Чүге «хөй дүжүттү» бээр болзувусса эки?

1, 2. а) Өлүрүнүң мурнундагы кежээзинде Иисус өөреникчилери-биле чүнүң дугайында чугаалашкан? (Статьяның эгезинде чурукту көрүңер.) б) Кандыг чылдагааннар-биле суртаалдап турарывысты сактыры чүге чугула? в) Бо статьяга чүнү сайгарар бис?

ӨЛҮРҮНҮҢ мурнундагы кежээзинде Иисус элчиннерин ынакшылынга бүзүредип, оларның-биле үр чугаалажып олурган. Эрткен статьядан алырга, ол өөреникчилеринге виноград сывының дугайында угаадыглыг чугааны чугаалааш, оларны «хөй дүжүт» бээринче, өскээр чугаалаарга, Чагырга дугайында медээни туруштуг суртаалдаарынче оттурган (Ин. 15:8).

² Ынчалзажок Иисус өөреникчилеринге чүү дээш ону кылырындан аңгыда, чүге ону кылыр ужурлуун тайылбырлаан. Чүү дээш суртаалдаарының чылдагааннарын ол оларга чугаалаан. Ону сактыры чүге чугула? Ол чүүл биске «хамык чоннарга» буянныг медээни туруштуг суртаалдаарынга дузалаар (Мф. 24:13, 14). Бо статьяга чүге суртаалдаар ужурлуувустуң дөрт чылдагаанын сайгарар бис. Оон аңгыда туруштуу-биле дүжүт бээринге Иегова биске канчаар дузалап турарын көөр бис.

ИЕГОВАНЫ АЛДАРЖЫДЫП ТУРАР БИС

3. а) Иоанн 15:8-те суртаалдап турарывыстың кандыг чылдагаанын бижээн? б) Иисустуң угаадыглыг чугаазында виноград салбактары чүнү илередип турарыл база ону ооң-биле деңнээни чүге таарымчалыг?

³ Иоанн 15:1, 8 номчуптуңар. Бис Иегованы алдажыдарын болгаш Ооң адын ыдыктаарын күзеп турар бис. Бо дээрге суртаалдап турарывыстың эң-не чугула чылдагааны-дыр. Иисус Адазын Иегованы виноград ажаакчызы-биле, бодун виноград сывынга, а эдерикчилерин ооң будуктары-биле деңнээн (Ин. 15:5). Ынчап кээрге, виноград салбактары — Христостуң эдерикчилериниң берип турары дүжүдүн, азы суртаал ажылын, илередип турар. Иисус элчиннеринге: «Силер... хөй дүжүттү бээр болзуңарза, Адам улам-на алдаржыыр» — дээн. Дүжүткүр виноград сывы ону өстүрген кижиге алдар эккээр. Ооң-биле дөмей, Чагырга дугайында медээни тарадыр дээш, шыдаар-ла чүвевисти кылыр болзувусса, Иегованы алдаржыдар бис (Мф. 25:20—23).

4. а) Бурганның адын канчаар ыдыктап турар бис? б) Бурганның адын ыдыктаар аргалыг болганыңарны бодап келгеш, чүнү миннир-дир силер?

⁴ Суртаалдап турарывыс-биле Бурганның адын канчаар ыдыктап турар бис? Бурганның ады долузу-биле ыдыктыг. Ынчангаш Ооң адын оон артык ыдыктыг кылып шыдавас бис. Ынчалзажок Исайя медээчиниң сөстеринче кичээнгейиңерни салып көрүңер: «Аг-шериглиг Дээрги-Чаяакчының ыдыктыын хүндүлеңер» (Иса. 8:13). Бурганның адын өске кандыг-даа аттардан артык хүндүлеп, ооң ады ыдыктыг деп хүлээп көөр кылдыр өскелерге дузалап турарывыс-биле ыдыктап турар бис (Мф. 6:9). Канчаар? Чижээ, улуска Иегованың кайгамчык шынарларын болгаш кижилерни черге дываажаңга мөңге чурттадыр деп турарын чугаалап тургаш, Ооң дугайында Эрликтиң тарадып турар нүгүлүн меге деп көргүзүп турар бис (Э.д. 3:1—5). Ол ышкаш Иегова «алдарны, мактал-хүндүнү, эрге-чагырганы хүлээп аарынга төлептиг» деп кижилерге билип алырынга дузалап тургаш, Ооң адын ыдыктап турар бис (Ажыд. 4:11). Он алды чыл эгелекчилеп чоруур Руне мынча дээн: «Бүгү Октаргайның Чаяакчызының адындан херечилээр аргалыг болганым дээш, Аңаа сеткилимден өөрүп четтирер-дир мен. Ол чүүл мени улаштыр суртаалдаарынче деткип турар».

