Угаан-бодалыңарны кым хевирлеп турарыл?

1, 2. а) Иисус Пётрнуң сүмезин канчаар хүлээп алганыл? (Статьяның эгезинде чурукту көрүңер.) б) Иисус Пётрга чүге ынчаар харыылааныл?

ИИСУС Израиль күрүнени катап тургузуптар деп, ооң өөреникчилери идегеп турган. Ынчалза-даа ол удавас хилинчекти шыдажып эрткеш, чок апаарын чугаалаарга, олар кайгап калган. Пётр тургаш: «Дээрги! Канчап ындыг боорул! Ындыг чүве Силер-биле болбас ужурлуг!» — дээрге, Иисус көрнүп келгеш: «Менден ырап чор, эрлик! Сен Мени оруумдан астыктырып тур сен, чүге дээрге бодалдарың Бурганныы эвес, улустуу-дур» — дээн (Мф. 16:21—23; Аж.-ч. 1:6).

² Бурганның бодалдары биле Эрликке чагырткан улустуң бодалдарының ылгалып турарын Иисус ынчаар көргүскен (1 Ин. 5:19). Пётрнуң сөстери бо делегейниң бот тогдунар хөөнүн илереткен. Ынчалзажок Бурганның боданып турары көңгүс өске деп, Иисус билип турган. Удавас таваржыры хилинчекке болгаш өлүмге Оглунуң белеткенип алырын Иегова күзеп турган. Иисустуң харыызындан алырга, бо делегейниң көрүжүнден ойталап, Адазы ышкаш боданырын ол күзеп чораан.

3. Бо делегейниң көрүжүнге удур туржуру чүге берге?

³ Бистиң дугайывыста чүү деп болур? Бурган ышкаш боданып турар бис бе азы бо делегейниң кижилери ышкаш бе? Христианнар болганывыста, Бурганның негелделеринге дүүштүр алдынып чоруур бис. А бодалдарывыстың дугайында чүү деп болур? Иегова ышкаш боданып өөренир дээш кызып турар бис бе? Аңаа хөй күжениишкин херек. А бо делегейниң хөөнү кайда-даа нептерээн болгаш, аңаа алзыры дыка белен (Эф. 2:2). Оон аңгыда ол хөөнге удур туржуру берге, чүге дээрге ол бисти бачыттыг күзелдеривисти хандырарынче оттуруп турар.

4. а) Бо делегейниң салдарынга алзыр болзувусса, чүү болур? б) Бо статьядан чүнү өөренип алыр бис?

⁴ Бо делегейниң салдарынга алзыр болза, кижи чүгле бодун бодап, эки-бакты боду тодарадырын күзей бээр (Мк. 7:21, 22). Ынчангаш улус ышкаш эвес, а Иегова ышкаш боданып өөренир болза эки. Ону канчаар кылырын бо статьяда тайылбырлаан. Бурганның көрүжү хосталгавысты кызыгаарлавайн, харын-даа ажык-дузаны эккеп турар деп билип алыр бис. Оон ыңай бо делегейниң хөөнүнге алыспас дээш, чүнү канчап болурувусту көөр бис. А дараазында статьяга аңгы-аңгы байдалдарда Бурганның көрүжү кандыгыл база ону канчаар хүлээп өөренип ап болурувусту сайгарар бис.

ИЕГОВА ЫШКАШ БОДАНЫП ӨӨРЕНИРИ ЧҮГЕ АЖЫКТЫГЫЛ?

5. Чамдык улус өске улустуң аайынче чүге кириксевес?

⁵ Чамдык улус кымның-даа аайынче кириксевес. Олар: «Бодумнуң бажым-биле боданыр мен» — дээр. Өскээр чугаалаарга, ындыг улус «шиитпирлерни бодум хүлээр эргелиг мен» диксээр чадавас. Олар өске улус аайы-биле чурттаксавас база өскелерге дөмей болуксавасa.

6. а) Иегова биске кандыг хосталганы бергенил? б) Ол хосталганың кызыгаары бар бе?

⁶ Бурган ышкаш боданып өөренип алгаш-даа, хууда саналдыг бооп болур бис. 2 Коринфичилерге 3:17-де: «Дээрги-Чаяакчының Сүлдези кайда барыл, ында хосталга бар» — дээн. Кандыг кижи болурун бодувус шилиир бис. Кижи бүрүзүнүң сонуургалдары болгаш күзелдери аңгы-аңгы болур. Иегова бисти ынчаар чаяап каан. Ынчалза-даа ол хосталга кызыгаарлыг. (Номчуптуңар: 1 Пётр 2:16.) Эки-бакты билип алырда, Библияны удуртулга кылдыр ажыглаарывысты Иегова күзеп турар. Бо чүүл ажык-дузаны эккеп турар бе азы хосталгавысты кызыгаарлап турар бе?

