1. Павел элчин шилип чагдырган христианнарга кандыг шыңгыы сагындырыг бергенил?

«БО ДЕЛЕГЕЙНИҢ амыдыралының аян-шинчизинге чаңчыгып, аңаа дөмей болбаңар» — деп, Павел элчин баштайгы христианнарга бижээн (Рим. 12:2). Чуртталгазын Бурганга бараалгаткан, шилип чагдырган акы-угбаларга ол чүге ындыг шыңгыы сагындырыг бергенил? (Рим. 1:7).

2, 3. Эрлик бисти Иеговадан чарып алырын канчаар кызып турарыл? Угаан-медереливисче хандыр сиңе берген чүүлдерден канчаар адырлып болур?

² Чамдык христианнарның Эрликтиң делегейинде сурагжаан бодалдарның болгаш көрүштерниң салдарынга алысканы Павелди дүвүредип турган (Эф. 4:17—19). Бистиң кайывыс-даа ындыг салдарга алзып болур. Бо делегей Эрликтиң эргезинде болганда, ооң янзы-бүрү кажар аргалары бар. Чижээ, ол бисти Иеговадан чарып алыр дээш, бодувуска хөй кичээнгей күзээр азы чугула болуксаар күзеливисти ажыглаптып болур. Эрлик бисти бодунга дөмейлештир боданы бээр кылдыр, кижизидилгевисти, эртем-билиивисти болгаш культуравысты безин ажыглап болур.

«УГААНЫҢАР ЧААРТЫП, БОДУҢАР БҮРҮНҮ-БИЛЕ ЭДЕ ТУРГУСТУНУП АЛЫҢАР»

4. Алыс шынны билип алгаш, бистиң хөй кезиивис кандыг өскерлиишкиннерни кылганыл?

⁴ Бурганның Сөзүнден алыс шынны билип алгаш, Иеговага бараалгаарын шиитпирлээн соонда, кандыг өскерлиишкиннерни кылганыңарны сактып келиңер. Хөй кезиивис чуртталгазын өскертип алган (1 Кор. 6:9—11). Биске бачыттыг херектерден адырлып алырынга дузалааны дээш, Иеговага дыка-ла өөрүп четтирер-дир бис!

5. Римчилерге 12:2-ден алырга, кандыг ийи чүүлдү күүседири чугула?

⁵ Ынчалза-даа ам-на оожургап болур деп бодаан херээвис чок. Бурганга бараалгап эгелээш, аар бачыттарны кылырын соксаткан-даа болзувусса, бисти катап эрги херектерже чыгаптар бүгү чүүлдерден ойталаар ужурлуг бис. Аңаа биске чүү дузалаар? Павел христианнарны: «Бо делегейниң амыдыралының аян-шинчизинге чаңчыгып, аңаа дөмей болбаңар... а угааныңар чаартып, бодуңар бүрүнү-биле эде тургустунуп алыңар» — деп кыйгырган (Рим. 12:2). Ынчап кээрге, ийи чүүлдү күүседир херек. Бирээде, бо делегейниң амыдыралының аян-шинчизинге чаңчыкпас база аңаа дөмей болбас ужурлуг бис. Ийиде, угаанывысты бүрүнү-биле эде тургузуп азы көрүштеривисти өскертиринге белен болуру биске чугула.

6. Матфей 12:43—45-те бижээн Иисустуң сөстеринден кандыг чугула түңнелди үндүрүп болурул?

⁶ Павелдиң чугаалааны эде тургустунуушкунче чүгле даштыкы хевири эвес, а кижиниң бүрүнү-биле иштики бүдүжүн өскертири кирип турар. («Чүгле даштыкы хевирден туттунмайн, бүрүнү-биле эде тургустунуп алыңар» деп көзенекти көрүңер.) Угаанывысты чаартып, өскээр чугаалаарга, бодалдарывысты, минниишкиннеривисти болгаш чаңывысты өскертири чугула. Ынчангаш бодувустан айтырар болзувусса эки: «Мен шын сеткилим-биле азы чүгле даштындан өскерлип турар мен бе?» Ол айтырыгга харыы дыка чугула. Бистен чүү негеттинип турарын Иисус Матфей 12:43—45-те тайылбырлаан. (Номчуптуңар.) Ооң сөстеринден чугула түңнелди үндүрүп болур бис. Шын эвес бодалдардан адырлыры чедишпес, угаанывысты Бурганны өөртүр бодалдар-биле долдурар херек.