ИЕГОВАГА БОЛГАШ ООҢ ОГЛУНГА ЫНАК БИС

5. а) Иоанн 15:9, 10-да суртаалдап турарывыстың кандыг чылдагаанын бижээнил? б) Туруштуг чоруктуң чугулазын Иисус канчаар демдеглээнил?

⁵ Иоанн 15:9, 10 номчуптуңар. Иеговага болгаш Иисуска дыка ынак бис. Бо дээрге Чагырга дугайында медээни суртаалдап турарывыстың ийиги чылдагааны-дыр (Мк. 12:30; Ин. 14:15). Иисус өөреникчилеринге: «Мээң ынакшылымга бүргеткеш амыдыраңар» — дээн. Ол чүге ынча дээн? Чылдан чылче Христостуң өөреникчизи болуп артарынга туруштуг чорук херек. Иоанн 15:4—10-дан алырга, виноград сывының дугайында угаадыглыг чугаазында Иисус «ынакшылымга бүргеткеш», «мээң-биле тудуш харылзаалыг болуңар» дээн сөстерниң ажыглааны-биле туруштуг чоруктуң кайы хире чугулазын демдеглээн.

6. Христостуң ынакшылынга бүргедип амыдыраарын күзеп турарывысты канчаар көргүзүп болур бис?

⁶ Христостуң ынакшылынга бүргедип амыдыраарын күзеп турарывысты, ол ышкаш ооң сеткилинге кирип турарывысты канчаар көргүзүп болур бис? Иисустуң айтыышкыннарын сагып тургаш. Ажыы-биле чугаалаарга, ол: «Меңээ дыңнангыр болуңар» дээн. Иисус бисти кылып турган чүвезин кылырын дилээн: «Мен... Адамның чагыгларын сагааш, Ооң ынакшылынга бүргеткен амыдырап чоруурум бо». Иисус аңаа хамаарыштыр биске үлегер көргүскен (Ин. 13:15).

7. Ынакшыл биле дыңнангыр чорук аразында кандыг харылзаалыг?

⁷ Дыңнангыр чорук биле ынакшыл аразында харылзаалыг деп, Иисус демдеглээн. Ол элчиннеринге: «Кым Мээң айтыышкыннарымны шыгжап алганыл база оларны сагып чоруурул, ол кижи Меңээ ынак болур» — деп чугаалаан (Ин. 14:21). Иисустуң суртаалдаңар дээн айтыышкыны Иеговадан келген болганда, ону күүседир болзувусса, Иеговага ынакшылывысты көргүзер бис (Мф. 17:5; Ин. 8:28). Иегова биле Иисус оларга ынакшылывысты көргеш, биске база ынак болур.

КИЖИЛЕРНИ САГЫНДЫРЫП ТУРАР БИС

8, 9. а) Суртаалдап турарывыстың үшкү чылдагаанын чугаалаңар. б) Иезекиил 3:18, 19 биле 18:23-те Иегованың сөстери бисти суртаалдаарынче канчаар оттуруп турарыл?

