Өлген улустуң дугайында алыс шынны камгалаңар

1, 2. а) Эрлик улусту канчаар мегелеп турарыл? б) Бо статьяга чүнү сайгарар бис?

ЭРЛИК, «нүгүл-мегениң адазы», бурунгу үеден бээр улусту мегелеп чоруур (Ин. 8:44). Ооң «чепсектериниң» санынче өлүмнүң болгаш өлген соонда чуртталганың дугайында меге өөредиглер кирип турар. Ол өөредиглерден хөй ёзу-чаңчылдар болгаш сагылгалар тывылган. Ол чылдагаан-биле хөй акы-угбаларывыс чоок улузу азы кожалары чок апаарга, «бүзүрели дээш чүткүлдүг» туржур ужурга таваржып турар (Иуда 3).

² Бир эвес ындыг шенелдеге таваржы берген болзуңарза, өлген улустуң байдалының дугайында библейжи өөредигден быжыг туттунарынга силерге чүү дузалаар? (Эф. 6:11). Кады бүзүрээн акывысты азы угбавысты Бурганга таарымча чок ёзу-чаңчылдарны сагыыр кылдыр албадап турар болза, ону канчаар деткип, оожургадып болур? Бо статьяга каш библейжи дүрүмнү сайгарар бис. А эгезинде өлүм дугайында Библияда чүнү бижээнин көрүптээлиңер.

ЧОК АПАРГАН УЛУСТУҢ БАЙДАЛЫ КАНДЫГЫЛ?

3. Баштайгы меге чүү чүвеге чедиргенил?

³ Бурган кижилерни мөңге чурттаар кылдыр чаяаган. Ооң күзел-бодалынче өлүм кирбейн турган. Ынчалза-даа Ада́м биле Ева мөңге чурттаар дээш, Иегованың: «Ол ыяштың [эки-бакты билириниң] чимизин чиве: бир эвес ону амзаптар болзуңза, ол-ла хүн өлүр сен» дээн бөдүүн айтыышкынын сагыыр ужурлуг турганнар (Э.д. 2:16, 17). Эрлик чыланны ажыглап, Евага: «Чок, өлбес силер» — дээн (Э.д. 3:4, 6). Муңгаранчыг чүүл, Ева ол мегеге бүзүрей бергеш, чимисти чипкен. Соонда Ада́м база аңаа катчыпкан (Э.д. 3:4, 6). Ынчалдыр өлүм биле бачыт чуртталгавыстың чарылбас кезии апарган (Рим. 5:12).

4, 5. Эрлик кижилерни канчаар мегелеп чоруурул?

⁴ Бурганның сөстери бүде берген: Ада́м биле Ева өлүп калганнар. А Эрлик кижилерни мегелээрин соксатпаан. Кижи өлүрге, ооң өлүм чок сүнезини улаштыр көзүлбес өртемчейде чурттап чоруур деп, меге өөредиг чоорту тывылган. Шак ол мегениң аңгы-аңгы хевирлеринге дыка хөй улус бүзүреп турар (1 Тим. 4:1).

⁵ Чүге ынча хөй улус ол меге өөредигге бүзүрээрил? Эрлик кижилерниң өлүмге хамаарылгазын билир болгаш, ону ажыглап турар. Бис мөңге чурттаар кылдыр чаяаттынган болгаш, өлүрүн күзевес бис (Эккл. 3:11). Өлүм — бистиң дайзынывыс-тыр (1 Кор. 15:26).

6, 7. а) Эрлик өлүм дугайында шынны чажырып шыдаан бе? Тайылбырлаптыңар. б) Бурганның Сөзүнден алыс шын үндезин чок коргуушкуннардан бисти канчаар хостап турарыл?

