Кижилерниң аразында ылгалды эскериңер

1, 2. Бурганның бараалгакчылары кандыг бергеге таваржып турар? (Статьяның эгезинде чурукту көрүңер.)

ХАЛДАВЫРЛЫГ аарыглыг улусту эмнеп турар эмчилер айыыл чок чоруктуң хемчеглерин сагыыр ужурлуг. Оон башка олар аарыгны чыпшырып ап болур. Бис база аңаа дөмей байдалда бис. Бистиң хөй кезиивис багай хөөн көргүзүп турар улустуң аразында чурттап, ажылдап чоруур. Ындыг улус Бурганга таарышпас шынарларны илередип турар.

² Бо делегейниң сөөлгү хүннеринде Бурганга ынак эвес улус Ооң эки-бакка хамаарышкан негелделерин херекке албайн турар. Павел элчин Тимофейге ийиги чагаазында Бурган-биле чоок харылзаазы чок улустуң илередир шынарларын бижээн. Сөөлгү хүннер чоокшулаан тудум, ындыг шынарлар кижилерге улам сайзыраар. (2 Тимофейге 3:1—5, 13 номчуптуңар.) Ындыг байдалга чеже-даа таарзынмайн турар болзувусса, бо делегейде чурттап турар улустуң хөөнү болгаш алдынып турары бисче салдар чедирип болур (У.ч. 13:20). Бо статьяга сөөлгү хүннерде кижилерниң көргүзүп турар шынарлары Бурганның бараалгакчыларының шынарларындан кайы хире ылгалып турарын көөр бис. Оон ыңай улуска Бурганче чоокшулаарынга дузалап тургаш, оларның багай хөөнүнге алыспазынга биске чүү дузалаарын сайгарар бис.

3. 2 Тимофейге 3:2—5-те Павел кымнарның дугайында бижээн?

³ Павел: «Сөөлгү хүннерде аар-берге үе чедип кээр» — дээн. Оон Павел ол үеде чурттаар улустуң 19 багай шынарын бижээн. Аңаа дөмей даңзыны Римчилерге 1:29—31-де бижээн, ынчалза-даа Тимофейге чагаада бижээн даңзыда шынарлар Христиан Грек Бижилгелерниң кайызында-даа таварышпайн турар. Ынчалзажок ол шынарларны шупту улус илеретпес. Алыс шын христианнар көңгүс өске шынарларны илередип турар. (Малахия 3:18 номчуптуңар.)

БОТТАРЫВЫСКА КАНДЫГ ХАМААРЫЛГАЛЫГ БИС?

4. Өрү көрдүнер кижи кандыг боорул, тайылбырлап көрүңерем.

⁴ Улус чүгле боттарын бодаар, акша-мөңгүнге ынак болур деп бижээш, Павел оон аңгыда олар мактаныычал, туразы улуг, адыыргак болур дээн. Бо шынарларны колдуунда боттарын өскелерден артык салым-чаяанныг, чараш дүрзү-хевирлиг, бай-шыдалдыг азы ниитилелде бедик туруш-байдалдыг мен деп санап чоруур улус илередип турар. Ындыг улус өскелер оларны магадазын база оларга сөгүрзүн деп күзеп чоруур. Бодун өрү көрдүнер кижиниң дугайында бир эртемден мынчаар бижээн: «Ооң чүрээнде боду бодунга чүдүүр бичии хүрээжигежи бар». Безин чадаарда бодун өрү көөр улус боттары өрү көрдүнер улуска хөңнү чок. Өрү көрдүнер чорук ол хире чүдек.

5. Өрү көрдүнер чорукка алзыпкан Бурганның шынчы бараалгакчыларының чижээн чугаалаңар.

⁵ Өрү көрдүнер чорук Иегованың караанга бужар. Ол «адыыргак көрүштү» көөр хөңнү чок (У.ч. 6:16, 17). Улуургак чорук Бурганче чоокшулаарынга шаптыктап турар (Ыд.ыр. 9:25). Ол Эрликтиң шынары-дыр (1 Тим. 3:6). Муңгаранчыг чүүл, өрү көрдүнер чоруктуң дузаанга Иегованың чамдык шынчы бараалгакчылары туттуруп алган. Иудей хаан Озия Бурганга хөй чылдар иштинде шынчы чораан. «Ынчалза-даа ол күчү-күштүг апаарга, сеткил-чүрээ улуургап, ону буураашкынга чедирген. Озия бодунуң Бурганы Дээрги-Чаяакчыга шынчы чоруун үреп, айдызаар бедигээшке чаагай чыттыг чүүлдер кыпсыр дээш Ооң өргээзинче кире берген» — деп Библияда бижээн. Оон ыңай Эзекия хаан база кезек үеде өрү көрдүнер чорукка алзыпкан (2 Чыл. 26:16; 32:25, 26).

