Биеэги бүдүжүңерден адырлып алыңар

1, 2. Өске улус Иегованың Херечилериниң чүзүн эскерип турар?

ХӨЙ улус Иегованың Херечилериниң чараш шынарларын эскерип турар. Нацист Германияга чурттап чораан акы-угбаларывыстың дугайында Антон Джилл деп чогаалчы мынчаар бижээн: «...нацистер Иегованың Херечилеринге дыка хөңнү чок турган. [...] 1939 чылда оларның 6000 хире кижизи... [концентрастыг лагерьлерже] шөлүттүрген». Ынчалзажок бо чогаалчының сөстеринден алырга, олар чеже-даа каржы-дошкун истеп сүрүүшкүннерге таваржып турган болза, олар хорадаачал эвес, бүзүрелдиг, демниг болгаш Бурганга шынчы турганы-биле билдингир чораан.

² Каш чыл бурунгаар Мурнуу Африкага, хөй ниитилелдиң кичээнгейин хаара туткан, Иегованың Херечилериниң тускай ужуражылгазы болуп эрткен. Улустуң хөй кезии Бурганның бараалгакчыларының эки шынарлар илередип турганын демдеглээн. Ол чурттуң хоойлуларының ужундан кара биле ак кештиг Иегованың Херечилериниң кады чыглып шыдавас үези турган. Ынчангаш 2011 чылдың декабрь 18-те Йоханнесбургтуң улуг стадионунга Мурнуу Африкадан болгаш кожа чурттардан 78000 ажыг янзы-бүрү язы-сөөктүг акы-угбаларның чыглып келгени кайгамчык болган. Стадионнуң даргазы ол болуушкуннуң дугайында мынча дээн: «Бо стадионга ол хире эки кижизиттинген улусту черле көрүп көрбээн мен. Кижи бүрүзү шевергин кеттинген. Стадионну дыка арыг кылдыр аштап каан силер! А эң-не кол чүүл — язы-сөөк ылгаар чорук силерде чок».

3. Бүдүн делегейде ха-дуңмавыс чүзү-биле кайгамчык?

³ Бо улустуң чугаазындан алырга, бүдүн делегейде ха-дуңмавыс, шынап-ла, кайгамчык улус бооп турар (1 Пет. 5:9). Өске организациялардан чүзү-биле ылгалып турар бис? «Биеэги бүдүжүңерни... адыра сивирип каапкаш, чаа кижиниң бүдүжүн кедип ал[ыңар]» деп сүмени эдерерин бар-ла шаавыс кызып турар бис (Кол. 3:9, 10). Ону кылырынга биске Библия болгаш Бурганның ыдыктыг сүлдези дузалап турар.

4. Бо статьяга чүнү сайгарар бис база ол чүге чугула?

⁴ Бир катап биеэги бүдүжүвүстен адырлып алгаш, олче кажан-даа эгилбес ужурлуг бис Биеэги бүдүжүвүстен адырлыры чүге чугула база ону канчаар кылып болур бис? Бо статьяга ону сайгарар бис. Оон аңгыда бачытче долузу-биле дүлнү берген азы багай чаңнар сайзырадып алган кижи өскерлип болур деп чүүлдү база көөр бис. Ол ышкаш Бурганга хөй чыл ишти бараалгап турар улуска каапкан багай херектеринче дедир эгилбезинге чүү дузалаарын сайгарар бис. Ындыг сагындырыглар биске чүге херек? Харааданчыг чүүл, Иегованың чамдык бараалгакчылары серемчилелин чидиргеш, шын эвес херектерин катап кылып эгелээн. Ынчангаш 1 Коринфичилерге 10:12-де: «Ынчангаш ийи бут кырында быжыг турар мен деп бодаар кижи, тайып ушпас дээш, кичээнзин» деп сагындырыгга шыңгыы хамаарылгалыг болур ужурлуг бис.

БАР-ЛА МӨЗҮ-ШЫНАР ЧОК КҮЗЭЭШКИННЕРДЕН АДЫРЛЫП АЛЫҢАР

5. а) Бурганга таарымча чок чаңнардан дүрген адырлыры чүге чугула? Чижектен чугаалаңар. (Статьяның эгезинде чурукту көрүңер.) б) Колосчуларга 3:5—9-биле алырга, биеэги бүдүшче чүү кирип турар?

⁵ Хевиңер хирленип, багай чыттыг апарза, канчаар силер? Ону дүрген-не уштурун бодаар болгай силер. Шак ол ышкаш, Бурганга таарымча чок чаңнар бисте бар деп билип турар болзувусса, оон дүрген адырлып аары аажок чугула. Бис Павелдиң христианнарга берген тода айтыышкынын эдериксеп турар бис. Ол Бурганга таарымча чок шупту чүүлдерден, оларның санында самыыралдан болгаш чүдек-бужар херектерден, адырлып алырын сүмелээн. Павелдиң сүмезин сайгарыптаалыңар. (Колосчуларга 3:5—9 номчувут.)

