Чаа кижиниң бүдүжүн кедип алыңар

1, 2. а) Чаа кижиниң бүдүжүн кедип шыдаар бис деп, чүге чугаалап болур? б) Колосчуларга 3:10—14-те чаа кижи бүдүжүнүң кандыг шынарларын бижээн?

ЧАА кижиниң бүдүжү «Бурганның овур-хевиринге үлегерлей» чаяаттынган деп Библияда бижээн (Эф. 4:24; Кол. 3:10). Бис чаа кижиниң бүдүжүн кедип шыдаар бис. Чүге дээрге Иегова кижилерни, Ооң чараш шынарларын өттүнүп шыдаар кылдыр, Бодунуң овур-хевири-биле чаяап каан (Э. д. 1:26, 27; Эф. 5:1).

² Бис Ада́м өгбевистен бачытты салгап алган бис, ынчангаш биске, өйлеп-өйлеп, шын эвес күзелдер тыптып кээр. Оон аңгыда долгандыр кижилер бисче улуг салдарны чедирип болур. Ындыг-даа болза Иегованың деткимчезиниң ачызында Аңаа таарымчалыг улус болу берип болур бис. Ону чедип алыры-биле, Павел элчинниң бижээни чаа кижи бүдүжүнүң каш шынарын сайгарып көрээлиңер. (Колосчуларга 3:10—14 номчувут.) Ол шынарларны Бурганга бараалгап тургаш, канчаар көргүзүп болурувусту база сайгарар бис.

«СИЛЕР ШУПТУ... ЧАҢГЫС ЧАА УЛУС СИЛЕР»

3. Чаа кижи бүдүжүнүң бир шынарын адап көрүңерем.

³ Христианнарны чаа кижи бүдүжүн кедип алыңар деп кыйгыргаш, Павел ооң чугула шынарларының бирээзин — ылгай көрбес чорукту сагындырган. Ол: «Грек, иудей; кыртыжап демдектеткен азы кыртыжап демдектетпээн кижи; варвар, скиф; кул, хостуг хамааты деп ылгал чок» — деп бижээнa. Христиан чыышка язы-сөөгүн азы ниитилелде туруш-байдалын барымдаалап, ылгаар чорук турбас ужурлуг. Чүге дизе Христостуң алыс шын эдерикчилери шупту — «чаңгыс чаа улус-тур» (Кол. 3:11; Гал. 3:28).

4. а) Иегованың бараалгакчылары өскелерге кандыг хамаарылгалыг болур ужурлуг? б) Христиан чаңгыс аай, демниг чорукка чүү шаптыктап болур?

⁴ Чаа кижи бүдүжүн кедип алган христианнар акы-угбаларга болгаш өске кижилерге, оларның язы-сөөгүн азы ниитилелде туруш-байдалын барымдаалавайн, хүндүткелдиг хамаарылга көргүзүп турар (Рим. 2:11). Чамдык чурттарда ону кылыры белен эвес. Чижээ, Мурнуу Африкада Иегованың Херечилериниң хөй кезии язы-сөөк аайы-биле хуваап каан черлерде чурттавышаан хевээр. Хоорай кыдыы черлер ак кештиглернии, а хоорай ишти — кара кештиглернии кылдыр санаттынып турар. Оон аңгыда хайнак улус чурттаар черлер база бар. Ынчангаш Мурнуу Африкадан ха-дуңма бот-боттарын эки билчип, сырый аралажыр кылдыр, Удуртукчу чөвүлел 2013 чылдың октябрьда тускай программаны эрттирерин саналдаан (2 Кор. 6:13). Ол программаже чүү кирип турган?

5, 6. а) Бурганның чонунуң чаңгыс аай, демниг чоруун быжыглаар дээш, бир чуртка кандыг программаны организастааныл? (Статьяның эгезинде чурукту көрүңер.) б) Ол программаның түңнелин чугаалаңар.