6. Давид чүү дээш өрү көрдүнүп болур турган? Ол томаарыыр чорукту чүге илередип турган?

⁶ Чамдык улус чаражы, алдарлыы, хөгжүмге салымныы, күчү-күжү азы бедик туруш-байдалы дээш өрү көрдүнүп чоруур. Давидке бо бүгү турган, ынчалза-даа ол назынының дургузунда бодун томаартып чораан. Кажан ол Голиафты тиилеп каарга, Саул уругларының бирээзин кадай кылдыр бээрге, Давид: «Хаанның күдээзи болур хире кым-дыр мен мен? Мээң төрел бөлүүм-даа, адамның ук-төөгүзү-даа Израильде билдингир деп бе?» — дээн (1 Хаан. 18:18). Давидке чөпшүл-томаанныг болурунга чүү дузалаан? Шынарларны, салым-чаяанны болгаш бедик туруш-байдалды Давид, олче кичээнгей салыр дээш томаарыыр чорукту илереткен, Бургандан алган турган. (Ыд.ыр. 112:5—8). Бар-ла бүгү чүвени аңаа Иегова берген деп, ол билип турган. (1 Коринфичилерге 4:7-биле деңнеңер.)

7. Чөпшүл-томаанныг болурунга биске чүү дузалаар?

⁷ Бөгүн Иегованың бараалгакчылары Давидти өттүнүп, чөпшүл-томаанныг болурун кызып чоруур. Бүрүн Күчүлүг Бурган Иегова бисти деткип турар, азы биске хамаарыштыр томаарыыр чорукту илередип турар [Чаа делегейниң очулгазы], деп бодал сеткиливисти хөлзедип турар (Ыд.ыр. 17:36). Бис Колосчуларга 3:12-де: «Ээ көрүүшкүннү, буянны, биче сеткилди, томаарыышкынны, шыдамык чорукту кедип алыңар» дээн сүмени эдерерин күзеп турар бис. Ол ышкаш ынакшыл «мактаныычал, адыыргак эвес» деп билир бис (1 Кор. 13:4). Томаарыыр чоруувус улусту Иеговаже хаара тыртып болур. Ашактар кадайларының арыг амыдыралын көргеш, артык чугаа-сөс чокка-ла, Ооң улузу апаары-биле дөмей, улус бистиң чөпшүл-томаанныг алдынып турарывысты көргеш, алыс шынны сонуургай берип болур (1 Пет. 3:1).

ӨСКЕЛЕРГЕ ХАМААРЫЛГАВЫС

8. а) Ада-иезинге дыңнангыр эвес чорукка чамдык улустуң хамаарылгазы кандыгыл? б) Библия ажы-төлдү чүүже кыйгырып турар?

⁸ Сөөлгү хүннерде кижилер бот-боттарынга кандыг хамаарылгалыг апаарын Павел бижээн. Чижээ, ажы-төл ада-иезин дыңнавас боор. Чамдык улус ону анаа чүве деп санаар, ол хамаанчок номнарда, фильмнерде болгаш теледамчыдылгаларда ындыг чорукту деткип турар. Ынчалза-даа дыңнангыр эвес чорук ниитилелдиң тургузуу болур өг-бүлелерни кошкадып турар. Ону улус шаандан тура билир турган. Бурунгу Грецияда ада-иезинче хол көдүрген кижиниң шупту хамааты эргелерин казып кааптар турган. А Римде адазын шашкан кижини өлүрүкчү кылдыр шиидип турган. Еврей-даа, Грек-даа Бижилгелер ажы-төлдү ада-иезин хүндүлээринче кыйгырып турар (Хост. 20:12; Эф. 6:1—3).

9. Ажы-төлге ада-иезинге дыңнангыр боорунга чүү дузалаар?

⁹ Дыңнангыр эвес чоруктуң «аарыындан» камгаланырынга ажы-төлге чүү дузалаар? Ажы-төл ада-иезиниң оларга кылып турар бүгү чүвезиниң дугайында боданыр болза, дыңнангыр болуру оларга белен болур. Оон аңгыда Бурган, бистиң Адавыс, оолдар-кыстарны ада-иезинге чагыртсын деп күзеп турарын ажы-төл сактыр ужурлуг. Ол ышкаш уруглары ада-иезиниң дугайында хүндүткелдиг чугаалап турары-биле үе-чергезинге эки үлегерни көргүзүп турар. Бир эвес ада-иениң ажы-төлүнге ынакшыыр сеткили чок боор болза, оларга дыңнангыр болуру берге апаар. Ынчангаш ажы-төл ада-иези оларга ынак деп билир боор болза, шын эвес алдыныптар күткүлгеге таварышкаш-даа, олар дыңнангыр болурун кызар. «Ачамның чөпшээревес чүүлдерин болганчок кылыксаар турган мен. Ада-ием чөптүг негелделер тургускаш, чүге оларны сагыырын тайылбырлап, кезээде мээң-биле чугаалажырынга белен турган. Бо чүүл оларны дыңнаарынга меңээ дузалап турган. Олар меңээ ынак деп көрүп турган мен, ынчангаш бодумнуң алдынып турарым-биле оларның сеткилин өөртүрүн күзеп турган мен» — деп, Остин үлешкен.

