Оолдар-кыстар, камгалалыңарны чедип алырынче чүткүңер

1. Чүге сугга суктурары — чүге дыка чугула базым? (Статьяның эгезинде чурукту көрүңер.)

ЧЫЛ санында-ла Библияны өөренип турар муң-муң кижилер сугга суктуруп турар. Оларның аразында бичии уруглар болгаш элээдилер дыка хөй. Оларның чамдыызы Иегованың Херечилериниң өг-бүлезинге өскен. Сен оларның бирээзи бооп чадавас сен. Кылган базымың макталга төлептиг. Сугга суктурары — дыка чугула базым-дыр. Ол чокта христиан апаары болгаш камгалал алыры болдунмас (Мф. 28:19, 20; 1 Пет. 3:21).

2. Бурганга чуртталгазын бараалгадырындан чүге кортпас болза эки?

² Сугга суктуруп алырыңга сээң мурнуңга хөй аргалар ажыттынып келген, ынчалзажок сенде ам улуг харыысалга бар деп сактыры чугула. Кандыг? Сугга суктурган хүнүңде: «Иисус Христостуң өргүлүнге үндезилеп, бачыттарың миннингеш, Иегованың күзел-соруун күүседир дээш, чуртталгаңны Аңаа бараалгадырын даңгырагладың бе?» деп айтырыгга «ийе» деп харыылаан сен. Сугга суктурганың-биле хөй улустуң мурнунга Иеговага ынак болуруңну, ол ышкаш Ооң күзел-соруун күүседири сеңээ чүүден-даа артык чугула болур деп аазаан сен. Шак ынчаар дыка улуг харыысалганы хүлээнип алган сен. Ол дээш хараадаан ажыы бар бе? Чок! Иеговага бодун хүлээдири — кижиниң хүлээр шиитпирлериниң эң-не экизи-дир. Оон өске кандыг орук бар? Иеговага дыңнангыр эвес кижи Эрликтиң чагыргазының адаанда чурттап турар! Эрлик сээң камгалал алырыңны күзевейн турар. Харын-даа, бир эвес сен Иеговага удур үймээнге катчыпкаш, мөңге чурттаар идегелиңни чидириптер болзуңза, ол дыка амыраар.

3. Христиан апаргаш, кандыг йөрээлдерни алган сен?

³ Христиан апаргаш, кандыг йөрээлдерни алганыңны сактып көрем. Чуртталгаңны Иеговага бараалгаткан болганыңда: «Дээрги-Чаяакчы мээң таламда-дыр, корткан херээм чүл, кижи амытан меңээ чүнү кылып шыдаарыл?» — деп чугаалап болур сен (Ыд. ыр. 117:6). Иегованың талазында болуру болгаш Ооң сеткилинге кирери — улуг алдар-хүндү-дүр! Ооң-биле чүү-даа деңнешпес.

БОТ ХАРЫЫСАЛГА

4, 5. а) Бурганга чуртталгазын бараалгаткан даңгыраа дээш кижи бүрүзү чүге хууда харыысалгалыг? б) Шупту христианнар кандыг бергелерге таваржып турар?

⁴ Сен сугга суктурган христиан кижи болганыңда, сээң Иегова-биле харылзааң, бажыңда шупту улус ажыглап болур кылдыр, ада-иеңниң төлеп кааны интернетке дөмей эвес. Чеже-даа ада-иең-биле чурттап турар болзуңза, сээң камгалалың чүгле сенден хамааржыр. Ону сактыры чүге чугула? Чүге дээрге келир үеде бүзүреливистиң канчаар шенеттинерин билбес бис. Чижээ, бичииңде сугга суктурган болзуңза, элээди апаргаш, ооң мурнунда таварышпааның бергелерге таваржып болур сен. Бир кыс дуңмавыс мынча дээн: «Кым-на төрүттүнген хүнүнде торт чивес апарганы дээш Иегованың Херечизи апарганынга хараадаар ийик. Ынчалзажок кижи элээди апаарга, мага-бот күзээшкини күштелип эгелээр. Ынчан Иеговага дыңнангыр болуру — эң-не эки орук-тур деп быжыг бүзүрээри оолдарга болгаш кыстарга дыка чугула болур».

⁵ Сугга суктурган соонда улуг-даа улуска бергелер таваржыр. Чижээ, өг-бүле тудары, кадыкшыл азы ажыл-агый-биле холбаалыг бергелер тургустунуп болур. Кижи бүрүзүнге ооң Иеговага бердинген чоруу шенеттинип турар байдалдар дөмей-ле тургустунар (Иак. 1:12—14).

