«Сеңээ бүзүреп каан бүгү чүүлдү кадагала»

1, 2. Павелдиң сөстери-биле алырга, Тимофейге чүнү бүзүредип кааныл? (1 Тимофейге 6:20).

БИСТЕ бар үнелиг чүүлдү чүгле бүзүрелдиг улуска шыгжадып каап болур бис. Чижээ, акшавысты банкыже суп тургаш, ону кым-даа оорлап апарбас деп билир болгай бис. Кандыг-бир кижиге үнелиг чүүлүвүстү шыгжадып каан болзувусса, аңаа бүзүреп турар боор бис.

² Номчуптуңар: 1 Тимофейге 6:20. Тимофейге үнелиг чүүлдү — Бурганның күзел-бодалының дугайында ылап шын билиглерни бүзүреткен деп, Павел элчин сагындырган. Оон ыңай Иегова Тимофейге «Буянныг Медээни суртаалдаар ажыл-херекти» бүзүреткен (2 Тим. 4:2, 5). «Сеңээ бүзүреп каан бүгү чүүлдү кадагала» — деп, Павел Тимофейге чагаан. А Иегова биске кандыг үнелиг чүүлдү бүзүреткен база ону чүге үнелээр ужурлуг бис?

ҮНЕЛИГ АЛЫС ШЫННЫ БЕЛЕККЕ АЛГАН БИС

3, 4. Бурганның Сөзүнден алыс шын чүге үнелигил?

³ Иегова Бодунуң Сөзү Библиядан алыс шын билиглерни биске ажыткан. Ол алыс шын аажок үнелиг, чүге дизе ол бисти Бурганның өңнүктери болурунга өөредип, ёзулуг аас-кежиктиг болурунга чүү херегин тайылбырлап турар. Бир эвес библейжи алыс шынга бүзүрээр болзувусса, меге өөредиглерниң кулдары болбас бис база Бурганның көөр хөңнү чок херектерин моон соңгаар кылбас бис (1 Кор. 6:9—11).

⁴ Бурганның Сөзүнден алыс шынны оон ыңай чүү үнелиг кылып турар? Иегова мөңге чуртталгага шын хамаарылгалыг, биче сеткилдиг улуска ол билиглерни ажыдып берип турар (Аж.-ч. 13:48, Чаа делегейниң очулгазы). Ындыг улус шынчы болгаш сарыылдыг чалчаның өөредип турар чүүлдери-биле чөпшээрежир (Мф. 11:25; 24:45). Алыс шынны бис боттарывыс билип шыдавас бис. Ол билиглерден артык үнелиг чүү-даа чок (У. ч. 3:13, 15).

5. Иегова биске оон ыңай чүнү бүзүредип кааныл?

⁵ Оон ыңай Иегова биске Ооң Бодунуң болгаш күзел-бодалының дугайында өскелерни өөредирин бүзүредип каан (Мф. 24:14). Суртаалдап турар медээвис дыка үнелиг, чүге дизе ооң ачызында улус Иегованың өг-бүлезиниң кезии апарып, мөңге чурттаар аргалыг бооп болур (1 Тим. 4:16). Суртаал ажылынга киирип турар үлүг-хуувус улуг-бичии-даа бол, амгы үеде эң чугула ажылга киржип чоруур бис (1 Тим. 2:3, 4). «Бурган-биле кады чаңгыс ажыл-херек» кылыры — дыка улуг алдар-хүндү-дүр! (1 Кор. 3:9).

СИЛЕРГЕ БҮЗҮРЕДИП КААН ЧҮҮЛДҮ КАДАГАЛАҢАР!

6. Чамдык христианнарның Бурган-биле кады ажылдажыр аргазын үнелевейн барганы кандыг түңнелге чедиргенил?

⁶ Тимофейниң үезинде чамдык христианнар Бурган-биле кады ажылдажыр аргазын үнелевейн барганнар. Ынчалдыр Димас бо делегейге хандыкшып, кады бараалгап чорааны Павелди каапкаш барган (2 Тим. 4:10). Фигелл биле Эрмоген Павелди истеп сүрүп турарын көргеш, кортканындан суртаалдаарын соксатканнар (2 Тим. 1:15). Именей, Александр болгаш Филит ойталакчыларга бүзүрей бергеш, алыс шынны каапканнар (1 Тим. 1:19, 20; 2 Тим. 2:16—18). Олар ооң мурнунда Иеговага ынак турган, ынчалза-даа оларга бүзүредип каан чүүлдү чоорту үнелевейн барганнар.

