Иегованың чыыжынга чугула херек силер!

1. Иегова силерге кандыг алдар-хүндүнү көргүскен?

ИЕГОВАНЫҢ чыыжынга хамааржыры — дыка улуг алдар-хүндү-дүр! Акы-угбалар-биле кады бараалгааш, чүнүң-биле-даа деңнеттинмес тайбыңны болгаш өөрүшкүнү миннип чоруур бис. Иегова чыышта силерге кандыг рольду дагзып каан?

2. Павел элчин бодунуң чагааларында кандыг чижекти ажыглааныл?

² Бурганның хей-аът киирген Павел элчинниң каш чагааларында ажыглаан чижек биске бо теманы эки билип алырынга дузалаар. Ол чагааларның кайызында-даа Павел чыышты кижиниң мага-бодунга, а чыышта аңгы-аңгы христианнарны мага-бодунуң кезектеринге деңнээн (Рим. 12:4—8; 1 Кор. 12:12—27; Эф. 4:16).

3. Бо статьяга чүнү сайгарар бис?

³ Язы-сөөгүвүс, акша-төгериивис, кижизидилгевис, эртем-билиивис кандыг-даа бол, бистиң кижи бүрүзү Иегованың чыыжынга чугула рольду ойнап турар. Бис шуптувус чыышты быжыктырып шыдаар бис. Бо статьяга Павелдиң чижээ биске чүнү өөредип турарын сайгарар бис. Бирээде, чыышта кижи бүрүзү чүге чугула деп билип алыр бис. Ийиде, чыышта ролювусту билип алыры биске берге болза, чүнү канчап болурувусту сайгарар бис. Үште, Иегованың биске дагзып каан даалгазын күүседири чүге чугула деп чүүлдүң дугайында боданыр бис.

ИЕГОВАНЫҢ ЧЫЫЖЫНДА КИЖИ БҮРҮЗҮ ЧУГУЛА РОЛЬДУ ОЙНАП ТУРАР

4. Римчилерге 12:4, 5-те сөстерден чүнү өөренип ап болуп бис?

⁴ Иегованың чыыжында кижи бүрүзү чугула рольду ойнап турар деп, Павелдиң чугаалаан чижээнден көскү. Ол мынча деп бижээн: «Чижек кылдыр мага-бодувусту алыылы: ол чаңгыс болгай, ынчалза-даа хөй кезектерден бүткен (а ол кезектерниң хүлээлгелери база аңгы-аңгы). Бис база ындыг бис: хөй-даа болзувусса, Христоска башкарты бергеш, чаңгыс мага-ботту тургускан бис, а ол мага-боттуң кезектери боор боттарывыс аравыста харылзаалыг бис» (Рим. 12:4, 5). Павелдиң сөстериниң утказы кандыгыл? Чыышта кижи бүрүзүнүң ролю аңгы-аңгы-даа болза, бис шуптувус Иегованың караанга үнелиг бис.

5. Иегова чыышка кандыг «белектерни» берген?

⁵ Чыышта аңгы-аңгы рольдарның дугайында бодап кээривиске, бажывыска бир дугаарында удуртулга ап турар акылар кирип кээр чадавас (1 Фес. 5:12; Евр. 13:17). Иегова Христосту таварыштыр чыыжынга «белектерни» берген (Эф. 4:8, 11). Оларның аразында Удуртукчу чөвүлелдиң кежигүннери болгаш оларның дузалакчылары, салбырлар комитеттериниң кежигүннери, кожуун хайгааракчылары, библейжи школаларның башкылары, хуралдың удуртукчулары болгаш дузалакчылары бар. Бурган ол шупту акыларны чыышты быжыглаар база Иегованың үнелиг хойларының дугайында сагыш човаар кылдыр, ыдыктыг сүлдези таварыштыр томуйлаан (1 Пет. 5:2, 3).

6. 1 Фессалоникчилерге 2:6—8-тен алырга, Иегованың томуйлап кааны акылар чүнү кызымак кылып турарыл?

⁶ Янзы-бүрү хүлээлгелерни күүседир кылдыр, Иегова акыларны ыдыктыг сүлдези-биле томуйлап турар. Мага-боттуң аңгы-аңгы кезектери, чижээ, холдар азы буттар бүгү мага-ботка ажык-дузаны эккээр. Ооң-биле дөмей, Иегованың томуйлааны акылар бүгү чыыштың чаагай чоруу дээш, кызымаккай ажылдап чоруур. Олар ону алдар-мактал дээш эвес, а акы-угбаларны быжыктырар дээш, кылып турар. (Номчуптуңар: 1 Фессалоникчилерге 2:6—8.) Боттарын хайыралавас, быжыг бүзүрелдиг акыларывыс дээш, Иеговага өөрүп четтирер-дир бис!

