Иеговага идеге, буяндан тары

1. Иегова кижилерни кандыг кайгамчык арга-шинектиг кылдыр чаяап кааныл?

ИЕГОВА кижилерни кайгамчык кылдыр чаяап каан. Чижээ, бергелерни шиитпирлээринге болгаш келир үени планнаарынга Ол биске угаан-сарыылды берген (У. ч. 2:11). Бурган кижилерни планнаан чүүлдерин боттандырып, салган сорулгаларынче чүткүүр кылдыр чаяап каан (Флп. 2:13). Оон аңгыда арын-нүүрлүг бис (эки-бакты ылгаар иштики минниишкин). Ол частырыглар кылбазынга болгаш оларны эдеринге дузалап турар (Рим. 2:15).

2. Иегова бистен чүнү күзеп турарыл?

² Иегова бисти арга-шинээвисти шын ажыглаар кылдыр күзеп турар. Чүге? Ол биске ынак болгаш, чүгле ынчан ёзулуг өөрүшкү биле сеткил ханыышкынын минниривисти Ол билир. Бодунуң Сөзүнде Ол бисти арга-шинээвисти ажыглаарынче чаңгыс удаа эвес кыйгырып турар. Чижээ, Еврей Бижилгелерде: «Кызымак кижиниң бодалдары ыяап-ла элбекшилге эккээр»; «Холуң кылып шыдаар бүгү-ле ажылды бар шааң-биле кылып чор» деп бижээн (У. ч. 21:5; Эккл. 9:10). А Христиан Грек Бижилгелерде: «Амдыызында арга барда, бүгү улуска... буяндан көргүзүп чоруулу»; «Өскелерге бараан боорда, кижи бүрүзү Бурганның хайырлаан ачы-буянныг белээн ажыглаар ужурлуг» дээн (Гал. 6:10; 1 Пет. 4:10). Иегова бисти бодувуска болгаш өскелерге ачылыг болзун дээш, шыдаар-ла чүвевисти кылып чорзун деп күзеп турары моон көскү-дүр.

3. Чүнү кылып шыдавас бис?

³ Ынчалза-даа арга-шинээвис кызыгаарлыг деп, Иегова билип турар. Бачытты болгаш өлүмнү ап кааптар шаавыс чок. Оон аңгыда өскелерни ону-мону кыл деп, албадап шыдавас бис, чүге дизе кижи бүрүзү хостуг эргелиг (3 Хаан. 8:46). Чеже-даа билиглиг, арга-дуржулгалыг болзувусса, Иеговага деңнээрге, кезээде чаш төлдер бооп артып каар бис (Иса. 55:9).

4. Бо статьяга чүнү сайгарар бис?

⁴ Кандыг-даа байдалда Иеговага ынанып, Ол бисти деткиир база күш четпес чүвевисти кылып бээр деп, ыяк бүзүрээр ужурлуг бис. Ындыг-даа болза, бергелерни шиитпирлээринге болгаш өскелерге дуза кадарынга бодувустуң талавыстан шыдаар чүвевисти кылыр болзувусса эки. Библия бисти: «Иеговага идеге, буяндан тары... шынныы-биле хөдел» — деп деткип турар (Ырлар 36:3, ЧД). Өскээр чугаалаарга, шынныы-биле хөделип, Иеговага идегеп, буян тарыыр ужурлуг бис. Иеговага идегеп, хөделип чораан Нойнуң, Давидтиң болгаш оон-даа өске Ооң шынчы бараалгакчыларының үлегерлеринден чүнү өөренип алырывысты көрээлиңер. Олар чүнү шыдаар, а чүнү шыдавазын кончуг эки билип база ол билиинге дүүштүр алдынып чораан деп эскерип каар бис.

ДОЛГАНДЫР БУЗУТ ҮҮЛГЕДИИШКИНИ БОЛУП ТУРДА

5. Ной кандыг үеде чурттап чорааныл?

⁵ Нойнуң үезинде делегей күчүлел болгаш самыырал-биле долган турган (Э. д. 6:4, 9—13). Ол бузут долган делегейни Иегова узуткаар деп, Ной билип турган. Ынчалзажок долгандыр болуп турган бүгү чүве ооң сеткилин хинчектеп турган чадавас. Күш четпес чүүлдери бар деп миннип-даа турза, ооң шыдаар чүүлдери база бар деп, ол билип турган.