7. Эрлик кандыг аргаларны ажыглап турар?

⁷ Иегованың бүзүредип каан чүүлүнден ойталаарынче Эрлик бисти канчаар ыдалап турарыл? Ооң ажыглап турар аргаларының чамдыызы бо-дур. Эрлик телевидение, интернет, фильмнер, солун-сеткүүлдер болгаш номнар таварыштыр бодунуң үзел-бодалдарын тарадып турар. Бис ол бүгүге алыскаш, алыс шынны кааптарывысты Эрлик күзеп турар. Оон аңгыда, ол истеп сүрүүшкүннерни болгаш үе-чергевистиң базыышкынын ажыглап, суртаалдавайн баар кылдыр, бисти коргудуп турар. Оон ыңай Эрлик бисти алыс шынны кааптар кылдыр кызып, кажар-оптуг арга-биле ойталакчыларның «билиг» деп адап турар чүүлүн ажыглап турар (1 Тим. 6:20, 21).

8. Дэниелдиң чижээнден чүнү өөренип ап болур силер?

⁸ Оваарымчалыг болбас болзувусса, чоорту алыс шынны үнелевейн барып болур бис. Видеооюннарга ынак турган Дэниелb акывыстың чижээн көрээлиңер. Ол мынча дээн: «Мен 10 хире харлыг тургаш, видеооюннарны ойнап эгелээн мен. Баштай олар хора чок ышкаш болган. Ынчалза-даа чоорту мен күчүлээшкин болгаш буктар-биле харылзаалыг оюннарны ойнап эгелээн мен». Дэниел видеооюннарже хүннүң-не мырыңай 15 шакты үндүрүп эгелээн. Ол мынча деп улаштырган: «Угааным-биле билип турган мен: ындыг оюннарны ойнап, ынча хөй үени үндүрүп турганым Иегова-биле найыралымны үреп турган. Ынчалза-даа чүрээм дашталы берген, ынчангаш кандыг-даа библейжи дүрүмнерни үревейн турар мен деп бодумну оожургадып турдум». Боттарывыс безин билбейн, оюн-тоглааның хайындан алыс шынны үнелевейн баргаш, Иегованың биске бүзүредип каан үнелиг чүүлүн чидирип ап болур бис.

БИСКЕ БҮЗҮРЕДИП КААН ЧҮҮЛДҮ КАНЧААР КАДАГАЛААРЫЛ?

9. Павел Тимофейни чүүже кыйгырганыл? (1 Тимофейге 1:18, 19).

⁹ Номчуптуңар: 1 Тимофейге 1:18, 19. Павел Тимофейни «чепсегленгеш, эки чаалажып» көөрүнче кыйгырган. Мында чугаа дорт уткалыг тулчуушкун дугайында чорбайн турар. Ынчалза-даа бис шуптувус ол тулчуушкунга киржип турар бис. Кандыг уткалыг дайынчыларга дөмей бис база кандыг шынарларны сайзырадыр болзувусса эки? Павелдиң чугаалаан чижээнден кандыг беш кичээлди шиңгээдип болурувусту сайгарып көөр бис. Олар биске бүзүредип каан чүүлдү кадагалаарынга дузалаар.

10. Бурганга чүге бердинген болур ужурлуг бис?

¹⁰ Бурганга бердинген чорукту сайзырадыңар. Эки дайынчы бердинген болур. Ол ынак кижизин азы үнелээр чүүлүн камгалаар дээш, бар шаа-биле тулчуур. Павел Тимофейни Бурганга бердинген чорукту сайзырадырынче оттурган (1 Тим. 4:7). Бурганга ынакшылывыс болгаш бердинген чоруувус өскен тудум, биске бүзүредип каан чүүлдү кадагалаар күзеливис дам күштелир (1 Тим. 4:8—10; 6:6).

11. Чүге биске бот-сагылга чуруму херек?

