Номчукчуларның айтырыглары

1 Коринфичилерге 10:13-те: «Бурган... кажан-даа силерге күш чедер шааңардан ажа бээр күткүлге эртерин чөпшээревес» — дээн. Павелдиң сөстери-биле алырга, кандыг шенелделерни эртип шыдаарывысты Иегова баш бурунгаар билир болгаш, ооң аайы-биле оларны чөпшээреп турар дээни ол бе?

Бо айтырыгны шинчилеп көрээлиңер. Оглу амызынга четтинген бир акый: «Оглувустуң амызынга четтинерин кадайым-биле ажып эртип шыдаптарывысты Иегова баш удур билир турган бе? Таанда-ла Бурган бисти ону ажып эртип шыдаптар деп бодааш, хай-халапты чөпшээрепкени ол бе?» — деп айтырган. Кандыг шенелделерге таваржырывысты Иегова шиитпирлеп турар деп бодаар үндезиннер бар бе?

1 Коринфичилерге 10:13-те бижээн Павелдиң сөстерин ханы шинчилеп көөрү дараазында түңнелге кээринге дузалаар: Библиядан алырга, кандыг шенелделерни эртип шыдаарывысты болгаш оларның кайызын чөпшээрээрин Иегова шиитпирлевейн турар. Чүге ындыг түңнел үндүрүп болурунуң дөрт чылдагаанын көрээлиңер.

Бирээде, Иегова кижилерге хостуг эргени берген. Ол бисти канчаар чурттаарын боттары шиитпирлезин деп күзеп турар (Ы. х. к. 30:19, 20; Иис. 24:15). Шын шилилгени кылыр болзувусса, базымнарывысты Иегова башкарар (У. ч. 16:9). Шын эвес орук шилип алыр болзувусса, ооң багай уржуктары-биле чурттаар ужурга таваржыр бис (Гал. 6:7). Кандыг шенелделерни эртерин Иегова шиитпирлээр турган болза, ол чүүл хостуг эргевисти хажыдып турар апаар эвес бе?

Ийиде, Иегова бисти «үе-хуусаа биле таварылгадан» камгалавайн турар (Эккл. 9:11). Таарымча чок үеде болгаш черге турар болзувусса, кайывыс-биле-даа багай чүүл (чамдыкта аар уржуктарлыг) болу берип болур. Суургага бастыртып өлген 18 кижиниң таварылгазын чугаалааш, Иисус болган чүүлдү Бурганның күзел-соруу-биле болган деп чугаалаваан (Лк. 13:1—5). Кымның чурттаарын, а кымның чогумча чок байдалдың хайы-биле өлүрүн Бурган шиитпирлеп турар деп бодаары сарыылдыг бе?

Үште, кижи бүрүзү маргыштыг айтырыгга киржип турар. Иегованың бараалгакчылары шенелделерге таварышкаш, Аңаа шынчы бооп артып шыдавас деп, Эрлик чугаалаан (Иов 1:9—11; 2:4; Ажыд. 12:10). Бир эвес Иегова шенелделерни, оларны эртип шыдавас деп санааш, бистен чайладып турган болза, бисти ажык-кончаа сүрүп бараалгап турар дээн Эрликтиң буруудадыышкыннары шын апаар.

Дөртте, келир үени өттүр көөр арга-шинээн Иегова үргүлчү ажыглавайн турар. Кандыг шенелдеге таваржырывысты баш удур шиитпирлээр дизе, келир үевисте болур чүүлдерниң шуптузун Бурган өттүр көөр апаар. А ындыг бодал Библияга чөрүжүп турар. Чугаажок, Бурган келир үени өттүр көрүп шыдаар (Иса. 46:10). Ынчалза-даа ол арга-шинээн Бурган үргүлчү ажыглавайн турар (Э. д. 18:20, 21; 22:12). Ол хостуг эргевисти хүндүлеп турар. Ынакшылдыг болгаш чөптүг Бурган ындыг болур эвес бе? (Ы. х. к. 32:4; 2 Кор. 3:17).