6. а) Иеговага кандыг даңгыракты берген сен? б) Филипчилерге 4:11—13-те сөстер бисти чүү чүвеге бүзүредип турарыл?

⁶ Кандыг-даа байдалда Иеговага шынчы артарынга сеңээ чүү дузалаар? Бурганга берген даңгырааңда кандыг-даа «бир эвес...» деп чүүлдер чок. Сен Октаргайның Чаяакчызынга чүү-даа болур болза, эштериң азы ада-иең безин Оон ойталай бээр-даа болза, Аңаа дөмей-ле шынчы артарыңны аазаан сен (Ыд. ыр. 26:10). Кандыг-даа байдалга таварышсыңза, аазаашкыныңга ээ болуп артарынга дузалаар кылдыр, Иеговадан күштү дилеп чор. (Филипчилерге 4:11—13 номчувут.)

7. «Камгалалыңарны... болбаазырадырын уламчылаңар» дээн сөстерниң утказы кандыг?

⁷ Иегова сээң өңнүүң болуксап турар. Ынчалзажок ол найыралды чидирбезинге болгаш камгалалды алырынга күш үндүрери негеттинер. Филипчилерге 2:12-де: «Камгалалыңарны... болбаазырадырын уламчылаңар» — дээн. Ол дээрге, кандыг-даа бергелер тургустунза, Иегованың өңнүү болуп артар дээш, чүнү канчаарын баш бурунгаар боданып алыры дээни ол. Бодунга идегээри айыылдыг, чүге дизе хөй чылдар иштинде Бурганга бараалгап чораан чамдык улус безин Аңаа шынчы эвес апарган. Шынчы артарынга сеңээ чүү дузалаар?

БИБЛИЯНЫ ӨӨРЕНИРИ

8. Библияны өөренири дээрге чүү дээни ол база ону кылыры чүге чугула?

⁸ Иегова-биле өңнүктер болур дизе, Ооң-биле чугаалажыры чугула. А чугаалажырынга ийи таланың киржилгези херек. Иегованың чугаазын канчаар дыңнап болур бис? Колдуунда Библияны өөренип тургаш. Чижээ, Библияның бодун болгаш библейжи дептерлерни номчуп, номчаан чүүлүвүстүң дугайында ханы боданып тургаш, Библияны өөренип турар бис. Библияны өөренири дээрге школада өөредилге номун номчууру азы экзамен мурнунда материалды шээжилээри эвес-тир. Ону, Иегованың бүдүжүнүң чаа-чаа талаларын ажыдарынга дузалаар, дыка солун аян-чорукка дөмейлеп болур. Ооң ачызында Бурганче чоокшулаар сен, а Ол база сенче чоокшулаар (Иак. 4:8).

9. Библияны өөренирде чүнү ажыглаар-дыр силер?

⁹ Иегованың организациязының ачызында эки шинчилел программазын тургузарынга херек шупту чүве сенде бар. Аңаа сеңээ 2009 чылдың апрельдиң (орус дылда) «Оттуп келиңер!» деп сеткүүлүнде «Аныяктарның айтырыглары» деп рубрикада «Библияны канчаар солун кылдыр номчуп болур?» деп статья дузалаар. Камгалалды чедип алырын күзеп турар болзуңза, өөренири болгаш ханы боданыры дыка чугула. (Ырлар 118:105 номчувут.)

МӨРГҮЛ

10. Сугга суктурган христианнар чүге Иеговага мөргүүр ужурлуг?

¹⁰ Библияны өөренип тургаш, Иегованың үнүн дыңнап турар бис, а мөргүп тургаш, Ооң-биле чугаалажып турар бис. Христиан кижи мөргүлге, анаа-ла бир утка чок ёзуга дег азы чедиишкин чедип алырынга дузалаар «хуулгаазын» сөстерге дег, хамаарылгалыг болбас ужурлуг. Мөргүл — Чаяакчывыс-биле чугаалажыр арга-дыр. Сен Ооң-биле чугаалажырыңны Ол күзеп турар. (Филипчилерге 4:6 номчувут.) Бир-ле чүве дээш аажок дүвүреп турар болзуңза, «Дээрги-Чаяакчыга үүрге-чүъгүң хүлээдип бер» деп мерген угаанныг сүмени эдер (Ыд. ыр. 54:23). Бо сүме дузалаар деп бүзүрээр сен бе? Дыка хөй акы-угбалар бо сөстерниң ажыктыын чуртталгазынга көрген. Ынчангаш ол сеңээ база дузалаар!

11. Иеговага үргүлчү өөрүп четтирери чүге чугула?