6, 7. а) Биеэги бүдүштен адырлып алыр дээш, шиитпирлиг хөделири чугула деп чүүлдү Павелдиң сөстери канчаар көргүскен? б) Сакура канчаар чурттап чораан база аңаа өскерлип алырынга чүү дузалаан?

⁶ Самыырал. Библияда «самыыралче» өг-бүле тутпаан улустуң аразында эр-херээжен чорук болгаш гомосексуализм кирип турар. Павел христианнарга «бачыттыг делегейден кээр бүгү чүүлүңерни: самыыралды» узуткаңар, өскээр чугаалаарга, мөзү-шынар чок күзээшкиннерден адырлып алыңар дээн. Павелдиң бо сөстеринден алырга, бачыттыг күзээшкиннеривистен адырлып алыр дээш, шиитпирлиг хөделири дыка чугула. Олардан адырлыры берге-даа болза, ол демиселге тиилеп болур бис.

⁷ Япониядан Сакураa дээр угбавыстың чижээн көрээлиңер. Чалыы үезинде ол чааскаанзырап, ооң сагыш-сеткили үргүлчү хоозурап чораан. Ол 15 харлыындан тура, аңгы-аңгы эр улус-биле холбажып эгелээн. Шак ынчаар ол чааскаанзырал-биле демисежип турган. Ол хараадап, үлешкен: «Мен үш катап уруг дүжүрткен мен. Эгезинде эр улус-биле харылзаа мени камгалап турган ышкаш. Сактырымга, олар меңээ ынак база мен оларга херек ышкаш болган мен. Ынчалза-даа ындыг харылзааларым көвүдээн тудум, бодумну камгалал чок кылдыр миннир апарган мен». Сакура ынчаар 23 харлыынга чедир чурттап келген. Оон ол Иегованың Херечилери-биле Библияны өөренип эгелээн. Билип алган чүүлү аңаа дыка солун болган. Ол Иегованың дузазының ачызында мөзү-шынар чок чуртталгазын соксадып, ыядыр, бодун буруудадыр минниишкиннерден адырлып алган. Ам Сакура эгелекчи бооп бараалгап, бодун чааскаанзыргай кылдыр миннивейн турар. Ол: «Мен дыка аас-кежиктиг мен, чүге дизе Иегованың ынакшылын хүннүң-не көрүп турар мен!» — дээн.

ЧҮДЕК-БУЖАР ЧАҢНАРДАНАДЫРЛЫП АЛЫҢАР

8. Бурганның караанга бисти чүдек-бужар кылдыр чүү кылып болур?

⁸ Чүдек-бужар херектер. Библияда «чүдек-бужар херектерже» самыыраар чоруктан аңгыда, таакпылаары болгаш үй-балай баштактар кирип турар (2 Кор. 7:1; Эф. 5:3, 4). Оон аңгыда кижиниң бүдүү кылыр херектери аңаа хамааржып турар. Чижээ, мөзү-шынар чок күзээшкиннер тывылдырар дептерлерни номчууру азы порнография көөрү. А бо чүүлдер мастурбацияb кылыр чаңны тывылдырып болур (Кол. 3:5).

9. Порнография көөр чаңчылдың уржуктары кандыгыл?

⁹ Порнография көрүп чаңчыга берген кижи туттунмас туралаашкынын хайныктырып турар. Оон ол мага-бодунуң ындыг күзелдерин хандырып чаңчыга берип болур. Шинчилелдерден алырга, порнография көрүп чаңчыга берген кижи арагачы кижиниң араганы ижиксээш, оон адырлып шыдавастай бээри ышкаш, ону көрүксеп туруп бээр. Ынчангаш порнография көөр чаңчыл багай уржуктарлыг болур. Чижээ, ыядып човаары, ажылга сонуургал чок апаары, өг-бүлеге алгыш-кырыштың тыптыры, чарлыры, безин амы-тынынга четтинери. Порнография көөр чаңчылын тиилеп шыдаан бир эр кижи ону бир чыл көрбейн баргаш, мынча дээн: «Мен бодумну катап хүндүлеп эгелээн мен».

10. Рибейро порнография көөр чаңчылдан канчаар адырлып алганыл?