¹¹ Бот-сагылга чурумунга өөрениңер. Дайынчы кижи тулчуушкунга белен боор дээш, үргүлчү сывыртаныр ужурлуг. Тимофей Эрликтиң багай салдарынга удурланып шыдаар турган, чүге дээрге Павелдиң сүмелээни дег, ол шын эвес күзээшкиннери-биле демисежип, Бурганга таарымчалыг шынарларны сайзырадып, кады бүзүрээн ха-дуңмазы-биле аралажып турган (2 Тим. 2:22). А ону кылырынга Тимофейге бот-сагылга чурумун сагыыры чугула турган. Бачыттыг күзээшкиннеривисти тиилээр дизивиссе, бистен база бот-сагылга чуруму негеттинер (Рим. 7:21—25). Оон ыңай бот-сагылга чуруму улаштыр эки талаже эттинип, «бачыттыг бүдүжүвүстен» ойталаарынга база «чаа кижи бооп» амыдыраарынга херек (Эф. 4:22, 24). Ажыл шагы соонда шылап калган боор бис, ынчангаш чыышче баарда, боттарывысты албадаар апаар чадавас бис (Евр. 10:24, 25).

12. Библияны оон-даа мергежилдиг ажыглаарынга биске чүү дузалаар?

¹² Дайынчы кижи чепсээн эки ажыглап билир боор дээш, үргүлчү мергежиир ужурлуг. Биске база Бурганның Сөзүн мергежилдиг ажыглап өөренири чугула (2 Тим. 2:15). Ону кылырынга биске чыыштар дузалаар. Өскелерге библейжи алыс шынның үнезин көргүзер дизивиссе, бис боттарывыс Библияны үргүлчү шинчилээр ужурлуг бис. Бурганның Сөзү бүзүреливисти быжыктырып болур. Ынчалза-даа Библияны анаа-ла номчууру чедишпес. Библейжи алыс шынның утказын шын билип алгаш, улуска ону канчаар тайылбырлаарын билир боор дээш, номчаан чүүлдүң дугайында ханы боданып, дептерлеривистиң дузазы-биле шинчилелди кылыры чугула (1 Тим. 4:13—15). Ынчан бис Бурганның Сөзүнүң дузазы-биле өскелерни өөредип шыдаар бис. Кижиге Библиядан шүлүктү анаа-ла номчууру чедишпес. Ол шүлүктүң утказын тайылбырлааш, ооң ажыктыын кижиге көргүзер болгай бис. Хууда Библияны шинчилээр программаны тургузуп алгаш, ол ёзугаар өөренир болзувусса, мергежилдиг башкылар апаар бис (2 Тим. 3:16, 17).

13. Еврейлерге 5:14-тен алырга, чүге эскериичел боор ужурлуг бис?

¹³ Эскериичел болуңар. Дайынчы кижи айыылды баш удур эскерер ужурлуг. Бис база айыылдыг байдалдарга таварышпас дээш, эскериичел боор ужурлуг бис (У. ч. 22:3; номчуптуңар: Еврейлерге 5:14). Чижээ, дыштанырда азы оюн-тоглааны шилиирде, оваарымчалыг боор ужурлуг бис. Телешоуларда болгаш фильмнерде улус колдуунда мөзү-шынар чок кылдыр алдынар. Шак ынчаар алдынып турары-биле олар Бурганны куду көрүп, боттарынга-даа, өскелерге-даа хораны чедирип турар. Ынчангаш Бурганга ынакшылывысты соодуп болур оюн-тоглаадан ойталаар ужурлуг бис (Эф. 5:5, 6).

14. Дэниел чүнү медереп билип кааныл?

¹⁴ Үстүнде чугаалашканывыс Дэниел күчүлел болгаш буктар-биле харылзаалыг оюннарның кайы хире айыылды чедирип болурун медереп эгелээн. Watchtower Library дээр электроннуг библиотеканың дузазы-биле ол темага хамаарышкан материалды тып алгаш, эки шинчилээн. Ол аңаа кандыг салдар чедирген? Дэниел Иегова-биле хамаарылгазын баксырадып турган оюннарны ойнавайн барган. Оон аңгыда ол онлайн-оюннарга бижидилгезин соксаткан база өске ойнакчылар-биле харылзаазын үскен. «Видеооюннар ойнаарының орнунга, арыг агаарга үени эрттирип, чыыжымда эштерим-биле аралажып эгелээн мен» — деп, Дэниел үлешкен. Ам ол эгелекчи болгаш хуралдың удуртукчузу бооп бараалгап турар.