⁵ Ол программаның аайы-биле аңгы-аңгы язы-сөөктүг азы дылдыг ийи чыыштың кежигүннери, үе-үе болгаш-ла, дыштаныр хүннерде аралажып турар. Ол акы-угбалар кады суртаалдап, чыыштар барып, бот-боттарынче аалдап барып турар. Программага чүс-чүс чыыштар киришкен. Тус черниң салбыры Херечи эвес улустан безин хөй үнелээшкиннерни алган. Чижээ, бир шажын бараалгакчызы: «Мен Херечи эвес мен, ынчалза-даа суртаал ажылыңарның дыка эки чурумчуттунганын болгаш араңарда язы-сөөк ылгаар чоруктуң чогун эскердим» — дээн. Ол программа Мурнуу Африкада Херечилерге кайы хире дузалыг болган?

⁶ Коса деп дылга чугааланыр Нома дээр угбавыс бөдүүн бажыңынче англи чыыштан ак кештиг акыларны чалаарындан эпчоксунуп турган. Ынчалза-даа ак кештиг ха-дуңма-биле суртаалдап, оларның бажыңынче аалдап барган соонда ол хөлзеп чугаалаан: «Олар анаа бис ышкаш кижилер ышкажыл!» Ынчангаш кажан ооң чыыжының чалаар ээлчээ кээрге, ол чаагай чем кылгаш, англи чыыштан акы-угбаларны бажыңынче чалаан. «Ак кештиг удуртукчу акый шалада хааржакче олуруп алырындан-даа чалданмас боорга, аажок кайгаан мен» — деп, Нома үлешкен. Ол программа ам-даа уламчылап турар. Ооң ачызында хөй акы-угбалар чаа өңнүктерни тып ап, аралажыышкынын оон-даа алгыдарынче хөөнненген.

«БОТ-БОТТАРЫҢАРГА БУЯННЫГ, ЭНЕРЕЛДИГ БОЛУҢАР»

7. Чүге кээргээчел болур ужурлуг бис?

⁷ Эрликтиң тургузуу төнмээн шаанда, бергелерге таваржыр бис. Оларның санынче ажыл чок чорук, аарыг-аржык, истеп сүрүүшкүннер, бойдус халаптары, эт-хөреңгини оорладыры кирип турар. Бот-боттарывысты деткижер деп бодаар болзувусса, сеткилден кээргээчел чорук херек. Сеткилден кээргээр чорук бисти өскелерге буян көргүзеринче оттурар (Эф. 4:32). Чаа кижи бүдүжүнге хамааржыр ол шынарлар биске Бурганны өттүнүп, өскелерни аргалаарынга дузалаар (2 Кор. 1:3, 4).

8. Чыышта шупту улуска кээргээчел, буянныг хамаарылга көргүзер болзувусса, түңнели кандыг болур? Чижектен чугаалаңар.

⁸ Өске чурттан көжүп келген акы-угбаларга болгаш чединмес ха-дуңмавыска оон-даа хөй кичээнгейни канчаар көргүзүп болур бис? Оларның-биле найыралдажырын кызып, чыышта оларны үнелеп турар деп минниринге дузалаар болзувусса эки (1 Кор. 12:22, 25). Филиппиннерден Японияже көжүп келген Данникарл дээр акывыстың чижээн көрээлиңер. Ажылынга аңаа тус черниң ажылчыннарындан артык багай хамаарылга көргүзүп турган. Бир катап ол Иегованың Херечилериниң чыыжынга келген. Ол мынчаар үлешкен: «Чыышта колдуунда чүгле японнар турган-даа болза, олар мени шагда-ла таныыр кижизи дег, мээң-биле чылыг-чымчак мендилешкеннер». Тус черниң акыларының эки хамаарылгазы аңаа Иеговаже чоокшулаарынга дузалаан. Ол сугга суктуруп алгаш, ам удуртукчу бооп бараалгап чоруур. Өске удуртукчулар Данникарл биле Дженниферни оларның чыыжынга бараалгап турарынга өөрүп турар. «Олар Бурганның Чагыргазын бирги черге салырынга хамаарыштыр эки үлегер көргүзүп, бөдүүн амыдырал тудуп, эгелекчилер бооп бараалгап турар» — деп, ол акылар чугаалаан (Лк. 12:31).