¹⁰ Хөй улуска порнография көөр чаңчылдан адырлыры берге, ынчалза-даа Бразилиядан Рибейро деп акывыс оон адырлып шыдаан. Ол элээди тургаш, бажыңындан чорупкан. Оон кезек үе эрткенде, ол макулатура болбаазырадыр заводка ажылдап эгелээн. Ол аңаа порнографиялыг сеткүүлдерни көрүп каан. Ол мынча дээн: «Мен чоорту порнография көрүп өөренип калган мен. Ындыг киноларны көрүксээш, чанымга чурттап турган херээженниң дүрген чоруптарын четтикпейн манап турган мен». Бир катап ол ажылынга эрги саазыннар аразынга «Өг-бүлениң чажыды» деп номну көрүп кааш, номчуп эгелээн. Оон ол Иегованың Херечилерин Библияны аңаа өөредир кылдыр дилээн. Ынчалза-даа ол чүдек-бужар чаңчылдан адырлырынга аңаа хөй үе херек болган. Аңаа чүү дузалаан? «Библияны номчааш, билип алган чүүлдүң дугайында боданып, Бурганга мөргүп турганымның ачызында Ооң эки шынарларын үнелеп эгелээн мен. Ынчангаш Иеговага ынакшылым порнография көөр чаңчылдан артык күштүг апарган» — деп, ол чугаалаан. Бурганның Сөзүнүң болгаш ыдыктыг сүлдениң ачызында Рибейро биеэги бүдүжүнден адырлып, сугга суктуруп алгаш, ам хуралдың удуртукчузу бооп бараалгап чоруур.

11. Порнография көрүксээр күзел-биле туржур дизе, чүнү канчаар болза эки?

¹¹ Рибейрога чүдек-бужар чаңчылдан адырлып алырынга чүгле Библия өөренири чедишпес турган деп, эскердиңер бе? Библейжи медээ ооң чүрээнге чедер кылдыр, ол күжениишкиннер үндүрер турган, а ону кылырынга үе херек. Ол билип алган чүүлдериниң дугайында ханы боданып, мөргүп турган. Түңнелинде ооң Бурганга ынакшылы порнография көөр күзелинден артык күштүг апарган. Иеговага күштүг ынакшылды сайзырадып, бузутту көөр хөңнү чок боор болза, ол чүүл порнография көрүксээр күзел-биле туржурунга дузалаар. (Ырлар 96:10 номчувут.)

КИЛЕҢНИ, ҮЙ-БАЛАЙ СӨСТЕРЭДЕРИН БОЛГАШ МЕГЕНИ ЫҢАЙ АП ОКТАПТЫҢАР

12. Стивенге килеңден болгаш үй-балай сөстер эдеринден адырлып алырынга чүү дузалаан?

¹² Кылыктыг улус килеңней бергеш, улусту дорамчылап, сөглээр. Ындыг чүүл өг-бүлени аас-кежиктиг кылбас. Ажы-төлдүг, кадайлыг Австралиядан Стивен мынча дээн: «Ооң мурнунда мен үргүлчү кончуттунар турган мен. Херекчок чүүл дээш, араатанзып, килеңней бээр турган мен. Кадайым-биле үш катап чарлыр часкан мен». Оон Иегованың Херечилери оларның-биле Библияны өөренип эгелээн. Стивен библейжи сүмелерни ажыглап турар апарган. Түңнели кандыг болган? «Бистиң чуртталгавыс бүрүнү-биле өскерли берген. Ооң мурнунда мен бичии-ле чүүлден часты бээр бомба ышкаш турган мен. Ам Иегованың ачызында кайгамчык амыр-тайбыңны болгаш тамчык-дышты миннип турар мен» — деп, ол үлешкен. Ам Стивен хуралдың дузалакчызы, а ооң кадайы каш чыл ишти эгелекчи бооп бараалгап чоруур. «Стивен — томаанныг, ажылгыр кижи. Ол аажок биче сеткилдиг» — деп, ооң хуралының удуртукчулары чугаалап турар. Ооң хорадап турганын олар кажан-даа көрбээн. Стивен ону боду чедип алган деп бодап турар бе? Чок. Ол мынча дээн: «Иегованың дузазын хүлээп албаан болзумза, чуртталгам канчап-даа экиживес турган. Ооң ачызында мен көңгүс өске кижи апарган мен».

13. Килең чүге айыылдыгыл? Библияда кандыг сагындырыг бар?

¹³ Библия бисти килеңден, алгы-кышкыдан болгаш үй-балай сөстер эдеринден адырлып алыңар деп турар (Эф. 4:31). Чүге дээрге ол бүгү колдуунда күчүлелге чедирер. Бо делегейде улус кылыкты анаа чүүл деп бодаар, ынчалза-даа ол Чаяакчывысты бак атка киирип турар. Хөй улус чаа кижиниң бүдүжүн кедип алырының мурнунда аажы-чаңын долузу-биле өскертип алган. (Ырлар 36:8—11 номчувут.)

14. Кылыктыг кижи биче сеткилдиг апарып болур бе?