6, 7. а) Ной чүнү шыдавас турган? б) Бистиң байдалывыс биле Нойнуң байдалы чүзү-биле дөмейил?

⁶ Ной чүнү шыдавас турганыл? Ной кел чыдар халап дугайында Бурганның медээзин өскелерге шынчызы-биле чугаалап турган-даа болза, бузуттуг кижилер сагындырыгны хүлээп аар кылдыр албадап шыдавас турган. Суг халавының кээрин-даа ол дүргедедип шыдавас турган. Ной Иеговага ынанып, Ооң бузутту ап кааптар дээн аазаашкынын өй шаанда күүседиптеринге бүзүрээр ужурлуг турган (Э. д. 6:17).

⁷ Бис база бузут-бак долган делегейде чурттап чоруур бис. Иегованың ону узуткаар деп турарын база билир бис (1 Ин. 2:17). Ынчалза-даа «Дээрниң Чагыргазының дугайында Буянныг Медээни» хүлээп аар кылдыр улусту албадап-даа, «коргунчуг хилинчектиң» кээрин дүргедедип-даа шыдавас бис (Мф. 24:14, 21). Биске, Нойнуң ышкаш, быжыг бүзүрел херек база Бурганның хөделип эгелээрин манап тургаш, Аңаа ынаныр ужурлуг бис (Ыд. ыр. 36:10, 11). Иегова бо делегейни доктааткан хүнүнде, бичии-даа саадатпайн, узуткаар дээрзинге ыяк бүзүрээр бис (Авв. 2:3).

8. Нойнуң кичээнгейи чүүже угланган турганыл? (Статьяның эгезинде чурукту көрүңер.)

⁸ Ной чүнү шыдаар турганыл? Ной шыдавас чүүлдери дээш ундаравайн, шыдаар чүүлдеринче кичээнгей салып турган. «Чөптүг-шынныг чорукту суртаалдаан» Ной Бурганның шииткелин шынчы медеглеп чораан (2 Пет. 2:5). Ооң ачызында ооң бүзүрели кошкаваан. Оон аңгыда ол бажың-хеме тудар деп Бурганның даалгазын күүседир дээш, угаан-сарыылын ажыглап, кызып ажылдап турган. (Еврейлерге 11:7 номчувут.)

9. Нойну канчаар өттүнүп болур бис?

⁹ Бис база, Ной ышкаш, Дээрги-Чаяакчының ажыл-херээнге бүгү бодувусту бараалгадыр дээш кызып чоруур бис (1 Кор. 15:58). Бурганга чүдүүр черлерни тударынга база септээринге киржип, шуулганнарга эки-турачы бооп дузалажып, салбырда азы очулга офизинде бараалгап турар чадавас бис. Ынчалза-даа бир дугаарында буянныг медээни суртаалдап турар бис. Ол чүүл келир үеге идегеливисти быжыглап турар. Бир угбавыс: «Бурганның Чагыргазының йөрээлдериниң дугайында улус-биле чугаалажып тургаш... сени дыңнап турар улустуң кандыг-даа идегели чогун база олар бергелеринче дүлдүне бергенин билип каар сен» — дээн. Суртаал ажылынга киржири — келир үеже идегелдиг көөрүнче болгаш мөңге амыдырал дээш чарышка дүжүп бербезинге биске дузалап турар (1 Кор. 9:24).

ЧАСТЫРЫГ КЫЛЫПКАНЫВЫСТА

10. Давид-биле чүү болганын чугаалап көрүңер.

¹⁰ Давид хаанның дугайында Иегова: «Мээң сеткилимге кирер кижини... тып алдым» дээн (Аж.-ч. 13:22). Давид шынчы чораан-даа болза, ооң аар бачыттар кылып турган таварылгалары база бар. Ол Вирсавия-биле самыын чорук кылган. Оон дора, бачыдын чажырар дээш, ол ооң ашаа Урияны тулчуушкунга өлүп каар кылдыр, кара сагыштыг планны тургускан. Давид шериг баштыңчызы Иоавче чагаа бижээш, ону Урияны дамчыштыр чорудупкан (2 Хаан. 11:1—21). Ынчалзажок Давидтиң бачыттары билдине берген (Мк. 4:22). Ынчан ол канчанганыл?

11, 12. а) Бачыт кылыпкаш, Давид чүнү өскертип шыдавас турганыл? б) Аар бачыт кылыпкан болзувусса, чүү чүвеге бүзүреп болур бис?

