Алыс шынны тып алганыңарга чигзинмеңер

1. «Алыс шын» деп сөстү кандыг уткалыг ажыглап турар бис?

АЛЫС шынны канчап билип алган сен? Бичииңден тура алыс шында сен бе? Алыс шынны шагда-ла билир сен бе? Шак мындыг айтырыгларны силерге чаңгыс удаа эвес салган боор азы боттарыңар кандыг-бир кижиден ынчаар айтырган чадавас силер. Ынчалза-даа «алыс шын» деп сөстү кандыг уткалыг ажыглап турар бис? Ынаар бистиң үзел-бодалдарывыс, Бурганга бараалгалывыс болгаш канчаар чурттап чоруурувус кирип турар. Алыс шында кижи Библия чүнү өөредип турарын билир болгаш, ында дүрүмнерге дүүштүр чурттап чоруур. Ынчангаш ол шажыннарның мегезинден хостуг база, бо делегейниң улузунга бодаарга, аас-кежиктиг (Ин. 8:32).

2. Иоанн 13:34, 35-тен алырга, кижини алыс шынче чүү хаара тудуп болур?

² Алыс шынны чүге сонуургай берген силер? Иегованың бараалгакчыларының канчаар алдынып турганын азы оларның ынакшылын көргеш, сонуургаан боор силер (1 Пет. 2:12). Улустуң хөй кезии Хурал залынга бир дугаар келгеш, сценадан чугаалап турган чүүлдерни-даа эвес, а ында ынакшылды эскерген. Ол ынакшыл оларның сагыш-сеткилинге аажок дээштиг болган. Ында кайгамчык чүве чок, чүге дизе Иисус ооң өөреникчилерин бот-боттарынга ынакшылындан билип алыр дээн. (Номчуптуңар: Иоанн 13:34, 35.) Ынчалза-даа быжыг бүзүрелдиг болур дизе, чүгле сагыш-сеткил хайныышкыны чедишпес.

3. Бүзүрелиңер Иегова-биле найыралга эвес, а Ооң бараалгакчыларының бот-боттарынга ынакшылынга үндезилеттинген болза, чүү бооп болур?

³ Бурганның бараалгакчыларының илередип турар ынакшылы сеткилиңерге тааржыр чадавас. Ынчалза-даа бүзүрелиңер чүгле аңаа үндезилеттинмес ужурлуг. Чүге? Кады бүзүрээн ха-дуңмавыстың бирээзи (безин эгелекчи азы хуралдың удуртукчузу) аар бачыт кылыптар болза, канчаар? А бир эвес чыышта бир кижи силерни хомудадыптар болза? Азы кандыг-бир кижи ойталакчы апаргаш, Иегованың Херечилери силерни мегелеп турар деп силерни бүзүредир болза, канчаар? Бо чүүл силерге моондак апаар бе? Ол дээш Иеговага бараалгавайн баар силер бе? Бо айтырыглар мону билип алырынга дузалаар: бир эвес бүзүрелиңер Иегова-биле найыралга эвес, а Ооң бараалгакчыларының бот-боттарынга ынакшылынга үндезилеттинген болза, ол удавас буурап каар. Чугаажок, силерниң Иеговага болгаш Ооң бараалгакчыларынга минниишкиниңер бүзүрелиңерни быжыктырып болур. Ынчалза-даа бүзүрелиңер ёзулуг быжыг болзун дизе, Библияны ханы шинчилеп, ооң өөредиглерин эки билип алыр болзуңарза эки. Ынчаар Библия Иегованың дугайында алыс шынга өөредип турар деп шынзыгар силер (Рим. 12:2).

4. Матфей 13:3—6, 20, 21-ден алырга, шенелделер кижиниң бүзүрелинге кандыг салдар чедирип болур?

