгүн база бир кижи частырыг кылгаш, буруузунуп, Бурган аңаа энерелин көргүзер кылдыр күзээр болза, ол хөделир ужурлуг. Ол бачыт кылырын соксадыр ужурлуг, өскээр чугаалаарга, чүгле аар бачыттардан эвес, а бачыт кылырынга чедирер бүгү чүүлдерден «дезер» ужурлуг. Павел элчин Коринфиде христианнарның ооң мурнунда кылган бачыттары дээш хараадаанындан чүнү кылганын бижээн: «Бурганның күзел-соруу-биле муңгагдаарыңарга, чүү болган-дыр? Кем-бурууңар чогун көргүзер дээш, кайы хире чүткүлдүг-дүр силер! Кайы хире хорадап база хөлзеп-дүвүреп... турар-дыр силер!» (2 Кор. 7:10, 11). Ооң мурнунда кылган частырыгларывысты катаптавас дээш, шиитпирлиг хөделир болзувусса, кылган бачыттарывыс дээш, сеткиливистен хараадап, Иегованың энерелин үнелеп турарывысты көргүзер бис.

12. Христиан кижи, Бурган аңаа моон-даа соңгаар энерел көргүзер кылдыр, чүүден ойталаар ужурлуг?

¹² Христиан кижи, Бурган аңаа моон-даа соңгаар энерел көргүзер кылдыр, чүүден ойталаар ужурлуг? Ол ону бачытче чыгаптар хире бүгү чүведен, ол чүүлдер аңаа чеже-даа эргим болза, адырлырынга белен боор ужурлуг (Мф. 18:8, 9). Чижээ, эш-өөрүңерниң бирээзи силерни Иегованы муңгарадыптар чүве кылырынче деткип турар болза, ооң-биле аралажырын соксадыр силер бе? Араганы өй-хемчээл чок ижиптер чораан болзуңарза, өйүн эрттир ижиптер күткүлге тургузар байдалдардан дезер силер бе? Азы мөзү-шынар чок күзелдер-биле туржуп чоруур болзуңарза, ындыг бодалдар тывылдырар фильмнерден, сайтылардан, байдалдардан ырап чоруурун кызар-дыр силер бе? Бурганга шынчы артар дээш, кылып турар бүгү чүвевис хилис барбас деп сактып чоруңар. Иегова сенден хая көрнү берген деп минниишкинден коргунчуг чүве чок. Ол ышкаш Ооң энерелин кезээ-мөңгеде минниринден артык эки чүве кайыын турар? (Иса. 54:7, 8).

«ЫНДЫГ ХООРАЙЛАР СИЛЕРГЕ ХОРГАДАЛ ЧЕРЛЕРИ БОЛЗУН»

13. Чүге хоргадал-хоорайга кижи айыылдан кортпайн, аас-кежиктиг чурттап болур турган?

¹³ Хоргадал-хоорайже дескен кижи аңаа бодун айыыл чок кылдыр миннип болур турган, чүге дизе Иегова: «Ындыг хоорайлар силерге хоргадал черлери болзун» — дээн (Иис. 20:1—3). Иегова өлүрүкчүнү ол-ла херек дээш катап шииде бээрин күзевейн турган. Оон аңгыда Ол өжээн негекчизин хоргадал-хоорайже киргеш, өлүрүкчүнүң амы-тынын үзерин хоруп каан. Ынчангаш дескен кижи ындыг хоорайга өжээн негээшкининден кортпайн, Иегованың камгалалының адаанга турган болгаш, дыштыг чурттап болур турган. Хоргадал-хоорайы кара-бажың эвес турган. Аңаа кижи ажылдап, өскелерге дузалап, кымдан-даа кортпайн, Иеговага бараалгап, сеткил ханып, аас-кежиктиг чурттап болур турган.

14. Аар бачыт кылгаш, эттинип алган кижи чүү чүвеге бүзүреп болур?