7, 8. Иегова ышкаш боданыры хосталгавысты эмин эрттир кызыгаарлап турар бе? Чижектен чугаалаңар.

⁷ Чижектен көрээлиңер. Ада-ие улус ажы-төлүн эки кижизидер дээш кызып чоруур. Олар ажы-төлүн шынчы, кежээ, өскелерниң дугайында бодап билир кылдыр өөредип турар. Ада-иениң кижизидилгези ажы-төлдүң хосталгазын хөлүн эрттир кызыгаарлап турар бе? Чок, харын-даа олар ажы-төлүн аас-кежиктиг болзун дээш кижизидер. Уруглары өзүп келгеш, бажыңындан чорупкаш, шиитпирлерни боттары хүлээп эгелээр. Бир эвес олар ада-иезиниң кижизидилгезин сактып чоруур болза, шын шиитпирлерни үндүрүп, хөй бергелерге, хараадалдарга, дүвүрелдерге таварышпас боор.

⁸ Ынакшылдыг Адавыс Иегова аас-кежиктиг, ужур-уткалыг чурттаарывысты күзеп чоруур (Иса. 48:17, 18). Ынчангаш Ол биске бедик мөзү-шынарлыг чурттаарынга болгаш улус-биле эки хамаарылгалыг болурунга дузалаар дүрүмнерни берген. Аңаа хамаарыштыр Ооң негелделерин сагып чурттаарывысты Бурган күзеп турар. Бо чүүл хосталгавысты кызыгаарлаар хамаанчок, харын-даа хандыр боданып, мерген угаанныг шиитпирлер үндүреринге дузалап турар (Ыд.ыр. 91:6; У.ч. 2:1—5; Иса. 55:9). Ооң ачызында хууда саналдыг артпышаан, аас-кежикти эккээр шиитпирлерни хүлээр бис (Ыд.ыр. 1:2, 3). Иегова ышкаш боданып өөренип алыры биске дыка-ла ажыктыг!

ИЕГОВАНЫҢ БОДАЛДАРЫ ӨНДҮР БЕДИК

9, 10. Бурганның угаан-бодалы бо делегейниң көрүжүнден ушчок ажып турар деп чүү бадыткап турарыл?

⁹ Шупту чүвеже Иегованың көрүжү-биле көөрүн күзээр бис, чүге дээрге Бурганның бодалдары бо делегейде кижилерниң бодалдарындан ушчок бедик. Амгы үеде мөзү-шынарга, өг-бүлеге, ажыл-агыйга азы өске-даа чүүлдерге хамаарышкан сүмелерниң хөй кезии Бурганның көрүжүнге дүүшпес. Чижээ, бо делегейде улус күзээн чүүлүн чедип алыр дээш, чүнү-даа кылырынга белен, а самыыраар чорукту анаа чүүл деп санаар. Аас-кежик чок өг-бүлелиг кижиге аңгыланып чурттай бээр кылдыр азы кандыг-даа чылдагаан чокка чарлып алырын улус бо-ла сүмелээр. Ындыг сүмелер Библияга чөрүшкек. Ындыг-даа болза, Библияның сүмелеринге бодаарга, бо делегейниң сүмелери амгы үеде ажыглаттынгыр бе?

¹⁰ Иисус: «Мерген угаан бодунуң ажыл-херээ-биле шынзыттынар» — дээн (Мф. 11:19). Кижилер эртем-техниктиг депшилгениң ачызында хөйнү чедип алган-даа болза, дайыннарның, язы-сөөк ылгаар чоруктуң, кем-херек үүлгедиглериниң когун үзүп чадап каан. Бо бүгү кижилерниң аас-кежиинге шаптыктап турар. Ол ышкаш бо делегейде улус самыыраар чорукту анаа чүүл деп бодаар. Ынчалза-даа самыыраар чорук өг-бүлелерни чарып, шээр аарыгларны тывылдырып, өске-даа багай түңнелдерге чедирип турарынга улустуң хөй кезии чөпшээрежир. А ол айтырыгже Бурганның көрүжү-биле көөр кижи өг-бүле чуртталгазында аас-кежиктиг, кадык болгаш бүгү делегейде ха-дуңмазы-биле тайбың чурттап чоруур (Иса. 2:4; Аж.-ч. 10:34, 35; 1 Кор. 6:9—11). Моон алырга, Бурганның көрүжү өндүр бедик.

11. Моисейниң угаан-бодалын кым хевирлеп турганыл база ооң түңнели кандыг болган?