7. Долу бараалгап чоруур улус кандыг йөрээлдерни ап турар?

⁷ Делегейниң аңгы-аңгы булуңнарында миссионерлер, оон ыңай тускай болгаш доктаамал эгелекчилер бооп бараалгап чоруур акы-угбалар бар. Долу бараалгал оларның амыдыралының чугула кезээ апарган. Ооң ачызында олар дыка хөй улуска Иисус Христостуң өөреникчилери апаарынга дузалаан. Өнчү-хөреңги талазы-биле хөй чүвези чок-даа болза, оларның чуртталгазы Иегованың кайгамчыктыг йөрээлдери-биле долган (Мк. 10:29, 30). Ол акы-угбаларга ынак бис база оларның күжениишкиннерин үнелээр бис.

8. Иегова суртаалчы бүрүзүн чүге үнелеп турар?

⁸ Чыышта чугула рольду чүгле томуйлаттынган акылар болгаш долу бараалгакчылар ойнап турар дээни ол бе? Чок! Буянныг медээниң суртаалчы бүрүзү Бурганга болгаш чыышка үнелиг (Рим. 10:15; 1 Кор. 3:6—9). Чүге дизе чыыштың кол даалгаларның бирээзи — Христостуң өөреникчилерин белеткээри-дир (Мф. 28:19, 20; 1 Тим. 2:4). Ынчангаш сугга суктурган, сугга суктурбаан-даа суртаалчылар ол ажылды бирги черге салырын кызып чоруур (Мф. 24:14).

9. Чыышта угбаларны чүге үнелеп турар бис?

⁹ Иегова херээжен улуска алдар-хүндүнү көргүзүп, чыышта чугула даалгаларны берип турар. Ол өгнүң херээжен ээлериниң, иелерниң, дулгуяк кадайларның, бот кыстарның бердинген бараалгалын үнелеп турар. Бурганга шынчы херээжен улустуң кайгамчыктыг үлегерлери Библияда бижиттинген. Олар мерген угаанныг, бүзүрелдиг, бараалгалга чүткүлдүг, эрес-дидим, беримчелиг, буянныг херектерни кылып чораан боорга, Иегова оларга ынак турган (Лк. 8:2, 3; Аж.-ч. 16:14, 15; Рим. 16:3, 6; Флп. 4:3; Евр. 11:11, 31, 35). Чыышта кайгамчыктыг шынарларны илередип чоруур эргим угбаларывыс бар боорга, Иеговага өөрүп четтирер-дир бис!

10. Улуг назылыг акы-угбаларывысты чүге үнелээр бис?

¹⁰ Чыышта назы-хары улуг хөй акы-угбалар бар боорга, биске өөрүнчүг. Оларның чамдыызы Иеговага аныяандан тура бараалгап келген. А чамдыызы чоокта чаа алыс шынны билип алган. Улгады берген акы-угбаларывыстың кадыкшылы колдуунда багай. Ынчангаш оларга чыыш иштинде ажыл-херектерге болгаш суртаалга киржири белен эвес. Ындыг-даа болза, олар суртаалче бүгү күжүн үндүрүп, өскелерни деткип, өөредир дээш шыдаар шаа-биле кызып турар! Оларның арга-дуржулгазындан хөйнү өөренип ап турар бис. Улуг назылыг акы-угбаларывыс Иегованың-даа, бистиң-даа караавыска чараш (У. ч. 16:31).

11, 12. Элээди дуңмаларывыстың үлегери силерни канчаар деткип турар?

¹¹ Элээди дуңмаларывыстың дугайында база бодап көрүңер. Олар Эрликке башкарткан база ооң үзел-бодалдары-биле долган делегейде чурттап турар болгаш, хөй бергелерге таваржып чоруур (1 Ин. 5:19). Ындыг турбуже, оларның чыыштарга киржип, суртаалдап, боттарының үзел-бодалдарын коргуш чокка камгалап турарын көргеш, хей-аъдывыс көдүрлүр. Эргим дуңмаларывыс, силер Иегованың чыыжынга чугула черни ээлеп турар силер! (Ыд. ыр. 8:2—3).

¹² Чамдык акы-угбаларывыс боттарын чугула эвес деп санап турар. Кижи бүрүзү чыышта чугула рольду ойнап турар деп минниринге биске чүү дузалаар? Ону сайгарыптаалыңар.