10, 11. а) Кижилерниң ынакшылы чедишпес деп кандыг шынарлар көргүзүп турар? б) Христианнар улуска кайы хире ынак боор ужурлуг?

¹⁰ Павел ынакшыл илеретпейн турар улустуң оон өске шынарларын база чугаалаан. Ада-иезинге дыңнангыр эвес чоруктуң соонда, ол өөрүп четтирерин билбес чоруктуң дугайында сагындырган. Ынчаар чугаалаары шын, чүге дизе өөрүп четтирерин билбес улус өскелерниң оларга кылган чүвезин үнелевес. Павел улаштыр кижилер ыдыктыг чүүлдерден ойталаар апаар деп бижээн. Оларның кээргээр сеткили чок боор, ынчангаш оларның-биле эптежири берге болур. Ол ышкаш улус өскерликчи болгаш өгү-дылын караңнадырынга өй болу бээр азы олар өске улусту, ол хамаанчок Бурганны бак сөглээр боор. Оон ыңай сөөлгү хүннерде кижилер нүгүлчү азы өскелерниң адын баксырадып, хоп чугаа тарадыр боорa.

¹¹ А Иегованың бараалгакчылары улуска үе-дүптен бээр ёзулуг ынакшылды илередип турары-биле өскелерден ылгалып чоруур. Иисус: «Чаныңда кижиге... ынак бол» — дээн. Бо дээрге Моисейниң хоойлузунда ийи дугаар чугула айтыышкын-дыр (мында Иисус ага́пе деп ынакшылдың дугайында чугаалаан). Ол айтыышкындан чүгле «Бодуңнуң Бурганың Дээрги-Чаяакчыга... ынак бол» деп айтыышкын чугула (Матф. 22:37—39). Иисустуң сөстеринден алырга, бот-боттарынга ынак болуру дээрге алыс шын христианнарның ылгавыр демдээ-дир. (Иоанн 13:34, 35 номчуптуңар.) Олар дайзыннарынга безин ынак болур ужурлуг (Мф. 5:43, 44).

12. Иисус улуска ынакшылын канчаар көргүзүп турган?

¹² Иисус кижилерге сеткил-чүрээнден ынак турган. Ол хоорайларны кезип, Бурганның Чагыргазының дугайында суртаалдап чораан. Ол согур, аскак, кеш аарыглыг болгаш дүлей улусту экиртип, өлгеннерни диргизип турган (Лк. 7:22). Иисусту чамдык улус көөр хөңнү чок-даа турган болза, ол кижилер дээш амы-тынын берген. Ол ынакшылды көргүзүп тургаш, Адазын долузу-биле өттүнүп турган. Бүдүн делегейде Иегованың Херечилери Иисустуң үлегерин өттүнүп, өскелерге ынакшылды көргүзүп турар.

13. Бистиң ынакшылывыс өскелерге Иеговаже чоокшулаарынга канчаар дузалап болур?

¹³ Бистиң ынакшылывыс улусту дээрде Адазын эки билип алырынче оттуруп болур. Чижектен көрээлиңер. Таиландыда бир эр кижи регион шуулганынга баргаш, ында ынакшылдыг хамаарылганы көргеш, чанып келгеш, ооң-биле Библияны неделяда ийи катап өөренирин дилээн. Оон ол шупту төрелдеринге суртаалдап эгелээн. А чартык чыл эрткенде, Хурал залынга ол бир дугаар даалгазын күүсеткен. Улуска ынакшылды илередири силерге болдунар-дыр бе? Бодуңардан айтырыңар: «Чыышта акы-угбаларымга, төрелдеримге болгаш суртаалдап турар улузумга күзелдии-биле дузалап турар мен бе? Өскелерге Иегова ышкаш хамаарылгалыг болурун кызып турар мен бе?»

БӨРҮЛЕР БИЛЕ ХУРАГАННАР

14, 15. Хөй улус кандыг араатанзыг шынарларны көргүзүп турар? Чамдык улус канчап өскерлип шыдаан?

¹⁴ Сөөлгү хүннерде кижилер христианнарга таарышпас өске-даа багай шынарларны илередир деп Библияда бижээн. Чижээ, хөй улус буянны көөр хөңнү чок улус болу бээр. Ындыг улус эки чүүлдерге удур болур. Олар бодун туттунуп билбес база каржы апаар. Чамдык улус хай-чагырга чок болур. Олар хамык чүвени боданмайн кылыр база кылган херектериниң өскелерге кандыг салдар чедирип болурун бодавас боор.