⁴ Чамдык улус алыс шынны өөрүшкүлүг хүлээп алгаш, оон бергелерге таварышкаш, бүзүрели кошкай бээр деп, Иисус чугаалаан. (Номчуптуңар: Матфей 13:3—6, 20, 21.) Ындыг улус Иисустуң эдерикчилери апаргаш, бергелерге болгаш шенелделерге таваржыр деп билбээн чадавас (Мф. 16:24). Чок болза, олар бергелерге черле таварышпас деп азы Бурган шупту бергелерин шиитпирлеп кааптар деп бодаан чадавас. Ынчалза-даа бо делегейге бергелерден кижи кайнаар-даа чаштып шыдавас. Чуртталгавыска чүү-даа болу берип болур. Ооң ужундан өөрүшкүвүстү түр када чидирип ап болур бис (Ыд. ыр. 6:7; Эккл. 9:11).

5. Акы-угбаларывыстың хөй кезии бүзүреп турар чүүлүнүң ылаптыынга чигзинмейн чоруурун канчаар көргүзүп турар?

⁵ Акы-угбаларывыстың хөй кезии бүзүреп турар чүүлүнүң ылаптыынга чигзинмейн чоруур. Чүге ынча деп болур? Чыышта бир кижи оларны хомудадыптарга-даа азы библейжи дүрүмнү сагывайн баарга-даа, оларның бүзүрели чайгылыш дивес (Ыд. ыр. 118:165). Берге байдалга таварышкан санында-ла, оларның бүзүрели кошкавайн, харын-даа быжыгып орар (Иак. 1:2—4). Ындыг быжыг бүзүрелди канчаар сайзырадырыл?

ЫЛАП ШЫН БИЛИГЛЕРНИ АЛЫҢАР

6. Бирги векте христианнарның бүзүрели чүге үндезилеттинген турган?

⁶ Бирги векте христианнарның бүзүрели Ыдыктыг Бижилгеден билиглерге болгаш Иисус Христостуң өөредиглеринге, азы «Буянныг Медээниң алыс шынныг утказынга», үндезилеттинген турган (Гал. 2:5). Ол алыс шынче христиан өөредиглер, ооң санында Иисустуң бачыттан хостаар өргүлүнүң болгаш диргизиишкининиң дугайында билиглер, кирип турар. Павел элчин ол өөредиглерниң шынныынга чигзинмейн чораан. Ону кайыын билир бис? Ол «Христостуң хилинчекти көрүп эртер, а оон катап дирлир ужурлуун» бадыткаар дээш, Бижилгени ажыглап турган (Аж.-ч. 17:2, 3). Христостуң өөреникчилери ол өөредиглерни хүлээп алгаш, ыдыктыг сүлде Бурганның Сөзүн билип алырынга оларга дузалаар деп чигзинмейн турган. Оон аңгыда олар ол өөредиглерниң Ыдыктыг Бижилгеге үндезилеттингенинге шынзыккан (Аж.-ч. 17:11, 12; Евр. 5:14). Ынчап кээрге, оларның бүзүрели анаа минниишкиннерге эвес, а Бурганның дугайында алыс шынга үндезилеттинген (Кол. 1:9, 10).

7. Библейжи өөредиглерниң ылаптыынга бүзүрел биске канчаар дузалаар?

⁷ Бурганның Сөзүнде алыс шын кажан-даа өскерилбес (Ыд. ыр. 118:160). Чижээ, чыышта кандыг-бир кижи бисти хомудадыптарга азы аар бачыт кылыптарга, чок болза, бергелерге таваржырывыска, алыс шынче ол чүүлдер салдар чедирбес. Ынчангаш библейжи өөредиглерни эки билип алгаш, оларның ылаптыынга чигзинмес болзувусса эки. Библейжи алыс шынга үндезилеттинген быжыг бүзүреливис, далайга якорь дег, амыдыралдың «хат-шуурганынга» торулбазынга дузалаар. Бүзүреп турар чүүлүвүстүң ылаптыынга канчаар шынзыгарыл?

