«Сөөлгү хүннерниң» сөөлгү хүннеринде хөй бараалгаңар!

1. Сөөлгү хүннерде чурттап турарывысты чүү бадыткап турар?

БИР эвес 1914 чылдың соонда төрүттүнген болзуңарза, бо делегейниң «сөөлгү хүннеринде» чурттап турар силер (2 Тим. 3:1). Бис шуптувус Иисустуң өттүр билип чугаалаан болуушкуннарын билир бис. Ол дээрге дайыннар, аш-чут, чер шимчээшкиннери, аарыг-аржык, бузуттуң нептерээри база Иегованың чонун истеп сүрери-дир (Мф. 24:3, 7—9, 12; Лк. 21:10—12). Оон ыңай улус, Павел элчинниң чугаалааны дег, алдынып турар. («Кижилер кандыг апарган?» деп көзенекти көрүңер.) Бо делегейниң «сөөлгү хүннеринде» чурттап турарывысты бо бүгү бадыткап турар (Мих. 4:1).

2. Кандыг чугула айтырыгларның харыызын билип алыр болзувусса эки?

² 1914 чылдан эгелеп, элээн үе эрткен болганда, сөөлгү хүннерниң «сөөлгү хүннеринде» чурттап турар бис. Төнчү ол хире чоокшулап келгенде, чугула айтырыгларның харыызын билип алыр болзувусса эки: «сөөлгү хүннерниң» төнчүзүнде кандыг болуушкуннар болур? Ол болуушкуннар болбаанда, Иегова бистен чүнү манап турар?

«СӨӨЛГҮ ХҮННЕРДЕ» КАНДЫГ БОЛУУШКУННАР БОЛУР?

3. 1 Фессалоникчилерге 5:1—3-тен алырга, политиктиг башкарыкчылар кандыг чарлал кылыр?

³ Номчуптуңар: 1 Фессалоникчилерге 5:1—3. Павел мында «Дээрги-Чаяакчының шииткел хүнүн» сагындырып турар. Бо шүлүктерде Иегованың шииткел хүнү дээрге «Өндүр улуг Вавилонче», азы делегей чергелиг меге шажынның ниити бөлүүнче, халдай бээр үеден тура Армагеддонга чедир үе-дир (Ажыд. 16:14, 16; 17:5). Ол хүннүң бетинде чоннар: «Кайда-даа амыр-тайбың-дыр, айыыл чок-тур» деп чарлаар. Политиктиг башкарыкчылар ооң-биле дөмей сөстерни чурттар аразында харылзаалар экижий бээрге, чамдыкта ажыглаарb. Ынчалза-даа Библияда бижээни «кайда-даа амыр-тайбың-дыр, айыыл чок-тур» дээн чарлал бир тускай болур. Чүге? Ол үеде улус политиктиг башкарыкчыларны делегейде байдалды экижидип, айыыл чок кылыпкан деп бодай бээр. А херек кырында олар карак чивеш аразында узуткаттырар (Мф. 24:21).

4. а) «Кайда-даа амыр-тайбың-дыр, айыыл чок-тур» деп чарлалдың дугайында чүнү билбес бис? б) Чүнү эки билир бис?

⁴ «Кайда-даа амыр-тайбың-дыр, айыыл чок-тур» деп чарлал болур деп билир-даа болзувусса, ону чүү дээш база канчаар чарлаарын билбес бис. Оон ыңай ону чаңгыс катап бе азы элээн каш катап чарлаар бе, база билбес бис. Ынчалза-даа дараазында чүүлдү эки билир бис: политиктиг башкарыкчылар ёзулуг амыр-тайбыңны тургузуп шыдаар деп бодалдарга алзып, бодувусту мегелевес ужурлуг бис. Оларның сөстери библейжи өттүр билген медеглелдиң күүсеттинип турарынче айтып турар. Ол сөстерниң соонда Иегованың шииткел хүнү чедип кээр.

5. 1 Фессалоникчилерге 5:4—6 «Иегованың шииткел хүнүнге» белеткенип алырынга биске канчаар дузалап турар?

⁵ Номчуптуңар: 1 Фессалоникчилерге 5:4—6. Павелдиң сөстери «Иегованың шииткел хүнүнге» белеткенип алырынга дузалап турар. Бис «өске улус ышкаш, уйгуга бастырбас» ужурлуг бис. Биске «серемчилелдиг болгаш хынамчалыг» болуру чугула. Чижээ, политикаже база ооң ажыл-херектеринче киришпес дээш, оваарымчалыг болур болза эки. Оон башка бо делегейниң кезии апаар бис (Ин. 15:19). Ёзулуг амыр-тайбыңны чүгле Бурганның Чагыргазы тургузар деп ыяк билир бис.