9, 10. Суртаал үезинде кээргээчел чорук илередип турар улустуң күжениишкиннери кандыг йөрээлдерни эккеп турар? Чижектерден чугаалаңар.

⁹ Өскелерге Чагырга дугайында медээни чугаалап турувуста, «бүгү улуска... буян» кылыр аргавыс тыптып келир (Гал. 6:10). Өске чурттан көжүп келген улусту кээргээш, хөй Херечилер оларның дылын өөренип алыр дээш, хөй күш үндүрген (1 Кор. 9:23). Ол чүүл эки түңнелге чедирген. Австралиядан Тиффани дээр угбавыс Брисбенде суахили дылында эртип турар чыышка дузалаар дээш, ол дылды өөренип алган. Суахилини өөренири белен эвес турган-даа болза, ол чүүл ооң чуртталгазын байыткан. «Солун бараалгалдың дугайында бодап турар болзуңарза, өске дылдыг чыышка бараалгап болур силер. Төрээн хоорайыңардан үнмейн, аян-чорук кылып чоруур-биле дөмей боор силер. Ынчаар делегей чергелиг ха-дуңма деп чүл ол дээрзин эки билип, ында тергиидеп турар кайгамчыктыг демниг чорукту ийи карааңар-биле көрүп каар силер» — деп, ол үлешкен.

¹⁰ Япониядан бир өг-бүлениң чижээн көрээлиңер. Оларның уруу Сакико сактып чугаалаан: «90 чылдарда суртаал үезинде Бразилиядан келген улуска бо-ла таваржыр турган бис. Оларга португал дылда Библиядан Ажыдыышкын 21:3, 4, Ырлар 36:10, 11, 29 болгаш өске-даа шүлүктерни көргүзеривиске, оларның чамдыызының карактарының чаштары бүлдеңейнип турган. Оларның Бурган-биле харылзаа тудар хереглелин миннип турарын көргеш, өг-бүлевис-биле португал дылды өөренирин шиитпирлээн бис. Ол дылды өөренип алыр дээш, хөй күжениишкиннерни үндүрген бис, ынчалза-даа алган йөрээлдеривис оон-даа хөй болган. Бис ол дээш Иеговага аажок өөрүп четтирер-дир бис». Соонда ол өг-бүле португал чыышты тургузарынга дузалаан. Сакико ада-иези-биле ол чылдарның дургузунда өске чурттан көжүп келген хөй улуска Иегованың бараалгакчылары болурунга дузалаан. (Ажыл-чорудулга 10:34, 35 номчувут.)

«ТОМААРЫЫШКЫННЫ... КЕДИП АЛЫҢАР»

11, 12. а) Чаа кижи бүдүжүн кедип алырынче бисти чүү оттурар ужурлуг? б) Томаарыыр чорукту сайзырадырынга биске чүү дузалаар?

¹¹ Чаа кижи бүдүжүн кедип алырынче бисти кижилерден мактал алыр күзел эвес, а Бурганны алдаржыдар күзел оттурар ужурлуг. Четпес-дудуу чок дээрниң төлээзи безин, улуургааш, бачыт кылган болгай. (Иезекиил 28:17-биле деңнеңер.) Ындыг болганда бачыттыг кижилерге улуургай бээри кайы хире белен-дир! Ынчалза-даа томаарыышкынны кедип алыры болдунар. Биске чүү дузалаар?

¹² Томаарыыр чорукту сайзырадыр дизивиссе, хүннүң-не Бурганның Сөзүнүң дугайында боданырынче үе үндүрер ужурлуг бис (Ы. х. к. 17:18—20). Чижээ, Иисустуң өөредиглериниң болгаш ооң бараалгал үезинде томаарыыр чорукту канчаар көргүзүп турганының дугайында боданып болур бис (Мф. 20:28). Иисус өөреникчилериниң буттарын безин чуп берген (Ин. 13:12—17). Оон аңгыда ыдыктыг сүлде бодувусту өскелерден улуг деп санаар сундугуушкун-биле демисежиринге дузалаар кылдыр, үргүлчү мөргүүр болзувусса эки (Гал. 6:3, 4; Флп. 2:3).