⁸ Иегованың хүнү чоокшулаан деп улусту сагындырып турар бис. Ол дээрге суртаалдап турарывыстың үшкү чылдагааны-дыр. Библияда Нойну «чөптүг-шынныг чорукту суртаалдаан» дээн. (2 Пётр 2:5 номчуптуңар.) Суг халавының мурнунда Ной каржы делегейниң узуткаашкынының кел чыдарын кижилерге сагындырып турган. Чүге ынча деп болур? Иисустуң сөстеринче кичээнгейден салыптаалыңар: «Ол хүннерде, суг халавының мурнуу чарыында, Нойнуң бажың-хемезинге олурупканы хүнге чедир, улус-чон ижип-чип, кадай ап база ашакка барып келген болгай. Суг халап келгеш, оларның шуптузун узуткап каггыжеге чедир, олар чүнү-даа угаап бодавааннар. Кижи амытан Оглу чедип кээрге, база шак ындыг боор» (Мф. 24:38, 39). Долгандыр кижилер Нойну дыңнавайн-даа турда, ол Бурганның медээзин чарлаарын уламчылап турган.

⁹ Бурган келир үеде кижилерге чүнү кылыр деп турарын шупту улус билип алыр кылдыр, Чагырга дугайында медээни суртаалдап турар бис. Бис база, Иегова ышкаш, кижилер ол медээни дыңнааш, амы-тынныг артар кылдыр күзээр бис (Иез. 18:23). Оон аңгыда бажыңнар кезип азы хөй-ниити черлерге суртаалдап тургаш, аргалыг-ла болза, хөй кижилер Бурганның Чагыргазы бузуттуг делегейни узуткап кааптар деп билип алыр кылдыр кызып чоруур бис (Иез. 3:18, 19; Дан. 2:44; Ажыд. 14:6, 7).

КИЖИЛЕРГЕ ЫНАК БИС

10. а) Матфей 22:39-тан алырга, кандыг чылдагаан-биле суртаалдап турар бис? б) Павел биле Сила таңныылдар даргазынга канчаар дузалаан?

¹⁰ Суртаалдап турарывыстың дөрткү чылдагааны — кижилерге ынак бис (Мф. 22:39). Ынакшыл бисти ол даалганы улаштыр күүседиринче оттуруп турар, чүге дизе улустуң чуртталгазынга өскерлиишкиннер болу бээрге, олар буянныг медээни дыңнай берип болур. Павел элчин болгаш Сила-биле болган таварылганы сактып кээлиңер. Филиппы хоорайга оларны кара-бажыңнап каан. Дүн ортузунда чер шимчээшкини болган. Оон кара-бажыңның эжиктери ажыттына берген. Таңныылдар даргазы хоругдаттырганнарны дезе берген деп бодааш, амы-тынынга четтинер деп барган. Ынчалза-даа Павел аңаа: «Бодуңга хора чедирбе!» — деп алгырган. Таңныылдар даргазы дүвүрээш, Павел биле Силадан: «Камгалал алыр дизе, мен чүнү кылыйн?» — деп айтырган. Харыызынга олар: «Дээрги Иисуска бүзүре. Ынчаар... камгалал алыр силер» — дээн (Аж.-ч. 16:25—34).

11, 12. а) Таңныылдар даргазы-биле болган таварылга бараалгалывыска кандыг хамаарылгалыг? б) Чүге улаштыр суртаалдаарын күзеп турар бис?

¹¹ Ол таварылга суртаал ажылынга кандыг хамаарылгалыг? Таңныылдар даргазы чүгле чер шимчээшкининиң соонда алыс шынны билип алыксай бергеш, Павел биле Силадан дуза дилээнин эскерип көрүңер. Бөгүн база библейжи медээни ооң мурнунда херекке албайн турган улус, амыдыралынга бир-ле багай чүвеге таварышкан соонда, ол медээге хамаарылгазын өскертип алган. Чижээ, чамдык улус хөй чылдар иштинде ажылдап келген ажылындан хенертен үндүртүпкеш, чок болза ашаа азы кадайы-биле чарлы бергеш, аажок ундарап болур. А өскелер аарый бергениниң билип кааш азы чоок кижизин чидиргеш, муңчулуп чоруур чадавас. Ындыг коргунчуг бергелерге таварышкаш, улус чуртталганың утказының дугайында боданып, ооң мурнунда херекке албайн турган айтырыгларын салып эгелээр. Безин чадаарда олар: «Камгалал алыр дизе, мен чүнү кылыйн?» — деп боданып турар чадавас. Дараазында кээривиске олар идегел бээр буянныг медээни дыңнаарын чуртталгазында бир дугаар чөпшээрежир чадавас.