АЛЫС ШЫННЫ БИЛИР ДЭЭРЗИНГЕ ШЫНЗЫГЫҢАР

8. 2 Тимофейге 3:14, 15-тен алырга, Тимофей алыс шынны билиринге канчаар шынзыккан?

⁸ Тимофей алыс шынны билиринге чигзинмейн чораан. Аңаа чүү дузалаан? (Номчуптуңар: 2 Тимофейге 3:14, 15.) Ону бир дугаар Ыдыктыг Бижилге-биле авазы биле кырган-авазы таныштырган. Ынчалза-даа ол боду база Бижилгени шинчилээр дээш, үезин болгаш күжүн үндүрүп турган. Ынчангаш ол алыс шынга чигзинмейн чораан. Удатпаанда Тимофей, ооң авазы болгаш кырган-авазы христианнар апарган. Иисустуң өөреникчилериниң аразында ынакшыл Тимофейни кайгаткан боор. Ол кады бүзүрээн акы-угбалары-биле аралажыксап, олар дээш сагыш човап чораан (Флп. 2:19, 20). Ынчалза-даа ооң бүзүрели кижилерге минниишкиннерге эвес, а ылап шын билиглерге үндезилеттинген турган. Ооң ачызында Иегова ооң чоок өңнүү апарган. Силер база Библиядан Иегованың дугайында билип алган чүүлдериңерниң дугайында ханы боданыр болзуңарза эки.

9. Кандыг чугула үш алыс шынның ылаптыынга шынзыгар болзуңарза эки?

⁹ Баштай үш чугула алыс шынның ылаптыынга шынзыгар болзуңарза эки: 1) Иегова шупту чүвени чаяаган (Хост. 3:14, 15; Евр. 3:4; Ажыд. 4:11). 2) Библия — Бурганның кижилерге чагаазы (2 Тим. 3:16, 17). 3) Иегованың чону бар, олар Аңаа Христостуң башкарылгазының адаанда бараалгап чоруур, ол дээрге Иегованың Херечилери-дир (Иса. 43:10—12; Ин. 14:6; Аж.-ч. 15:14). Бо бүгү алыс шынның ылаптыынга шынзыгар дизе, Библияны бирден бирээ чокка билири албан эвес. Силерниң сорулгаңар — угаан-сарыылыңарны ажыглап тургаш, алыс шынга шынзыгары-дыр (Рим. 12:1).

УЛУС АЛЫС ШЫНГА ШЫНЗЫГАР КЫЛДЫР ДУЗАЛАҢАР

10. Библейжи алыс шынның ылаптыынга шынзыккаш, чүнү канчаар болзувусса эки?

¹⁰ Бурганның болгаш Ооң чонунуң дугайында чугула алыс шынның ылаптыынга шынзыккаш, Библияны ажыглап, ооң дузазы-биле өскелерге аңаа шынзыгарынга дузалаар болзувусса эки. Чүге? Христианнар болганывыста, бисти дыңнаар улусту алыс шынга өөредир харыысалгалыг бис (1 Тим. 4:16)b. Библейжи өөредиглерниң ылаптыын өске улуска бадыткап чугаалаар болзувусса, боттарывыс аңаа улам шынзыгар бис.

11. Павел элчин биске кандыг үлегер көргүскен?

¹¹ Павел элчин улусту өөредип тургаш, «Моисейниң хоойлузу болгаш медээчилерниң номнарынга үндезилээш, Иисустуң дугайында оларга шынзыдып» турган (Аж.-ч. 28:23). Өскелерни алыс шынга өөредип тургаш, Павелди канчаар өттүнүп болур бис? Библияда бижээн чүүлдү оларга анаа-ла чугаалап бээри чедишпес. Бурганның Сөзүнге даянып, түңнелдерни боттары үндүрүп билир кылдыр, оларны өөредир болза эки. Ынчан ол улустуң Иегова-биле хамаарылгазы чоок боор. Оларга бистиң-биле чугаалажыры солун боорга эвес, а олар Иегованы ынакшылдыг Бурган деп бадыткалдарны Библиядан боттары тып алгаш, алыс шынны хүлээп алыр кылдыр күзээр бис.

