Бурганның Чагыргазы кээрге, чуртталга канчаар өскерли бээр?

1, 2. а) Шаажыладып өлүртүр дээн кем-херек үүлгедикчизи биле бо делегейниң чүзү дөмей? (Статьяның эгезинде чурукту көрүңер.) б) Шупту сарыылдыг чаяалгалар бо делегейниң узуткаашкынын канчаар хүлээп алыр?

«ӨЛГЕН КИЖИ БАР ЧЫДЫР!» Бо сөстер кара-бажыңның камеразындан айыылдыг кем-херек үүлгедикчизин үндүрүп орда, коридорда чаңгыланып турар. Ол кижи дириг болгаш кадык турда-ла, кара-бажың таңныылдары чүге ынча деп алгыржып турарыл? Чүге дизе ону шаажылап өлүрер дээш аппар чыдар. Ол шииттирген херектенни өлүг деп санап болурa.

² Бистиң бузуттуг делегейивисти ындыг кем-херек үүлгедикчизинге дөмейлеп болур. Делегей шагда-ла шииттирген, ол удавас узуткадыр. Библияда: «Бо делегей... эстип-хайлы бээр» — дээн (1 Ин. 2:17). Бо сөстер боттаны бээр деп, бичии-даа чигзинмес бис. Ынчалза-даа өлүмге шииттирген кем-херек үүлгедикчизи биле бо бузуттуг делегейниң аразында чаңгыс ылгал бар. Херектенниң шаажыладып өлүртүр дээн шииткелин чөптүг эвес дээш өскертирин негеп азы соңгаарладып болур. А бо делегейге хамаарыштыр шииткелди Октарагайда эң-не чөптүг Шииткекчи үндүрген (Ы. х. к. 32:4). Бо шииткелдиң күүселдези соңгаарлаттынмас база ооң чөптүүнге кым-даа чигзинмес. Бо делегейни узуткап кааптарга, шупту сарыылдыг чаяалгалар чөптүг чоруктуң тергиидээринге өөрүүр. Ынчан ёзулуг хосталга кээр!

3. Бурганның Чагыргазы кээрге, чүү эстип-хайлы бээрил?

³ Эстип-хайлы бээр делегейже чүү кирип турар? Улустуң чуртталганың адырылбас кезээ деп санаары хөй-ле багай чүве кирип турар. Ол бүгү моон соңгаар турбас. Ол багай медээ бе? Чок! Ажыы-биле чугаалаарга, «Дээрниң Чагыргазының дугайында бо Буянныг Медээ» дорт-ла олче айтып турар (Мф. 24:14). Ынчаарга Бурганның Чагыргазы кээрге, чүү эстип-хайлы бээрил? Ол дээрге: бузуттуг кижилер, каржы-бакка борашкан организациялар, каржы херектер, аарышкы, өлүм болгаш хилинчек-тир. Оларны сайгарып тургаш, бис 1) оларның амыдыралывысче салдарын, 2) Иегова оларны канчаптарын база 3) оларның орнун чүү солуптарын көөр бис.

БУЗУТТУГ КИЖИЛЕР

4. Бузуттуг кижилер чуртталгавысче кандыг салдар чедирип турарыл?

⁴ Бузуттуг кижилер чуртталгавысче кандыг салдар чедирип турарыл? Павел элчин «сөөлгү хүннерде аар-берге үе чедип кээрин» өттүр медеглээш, «бузуттуглар болгаш хуурмак хейлер багынга улам өнемчи[ир]» деп бижээн (2 Тим. 3:1—5, 13). Бо сөстерниң боттанып турарын эскерер-дир силер бе? Хөй кезиивис бузуттуг кижилерден — дүржок кижилерден азы каржы-хажагай кем-керек үүлгедикчилеринден — когарап чораан бис. Оларның чамдыызы килеңин ажыы-биле көргүзүп, а өскелери эки улус бооп, бужар херектерин бүдүү үүлгедип турар. Бис олардан хууда когараваан-даа болзувусса, олар дөмей-ле чуртталгавысче салдар чедирип турар. Бузуттуг улустуң чаш ажы-төлдү, кырган улусту болгаш камгаланыптар харыы чок кижилерни канчаар каржы аажылап турарын дыңнааш, сеткиливис аарыыр. Ындыг кижилерниң алдынып турары дерзии, араатанзыг, безин буктардан дөстелип үнген (Иак. 3:15). Эки чүүл, Иегованың Сөзүнден өөрүшкүлүг медээ биске эки хөөннүг болурунга дузалап турар.

5. а) Бузуттуг кижи бүрүзүнде кандыг арга бар? б) Өскерлир хөңнү чок бузуттуг улус-биле чүү болур?

