Иегова биле Иисуска четтиргенивисти канчаар илередип болур бис?

Силерге дыка үнелиг белек берген болза, чүнү миннир силер? Дыка-ла өөрүп, ол белекти үнелеп турарыңарны көргүзер боор силер. Иегова биле Иисус чүнүң-биле-даа деңнеттинмес белек берген. Ол чүү деп белек база ол дээш четтиргенивисти канчаар илередип болур бис?

1. Иегова биле Иисуска четтиргенивисти канчаар илередип болур бис?

Иисуска бүзүрээн кижи бүрүзү өлбейн, мөңге чурттаар аргалыг деп Библияда бижээн (Иоанн 3:16). Бүзүрел дээрге анаа-ла миннишкиннер эвес-тир. Ону ажыл-херектеривис, шиитпирлеривис-биле көргүзер бис (Иаков 2:17). Ынчаар бүзүреливисти көргүзер болзувусса, Иисус база ооң ачазы Иегова-биле найыралывыс быжыг болур. (Номчуптуңар: Иоанн 14:21.)

2. Иегова биле Иисуска четтиргенивисти кандыг тускай болуушкунга илередип болур бис?

Иисус өлүрүнүң мурнунда кежээ өргүл дээш четтиргенин оон өске канчаар илередип болурун өөреникчилеринге чугаалаан. Ол Дээргиниң кежээзи, азы Христостуң өлүмүнүң сактыышкын кежээзи, деп адаар онзагай байырлалды киирген (1 Коринфичилерге 11:20). Төлевирни элчиннер болгаш шупту христианнар сактып чорзун деп, Иисус күзээн. Ол байырлалга хамаарыштыр Иисус: «Меңээ тураскаал кылдыр ынчаар кылып чоруңар» — дээн (Лука 22:19). Сактыышкын кежээзинге келгениңер Иегова биле Иисуска өндүр улуг ынакшылы дээш четтиргениңерни көргүзер.

ХАНЫ ШИНЧИЛЕҢЕР

3. Өөрүп четтирген хөөн буянныг херектерже оттурар

Бир кижи силерниң амы-тыныңар камгалап каан дижик. Ооң дугайында утпас болгай силер. Ол кижиге четтиргениңер илередир арганы тып алыр силер.

Чуртталгавыс дээш Иеговага өөрүп четтирер бис. 1 Иоанн 4:8—10-ну номчааш, харыылаптыңар:

• Иисустуң өргүлү чүге онза белек?

• Иегова биле Иисустуң кылган чүүлү силерге кандыг минниишкиннер оттурар-дыр?

Иегова биле Иисуска четтиргенивисти канчаар илередип болур бис? 2 Коринфичилерге 5:15 биле 1 Иоанн 4:11; 5:3-тү номчуптуңар. Шүлүк бүрүзүн номчааш, айтырыгга харыылаптыңар:

• Бо шүлүктен алырга, четтиргенин канчаар илередип болур?

4. Иисустан үлегерни алыңар

Иисустан үлегер ап чурттаары — четтиргенин илередир база бир арга. 1 Пётр 2:21-ни номчааш, харыылаптыңар:

• Иисусту канчаар өттүнүп болур силер?

5. Иисустуң өлүмүнүң Сактыышкын кежээзин байырлаңар

Бир дугаар Сактыышкын кежээзи канчаар эрткенин билип алыр дээш, Лука 22:14, 19, 20-ни номчааш, харыылаптыңар:

• Сактыышкын кежээзи канчаар эртер турган?

• Хлеб биле кызыл арага чүнү илередип турар? (19, 20 дугаар шүлүктерни көрүңер.)

Өлүмүнүң сактыышкын кежээзин өөреникчилери чыл санында эрттирер кылдыр, Иисус күзээн. Ынчангаш Иегованың Херечилери Иисустуң айтыышкынын эдерип, Христостуң өлүмүн сактыр дээш, чыл санында чыглып турар. Ол чугула байырлалды ВИДЕОДАН көргеш, айтырыгга харыылаптыңар:

ВИДЕО: «Иисус Христостуң өлүмүнүң дугайында сактыышкын» (1:41)

• Сактыышкын кежээзи канчаар эртер?

Хлеб биле кызыл арага дээрге демдектер-дир. Хлеб — бис дээш берген Иисустуң тергиин мага-бодун, а кызыл арага — ханын илередип турар

КОЛ БОДАЛ

Иисуска бүзүреп, Сактыышкын кежээзинге келгенивис-биле төлевир дээш четтиргенивисти илередип болур бис.

Катаптаашкын

• Иисуска бүзүрээриниң утказы кандыг?

• Силерге кылган чүүлү дээш, Иегова биле Иисуска четтиргениңерни канчаар илередип болур силер?

• Иисустуң өлүмүнүң Сактыышкын кежээзинге кээри чүге чугула?

НЕМЕЛДЕ

Иисустуң өлүмү бисти чүнү кылырынче оттуруп турар?

«Иисус Иегованы алдаржыдар дээш, мага-бодун шын ажыглап турган» (9:28)

Бүзүрел дээрге чүл, ону канчаар илередир?

«Иегованың аазаашкыннарынга бүзүреңер» («Таңныыл суургазы» октябрь, 2016 чыл)

Төлевирниң ачызында бир херээжен кижи багай бодалдарга бастыртпас апарганын номчуңар.

«Алыс шын чуртталганы өскертир» («Таңныыл суургазы» август 1, 2011 чыл)

Сактыышкын кежээзинге чамдык улус кызыл араганы, хлебти чүге амзаарын номчуп көрүңер.

«Иегованың Херечилериниң Сактыышкын кежээзин демдеглээри чүге ылгалдыг?» (веб-статья)