¹² Ынчангаш суртаалдаарын уламчылап-ла турар болзувусса, бисти дыңнаар күзелдиг, аргалал хереглеп турар кижиге таваржы берип болур бис (Иса. 61:1). 38 чыл дургузунда долу бараалгап чоруур Шарлотта: «Кижилер бөгүн чүнү канчаар аайын тыппайн турар. Оларга буянныг медээни дыңнаар арганы бээр болзувусса эки» — дээн. А 34 чыл эгелекчилеп чоруур Эйвор мынча дээн: «Амгы үеде кижилер, кажангызындан артык, ундаралга бастырып чоруур. Оларга дыка дузалажыксаар мен! Ынчангаш оларже барып турар мен». Ийе, кижилерге ынакшыл — улаштыр суртаалдаарының чугула чылдагааны-дыр.

ТУРУШТУУ-БИЛЕ СУРТААЛДААРЫНГА БИСКЕ ЧҮҮ ДУЗАЛААР?

13, 14. а) Иоанн 15:11-ден алырга, суртаалдаарынга биске чүү дузалап турар? б) Иисустуң ышкаш өөрүшкүнү канчаар миннип болур бис? в) Өөрүшкү бараалгалывысче кандыг салдар чедирип турарыл?

¹³ Өлүрүнүң мурнундагы кежээзинде Иисус элчиннеринге туруштуу-биле дүжүт бээринге оларга чүү дузалаарын чугаалаан. Ол чүл база ол биске канчаар дузалап болур?

¹⁴ Өөрүшкү. Иисустуң суртаалдаңар дээн айтыышкынын аар чүък деп болур бе? Чок. Виноград сывының дугайында угаадыглыг чугаа-биле Иисус өөреникчилерин суртаал ажылы оларга өөрүшкү эккээр деп бүзүреткен. (Иоанн 15:11 номчуптуңар.) Өскээр чугаалаарга, Бурганның күзел-соруун күүседип тургаш, ооң миннип турган өөрүшкүзүн база миннир бис деп, Иисус аазаан. Ооң сөстериниң утказы кандыгыл? Сактыр болзувусса, Иисус бодун виноград сывы-биле, а өөреникчилерин ооң будуктары-биле деңнээн. Будуктарның сып таварыштыр сугну болгаш чемиштиг бүдүмелдерни ап турары дег, бис Иисус-биле тудуш харылзаалыг боор болзувусса, ооң миннип турган өөрүшкүзүн миннир бис (Ин. 4:34; 17:13; 1 Пет. 2:21). 40 ажыг чыл эгелекчилеп чоруур Ханне: «Суртаал соонда миннип турар өөрүшкүм бараалгалымны уламчылаарынга дузалап турар» — деп үлешкен. Шынап-ла, өөрүшкү биске улус дыңнавас девискээрге безин Иеговага улаштыр бараалгаарынга дузалап, күштү берип турар (Мф. 5:10—12).

15. а) Иоанн 14:27-де Иисус чүнү сагындырган? б) Бараалгалывыска дүжүт бээринге тайбың канчаар дузалап турарыл?

¹⁵ Тайбың. (Иоанн 14:27 номчуптуңар.) Өлүрүнүң мурнундагы кежээзинде Иисус элчиннеринге: «Амыр-тайбыңны Мен силерге берип тур мен» — дээн. Христостуң амыр-тайбыңы суртаал ажылынга дүжүт эккээринге биске канчаар дузалап турарыл? Суртаалдаарын уламчылап тургаш, тайбыңны миннип турар бис, чүге дээрге шак ынчаар Иегова биле Иисусту өөртүп турар бис (Ыд.ыр. 149:4; Рим. 5:3, 4; Кол. 3:15). 45 чыл ишти долу бараалгап чоруур Ульф үлешкен: «Суртаал соонда шылап калган кээр-даа болзумза, сагыш-сеткил ханыышкынын миннип турар мен. Суртаал ажылы чуртталгамны ёзулуг уткалыг кылып турар». Амыр-тайбың биле сеткил ханыышкынын миннип турарывыс дээш өөрүп четтирер-дир бис!