¹¹ Ынчалзажок чүгле Иеговадан дуза дилээр таварылгаларда мөргүүр бис бе? Библияда: «Өөрүп четтириңер!» — дээн (Кол. 3:15). Чамдыкта чүгле бергелеривисти бодап туруп бергеш, бар эки чүүлдеривисти уттуптар бис. Иеговага четтиргенивисти илередир дээш, хүн бүрүде, эвээш дизе, үш чылдагаан тып алгаш, мөргүлге ону чугаалаар деп сорулга салып ап болур бис. 12 харлыында сугга суктурган Абигейл: «Бүдүн Октаргайда өөрүп четтиргенивиске Иеговадан артык төлептиг кым-даа чок деп санаар мен. Арга тыптып кээрге-ле, Ооң биске берип турар белектери дээш, Аңаа четтиргенивисти илередир ужурлуг бис. Бир катап солун айтырыг дыңнаан мен: бир эвес даң бажыңда оттуп кээривиске, чүгле дүүнгү Иеговага четтиргенивисти илереткен чүүлдеривис артар турган болза, чүвүс артарыл?» — деп үлешкен.

БОТ ДУРЖУЛГА

12, 13. Иегова хууда меңээ ачы-буянын көргүзүп турар деп боданыры чүге чугула?

¹² Бурунгу үеде Иегова Давид хаанга кадыг-дошкун шенелделерни ажып эртеринге чаңгыс удаа эвес дузалап турган. Давидтиң чогааткан ырызында мындыг сөстер бар: «Амзангырлап шенеп көрүңер, Дээрги-Чаяакчының кайы хире ачы-буянныын билип каар силер. Хоргадалды Оон алыр кижи амыр-чыргалдыг» (Ыд.ыр. 33:9). Бот дуржулганың кайы хире чугулазын бо сөстер көргүзүп турар. Библияны болгаш христиан дептерлеривисти номчуп, чыыштарже барып тургаш, Бурганның акы-угбаларга Аңаа бердинген артарынга канчаар дузалап турганын билип ап турар сен. Ол чүүл сорук киирер. Ынчалза-даа Иегова-биле найыралыңны быжыглаар дизиңзе, Ооң хууда сени канчаар деткип турарын бодуң эскерер болзуңза эки. Иегованың ачы-буянын эскерген таварылгаларың чуртталгаңга турган бе?

¹³ Христиан кижи бүрүзү Иегованың ачы-буянын бодунга көрген. Ол бисти Бодунче болгаш Оглунче хаара туткан. Иисус: «Мени айбылап чоруткан Адам кандыг-бир кижини хаара тутпас чүве болза, кым-даа Менче чедип кээп шыдавас» — дээн (Ин. 6:44). Бо сөстер сеңээ база хамааржыр деп миннир-дир сен бе? Ынчалза-даа: «Иегова мени эвес, а ада-иемни Бодунче хаара туткан. Мен анаа оларның аайы-биле келген мен» деп бодап турар чадавас сен. Ынчалзажок бодуңну Иеговага бараалгадып, сугга суктургаш, Ооң-биле тускай, чоок хамаарылгалыг мен деп көргүскен сен. «Бурганга ынак кижи Аңаа билдингир апарган-дыр» деп Библияда бижээн (1 Кор. 8:3). Иегованың организациязында ээлеп турар чериңни кезээде үнелеп чор.

14, 15. Суртаалга киржири бүзүреливисти канчаар быжыглап болур?

¹⁴ Иегованың ачы-буянын оон ыңай канчаар эскерип болур сен? Суртаал үезинде азы школага бүзүрелиңни үлежип туруңда Ооң канчаар сени деткип турарын эскерип көр. Чамдык уругларга чаңгысклассчыларынга суртаалдаары берге. Чүге дээрге оларның канчаар алдынарын кижи билбес боор. Чаңгыс кижиниң мурнунга безин бүзүрелин үлежири берге турда, бөлүк улустуң мурнунга ону кылыры мырыңай коргунчуг. Коргушту канчап ажып эртерил?

¹⁵ Эгезинде үзел-бодалдарыңның алыс шынныынга чүге бүзүреп турарыңны боданып көр. Чүү чүвеге база чүге бүзүреп турарыңны, ол ышкаш үзел-бодалдарыңны өскелерге канчаар тайылбырлап болуруңну боданыр дээш, үеден аңгылап ал. Быжыг бүзүреп турар болгаш чүнү чугаалаарыңны билир боор болзуңза, Иегованың дугайында чугаалаар күзелиң кыптыгып кээр (Иер. 20:8, 9).