12, 13. Ада-иелер ажы-төлүн алыс шынның оруун эдереринге канчаар дузалап болур?

¹² Ада-иелер, ажы-төлүңерни алыс шынның оруун эдерзин деп күзээр болгай силер. Олар чыышта эки эштерлиг болза, Бурган-биле харылзаазы быжыг апаар деп бодаар чадавас силер. Ынчалза-даа Библияда алыс шынга бүзүрээринге оларга чүгле эки эш-өөр чедишпес. Олар боттары Иегова-биле найыралын быжыктырып, библейжи өөредиглерниң ылаптыынга шынзыгар ужурлуг.

¹³ Ада-иелер ажы-төлүн Бурганның дугайында алыс шынга өөредир деп бодаар болза, боттары Библияны кызымаккай шинчилеп, үлегерни көргүзер ужурлуг. Олар билип алган чүүлүнүң дугайында ханы боданыр болза эки. Ынчан оларның ажы-төлү база шак ынчаар ханы боданып өөренип алыр. Ада-иелер библейжи кичээлдер эрттирип тургаш, улуска Библияны шинчилээринге херек херекселдерни ажыглап өөредип турары ышкаш, ажы-төлүн база ынчаар өөредири чогуур. Шак ынчаар Иегова «аъш-чемни» шынчы болгаш сарыылдыг чалчага үлээрин дааскан деп чүүлге олар ажы-төлүнүң бүзүрелин быжыктырып, Аңаа ынакшылын сайзырадыр (Мф. 24:45—47). Ада-иелер, ажы-төлүңерни чүгле кол библейжи алыс шынга эвес, а «Бурганның бодалдарының ханы дүвүн» билип алырынга өөредиңер (1 Кор. 2:10). Оларның хар-назынын болгаш билип шыдаар аргазын кичээнгейге алыңар. Ынчан олар быжыг бүзүрелди сайзырадып алыр.

БИБЛЕЙЖИ ӨТТҮР БИЛГЕН МЕДЕГЛЕЛДЕРНИ ШИНЧИЛЕҢЕР

14. Библейжи өттүр билген медеглелдерни чүге шинчилээр болза эки? («Бо өттүр билген медеглелдерни тайылбырлап шыдаар силер бе?» деп көзенекти көрүңер.)

¹⁴ Өттүр билген медеглелдер — Бурганның Сөзүнүң чугула кезээ-дир. Оларның ачызында Иеговага бүзүреливис быжыгып орар. Силерниң бүзүрелиңерни кандыг өттүр билген медеглелдер быжыктырганыл? «Сөөлгү хүннерниң» дугайында өттүр билген медеглел чадавас (2 Тим. 3:1—5; Мф. 24:3, 7). А өске өттүр билген медеглелдерниң дугайында чүү деп болур? Чижээ, Даниил 2 биле 11-ги эгелерде өттүр билген медеглелдерни тайылбырлап шыдаар силер бе?c Бүзүрелиңер Ыдыктыг Бижилгеге быжыг үндезилеттинген болза, ол чайгылыш дивес. Ийиги делегей дайынының үезинде Германияга каржы истеп сүрдүрүп турган акыларывыстың дугайында бодап көрүңер. Ол үеде сөөлгү хүннерниң дугайында өттүр билген медеглелдерниң утказы чедир билдинмес турган-даа болза, оларның быжыг бүзүрели билир турган библейжи билиглерге үндезилеттинген турган.

15—17. Нацистерге истедип сүрдүрген акы-угбалар Библияны шинчилеп турганының ачызында канчап шынчы арткан?