15. Ойталакчыларның мегези чүге айыылдыг?

¹⁵ Тимофей ышкаш, ойталакчыларның тарадып турар информацияның айыылдыын баш удур эскерер ужурлуг бис (1 Тим. 4:1, 7; 2 Тим. 2:16). Чижээ, олар бистиң ха-дуңмавыстың дугайында нүгүлдү тарадып, Иегованың организациязынга бүзүреливисти кошкадып болур. Ойталакчыларның мегезинге алзыр болзувусса, бүзүреливис буурап каап болур. Ынчангаш ол дузакка канчап-даа туттурбас ужурлуг бис. Чүге дизе ындыг хоп-мегени «угааны чайылган, алыс шындан астыккан» улус тарадып турар. Оларның сорулгазы — бисти алгыш-кырышка болгаш хоозун маргылдаага киириштирери-дир. Олар бисти нүгүлге бүзүрей бергеш, акыларга хамаарыштыр «кара сагыштыг каразыгларлыг» апаарывысты күзеп турар (1 Тим. 6:4, 5).

16. Кайнаар чардыкпас ужурлуг бис?

¹⁶ Кол чүүлден өскээр чардыкпаңар. Тимофей байып аар азы өске кандыг-бир сорулга чедип алырының орнунга, «Христос Иисустуң бердинген дайынчызы дег», бүгү кичээнгейин бараалгалче салыр ужурлуг турган (2 Тим. 2:3, 4). Бис база өнчү-хөреңги чыыр айыылга алыспас болзувусса эки. «Байлакшыл дуурайы» бистиң Иеговага ынакшылывысты, Бурганның Сөзү дээш өөрүп четтирер хөөнүвүстү база өскелер-биле алыс шынны үлежир күзеливисти кошкадып болур (Мф. 13:22). Бөдүүн амыдырал тудуп, Бурганның Чагыргазын бирги черге салыр дээш, кызар ужурлуг бис (Мф. 6:22—25, 33).

17, 18. Иегова-биле найыралывысты камгалаар дизивиссе, чүнү канчаар ужурлуг бис?

¹⁷ Саадал чокка хөделиринге белен болуңар. Дайынчы кижи халдаашкын эгелей берзе, чүнү канчаарын эрте дээре бодап алган боор ужурлуг. Иегованың биске бүзүредип каан чүүлүн кадагалап алырын күзээр болзувусса, айыылды эскерип кааш-ла, дүрген-не хөделир ужурлуг бис. Ону кылырынга чүү дузалаар? Чүнү канчаарын тодаргай бодап алыры.

¹⁸ Чижектен көрүп көрээлиңер. Самолётту ужудуп үндүрериниң бетинде, пассажирлерге айыыл тургустунуп келген байдалда чүнү канчаарын тайылбырлап бээр база оларның чоогунда үнер эжиктерни көргүзүп бээр. Чүге? Авария болу берзе, самолёттан дүрген үне бээр кылдыр. Бис база шак ынчаар фильмнерге, теледамчыдылгаларга азы интернетке хенертен чүдек-бужар, каржы-дошкун чүүлдер азы ойталакчыларның материалдары көстүп келзе, чүнү канчаарын эрте дээре боданып алыр ужурлуг бис. Аңаа белен боор болзувусса, Иегова-биле найыралывысты камгалап, Ооң караанга кем-буруу чок артар дээш, саадал чокка хөделир бис (Ыд. ыр. 100:3; 1 Тим. 4:12).

19. Иегованың биске бүзүредип каан чүүлүн үнелеп турар болзувусса, кандыг йөрээлдерни алыр бис?

¹⁹ Иегованың биске бүзүредип каан чүүлүн — үнелиг библейжи алыс шынны болгаш ону өскелерге өөредир улуг алдар-хүндүнү үнелээр ужурлуг бис. Ынчан арын-нүүрүвүс арыг, чуртталгавыс ужур-уткалыг боор. Оон аңгыда, Бурганның дугайында алыс шынны билип алырынга улуска дузалааш, сеткиливиске өөрүшкүнү миннир бис. Иегованың деткимчезиниң ачызында Ооң биске бүзүредип каан чүүлүн кадагалап шыдаар бис (1 Тим. 6:12, 19).