13. Томаарып чоруур болзувусса, түңнели кандыг болур?

¹³ Чугаалар 22:4-тү номчувут. Иегованың шупту бараалгакчыларынга томаарыыр чорук херек, ол эки түңнелге чедирер. Томаарыыр чорукту илередиривиске, ол чүүл чыыш иштинге тайбың биле демниг чорукту деткиир. Оон аңгыда ол дээш Иегова биске ээ көрүүшкүнүн көргүзер. Пётр элчин: «Шуптуңар бот-боттарыңар мурнунга томаарыңар, чүге дээрге „Бурган адыыргак улуска удурланыр, а томаарааннарга ээ көрүүшкүнүн хайырлаар“» — деп бижээн (1 Пет. 5:5).

БИЧЕ СЕТКИЛДИ БОЛГАШ ШЫДАМЫК ЧОРУКТУ КЕДИП АЛЫҢАР

14. Биче сеткил биле шыдамык чорукту илередиринге хамаарыштыр тергиин үлегерни кым көргүзүп турарыл?

¹⁴ Бөгүн биче сеткил биле шыдамык чорукту улус колдуунда кошкак чорук деп санаар. Ынчалза-даа ол шуут шын эвес! Чүге дизе ол кайгамчык шынарлар Октаргайда эң-не күчүлүг Хуу-ботка, Бурганга, хамааржыр. Иегова биче сеткил биле шыдамык чорукту илередиринге хамаарыштыр тергиин үлегерни көргүзүп турар (2 Пет. 3:9). Авраам биле Лоттуң салып турган айтырыгларынга дээрниң төлээлерин таварыштыр Ооң канчаар харыылап турганын сактып келиңер (Э. д. 18:22—33; 19:18—21). Азы Иегованың чөрүү израиль чонга 1500 ажыг чыл дургузунда шыдамык чорукту көргүзүп келгенин бодап көрүңер (Иез. 33:11).

15. Иисустуң биче сеткилдии болгаш шыдамыы чүүден көстүп турган?

¹⁵ Иисус Христос биче сеткилдиг кижи чораан (Мф. 11:29). Ол бодунуң эдерикчилеринге шыдамык бооп, оларның четпес талаларын херекке албайн турган. Оон аңгыда Иисус шажын башкарыкчыларының ону чөптүг эвес буруудадып турарын болганчок дыңнаар турган. Ынчалзажок ону чагыга хере шаап каарынга чедир ол биче сеткилдиг болгаш шыдамык арткан. Иисус хилинчээниң үезинде Адазынга мөргүп тургаш, ооң шаажылалынга киржип турган улусту өршээрин дилеп: «Чүнү кылып турарын билбес улус-тур» — деп чугаалаан (Лк. 23:34). Ындыг берге байдалга безин ол биче сеткилдиг болгаш шыдамык болурунуң кайгамчыктыг үлегерин көргүскен! (1 Пётр 2:21—23 номчувут.)

16. Биче сеткил биле шыдамык чорукту херек кырынга канчаар көргүзүп болур бис.

¹⁶ Биче сеткил биле шыдамык чорукту канчаар илередип болур бис? Павел Колоссы хоорайның чыыжында христианнарга бодунуң чагаазынга ооң бир аргазын айыткан: «Бот-боттарыңарга шыдамык хамаарылгалыг бооп, кайы-бирээңер өске-бир эжинге хомудап-даа турза, бот-боттарыңарны өршээңер. Дээрги-Чаяакчының силерни өршээгени дег, силер база ынчалдыр өршээңер!» (Кол. 3:13). Ол кыйгыны эдереринге биске биче сеткил биле шыдамык чорук херек. Акы-угбаларывысты өршээп тургаш, чыыштың демниг чоруун быжыглаар бис.