¹⁵ Ындыг араатанзыг шынарларны көргүзүп чораан улустуң хөй кезии эки талаже өскерлип шыдаан. Бо кайгамчык өскерлиишкиннерни Библияда өттүр медеглээн турган. (Исайя 11:6, 7 номчуптуңар.) Исайяның өттүр медеглелинде бөрү биле арзылаң дээн ышкаш черлик амытаннар хураган биле бызаа дээн ышкаш азырал амытаннар-биле кады оъттап-чемненир үениң дугайында бижээн. Олар чүге тайбың апаарыл? Чүге дизе «чер-делегей Дээрги-Чаяакчыны билип аары-биле долдунар» деп Библияда тайылбырлаан (Иса. 11:9). Дириг амытаннар Иегованың дугайында билип ап шыдавас болганда, бо өттүр медеглел кижилерге база күүсеттинер ужурлуг.

16. Кижилерге өскерлип алырынга Библия канчаар дузалап турар?

¹⁶ Чамдык улус ооң мурнунда, бөрүлер дег, каржы турган, ынчалза-даа өскерлип алгаш, өске улус-биле тайбың чурттап чоруур. Оларның чамдыызының дугайында «Библия чуртталганы өскертип турар» деп ниити аттыг статьялардан номчуп болур. Иегованы билип алгаш, Аңаа бараалгап эгелээн улусту Бурганны хүндүлээриниң чүгле даштыкы хевиринден туттунар, а Ооң ылаптыг күжүнден ойталаар улус деп болбас. Өскээр чугаалаарга, олар Бурганның шынчы бараалгакчылары бооп мегеленип чоруур улуска дөмей эвес. Безин чадаарда кылыктыг чораан улус «чөптүг-шынныг база ыдыктыг амыдыралы-биле онзаланыр, Бурганның овур-хевиринге үлегерлей чаяаган чаа кижи бооп», өскерлип алган (Эф. 4:23, 24). Бурганның дугайында билген тудум, олар Ооң негелделерин сагыыры чугула деп билип турар. Олар үзел-бодалдарын эде көрүп, аажы-чаңын өскертиринге белен. Бодун өскертири белен эвес, ынчалза-даа Иегованы өөртүксеп турар улуска ыдыктыг сүлдезин берип турар Бурганның ачызы-биле ол болдунар.

«ОЛАР-БИЛЕ ЧЕРЛЕ ЧООКШУЛАШПА»

17. Бурганга таарышпас шынарларны илередип турар улустуң салдарындан бисти чүү камгалаар?

¹⁷ Бурганга бараалгап турар улус биле Аңаа бараалгавайн турар улустуң ылгалы дыка көскү апар чыдар. Өске улустуң багай чаңнары биске салдар чедирбес кылдыр оваарныр ужурлуг бис. Иегова бисти 2 Тимофейге 3:2—5-те дег улус-биле черле чоокшулашпазын чагып турар. Бурганга таарышпас шынарларны илередип турар улустан шуут дезип шыдавас бис. Ындыг улус-биле кады ажылдап, школада өөренип, безин чурттап турар бис. Ынчалза-даа бис оларның үзел-бодалдарынга, багай чаңнарынга алыспайн барып шыдаар бис. Иегова-биле найыралывысты быжыглаарынга биске чүү дузалаар? Библияны шинчилээри болгаш Бурганга, бис ышкаш, ынак улус-биле чоок аралажыры.

18. Сөстеривис болгаш алдынып турарывыс өскелерге Иегованы билип алырынга канчаар дузалап болур?

¹⁸ Өске улус база Бурганны билип алзын деп күзеп турар бис. Ынчангаш биске таарымчалыг сөстерни айтып бээр кылдыр, Иеговадан дузаны дилеп тургаш, улуска алыс шынны чугаалаар аргаларны эрттирбес ужурлуг бис. Өскелер бисти Иегованың Херечилери деп билир боор болза эки. Ынчан эки алдынып турарывыс боттарывысты эвес, а Бурганны алдаржыдар. «Бурганны тоовас чоруктан-даа, делегейден укталган күзээшкиннерден-даа ойталаарынга; боттарывысты холга ап, амгы бо делегейге Бурганны хүндүлеп, чөптүг-шынныг чурттаарынга» Иегова бисти өөредип каан (Тит. 2:11—14). Бурганны херектеривис-биле өөртүрүн кызарывыска, өске улус эки алдынып турарывысты көргеш: «Силер-биле кады чоруурун биске чөпшээреп көрем, чүге дээрге Бурган силер-биле кады дээрзин дыңнадывыс» деп болур (Зах. 8:23).