6. Улуска канчаар дузалаар ужурлуг бис база чүге?

⁶ Серемчилелдиг болурундан аңгыда, бистиң үевиске хамааржыр библейжи өттүр билген медеглелдерни улуска билип алырынга дузалаар ужурлуг бис. Коргунчуг хилинчек эгелей бээрге, Иегованың талазын ээлээри болдунмас деп утпаалыңар. Ынчангаш амгы үеде суртаалдаары эргежок чугула!c

ИДЕПКЕЙЛИГ СУРТААЛДАҢАР

7. Иегова бистен чүнү манап турарыл?

⁷ Иегованың шииткел хүнүнге чедир мырыңай эвээш үе арткан, ынчангаш идепкейлиг суртаалдаарывысты Бурган бистен манап турар. Ынчангаш бодувустан: «Мен „Дээрги-Чаяакчының даандырган ажыл-херээнге“ долузу-биле киржип турар мен бе?» деп айтырар херек (1 Кор. 15:58). Иисус кандыг ажылды кылырывысты баш удур медеглээн. Сөөлгү хүннерде чүү болурун тайылбырлап тургаш, ол: «Чүнүң-даа мурнунда Буянныг Медээни бүгү чоннарга суртаалдаан турар ужурлуг силер» — деп сагындырган (Мк. 13:4, 8, 10; Мф. 24:14). Бодап көрүңер даан: суртаалче үнген саныңарда-ла, ол библейжи өттүр билген медеглелди күүседип турар силер!

8. Чагырга дугайында суртаал ажылы кайы хире чоруттунуп турарыл?

⁸ Чагырга дугайында суртаал ажылы кайы хире чоруттунуп турарыл? Чыл санында бүгү делегейде буянныг медээни дыңнаан улустуң саны көвүдеп-ле орар. Чижээ, бо сөөлгү хүннерде Чагырга медээчилериниң кайы хире хөй апарганын бодап көрүңер даан. 1914 чылда 43 чуртка 5155 суртаалчы турган. А амгы үеде 240 чурттарда болгаш девискээрлерде 8,5 миллион хире суртаалчы бар! Ындыг-даа болза, суртаал ажылы ам-даа төнмээн. Кижи төрелгетенниң бергелерин чүгле Бурганның Чагыргазы шиитпирлеп шыдаар деп улуска ам-даа чугаалаар ужурлуг бис (Ыд. ыр. 144:11—13).

9. Чагырга дугайында медээни ам-даа улаштыр чүге суртаалдаар ужурлуг бис?

⁹ Иегова суртаал ажылын төнген деп чугаалаваан шаанда, ол ажыл уламчылаар. Ынчаарга кижилерниң Иегованы болгаш Иисус Христосту билип алыр үези кайы хире арткан? (Ин. 17:3). Ооң харыызын билбес бис. Ынчалза-даа «мөңге амыдыралга шын хамаарылгалыг бүгү улустуң» коргунчуг хилинчек мурнунда буянныг медээни хүлээп алыр аргазы турар деп билир бис (Аж.-ч. 13:48, Чаа делегейниң очулгазы). Амдыызында үе барда, ындыг улуска канчаар дузалап болур бис?

10. Улусту алыс шынга өөредиринге, Иегова биске канчаар дузалап турар?

¹⁰ Иегова улусту алыс шынга өөредир дээш, организациязы таварыштыр биске шупту херек чүүлдү берип турар. Чижээ, ажыл хүннеринде ужуражылгаже неделя санында барып турар бис. Аңаа улус-биле бир дугаар чугааны канчаар эгелээрин база катап баргаш чүнү чугаалаарын, ол ышкаш библейжи кичээлди канчаар эрттирерин өөренип турар бис. Оон ыңай Иегованың организациязы биске суртаалдаар херекселдерни берип турар. Ол херекселдер:

• чугааны эгелеп алырынга,

• сонуургалды оттурарынга,

• улусту Библияның дугайында хөйнү билип алырынче деткииринге,

• библейжи кичээл үезинде алыс шынга өөредиринге,

• алыс шынны сонуургап турар улусту сайтывысче кирер кылдыр деткииринге болгаш оларны Хурал залынче чалаарынга дузалап турар.

Ол херекселдерни анаа чыттырбайн, оларны ажыглаңарd. Чижээ, бир кижи-биле аянныг чугаалашкан соонда, катап кээриңерге чедир номчуп турар кылдыр, аңаа буклетти азы журналды арттырып каап болур. Бистиң кижи бүрүзүнде Чагырга дугайында медээни ай санында идепкейлиг суртаалдаар хүлээлге бар.