17. Чүге биче сеткилдиг болгаш шыдамык болур ужурлуг бис?

¹⁷ Христианнар биче сеткилдиг болгаш шыдамык боор ужурлуг. Ол дээрге Бурганның негелдези-дир. Ол шынарлардан камгалалывыс хамааржыр (Мф. 5:5). Ынчалза-даа оон-даа чугула чүүл — ол шынарларны илередип тургаш, Иегованы алдаржыдып, ол ышкаш өскелерге библейжи сүмелерни эдереринге дузалап турар бис (Гал. 6:1; 2 Тим. 2:24, 25).

ЫНАКШЫЛДЫ КЕДИП АЛЫҢАР

18. Ынакшыл биле ылгай көрбес чорук кандыг холбаалыгыл?

¹⁸ Көргенивис шупту шынарлар ынакшыл-биле сырый харылзаалыг. Байларга ядыылардан артык эки хамаарылга көргүзүп турган улуска Христостуң өөреникчизи Иаковтуң кандыг сүмени бергенин сактып кээлиңер. Ынчаар алдынары «Чаныңда кижиге бодуңга бодуң дег ынак бол» деп «Хаанывыстың хоойлузун» үрээри-дир деп, ол көргүскен. «Улусту ылгай көөр болзуңарза, бачыт үүлгеткениңер... ол-дур» — деп, Иаков немээн (Иак. 2:8, 9). Улуска ынак болзувусса, оларга хамаарылгавыс оларның эртем-билиинден, язы-сөөгүнден азы ниитилелде туруш-байдалындан хамаарышпас болур. Кижилерни ылгай көрбес чорук сеткиливистен үнүп, бүдүжүвүстүң кезээ болур ужурлуг.

19. Ынакшылды чүге кедип алыр ужурлуг бис?

¹⁹ Оон аңгыда «ынакшыл шыдамык-даа, буянныг-даа. Ол... адыыргак эвес» (1 Кор. 13:4). Моон-даа соңгаар улуска Чагырга дугайында медээни чугаалаарынга биске шыдамык, буянныг болгаш томаарыыр чорук херек (Мф. 28:19). Бо-ла шынарлар биске чыышта шупту акы-угбалар-биле тайбың болурунга дузалап турар. Ындыг ынакшыл кандыг түңнелдигил? Ооң ачызында Иегованы алдаржыдып, улусту алыс шынче хаара тыртып турар демниг чорук чыыштарда тергиидеп турар. Ынчангаш чаа кижи бүдүжүн тайылбырлаан сөстер мынчаар төнген: «А чүнүң-даа кырынга бүгүдени дээди чаңгыс эп кылдыр тудуштурар ынакшыл турар болзун» (Кол. 3:14).

УГААН-МЕДЕРЕЛИҢЕРНИ БОЛГАШ САГЫШ-СЕТКИЛИҢЕРНИ ЧААРТЫП АЛЫҢАР

20. а) Бодувуска кандыг айтырыгларны салыр ужурлуг бис база чүге? б) Чүнү четтикпейн манап турар бис?

²⁰ Кижи бүрүзү бодундан айтырар ужурлуг: «Биеэги бүдүжүмден адырлыр дизимзе, оон ыңай чүнү кылыр ужурлуг мен?» Бургандан дуза дилеп мөргүп, Ооң Чагыргазын салгап алырынга шаптыктаар бачыттыг херектерден дезип, шын эвес бодалдар-биле демисежир дээш, бүгү чүвени кылыр ужурлуг бис (Гал. 5:19—21). Оон аңгыда: «Угаан-медерелимни болгаш сагыш-сеткилимни чаартып турар мен бе?» — деп база айтырар ужурлуг бис (Эф. 4:23, 24). Бачыт чок апаарывыска чедир чаа кижи бүдүжүн кедип алыр дээш, кызар болзувусса эки. Шупту улус Бурганның шынарларын долузу-биле илередип, чаа кижи бүдүжүн кедип алыр үе кээрге, кайы хире аянныг апаар-дыр, бодап көрүңер даан!