16. а) Иоанн 15:15-тен алырга, элчиннер Иисустуң чүзү апарган? б) Иисус-биле найыралдыг артар дизе, элчиннер чүнү кылыр ужурлуг турган?

¹⁶ Иисус-биле найырал. Элчиннеринге бодунуң ышкаш эгээртинмес долу өөрүшкүнү олар база миннип болур деп чугаалааш, Иисус бодун хайыралавас ынакшылды илередириниң кайы хире чугулазын тайылбырлаан (Ин. 15:11—13). Оон ол оларга: «Мен силерни эш-өөрүм деп ададым» — дээн. Бодап безин көрүңер даан: элчиннер Иисустуң эш-өөрү апарган! Ооң-биле найыралдыг артар дизе, олар хөй «дүжүттү» бээр ужурлуг турган. (Иоанн 15:14—16 номчуптуңар.) Ооң мурнунда, ийи хире чыл бурунгаар, Иисус элчиннеринге: «Баргаш: „Дээрниң Чагыргазы чоокшулап келген-дир!“ — деп суртаалдаңар» — дээн (Мф. 10:7). А өлүрүнүң мурнундагы кежээзинде Иисус оларны эгелээн ажылды уламчылаарынче деткээн (Мф. 24:13; Мк. 3:14). Иисустуң айтыышкыны белен эвес-даа болза, олар ону күүседипкеш, ооң эш-өөрү болуп артып калган. Оларга чүү дузалаан?

17, 18. а) Иоанн 15:16-да Иисус өөреникчилерин чүү чүвеге бүзүреткен? б) Ол аазаашкын оларны канчаар деткип турган? в) Бараалгалывысты уламчылаарынга биске чүү дузалап турар?

¹⁷ Мөргүлдерге харыы. Иисус: «Мээң адым адап, чүнү-даа дилээриңерге, Адам силерге дөгерезин бээр» — дээн (Ин. 15:16). Ооң сөстери элчиннерге күш берип, эрес-дидим болурунга дузалаанa. Олар Иисус удавас өлүп каар деп эки медеревейн турган-даа болза, олар деткимче чок артпас деп ооң аазаашкыны оларны бүзүреткен. Чагырга дугайында медээни улаштыр суртаалдазын дээш, Иегова оларның кандыг-даа дилег-мөргүлдеринге харыылаарынга белен турган. Удатпаанда элчиннер аңаа шынзыккан (Аж.-ч. 4:29, 31).

¹⁸ Амгы үеде база чүү-даа өскерилбээн. Бараалгалывыска туруштуу-биле дүжүттү берип-ле турар болзувусса, Христостуң эш-өөрү болуп артар бис. Оон аңгыда суртаалдап тургаш, бергелерге таваржып турар болзувусса, дуза дилээн мөргүлдеривиске Иегова албан-биле харыылаар (Флп. 4:13, Чаа делегейниң очулгазы). Мөргүлдеривиске Иегованың харыылап турары дээш, ол ышкаш Иисустуң эш-өөрү болур аргалыг болганывыска дыка-ла өөрүп четтирер-дир бис! Ол чүүл бараалгалывыска моон-даа соңгаар дүжүт бээринге дузалаар (Иак. 1:17).

19. а) Суртаалдаарын чүге уламчылап турар бис? б) Ол ажылды эчизинге чедиреринге биске чүү дузалаар?

¹⁹ Бо статьяга чүге суртаалдаарын уламчылап турарывыстың чылдагааннарын көрдүвүс: Иегованы алдаржыдып, Ооң адын ыдыктаарын, Аңаа болгаш Иисуска ынакшылывысты бадыткаарын болгаш кижилерге ынакшыл илередип, оларны сагындырарын күзеп турар бис. А өөрүшкү, тайбың, Иисус-биле найырал болгаш мөргүлдеривиске харыы Бурганның берген даалгазын эчизинге чедиреринге дузалаар. Күжүвүстү харамнанмайн, хөй «дүжүттү» берип турарывысты көргеш, Иегова аажок өөрүп турар!