11. Библия өөренир онлайн-курстуң сорулгазы кандыгыл?

¹¹ Иегова улусту алыс шынга өөредир дээш, jw.org^® деп сайтыда Библияны өөренир онлайн-курсту база ажыглап турар. Ол курстуң сорулгазы кандыгыл? Ай санында бүдүн делегейде он-он муң кижилер Библияны өөренир курстарны интернеттен дилеп турар. Бистиң сайтывыста онлайн-курс ындыг улуска Бурганның Сөзүнден алыс шынны билип алырынга дузалап болур. Оларның чамдыызы Библияны бистиң-биле өөрениринден диттикпейн турар чадавас. Ындыг улуска сайтывыста онлайн-курсту көргүзүп бериңер азы олче шөлүгнү (ссылканы) октап бериңерe.

12. Библия өөренир онлайн-курс кандыг айтырыгларның харыызын билип алырынга дузалаар?

¹² Библияны өөренир онлайн-курста мындыг темалар бар: «Библия болгаш ооң Автору», «Библияда кымның дугайында чугаалап турар?», «Идегел дугайында библейжи медээ». Ол курс дараазында айтырыгларның харыызын билип алырынга дузалаар:

• Библия кижиге канчаар дузалап болур?

• Иегова, Иисус Христос болгаш дээрниң төлээлери дээрге кымнарыл ол?

• Бурган кижилерни чүү дээш чаяаган?

• Делегейде чүге ынча хөй каржы-бак болгаш хилинчек-човалаң барыл?

Оон ыңай ол курста Иегованың канчаар:

• хилинчек-човалаңның болгаш өлүмнүң когун үзерин,

• чок апарган улусту диргизиптерин база

• кижи чагыргаларын Бурганның Чагыргазы-биле солуптарын тайылбырлап турар.

13. Библияны суртаалчы-биле кады өөренирин онлайн-курстар солуп шыдаар бе? Тайылбырлаптыңар.

¹³ Ол онлайн-курс Библияны суртаалчы-биле кады өөренирин канчап-даа солуп шыдавас. Чүге дизе өөреникчилер белеткээр даалганы Иисус биске берген болгай. Алыс шынны сонуургап турар кижи ол кичээлдерни өөренип көргеш, ону сонуургап, оон-даа хөйнү билип алыксай бээр дээрзинге идегеп турар бис. Ынчан ол Библияны өөренирин чөпшээрежир чадавас. Онлайн-кичээл төнчүзүнде-ле, суртаалчы-биле хууда өөренир заявканы долдурарын сүмелээн. Ортумаа-биле хүн санында бүгү делегейден 230 ажыг заявка кээп турар! Библияны суртаалчы-биле өөренири эргежок чугула!

ӨӨРЕНИКЧИЛЕРНИ ДИЛЭЭРИН УЛАМЧЫЛАҢАР

14. Матфей 28:19, 20-ден алырга, чүнү кылыр ужурлуг бис база чүге?

¹⁴ Номчуптуңар: Матфей 28:19, 20. Библейжи кичээлдерни эрттирип тургаш, Иисустуң «бүгү айтыышкыннарын сагыыр кылдыр» өөретпишаан, өөреникчилерни белеткээр ужурлуг бис. Иегованың болгаш Ооң Чагыргазының талазынче туруп алырының кайы хире чугулазын билип алыр кылдыр, улуска дузалаар херек. Ону кылыр дизе, оларны библейжи алыс шынга дүүштүр чурттаарынче, Иеговага чуртталгазын бараалгадырынче болгаш сугга суктурарынче деткиири чугула. Олар Иегованың шииткел хүнүн чүгле ынчаар ажып эртип шыдаар (1 Пет. 3:21).

15. Үени кайнаар чарывас болза эки база чүге?

¹⁵ Кырында көргенивис дег, бо делегейниң төнчүзүнге чедир көңгүс эвээш үе арткан. Ынчангаш Христостуң өөреникчизи болур дээш өскерлир күзели чок улус-биле Библия өөренип, оларже үе чараан ажыы чок (1 Кор. 9:26). Үе чаңгыс черге турбас! Төнчү келбээнде Чагырга дугайында медээни ам-даа чеже кижиге дыңнадыр ужурлуг бис!