¹¹ Бурганның бодалдары кижилерниинден канчап-даа бедик деп, Ооң бурунгу бараалгакчылары билир турган. Чижээ, Моисей «Египеттиң бүгү-ле мерген угаанын шиңгээдип» алган-даа болза, ёзулуг мерген угаан чүгле Иеговада деп билир чораан (Аж.-ч. 7:22; Ыд.ыр. 89:12). Ынчангаш ол Иеговадан: «Оруктарыңны меңээ ажыдып берем» — деп дилээн (Хост. 33:13). Моисей Бурганга угаан-бодалын хевирлээрин чөпшээрээн. Ынчангаш Ол ону күзел-соруун күүседиринге ажыглап, бүзүрели быжыг улустуң бирээзи деп адап, аңаа алдар-хүндүнү көргүскен (Евр. 11:24—27).

12. Павел үзел-бодалдарын чүү чүвеге үндезилеп чорааныл?

¹² Павел элчин угаанныг, эртем-билиглиг кижи чораан. Ол еврей биле грек дылды база билир турган (Аж.-ч. 5:34; 21:37, 39; 22:2, 3). Ынчалза-даа Павел шиитпирлер хүлээрде, бо делегейниң мерген угаанындан ойталап, үзел-бодалдарын Ыдыктыг Бижилгеге үндезилеп чораан. (Номчуптуңар: Ажыл-чорудулга 17:2, 3; 1 Коринфичилерге 2:6, 7, 13.) Түңнелинде Павел чедиишкинниг бараалгап, мөңге чурттаар идегелдиг апарган (2 Тим. 4:8).

13. Бурган ышкаш боданып өөренип алыр дизе, кым кызар ужурлуг?

¹³ Ынчап кээрге, Бурганның көрүжү бо делегейниинден оранчок бедик деп көскү. Иегованың негелделерин сагып чурттаар болзувусса, ёзулуг аас-кежиктиг болгаш чедиишкинниг апаар бис. Ындыг-даа болза, Иегова бисти Ооң аайы-биле боданырын албадавайн турар. «Шынчы болгаш сарыылдыг чалча-даа», удуртукчу акылар-даа чүнүң дугайында боданырын айытпайн турар (Мф. 24:45; 2 Кор. 1:24). Бурган ышкаш боданып өөренип алыр дизе, кижи боду кызар ужурлуг. Аңаа чүү херек?

БО ДЕЛЕГЕЙНИҢ САЛДАРЫНГА АЛЫСПАҢАР

14, 15. а) Иегова ышкаш көрүштүг болурун күзээр болзувусса, чүнүң дугайында боданыр ужурлуг бис? б) Римчилер 12:2-ден алырга, бо делегейде нептерээн бодалдардан чүге оваарныр ужурлуг бис? Чижектен чугаалаңар.

¹⁴ Римчилерге 12:2-де мынча дээн: «Бо делегейниң амыдыралының аян-шинчизинге чаңчыгып, аңаа дөмей болбаңар, а Бурганның силерден чүнү күзээнин, кандыг чүүлдер Аңаа эки, таарымчалыг база болбаазыраңгай боорун билип аар дээш, угааныңар чаартып, бодуңар бүрүнү-биле эде тургустунуп алыңар». Бо шүлүктен алырга, алыс шынны билип алырының мурнунда үзел-бодалдарывыс кандыг-даа турган болза, ону өскертип, Бурган ышкаш боданып өөренип ап болур бис. Ийе, угаан-бодалывысче дуржулгавыс болгаш ада-иевистен салгап алган чүүлдеривис, бичии-даа бол, салдар чедирип турар. Ынчалза-даа угаан-бодалывысты өскертип шыдаар бис. Ол хөй кезиинде бистиң чүнү бодап турарывыстан хамааржыр. Янзы-бүрү айтырыгларже Иегованың көрүжүнүң дугайында ханы боданыр болзувусса, ооң кайы хире ажыктыын билип каар бис. Ынчан Бурган ышкаш боданыр күзелдиг апаар бис.

¹⁵ Ол ышкаш бо делегейниң салдарынга алыспас ужурлуг бис. Ол дээрге Иеговага таарышпас чүүлдерни көөрүн, номчуурун, дыңнаарын соксадыры дээни ол. Ооң чугулазын билип алырынга мындыг чижек дузалаар. Бир кижи кадыын экижидип аар дээш, ажыктыг чемнер чиир деп шиитпирлеп алган. А бир эвес ол хоралыг чемнер чиирин уламчылаар болза, ооң кадыы экижиир бе? Чок. Шак ол ышкаш угаан-бодалывысты Бурганның бодалдары-биле долдуруп-даа тургаш, бо делегейде нептерээн бодалдар-биле ону хирлендирер болзувусса, ол ажыктыг болбас.

16. Бодун чүүден камгалаары чугула?