⁶ Эрлик өлүм дугайында шынны чажырып шыдаваан. Амгы үеде өлген улустуң байдалын база оларга идегелдиң дугайында алыс шынны дыка хөй улус билир апарган. Олар ооң дугайында өскелерге чугаалап чоруур (Эккл. 9:5, 10; Аж.-ч. 24:15). Ол билиглер бисти аргалап, үндезин чок коргуушкуннардан болгаш чигзиниглерден камгалап турар. Өлген улустан кортпас бис база олар ам канчап турар ирги дээш муңгаравас бис. Кижи өлген соонда, чиде бээр болганда, ооң кандыг-даа хора чедирер харыы чок. Ол улуг уйгузу-биле удуп чыдар (Ин. 11:11—14). Оон ыңай чок апарган улуска үе туруптар деп билир бис. Кажан диргизиишкин эгелей бээрге, чүс-чүс чылдар бурунгаар өлген улуска безин, ол чылдар карак чивеш аразында эрткен ышкаш кылдыр сагындырар.

⁷ Өлген улустуң байдалының дугайында алыс шын бөдүүн, тода болгаш ужур-уткалыг. Эрликтиң будалчак мегези ол алыс шынга канчап-даа деңнешпес! Эрлик бодунуң мегези-биле кижилерни мегелээринден аңгыда, Чаяакчының адын карартып турар. Эрликтиң чедирген хоразының хемчээлин тодарадыр дээш, баштай бо айтырыгларның харыызын билип алыылыңар: ооң мегези Иегованы канчаар карартып турар? Ооң мегези Христостуң бачыттан хостаар өргүлүнге бүзүрелди канчаар кошкадып турар? Ол меге кижилерниң ажыг-шүжүүн болгаш хилинчек-човалаңын дам күштелдирип турар деп чүге чугаалап болур?

ЭРЛИКТИҢ МЕГЕЗИ ДЫКА УЛУГ ХОРАНЫ ЧЕДИРГЕН

8. Иеремия 19:5-тен алырга, чок апарган улустуң байдалының дугайында Эрликтиң мегези Иегованың адын канчаар баксырадып турарыл?

⁸ Чок апарган улустуң байдалының дугайында Эрликтиң мегези Иегованың адын баксырадып турар. Чижээ, кижилер өлген соонда алдыы оранда өрттенип, хинчектенип турар деп меге өөредиг Иегованың адын карартып турар. Чүге? Ол өөредиг ынакшылдыг Бурганны, Эрлик ышкаш, каржы кылдыр көргүзүп турар (1 Ин. 4:8). Ону бодап келгеш, чүнү миннир-дир силер? А оон артык, Иегова чүнү миннип турарыл? Ол каржы чоруктуң кандыг-даа хевиринге хөңнү чок болгай. (Номчуптуңар: Иеремия 19:5.)

9. Эрликтиң мегези Иоанн 3:16 биле 15:13-те бижээн Христостуң бачыттан хостаар өргүлүнге бүзүрелди чүге кошкадып турар?

⁹ Эрликтиң мегези Христостуң бачыттан хостаар өргүлүнге бүзүрелди кошкадып турар (Мф. 20:28). Кижи өлүм чок сүнезинниг деп меге өөредигни Эрлик тарадып турар. Ол, шынап-ла, ындыг турган болза, улус мөңге чурттап болур ийик. Ынчаарга мөңге чурттаар дизе, Христостуң бис дээш өлген херээ чок турган. Христостуң өргүлү — кижилерге көргүскен ынакшылдың өндүр улуг илерээшкини-дир деп сактып чоруңар. (Номчуптуңар: Иоанн 3:16; 15:13.) Ол белектиң үнезин кудуладып турар өөредиглер Иегованың болгаш Иисустуң сеткилин кайы хире муңгарадып турар-дыр, бодап көрүңер даан!

10. Эрликтиң мегези улустуң ажыг-шүжүүн болгаш хилинчек-човалаңын канчаар күштелдирип турар?