¹⁴ Австрияда чыыштарның бирээзинде удуртукчу бооп бараалгап чоруур Ханстың чижээн көрээлиңер. Ооң хуралының удуртукчулар чөвүлелиниң башкарыкчызы: «Ханс дээрге биче сеткилдиг акыларның бирээзи-дир» — деп чугаалаан. Ынчалза-даа Ханс кезээде биче сеткилдиг турбаан. Элээди үезинде ол арагалап эгелээш, дыка кылыктыг кижи апарган. Бир катап Ханс эзирик тургаш, килеңнээнинден кыс эжин өлүрүп каапкан. Ол дээш ону 20 чылга шиидип каан. Ынчалза-даа кара-бажыңга ол өскерилбээн. Кезек үе эрткенде, Ханстың авазы хуралдың удуртукчузун олче барып көөрүн дилээн. Ханс Библияны өөренип эгелээн. «Биеэги бүдүжүмден адырлып алыры дыка берге болган. Ынчалза-даа мени Исайя 55:7-де: „Бузуттуг кижи бодунуң оруундан... ойталазын“ дээн сөстер, ол ышкаш 1 Коринфичилерге 6:11-де бузуттуг оруун кагган улустуң дугайында „Силерниң чамдыыңар шак-ла ынчаар амыдырап чораан болгай“ дээн сөстер мени деткип турган. Хөй чылдар дургузунда Иегова ыдыктыг сүлдези-биле мени шыдамыккай деткип турганының ачызында чаа кижи бүдүжүн кедип шыдаан мен». Ханс кара-бажыңга 17 чыл чартык олургаш, үнүп келген. Ол үеде ол сугга суктуруп алган турган. «Иегованың өндүр улуг ээ көрнүүшкүнү болгаш өршээринге белени дээш, Аңаа өөрүп четтирер-дир мен!» — деп, ол чугаалаан.

15. Биеэги бүдүшче оон ыңай чүү кирип турар? Ооң дугайында Библияда чүү дээнил?

¹⁵ Биеэги бүдүшче үй-балай сөстер эдеринден аңгыда мегелээр чаң база кирип турар. Чижээ, хөй улус үндүрүг декларациязын долдурарда азы кылган үүлгедиглери дээш харыылавазы-биле мегелеп турар. Ынчалза-даа Иегова — «алыс шынныг Дээрги-Бурган-Чаяакчы» (Ыд. ыр. 30:6). Ол бараалгакчы бүрүзүнден шынны чугаалаарын болгаш мегелевезин негеп турар (Эф. 4:25; Кол. 3:9). Ынчангаш шынны чугаалаары чеже-даа эпчок азы берге болза, дөмей-ле мегелевес ужурлуг бис (У. ч. 6:16—19).

ОЛАРГА ТИИЛЭЭРИНГЕЧҮҮ ДУЗАЛААН?

16. Кижи биеэги бүдүжүн канчаар тиилеп ап болур?

¹⁶ Кижи бодунуң күжү-биле биеэги бүдүжүнден адырлып шыдавас. Сакура, Рибейро, Стивен болгаш Ханс багай чаңнарындан адырлып алыр дээш, хөй күжениишкиннерни үндүрген. Оларга тиилээринге чүү дузалаан? Олар Бурганның Сөзүнге болгаш ыдыктыг сүлдеге угаанынче болгаш чүрээнче салдар чедирерин чөпшээрээннер (Лк. 11:13; Евр. 4:12). Бис база ындыг дузаны алыр дизивиссе, хүннүң-не Библияны номчуп, ооң дугайында ханы боданып, библейжи дүрүмнерни ажыглаарынга херек мерген угаанны болгаш күштү Бургандан дилээр ужурлуг бис (Иис. 1:8; Ыд. ыр. 118:97; 1 Фес. 5:17). Чыыштарга белеткенип, олче барып тургаш, Бурганның Сөзүнүң болгаш ыдыктыг сүлдениң деткимчезин миннип турар бис (Евр. 10:24, 25). Оон аңгыда, Бодунуң чонунуң бүзүрелин быжыглаар дээш, Иегованың ажыглап турар янзы-бүрү аргаларының дугайында утпас болзувусса эки (Лк. 12:42).

17. Дараазында статьяга чүнү сайгарар бис?

¹⁷ Бурганның көөр хөңнү чок чүүлдерин болгаш христианнарның чүүден шиитпирлии-биле ойталаар ужурлуунуң дугайында каш чижээн көрдүвүс. Ынчалза-даа Бурганның сеткилинге кирер дизе, чүгле ону кылыры чедишпес. Бис чаа бүдүштү кедип алгаш, эки шынарларны кезээде көргүзер ужурлуг бис. Дараазында статьяга ону канчаар кылып болурувусту сайгарар бис.