16. Бүзүрелди үлежиринге шаптыктап турар коргушту канчаар ажып эртерил?

¹⁶ Эки белеткенген-даа болзуңза, бүзүрелиңни үлежири белен эвес бооп болур. 13 харлыында сугга суктурган 18 харлыг кыс дуңмавыс: «Чүү чүвеге бүзүреп турарымны эки билир-даа болзумза, чамдыкта ону үндүр чугаалаары меңээ берге» — деп үлешкен. Ол ону ам канчаар ажып эртип турарыл? «Хостуг алдынарын кызар чордум. Чаңгысклассчыларым кылып турган чүүлдерин анаа хостуг чугаалап турда, мен чүге шыдавас деп мен?! Ынчангаш сөс кадында: „Чоокта чаа улус-биле Библияның дугайында чугаалажып турумда...“ — дээш мээң-биле болган бир чүвени чугаалап бээр чордум. Чугаам Библия дугайында эвес-даа болза, улусту Библияга канчаар өөредип турарымны оларның чамдыызы сонуургаар. Безин чамдыкта олар ооң дугайында айтырып эгелээр. Ынчаар хөй кылган тудум, бүзүрелимни үлежири белен апар-ла чыдар. Ындыг чугаалар соонда дыка өөрүүр чордум!» — деп, ол чугаалаан.

17. Өскелер-биле үзел-бодалдарыңның дугайында хостуг үлежиринге оон ыңай чүү дузалаар?

¹⁷ Чугаалажып турар улузуңнуң үзел-бодалын сонуургап, оларны хүндүлээр болзуңза, олар хөй кезиинде сени дыңнаар күзелдиг болур. Бичиизинде сугга суктурган 17 харлыг Оливия үлешкен: «Улус-биле чугаалажып тургаш, мени бажы-биле шажынче кире берген кижи деп бодай бээринден корткаш, Библияның дугайында чугаалавас турган мен». Оон Оливия ол чүүлче өске талазындан көрген. Коргарының орнунга, ол мынча деп бодаан: «Чамдык аныяк улус Иегованың Херечилериниң дугайында чүнү-даа билбес болгай. Олар, бистен өске, Херечилерниң кайызы-биле-даа таныш эвес. Ынчангаш оларның биске кандыг хамаарылгалыг болуру бистиң канчаар алдынып турарывыстан хамааржыр. Кажан чугаа бүзүреливистиң дугайында чоруп эгелээрге, коргуп, ыядып, девидеп, чугаадан дезип эгелээр болзувусса, чүү болур? Улус бисти бүзүрелинден ыядып турар деп бодаар чадавас. Безин чадаарда, чиктиг алдынганывыс дээш биске каржы кылдыр харыылап болур. А бир эвес үзел-бодалдарывысты, өске темаларны ышкаш, хостуг чугаалаар болзувусса, улус биске хүндүткелдиг болур чадавас».

КАМГАЛАЛЫҢАРНЫ ЧЕДИП АЛЫРЫНЧЕ ЧҮТКҮҢЕР!

18. Камгалалды чедип алырынче чүткүүрү дээрге чүү дээни ол?

¹⁸ Бисте шыңгыы харыысалга бар деп көрдүвүс. Христиан кижи бүрүзү бодунуң камгалалын чедип алырынче чүткүүр ужурлуг. Чижээ, ону чедип алыр дизе, Бурганның Сөзүн номчуп, номчаан чүүлүвүстүң дугайында ханы боданып, Иеговага мөргүп, Ооң хууда биске кылган чүүлдери дээш өөрүп четтирер болзувусса эки. Бо бүгү Иегова — сээң Өңнүүң деп чүүлге бүзүрелиңни быжыглаар база үзел-бодалдарыңны өскелер-биле дидим үлежиринче сени оттурар. (Ырлар 72:28 номчувут.)

19. Камгалалды чедип алырынче чүткүп тургаш, чүге бар-ла күжүвүстү үндүрер ужурлуг бис?

¹⁹ Иисус: «Мени эдерер дээн кижи бар болза, ол бодунуң күзел-бодалындан ойталазын база бодунуң белдир-ыяжын чүктеп алгаш, Мени эдерзин» — дээн (Мф. 16:24). Христиан болур дээн кижи Бурганга чуртталгазын бараалгадып, сугга суктурар ужурлуг. Ол дээрге сени хөй йөрээлдер манап турар оруктуң эгези-дир. Сөөлүнде ол орук Бурганның аазааны чаа делегейге мөңге амыдыралче сени чедире бээр. Ынчангаш камгалалыңны чедип алырынче чүткүүрүн уламчыла!