¹⁰ Эрликтиң мегези улустуң ажыг-шүжүүн болгаш хилинчек-човалаңын күштелдирип турар. Чаш төлүн оскунуп алган ада-иеге чамдыкта мынча дээр: «Дээрге база бир ангелчигеш турзун дээш, Бурган силерниң төлүңерни дээрже аппарган-дыр». Ындыг меге ада-иениң ажыг-шүжүүн чиигедир бе азы дам күштелдирер бе? Шаанда церковьтуң өөредиинге удурланган улусту отка өрттедип, шаажылап турган улус алдыы оран дугайында меге өөредигни ажыглап, ооң-биле агартынып турган. Испан инквизиция дугайында бир номдан алырга, кижилерни отка өрттедип шаажылап турган улус «церковька удурланган кижилер алдыы оранга өрттенириниң кандыг боорун көрүп, өлүрүнүң мурнунда буруузун миннингеш, алдыы оранче кирбес кылдыр, камгалалды Бургандан ап болур» деп бүзүреп чораан чадавас. Чамдык чурттарда улус чок апарган өгбелеринге мөгейип, олардан йөрээл алыр дээш кызып чоруур. А өске чурттарда өгбелери хора чедирбезин дээш, оларны «чемгерип», янзы-бүрү өргүлдерни кылып турарлар. Эрликтиң мегезинден тывылган өөредиглер ёзулуг оожургал бербейн турар. Харын-даа ол улусту дүвүредип, коргудуп чоруур.

БИБЛЕЙЖИ АЛЫС ШЫННЫ КАМГАЛАҢАР

11. Төрелдеривис азы таныыр улузувус экини күзеп, Бурганның Сөзүнге удур алдынарынче бисти канчаар албадап болур?

¹¹ Төрелдеривис азы таныыр улузувус экини күзеп, библейжи эвес ёзу-чаңчылдарны бисти сагызын дээш, албадаарын оралдажып болур. Ындыг таварылгаларда Бурганга болгаш Ооң Сөзүнге ынакшылывыс Иеговага дыңнангыр болурунга биске дузалаар. Чижээ, олар «калган кижиге ынак эвес сен, аңаа хүндүткел көргүспейн турар сен» деп бисти ыяттырып азы «сен дээш ол кижи дириг улуска хора чедире берзе, канчаар сен?» деп болур. Библейжи алыс шынны канчаар камгалап болур бис? Бурганның Сөзүнден каш дүрүмнү көрүптээлиңер.

12. Библияга кандыг өөредиглер болгаш ёзу-чаңчылдар дүүшпес?

¹² Библейжи эвес ёзу-чаңчылдардан болгаш өөредиглерден оваарнып чоруңар (2 Кор. 6:17). Кариб ортулуктарында чоннарның хөй кезии кижи чок апаарга, ооң сүнезини ырак эвесте чоруп турар база аңаа багай хамаарылгалыг чораан улусту ол кезедип болур деп бүзүреп турар. Безин ол сүнезин «төрел аймакка каргыш салып болур» деп бир справочникте демдеглээн. Африканың чамдык чурттарында калган кижиниң бажыңында көрүнчүктерни дуглаар база ооң чуруктарын ханаже көрүндүр салыр. Өлген кижи бодунуң арнын көрбес ужурлуг дээр. Иегованың Херечилери болганывыста, ындыг сагылгаларга бүзүревес бис. Ол ышкаш Эрликтиң мегезин деткип турар ёзу-чаңчылдарны сагывас бис (1 Кор. 10:21, 22).

13. Иаков 1:5-тен алырга, кандыг-бир ёзу-чаңчылды сагып болур-болбазынга чигзинип турар болзуңарза, чүнү канчаарыл?