¹⁵ Германияга нацистер чагырып турда, муң-муң акы-угбаларны концлагерьлерже шөлүпкен. Гитлер болгаш бир концлагерьниң даргазы Генрих Гиммлер Иегованың Херечилеринге хөңнү чок турган. Бир угбавыстың сөстеринден алырга, Гиммлер концлагерьге олурган каш угбавыска мынча дээн: «Силерниң Иеговаңар дээрге чагырзын, а черге бис чагырар бис! Кым кымны ажыр чурттаарын көрүптер бис!» Ол байдалда Иегованың бараалгакчыларынга шынчы артарынга чүү дузалаан?

¹⁶ Бурганның Чагыргазы 1914 чылда башкарып эгелээн деп, олар билир турган. Ынчангаш улуг истеп сүрүүшкүннерге таварышкаш, олар кайгаваан. Черде чаңгыс-даа чазак Бурганның күзел-соруунуң күүсеттинеринге шаптыктап шыдавас деп, Бурганның чону эки билир турган. Гитлер алыс шын шажынны узуткап, Бурганның Чагыргазындан артык күштүг чазакты тургузуп чадап каан. Гитлерниң чагыргазы кажан-бир төнүп каар деп, акыларывыс ыяк бүзүреп турган.

¹⁷ Акы-угбаларывыстың бүзүреп турганы шын болган. Кезек үе эрткенде, нацистерниң чагыргазы буурап дүшкен. «Черге бис чагырар бис!» дээн Генрих Гиммлер, амы-тынын камгалаар дээш, дезипкен. Ол дезип бар чыда, концлагерьге олурган Любке дээр акывыска таваржы берген. Сузу бастынган Гиммлер ону танып кааш: «Библияның Шинчилекчизи, ам чүү боор инчеш?» — деп айтырган. Любке акывыс Гиммлерге: «Нацистерниң чагыргазы буурап дүжер, а Иегова бараалгакчыларын камгалаар деп черле билир турган бис» — деп харыылаан. Иегованың Херечилерин чаңгыс удаа эвес бактап турган Гиммлер бо удаада тунуп калган. Удатпаанда ол бодунуң амы-тынынга четтинген. Моон чүнү өөренип ап болур бис? Библияны база ында өттүр билген медеглелдерни шинчилээр болзувусса, Бурганга чайгылыш чок, быжыг бүзүрелди сайзырадып, шенелделер үезинде шынчы артар бис (2 Пет. 1:19—21).

18. Чүге «ынакшылывыс угаап билиишкин-биле байып... эгээртинмес долу» болур ужурлуг? Ону билип алырынга Иоанн 6:67, 68-те сөстер канчаар дузалап турар?

¹⁸ Алыс шын христианнар болганывыста, ынакшылды илередир ужурлуг бис. Ынчалза-даа «ынакшылывыс угаап билиишкин-биле байып... эгээртинмес долу» болур ужурлуг (Флп. 1:9). Оон башка бисти кажарлап, мегелээр улуска, оларның санында ойталакчыларга бүзүрээш, «янзы-бүрү өөредиглерниң чалгыгларынга болгаш хаттарынга» алзып болур бис (Эф. 4:14). Бирги векте өөреникчилериниң хөй кезии Иисусту кааптарга, Пётр элчин аңаа: «Мөңге амыдыралды бээр сөстер Силерде-дир» — деп бүзүрелдии-биле чугаалаан. (Номчуптуңар: Иоанн 6:67, 68.) Ол үеде Пётр Иисустуң өөредиглерин чедир билбейн турган-даа болза, Башкызынга шынчы арткан, чүге дизе Иисус — Христос-тур деп, ол ылап бүзүреп турган. Силер база библейжи өөредиглерге бүзүрелиңерни быжыктырар болзуңарза, чүү-даа болу берзе, бүзүрелиңер кошкаш дивес. Ынчан өске улустуң бүзүрелин база быжыктырып шыдаар силер (2 Ин. 1, 2).