¹⁶ Бо делегейниң салдарындан бүрүнү-биле аңгыланыры болдунар бе? Чок, ооң салдары дөмей-ле бар, чүге дизе бо «делегейни шуут каапкаш», чорууру болдунмас (1 Кор. 5:9, 10). Суртаалдап чорааш безин, шын эвес үзел-бодалдыг улуска таваржып турар бис. Ындыг байдалдарны ояры болдунмас-даа болза, ол үзел-бодалдарны сонуургап, хүлээген херээ чок. Иисустуң үлегерин эдерип, Эрликтиң тарадып турар өөредиглеринден шиитпирлии-биле ойталап, болдунар-ла болза, ол салдарга алыспаалыңар. (Номчуптуңар: Чугаалар 4:23.)

17. Бо делегейниң салдарынга алыспас дизе, чүнү канчаар херек?

¹⁷ Чижээ, чоок эдержир эштерни шилиирде, оваарымчалыг болуру чугула. Иеговага бараалгавайн турар улус-биле чоок аралажыр болзувусса, оларның үзел-бодалдарынга алзып болурувусту Библия кичээндирип турар (У.ч. 13:20; 1 Кор. 15:12, 32, 33). Оон аңгыда оюн-тоглааны кичээнгейлиг шилиир болза эки. Оюн-тоглаада эволюция өөредиин, күчүлелди болгаш самыыралды деткип турар болза, ону сонуургавас ужурлуг бис. Ынчан угаанывысты «Бурганны угаап билиринге удурланган бүгү барымдаалар-биле» хирлендирбес бис (2 Кор. 10:4—5).

18, 19. а) Баштай хора чок ышкаш сагындырар көрүштерге хамаарыштыр оваарымчалыг болуру чүге чугула? б) Бодувуска кандыг айтырыгларны салыр болзувусса эки база чүге?

¹⁸ Чамдыкта бо делегейде нептерээн көрүштерниң багай талазы дораан эскертинмес, ынчангаш ону тодарадып билири чугула. Чижээ, медээлерни кандыг-бир политиктиг айтырыгны депшидер дээш, таарыштыр көргүзүп каан болур. А сураглыг улуска тураскааткан төөгүлерде ёзулуг чедиишкинге хамаарыштыр бо делегейниң көрүжү илереп болур. Чамдык киноларда азы номнарда «мен болгаш өг-бүлемден чугула чүү-даа чок» деп бодалды нептередип турар. Баштай ол чүүл шын, чаптанчыг, черле ындыг боор ышкаш сагындырар. Ынчалза-даа ындыг көрүш Библияга дүүшпес. Чүге дээрге Иеговага кымдан-даа артык ынак боор болзувусса, бис-даа, өг-бүлевис-даа аас-кежиктиг болур (Мф. 22:36—39). Чамдык бичии уруглар номнарында, киноларында, мультфильмнеринде багай чүве чок-даа болза, ында мөзү-шынар чок чорукту анаа чүүл кылдыр көргүзүп болур.

¹⁹ Ол дээрге шупту оюн-тоглаадан ойталаары дивээни ол: «Бо делегейниң салдары дораан көзүлбес-даа болза, ону эскерип шыдап турар мен бе? Ажы-төлүмнүң, безин бодумнуң чүнү номчуп азы көрүп турарын хынап турар мен бе? Эрликтиң делегейиниң көрүжүнден ойталаары белен боор кылдыр, ажы-төлүмге бүгү чүүлче Иегова ышкаш көрүштүг боорунга дузалап турар мен бе?» деп бодувустан айтырып болур бис. Бо делегейниң болгаш Бурганның көрүжүнүң ылгалын эки билир болзувусса, багай салдарга алыспас бис.

СИЛЕРНИ КЫМ ХЕВИРЛЕП ТУРАРЫЛ?

20. Угаан-бодалывысты кымга хевирледип турарывыс чүүден көскү?

²⁰ Угаан-бодалывысты бир болза Иегова, бир болза Эрликтиң чагырып турары делегейи хевирлеп турар деп утпаңар. Ол чүүл кымны дыңнап турарывыстан хамааржыр. Бо делегейниң үнелеп турар чүүлдерин үнелээр болзувусса, олар биске салдарлыг болур. Ынчан бодалдарывыс болгаш алдынып турарывыс бачыттыг күзелдерин хандырар улустуу ышкаш апаар. Ынчангаш угаан-бодалывысты чүнүң-биле долдуруп турарывысты хынаары дыка чугула.

21. Дараазында статьяга чүнү сайгарар бис?

²¹ Үстүнде чүүлден алырга, Иегова ышкаш боданыр дизе, бо делегейниң өөредиглеринден болгаш көрүжүнден ойталаары чедишпес. Шупту чүүлче Бурган ышкаш көрүштүг болур дээш, угаанывысты Ооң бодалдары-биле долдурар болзувусса эки. Ону дараазында статьяга көөр бис.