¹¹ Давид чүнү шыдавас турганыл? Давид үүлгедиглерин эдип, бачыттарының уржуктарын чайладып шыдавас турган. Чамдык частырыгларының уржуктарын ол өлгүжеге чедир көрүп келген (2 Хаан. 12:10—12, 14). Ынчангаш аңаа бүзүрел херек турган. Сеткилинден бачыдын миннинген болганда, Иегова ону өршээптер база бачыттарының уржуктарын ажып эртеринге дузалаар деп, ол Бурганга бүзүреп, Аңаа идегээр ужурлуг турган.

¹² Шупту бачыттыг бис, часпас кижи чок. Ындыг-даа бол, чамдык бачыттар, өскелеринге бодаарга, аар. Чамдыкта частырыгларывысты эдип шыдавас бис, ынчангаш ооң уржуктары-биле чурттаар ужурга таваржыр бис (Гал. 6:7). Ынчалзажок Иеговага ынанып, бачыттарывысты миннир болзувусса, бергелерни боттарывыс-даа тургузуп алган болзувусса, оларны ажып эртеринге Ол дузалаар деп, бүзүреп болур бис. (Исайя 1:18, 19; Ажыл-чорудулга 3:19 номчувут.)

13. Давид Иегова-биле харылзаазын канчаар катап тургузуп алганыл?

¹³ Давид чүнү шыдаар турганыл? Иегова-биле харылзааны катап тургузарынга херек чүүлдерни Давид кылган. Чижээ, ол Иегованың төлээлекчизинден, Нафан медээчиден, эдип-чазаашкынны хүлээп алган (2 Хаан. 12:13). Оон ыңай Давид Иегованың ээ көрнүүшкүнүн дилеп, бачыттарын миннип, мөргүп турган (Ыд. ыр. 50:3—19). Буруузунар минниишкин ону хөме аптарын ол болдурбаан. Давид частырыгларынга өөренип чораан. Ынчангаш ол частырыгларын кажан-даа катаптаваан. Ол назыны дөгүй бергиже шынчы артып, Бурганга бердинген чоруун кадагалап алган (Евр. 11:32—34).

14. Давидтиң үлегеринден чүнү өөренип алыр бис?

¹⁴ Давидтиң үлегеринден чүнү өөренип алыр бис? Аар бачыт кылыпкан болзувусса, буруузунгаш, Иеговадан өршээл дилээр херек. Бачыттарывысты ажыы-биле Аңаа миннир болзувусса эки (1 Ин. 1:9). Оон аңгыда Бурган-биле харылзааны катап тургузарынга дузалаар кылдыр, ооң дугайында удуртукчуларга чугаалаар ужурлуг бис. (Иаков 5:14—16 номчувут.) Ол шупту базымнарны кылыр болзувусса, Иегованың бисти экиртип, өршээр дээн аазаашкынынга бүзүреливисти көргүзер бис. Частырыгларывыска өөренип, Иеговага бараалгаарын уламчылап, келир үеже идегелдиг көрүп өөренир ужурлуг бис (Евр. 12:12, 13).

ӨСКЕ ТАВАРЫЛГАЛАРДА

15. Аннаның үлегеринден чүнү өөренип алыр бис?

¹⁵ Иеговага идегевишаан, хөделип турган оон-даа өске Бурганның шынчы бараалгакчыларының үлегерин сактып кээр чадавас силер. Чижээ, Аннаның ажы-төлү чок турган, ол ооң-биле чүнү-даа кылып шыдавас турган. Ынчалза-даа Иегова ону оожуктурар деп, ол идегеп чораан. Ынчангаш ол Бурганга мөгеер дээш, ыдыктыг өргээ-майгынче кээрин уламчылап, сагыш-сеткилин мөргүлге тө каап берип турган (1 Хаан. 1:9—11). Дыка-ла эки үлегер! Кадыывыс кошкап азы шиитпирлеп шыдавазывыс бергелер тургустунуп кээр болза, сагыш човаашкыннарывысты Иеговаже, Ол бисче сагыш салыр деп чигзинмейн, чая кааптар болзувусса эки (1 Пет. 5:6, 7). Оон ыңай Иегованың чагыг-сургаалын алыр дээш, бодувустуң талавыстан шыдаар чүвевисти кылып турар бис. Ындыг чагыг-сургаалды Ол чыыш таварыштыр база берип турар (Евр. 10:24, 25).