¹⁴ Чамдыкта аар бачыт кылгаш, эттинип алган христианнарның сеткилин буруузунар минниишкиннер өйүп туруп бээр. Безин чадаарда, олар Иегованың караанга кезээ-шагда бачытка борашкан бооп артып калган бис деп бодап болур. Силер база ынчаар бодап турар болзуңарза, мону сактып чоруңар: Иегова силерни энерелдии-биле өршээпкен, ынчангаш бодуңарны айыыл чок кылдыр миннип болур силер. Дэниел база аңаа шынзыккан. Удуртукчулар аңаа эттинип алгаш, Бурганның мурнунга арыг арын-нүүрлүг болурунга дузалаан. Дэниел:«Ам-на сагыжым ажый берген. Бурганның негелдези ёзугаар шупту чүвени кылганым соонда, арын-нүүрүм аарывас апарган. Бачыдым долузу-биле өршээттинген. Иегова аазааны дег, бачыттарывысты алгаш, ону моон соңгаар кажан-даа көрбес кылдыр, бистен ырадып турар» — дээн. Дескен кижи хоргадал-хоорайга өжээн негекчизинден кортпайн, чурттап болур турган. Ол ышкаш Иегова бачыдывысты өршээпкен болза, Ол ону ооң соонда катап сактып кээр азы ол дээш бистен харыы негээр деп кортпас болзувусса эки. (Ырлар 102:8—12 номчувут.)

15, 16. Иисус бистиң Хостакчывыс болгаш Дээди бараалгакчывыс деп чүүл Иегованың энерелинге бисти чүге бүзүредип турар?

¹⁵ Бурунгу израильчилерге бодаарга, Иегованың энерелинге чигзинмезинге бисте оон-даа улуг чылдагаан бар. Павел элчин Иеговага долузу-биле дыңнангыр бооп шыдавазын хараадап чугаалаан соонда, өөрүшкү-биле: «Бурганга өөрүп четтирип тур мен, Дээргивис Иисус Христосту дамчыштыр» — дээн (Рим. 7:25). Павел эрткен үеде кылган частырыглары дээш буруузун миннинген-даа болза, бодун буруудадыр минниишкиннер-биле болгаш бачыттыг күзелдер-биле туржуп чораан. Ынчалза-даа Бурган ону «Иисус Христосту дамчыштыр» өршээпкен деп, ол бүзүреп турган. Хостакчывыс Иисустуң ачызында бис арыг арын-нүүрлүг апарып, сагыш-сеткиливисте амыр-тайбыңны миннип турар бис (Евр. 9:13, 14). А Христос Дээди бараалгакчывыс болганда, ол бодун «дамчыштыр Бурганга чоокшулап кээп турар улусту кезээде камгалап шыдаар, ол кезээ-мөңгеде амыдырап база олар дээш кезээде дилеп, болчуп чоруур» (Евр. 7:24, 25). Бурунгу Израильге дээди бараалгакчының бараалгалы чонга бачыттары дээш өршээл алырынга дузалап турган. А бистиң Дээди бараалгакчывыс Иисус Христостуң бараалгалының ачызында Иегованың энерели биле авыралынга идегээр чылдагааннарывыс оон-даа хөй (Евр. 4:15, 16).

¹⁶ Ынчангаш Иеговадан хоргадал дилээр дизе, Христостуң бачыттан хостаар өргүлүнге бүзүрээр херек. Бүзүрээр дизе, ол өргүлдү дыка хөй улус дээш берген деп билири чедишпес. Иисус хууда силер дээш өлген деп бүзүреңер (Гал. 2:20, 21). Бачыттан хостаар өргүлге үндезилеп, Бурган силерниң бачыттарыңарны база өршээптер деп бүзүреңер. Төлевирниң ачызында мөңге чурттаар идегелди алган силер деп бүзүреңер. Христостуң өргүлү — Иегованың хууда силерге берген белээ-дир.

17. Иеговадан хоргадал дилээринден артык эки чүве чок деп чүге чугаалап болур?

¹⁷ Хоргадал-хоорайларның дугайында хоойлу — Бурганның энерелиниң кайгамчыктыг үлегери-дир. Ол хоойлу Бурган амы-тынны ыдыктыг деп санап турарын көргүзүп турарындан аңгыда, удуртукчуларның биске канчаар дузалап болурун болгаш сеткилинден буруузунары дээрге чүл ол дээрзин өөредип, Иегованың кайы хире энерелдиг өршээп турарын көргүзүп турар. Иеговадан хоргадалды дилеп турар силер бе? Ооң камгалалының адаанга турарындан эки чүве чок! (Ыд. ыр. 90:1, 2). Дараазында статьяга хоргадал-хоорайларның дугайында хоойлу биске Иегованың чөптүүн болгаш энерелдиин өттүнеринге канчаар дузалаарын сайгарар бис.