Ынчаарга: «Бурган... кажан-даа силерге күш чедер шааңардан ажа бээр күткүлге эртерин чөпшээревес» дээн сөстерниң утказы кандыгыл? Мында Павел шенелдениң мурнунда эвес, а ооң үезинде Бурганның канчаар хөделип турарын бижээнa. Кандыг-даа шенелделерге таварышсывысса, Иеговага ынаныр болзувусса, Ол бисти деткиир деп, бо сөстер бисти бүзүредип турар (Ыд. ыр. 54:23). Павелдиң бүзүредии ийи үндезин алыс шында туттунуп турар.

Бирги алыс шын: таваржып турар шенелделеривис — «кижи шаа-биле» шенелделер-дир. Эрликтиң делегейинге бергелерни ояры болдунмас. Ынчалза-даа Бурганга ынаныр болзувусса, оларны шыдажып эртиптер бис (1 Пет. 5:8, 9). 1 Коринфичилерге 10:6—11-де Павел израильчилерниң ээн кургаг ховуга таваржып турган шенелделерин бижээн. Бурганга шынчы улуска ол шенелделер ажып эрттинмес хире берге турбаан. Ынчалза-даа, Павелдиң демдеглээни дег, чамдык израильчилер дыңнангыр эвес болган. Олар Бурганга ынанмайн баргаш, шын эвес күзелдерге алзыпкан.

Ийиги алыс шын: «Бурган... шынчы». Бурганның бодунуң чонун канчаар аажылап турганындан «Ооң чагыг-керээзин сагыыр база Аңаа ынак» улуска бердинген ынакшылы көстүп турар (Ы. х. к. 7:9). Оон аңгыда Иегова аазаашкыннарын үргүлчү күүседип чоруур деп Бурганның чонунуң төөгүзүнден көскү (Иис. 23:14). Ынчангаш Бурганга ынак болгаш Аңаа дыңнангыр улус шенелделерге таварышса, Иегова 1 Коринфичилерге 10:13-те аазаашкынынга шынчы болур деп чигзинмейн барып болур: 1) шенелдени кижи эртип шыдавайн баар хире кылдыр байдалды баксырай бээрин Ол болдурбас; 2) Ол «канчап адырлырын... айтып бээр».

Иегова Аңаа ынанып турар улуска шенелделерден адырлырын канчаар айтып берип турарыл? Шенелдеден Ол бисти адырып шыдаар деп чигзиниг чок. Ынчалза-даа Павел: «Ону шыдажып эртсиннер дээш, канчап адырлырын... айтып бээр» — деп бижээн. Ол дээрге шенелдени шыдажып эртсин дээш, Иегова биске бүгү-ле херек чүвени бээр дээн уткалыг. Иегованың биске дузалаар дээш ажыглап турар аргаларының чамдыызын көрээлиңер.

• «Кандыг-даа аар-берге байдалга таварышканывыста, Бурган бисти аргалап чоруур» (2 Кор. 1:3, 4). Иегова биске дүвүрээзинниг бодалдар биле минниишкиннерден адырлырынга Библияны, ыдыктыг сүлдени болгаш шынчы чалчаның берип турар «аъш-чемин» ажыглап, дузалап турар (Мф. 24:45; Ин. 14:16; Рим. 15:4).

• Иегова бисти ыдыктыг сүлдези-биле башкарып турар (Ин. 14:26). Шенелдеге таваржы бээривиске, ыдыктыг сүлде библейжи шүлүктерни болгаш дүрүмнерни сактып кээринге дузалап турар.

• Бурган биске дузалаар кылдыр дээрниң төлээлерин чоргузуп болур (Евр. 1:14).

• Ол акы-угбаларны бисти деткиир кылдыр оттуруп болур (Кол. 4:11).

Ынчап кээрге, 1 Коринфичилерге 10:13-те Павелдиң сөстери Иегова кандыг шенелделерни эртип шыдаарывысты баш бурунгаар билир болгаш, ооң аайы-биле оларны чөпшээреп турар деп утканы илеретпейн турар. Шенелделер үезинде Иеговага долузу-биле ынаныр болзувусса, Ол бистиң эртип шыдавас хире чүвевисти чөпшээревес база ону шыдажып эртсин дээш, канчаар адырлырын айтып бээр деп чүүлге чигзинмейн барып болур бис. Ол чүүл бисти аажок оожуктуруп турар!