МЕГЕ ШАЖЫН-БИЛЕ ХОЛБАШПАҢАР

16. Ажыдыышкын 18:2, 4, 5, 8-тен алырга, бистиң кижи бүрүзү чүнү канчаар ужурлуг? (Тайылбырны база көрүңер.)

¹⁶ Номчуптуңар: Ажыдыышкын 18:2, 4, 5, 8. Бо шүлүктерде Иегова бараалгакчыларындан оон ыңай чүнү манап турарын бижээн. Алыс шын христианнарның Өндүр улуг Вавилон-биле кандыг-даа харылзаазы турбас ужурлуг. Иегованың Херечизи апаарының бетинде кижи меге шажынның кежигүнү бооп, ооң ажыл-херээнге киржип, оларның ужуражылгаларынче барып турган чадавас. Азы ол шажынның хереглелдеринче акшаны өргүп чораан болза хөңнү. Сугга суктурбаан суртаалчы болурунуң мурнунда ол меге шажын-биле бүгү харылзаазын үзер ужурлуг. Чижээ, церковьтан азы Өндүр улуг Вавилон-биле харылзаалыг организациядан үнер дээн шиитпирин чагаага бижиири азы оон-даа өске арга-биле тода көргүзери чугулаf.

17. Бурганның бараалгакчылары кандыг ажылга ажылдавас база чүге?

¹⁷ Бурганның бараалгакчызы ооң ажылы Өндүр улуг Вавилон-биле кандыг-даа харылзаа чок дээрзинге шынзыгар ужурлуг (2 Кор. 6:14—17). Чижээ, ол церковька ажылдавас. Оон ыңай меге шажыннарның чүдүлге чери кылдыр ажыглап турар оран-савазынга ол кандыг-даа ажыл кылырын чөпшээрешпес. А бир эвес ол хууда бизнестиг болза, Өндүр улуг Вавилон-биле холбаалыг организация-биле ол керээ чарбас база олардан заказ албас. Бис аңаа чүге шыңгыы хамаарылгалыг бис? Чүге дизе бис Бурганның караанга арыг эвес шажын организацияларының ажыл-херээнге болгаш бачыдынга боражыр хөңнүвүс чок (Иса. 52:11)g.

18. Акывыс ажылга хамаарыштыр быжыг хөөнүн канчаар көргүскен?

¹⁸ Каш чыл бурунгаар бызаңчы удуртукчу акывыс ооң төрээн хоорайында церковька бичии ажыл кылыр заказ алган. Акывысты церковь ажылдарын черле кылбас деп, заказчик кижи билир турган. А бо удаада ооң проектизинге дүргени-биле кижи херек апарган. Ынчалза-даа акывыс библейжи дүрүмнерни сагып, ол заказты дөмей-ле албаан. Дараазында неделяда тус черниң солунунга церковьтуң кырында крест тургузуп турар өске бызаңчының чуруу үнүп келген. Бир эвес акывыс чөпшээрежипкен болза, ол чурукка бодун көрүп каар ийик. Бодап көрүңер даан, чыышта акы-угбалар акывыстың дугайында чүнү бодай бээр турган? А Иегова чүнү миннир турган?

ЧҮНҮ БИЛИП АЛДЫВЫС?

19, 20. а) Чүнү билип алдывыс? б) Дараазында статьяга чүнү билип алыр бис?

¹⁹ Библиядан алырга, удавас чугула өттүр билген медеглел күүсеттинер. Политиктиг башкарыкчылар: «Кайда-даа амыр-тайбың-дыр, айыыл чок-тур!» деп чарлаар. Ынчалза-даа чоннар боттары ёзулуг болгаш үр үеде уламчылаар амыр-тайбыңны тургузуп шыдавас деп Иегованың ачызында билир бис. Ол чарлал болбаанда база узуткаашкын хенертен эгелевээнде, чүнү канчаар ужурлуг бис? Иегова бистен Чагырга дугайында медээни идепкейлиг суртаалдаарывысты болгаш чаа өөреникчилерни улаштыр дилээривисти манап турар. Ол ышкаш шупту меге шажыннардан оюп чоруур ужурлуг бис. Ол дээрге Өндүр улуг Вавилонга хамааржыр организацияларның кежигүнү болурун соксадып, ажылывыс оларның-биле кандыг-даа харылзаа чок дээрзинге шынзыгары-дыр.

²⁰ «Сөөлгү хүннерниң» сөөлгү хүннеринде өске-даа болуушкуннар болур. Ынчан Иегова бистен шиитпирлиг базымнарны манаар. Кандыг базымнарны? База кел чыдар болуушкуннарга канчаар белеткенип ап болур бис? Ону дараазында статьядан билип алыр бис.