ЧЫЫШКА ЧУГУЛА СИЛЕР

13, 14. Чамдык улус чүге боттарын чыышка ажыы чок кылдыр бодаар?

¹³ Амгы үеде чамдык акы-угбалар боттарын чыышка ажыктыг кылдыр санавайн турар. Павел ол берге айтырыгже кичээнгейин салып, мынча дээн: «Бут хенертен: „Хол эвес болганымда, мага-ботка хамаарышпас мен“ — дээр-даа болза, ол мага-ботка хамаарышпас апарбас-ла болгай, ындыг аа? Ол ышкаш кулак хенертен: „Карак эвес болганымда, мага-ботка хамаарышпас мен“ — дээр-даа болза, ол мага-ботка хамаарышпас апарбас-ла болгай, ындыг аа?» (1 Кор. 12:15, 16). Ол сөстерниң утказы кандыгыл?

¹⁴ Боттарыңарны өске акы-угбалар-биле деңнээр болзуңарза, бот-үнелээшкиниңер кудулап болур. Чыышта мергежилдиг башкылар, эки удуртуп билир улус, сагыш човангыр кадарчылар барын көргеш, «мен хөөкүй оларга кайыын чедер мен» деп бодаар чадавас силер. Ындыг бодалдар силерниң биче сеткилдииңерни көргүзүп турар (Флп. 2:3). Ынчалза-даа кижи бодун салым-чаяанныг улус-биле үргүлчү деңнээр болза, чөгени берип болур. «Чыышка ажык-дузам-даа чок кижи-дир мен» деп бодалдарга безин алзып болур силер. Ындыг минниишкиннер-биле канчаар демисежирил?

15. 1 Коринфичилерге 12:4—11-ден алырга, салым-чаяанывыска кандыг хамаарылгалыг болур ужурлуг бис?

¹⁵ Солун чүүл, бирги векте Иегова чамдык христианнарга ыдыктыг сүлдениң хуулгаазын белектерин хайырлаан, ынчалза-даа шуптузунга чаңгыс аай эвес. (Номчуптуңар: 1 Коринфичилерге 12:4—11.) Иегова оларга аңгы-аңгы салым-чаяанны берген-даа болза, Аңаа кижи бүрүзү үнелиг турган. Амгы үеде Бургандан хуулгаазын белектерни албайн турар бис. Харын, кижи бүрүзүнүң салым-чаяаны дөмей эвес-даа болза, Иегова бистиң шуптувусту үнелеп турар.

16. Павел элчинниң кандыг сүмезин эдерер ужурлуг бис?

¹⁶ Бис бодувусту өске акы-угбалар-биле деңневейн, Бурганның Сөзүнде Павел элчинниң бижээн сүмезин эдерер болзувусса эки: «Кижи бүрүзү бодунуң ажыл-херээн шүгдүнзүн, ол ынчан бодун өске улус-биле деңневейн, чедиишкиннеринге чоргаарланып шыдаар» (Гал. 6:4).

17. Павелдиң сүмези биске чүзү-биле ажыктыг?

¹⁷ Павелдиң сүмезин эдерип, бодувусту өске улус-биле деңневес болзувусса, бодувуста салым-чаяанны эскерип болур бис. Чижээ, удуртукчу акывыс эки илеткелчи эвес-даа болза, өөреникчилер белеткээр ажылга мергежилдиг. Чок болза, өске хуралдың удуртукчулары ышкаш, организакчы эвес-даа болза, ол ынакшылдыг, сагыш-човангыр боорга, акы-угбалар оон библейжи сүмени айтырарындан сезинмес. Азы ооң бажыңы кезээде аалчыларга ажык (Евр. 13:2, 16). Бисте база эки талалар бар деп сактып чоруур болзувусса, чыыжывыска ажык-дузаны эккеп болур деп көрүп каар бис. Ынчан акы-угбаларның күштүг талаларын көргеш, оларга адааргавас бис.

18. Улус өөредир мергежилди канчаар сайзырадып ап болурул?

¹⁸ Суртаалдаар болгаш улус өөредир мергежилди сайзырадыры эргежок чугула. Иегова Бодунуң организациязы таварыштыр биске дузалап, кайгамчык өөредилгениң дугайында сагыш човаан. Чижээ, ажылдаар хүннерде болур ужуражылгада суртаалды экижидеринге хамаарыштыр айтыышкыннарны ап турар бис. Ол ужуражылгада билип алганыңар чүүлдерни ажыглаарын кызар-дыр силер бе?

19. Чагырга медээчилериниң школазынга өөрениринге силерге чүү дузалаар?