16. Назылай берген Самуилдиң үлегеринден ада-иелер чүнү өөренип алырыл?

¹⁶ А бир эвес силер Бурганга шынчы бараалгап турар-даа болзуңарза, төлүңер алыс шынның оруундан чорупкан таварылгада канчаарыл? Назылай берген Самуил улуг апарган оолдарын Бурганның дүрүмнерин сагыыр кылдыр албадап шыдавас турган (1 Хаан. 8:1—3). Шупту чүвени ол Иегованың холунче хүлээдиптер ужурлуг турган. Ынчалза-даа Самуил бодунуң талазындан Иеговага шынчы артып, Ооң чүрээн өөртүп болур турган (У. ч. 27:11). Самуил-биле болган чүүл чамдык христиан ада-иелерге таныш. Олар будалган оолдуң дугайында угаадыглыг чугаада Ада ышкаш, Иегова бузуттуг улусту бачыттарын миннингеш, Олче эглип кээрин манап турар деп бүзүреп турар (Лк. 15:20). Ындыг христианнар Иеговага шынчы артарын кызып, боттарының көргүзүп чоруур үлегери ажы-төлүн чыышче эглип кээринче оттурар деп идегеп чоруур.

17. Ядыы дулгуяк кадайның үлегери бисти чүү чүвеге бүзүредип турарыл?

¹⁷ Оон ыңай Иисустуң үезинде чурттап чораан ядыы дулгуяк кадайның үлегерин сактып кээп болур бис. (Лука 21:1—4 номчувут.) Бурганның өргээзинде болуп турган хоойлу сагывас чорукту ол эдип шыдавас турган (Мф. 21:12, 13). Ол ышкаш чединмес байдалындан ооң уштунуп шыдаптар харыы чок турган. Ынчалзажок ол сеткилинден «ийи эң үүрмек чоос салып», «амыдыраарынга херек бүгү кошкулун» өргүпкен. Ол Бурганга шынчы херээжен Иеговага долузу-биле идегеп турарын ынчаар көргүскен. Бирги черге Бурганның Чагыргазын салыр болза, Иегова ол дээш сагыш човаар деп, ол чигзинмээн. Бурганга ынанып, алыс шын чүдүлгени деткиирин ол шиитпирлээн. Чүнү-даа мурнай Бурганның Чагыргазынга башкартыр болзувусса, арткан бүгү чүвени Ол биске бээр дээрзинге бис база ыяк бүзүрээр бис (Мф. 6:33).

18. Бир акывыстың шын хөөннү кадагалап чораанын чугаалап көрүңер.

¹⁸ Бистиң үеде хөй акы-угбалар Иеговага ынанып турарын үлегери-биле көргүзүп, хөделип турар. Оларның бирээзи — Малком дээр акывыс. 2015 чылда өлүмүнге чедир ол Бурганга шынчы арткан. Ол кадайы-биле Иеговага хөй чылдар ишти бараалгап, өөрүшкүнү-даа, ажыг-шүжүгнү-даа көрүп чораан. «Кижи даарта чүү болурун билбес, ол ышкаш амыдыралга билдинмес аар-берге үелер база тургулаар. Ынчалза-даа Иегова Аңаа идегеп чоруур улусту йөрээп турар» — деп, Малком чугаалап чораан. Ол акывыс кандыг сүме бергенил? «Идепкейлиг, үре-түңнелдиг бараалгаар дээш Иеговага мөргүүрү» база «шыдавас чүүлүңче эвес, а шыдаар чүүлүңче кичээнгей салыры» дыка чугула деп, ол бижип турганa.

19. а) 2017 чылдың шүлүүнүң дугайында боданыры биске чүге чугула? б) 2017 чылдың шүлүүн амыдыралыңарга канчаар ажыглаар деп тур силер?

¹⁹ Бо делегей «багынга улам өнемчип» бар чыдар. Ынчап кээрге, улуг бергелерге таваржыр бис (2 Тим. 3:1, 13). Бергелерге бастыртып алырын болдурбас ужурлуг бис! Чүлдү-чүрээвистен Иеговага ынанып өөренип, шыдаар-ла чүвевисти кылып чоруулуңар. «Иеговага идеге, буяндан тары» деп 2017 чылдың шүлүүнүң дугайында боданыры ону кылырывыска дузалаар (Ыд. ыр. 36:3).