¹³ Кандыг-бир ёзу-чаңчылды сагып болур-болбазынга чигзинип турар болзуңарза, Иеговадан мерген угаанны бүзүрел-биле дилеп, мөргүңер. (Номчуптуңар: Иаков 1:5.) Ооң соонда ол ёзу-чаңчылдың дугайында дептерлеривисте чүү дээнин көрүңер. Херек болза, хуралыңарның удуртукчулары-биле ол айтырыгны сайгарыңар. Олар силерге канчаар алдынарын дорт айтып бербес-даа болза, аңаа хамаарышкан библейжи дүрүмнерни тып алырынга дузалаар, чижээ, бо статьяда дээн ышкаш. Ынчалдыр «угаан-медерелиңерни буянны бузуттан ылгап» өөредип алыр силер (Евр. 5:14).

14. Өскелерге моондак болбазынга биске чүү дузалаар?

¹⁴ «Ол бүгүнү Бурганның алдар-хүндүзү дээш кылып чоруңар» база «моондак тургуспаңар» (1 Кор. 10:31, 32). Кандыг-бир ёзу-чаңчылды сагыыр деп баргаш, шиитпириңерниң өске улустуң, ылаңгыя кады бүзүрээн акы-угбаларның, арын-нүүрүнге кандыг салдарны чедирерин бодаар херек. Оларны бачытче чыгаарын канчап-даа күзевес бис (Мк. 9:42). Оон аңгыда Иеговага бүзүревес улусту хей черге хомудадыксавас бис. Оларның-биле маргышкан азы ёзу-чаңчылдарын кыжырган херээ чок. Ынакшыл биске улус-биле хүндүткелдиг чугаалажырынга дузалаар. Ынчалдыр Иегованы алдаржыдар бис. Ынакшылдың күжү улуг деп утпаңар: ону илередип тургаш, удурланыкчыларывыстың чүрээн безин чымчадып болур бис.

15, 16. а) Өске улус бүзүреливистиң дугайында чүге билир болза эки? Чижекти чугаалаңар. б) Римчилерге 1:16-да Павелдиң сөстерин канчаар ажыглап болур бис?

¹⁵ Иегованың Херечизи мен деп чугаалаңар (Иса. 43:10). Төрелдериңер болгаш кожаларыңар силерниң Иеговага бараалгап турарыңарны билир болза, дүвүренчиг байдалда шын алдынары силерге белен болур. Мозамбиктен Франсишку мынча деп бижээн: «Алыс шынны билип алгаш, кадайым Каролина-биле төрелдеривиске моон соңгаар чок апарган улуска мөгейбес бис деп чугааладывыс. Каролинаның угбазы чок апаарга, бүзүреливис шенеттинген. Чурттап турар черивисте мындыг шажынчы ёзулал бар: өлген кижиниң мөчүзүн чуггаш, суун черге төп каарга, ооң чоок төрели аңаа үш дүн ишти хонар ужурлуг. Ол чаңчыл-биле алырга, шак ынчаар өлген кижиниң сүнезинин оожургадып болур. Төрелдер ол хүлээлгени Каролинаны кылзын дээн».

¹⁶ Бо өг-бүле канчалганыл? «Бис Иегованы өөртүксеп, Аңаа ынак болгаш, ол чаңчылды сагыырындан ойталаан бис. Каролинаның төрелдери аажок килеңнээн. Олар бисти „калган кижини хүндүлевейн турар силер“ деп буруудадып, „силерге кажан-даа дузалажып, келбес бис“ дээннер. Чүге бүзүреп чоруурувусту ооң мурнунда-ла тайылбырлаан болгаш, олар хорадап турда, ол дугайты чугаалашпаан бис. Чамдык төрелдер безин биске болчуп, бүзүреливис дугайында тайылбырлаанывысты сагындырган. Чоорту төрелдеривис оожургай бээрге, эптежип алган бис. Чамдыктары безин бажыңга келгеш, библейжи дептерлерни бистен дилээн» — деп, Франсишку чугаалаан. Өлген улустуң дугайында алыс шынны камгалаарындан кажан-даа ыятпаалыңар! (Номчуптуңар: Римчилерге 1:16.)

АЖЫГ-ШҮЖҮГЛҮГ УЛУСТУ АРГАЛАП, ДЕТКИҢЕР

17. Акывыстың азы угбавыстың чоок кижизи чок апаарга, чүнү канчаар болзувусса эки?