¹⁹ Салым-чаяанывысты сайзырадып болур аргаларның бирээзи — Чагырга медээчилериниң школазынга өөренири. Аңаа долу бараалгап чоруур, 23-тен 65 харга чедир акы-угбалар өөренип болур. Ол школага өөренири кажан-даа болдунмас деп бодаар-дыр силер бе? Чагырга медээчилериниң школазынга өөрениринге шаптыктаар чүүлдерниң дугайында бодаарының орнунга, аңаа чүге өөрениксээриңерниң дугайында боданыңар. Оон соонда сорулганы чедип алырынга херек пландан тургузуп алыңар. Сорулгаңарже кызып чүткүүр болзуңарза, Иегова болдунмас ышкаш чүүлдү боттандырарынга дузалаар.

САЛЫМ-ЧАЯАНЫҢАРНЫ ЧЫЫШТЫҢ МЕНДИ-ЧААГАЙ ЧОРУУНГА АЖЫГЛАҢАР

20. Римчилерге 12:6—8-те бижээн сөстерден чүнү өөренип ап болур бис?

²⁰ Павелдиң чижээ бисти база бир ажыктыг чүүлге өөредип турар. Римчилерге 12:6—8-те бижээн сөстерниң дугайында боданып көрээлиңер (номчуптуңар). Чыышта улустуң салым-чаяаны аңгы-аңгы деп, Павел мында бижип турар. Ынчалза-даа чыышты быжыглаар дээш, салым-чаяанывысты ажыглаар ужурлуувусту ол онзалап демдеглеп турар.

21, 22. Роберт биле Феличениң чижээнден чүнү өөренип ап болур бис?

²¹ Бир акывыс, ону Роберт деп адаалы, даштыкы чуртка бараалгап турган. Кезек үе эртерге, ону чуртунче чанып келгеш, Вефилге бараалгаарын дилээн. Ынчалза-даа Роберт чаа томуйлаашкынынга өөрүвейн, бир-ле чүвени шын эвес кылган хевирлиг мен деп бодаан. Акылар ону канчаар-даа деткиирге, ол оларга бүзүревээн. Роберт мынча дээн: «Меңээ дааскан ажыл-херекти эки күүседип „шыдаваанымга“ муңгарап, бодумну буруудадып турдум. Ындыг минниишкиннерге хөй айлар дургузунда алзып келдим. Чамдыкта Вефилге бараалгалымны соксадыр деп бодап турган мен». Аңаа катап өөрүшкүлүг апаарынга чүү дузалаан? Бир удуртукчу акый солун бодалды аңаа сагындырган: Иегова ооң мурнунда даалгаларны амгы үеде кылып чоруур даалгаларга белеткээр дээш, биске дагзып турган. Артында каапкан чүүлдерже эвес, а бурунгаар чүткүп, амгы үеде кылып шыдаар чүүлдерже кичээнгейни углаары чугула деп, Роберт билген.

²² Феличе Эпископо дээр акывыс база ындыг чүүлге таварышкан. Ол 1956 чылда өөнүң ишти-биле Галаад школазын доозупкаш, Боливияга кожуун хайгааракчызы кылдыр бараалгай берген. А 1964 чылда оларның оглу төрүттүнген. Феличе сактып чугаалаан: «Ынак бараалгалывысты каары биске дыка берге болган. Шынын чугаалаарга, мен бир чыл чыгыы бодумну кээргеп, томуйлаашкынымны каар ужурга таварышканымга дыка-ла үр хараадап келген мен. Ынчалза-даа Иегованың ачызында тургустунган байдалче өске талазындан көрүп, ада боор чаа даалгамче бүгү кичээнгейимни углаан мен». Роберт биле Феличениң минниишкиннери-биле таныш силер бе? Ооң мурнунда күүседип чораан хүлээлгелерни ам күүсетпейн баргаш, муңчулуп чор силер бе? Ийе болза, амгы үеде Иеговага болгаш чыышта акы-угбаларга кылып болур чүүлдериңерже кол кичээнгейни салыңар.

23. Чүнү канчаар ужурлуг бис? Дараазында статьяга чүнү сайгарар бис?

²³ Иеговага кижи бүрүзү үнелиг. Ол бисти Бодунуң өг-бүлезиниң кежигүннери кылдыр минниривисти күзеп турар. Ынчангаш чыышта акы-угбаларны канчаар деткиирин боданып, ону кызып боттандырыңар. Ынчан чыышка ажыктыг болуруңарга чигзинмес силер. Ынчаарга кады бүзүрээн ха-дуңмавыска кандыг хамаарылгалыг бис? Оларга ынакшылды канчаар көргүзүп болур? Ону дараазында статьяга сайгарар бис.