¹⁷ Кады бүзүрээн ха-дуңмавыстың бирээзиниң чоок кижизи чок апаарга, ёзулуг эш болур дээш кызар болзувусса эки. «Ха-дуңмаң айыыл-халап үезинде дузалаар дээш төрүттүнер» — дээн болгай (У.ч. 17:17). Ылаңгыя акывысты азы угбавысты Бурганга таарымча чок ёзу-чаңчылдар сагыырын албадап турар болза, оларны канчаар деткип болур бис? Ону кылырынга дузалаар ийи библейжи дүрүмнү сайгарыптаалыңар.

18. Иисус чүге ыглай берген база ооң чижээнден чүнү өөренип ап болур бис?

¹⁸ «Качыгдап ыглааннарның качыгдалын үлежиңер» (Рим. 12:15). Ажыг-шүжүгге таварышкан кижини аргалаар сөстерни тывары чамдыкта берге. Ынчалза-даа карак чажы кандыг-даа чечен сөстерден артык боор. Кажан Иисустуң өңнүү Лазар чок апаарга, Мария, Марфа болгаш ооң эштери ажыын ажып, качыгдап турганнар. Дөрт хонук эрткенде Иисус келген. Ол улустуң ыглап-сыктаанын көргеш, Лазарны диргизиптерин билир турган-даа болза, «ыглай берген» (Ин. 11:17, 33—35). Иисус ыглааны-биле Иегованың минниишкиннерин илереткен. Ол ышкаш ооң карааның чажы ол өг-бүлеге кайы хире ынаан көргүскен. Чигзиниг чок, ол чүүл Мария биле Марфаны дыка оожургаткан. Ооң-биле дөмей, акы-угбаларывыс ынакшылывысты болгаш олар дээш сагыш човап турарывысты көргеш, ынак эш-өөрүнүң деткимчезин миннип, чааскаан эвезин билип турарлар.

19. Качыгдаан кижини аргалап тургаш, Экклесиаст 3:7-де сөстерни канчаар ажыглап болур бис?

¹⁹ «Ыыттавас-даа үе турар, чугаалаар-даа үе турар» (Эккл. 3:7). Чоок кижизин ышкынган кижини оон ыңай канчаар аргалап болурул? Ону кичээнгейлиг дыңнап тургаш. Сагыш-сеткилин үндүр чугаалаар аргадан аңаа бериңер. Качыгдаан кижиниң чугаазы «доңгун» болза, хомудаваңар (Иов 6:2, 3). Ооң Иеговага бүзүревес төрелдери олче «халдап» турар боорга, аңаа дыка берге чадавас. Ол ышкаш кады мөргүңер. «Мөргүлдү дыңнап турар Бурган» аңаа күштү болгаш тода угаанны бээр кылдыр дилеңер (Ыд.ыр. 64:3). Болдунар болза, Библияны азы дептерлеривистен таарымчалыг статьяны, чижээ, ону деткиптер допчу намдарны кады номчуңар.

20. Дараазында статьяга чүнү сайгарар бис?

²⁰ Өлген улустуң байдалын болгаш «чевеглерде» чыдар улусту манап турар кайгамчык келир үе дугайында алыс шынны билир болганывыска Бурганга дыка-ла өөрүп четтирер-дир бис! (Ин. 5:28, 29). Библейжи алыс шынны сөзүвүс болгаш ажыл-херээвис-биле дидим камгалап, арга тыптып кээрге-ле, ооң дугайында улуска чугаалаалыңар. Дараазында статьяга улус алыс шынны билип албас кылдыр чардыктырып турар Эрликтиң база бир какпазын сайгарар бис. Ол дээрге караң көрнүр чорук-тур. Ооң-биле холбаалыг ажыл-херектерден болгаш оюн-тоглаадан ойталаары чүге чугулазын көөр бис.