⁵ Иегова оларны канчаптарыл? Иегова амгы үеде бузуттуг улуска өскерлип аар арганы берип турар (Иса. 55:7). Ол бо делегейни узуткаар деп шииткен-даа болза, тус-тузунда кижилерни амдыызында шиитпээн. А коргунчуг хилинчектиң кээринге чедир, бо делегейни деткиир, өскерлир хөңнү чок кижилер-биле чүү болур? Иегова бузуттуг кижилерни кезээ-мөңгеде узуткаарын аазап турар. (Ырлар 36:10 номчувут.) Бузуттуглар оларның-биле чүү-даа болбас деп бодап турар чадавас. Оларның хөй кезии каржы херектерин чажырып өөренип алган. Сактырга, олар үүлгедиглери дээш кеземче албайн турар ышкаш (Иов 21:7, 9). Ынчалза-даа Библияда мынча дээн: «Бурган кижиниң оруктарын хайгаарап, бүгү базымнарын көрүп турар. Бузуттуг-бак улус чаштына бээр хире дүмбей, муңгаш караңгы чер чок» (Иов 34:21, 22). Бургандан чаштынары болдунмас. Ону кым-даа мегелеп шыдавас. Бурганның көрбейн баары хире кандыг-даа караңгы дүмбей чер чок. Кижи бүрүзүнүң каржы херектерин Ол көрүп турар. Армагеддон соонда кайнаар-даа көргеш, чаңгыс-даа бузуттуг кижини көрбес бис. Олар шупту мөңгези-биле чиде бээр! (Ыд. ыр. 36:12—15).

6. Бузуттуг улусту узуткап кааптарга, черге кымнар артарыл? Ону чүге өөрүүр чылдагаан деп болурул?

⁶ Бузуттугларны узуткап кааптарга, черге кымнар артарыл? Иегова биске: «А биче сеткилдиг улус чер-чуртту салгап алгаш, чаагай чоруктуң элбээнге таалаар» — деп сагыш-сеткилди чылдып турар аазаашкынны берген. Ол-ла ырда улаштыр мынча дээн: «Чөптүг-шынныг улус чер-чуртту салгап алгаш, ону кезээ мөңгеде ээлеп чурттаар» (Ыд. ыр. 36:11, 29). «Биче сеткилдиг» болгаш «чөптүг-шынныг» улус дээрге кымнарыл? Биче сеткилдиг улус — Иегованың удуртулгазын болгаш сөзүн кичээнгейге ап турар улус-тур, а чөптүг-шынныг улус — Бурганга таарымчалыг чүүлдерни күзелдии-биле кылып турар улус-тур. Бөгүн бузуттугларның саны чөптүг-шынныг улустан ушчок хөй. Ынчалза-даа чаа делегейге биче сеткилдиг болгаш чөптүг-шынныг улустуң саны эвээш-даа, хөй-даа болбас, чүге дизе чер кырынга чүгле олар чурттаар. Ындыг улус аразынга чурттаары дыка-ла аянныг болур! Ол ёзулуг дываажаң болур.

КАРЖЫ-БАККА БОРАШКАН ОРГАНИЗАЦИЯЛАР

7. Каржы-бакка борашкан организациялар чуртталгавысче кандыг салдар чедирип турарыл?

⁷ Каржы-бакка борашкан организациялар чуртталгавысче кандыг салдар чедирип турарыл? Бо делегейде каржы херектерниң хөй кезиин кижилер эвес, а организациялар кылып турар. Чижээ, шажын организациялары Бурганның дугайында мегени тарадып, Библияга улустуң бүзүрелин чидирип, черниң болгаш кижи төрелгетенниң келир үезинге хамаарыштыр меге чүүл өөредип, миллион-миллион кижилерни дуурайлап турар. А дайыннар эгелеп, аңгы-аңгы язы-сөөк улус аразында чөрүлдээлер үндүрүп, ядыы, чединмес улусту кызып-кыйып, хээли ап азы ылгай көөр чорукту ажыглап, байып турар чазактарның дугайында чүнү чугаалап болур? Оон ыңай хөй акша сүрер дээш, агаар-бойдусту хирлендирип, ооң казымал-байлаан төтчеглеп турар корпорацияларның дугайында база чугаалап болур. Ооң түңнелинде каш борбак кижи кедергей бай-шыырак амыдырап турар, а миллион-миллион кижилер аштап-түреп чоруур. Делегейде бооп турар хилинчек дээш ындыг организациялар база буруулуг дээрзи чигзиниг чок.

8. Библияныы-биле алырга, кижилерге шимчеш дивес, быжыг шивээлерни сагындырар организациялар-биле чүү болурул?

⁸ Иегова оларны канчаптарыл? Библияда самыраан херээженни азы Өндүр улуг Вавилонну илередип турар шупту меге шажын организацияларынга удур политиктиг күштер үнүптерге, коргунчуг хилинчек эгелей бээр (Ажыд. 17:1, 2, 16; 18:1—4). Меге шажындан чүү-даа артпас. А өске бузуттуг организациялар-биле чүү болурул? Оларның хөй кезии кижилерге шимчеш дивес, быжыг шивээлерни сагындырар, ынчангаш оларны Библияда даглар биле ортулуктарга дөмейлээн. (Ажыдыышкын 6:14 номчувут.) Библияда чазактар болгаш оон хамааржып турар организациялар шуптузу узуткаттырар деп баш удур медеглээн. Бо эрги делегейниң чазактарын болгаш оларның-биле кады Бурганның Чагыргазынга удурланып турар шупту улусту узуткап кааптарга, коргунчуг хилинчек эчизинге чеде бээр (Иер. 25:31—33). Ооң соонда чер кырынга каржы-бакка борашкан чаңгыс-даа организация артпас.

9. Чаа ниитилелге корум-чурум тергиидээр деп чүге чигзинмес бис?

⁹ Оларның орнун чүү солуптар? Армагеддоннуң соонда чер кырынга оода чаңгыс организация артар бе? Библияда: «Бис Бурганның аазааны чаа дээр биле чаа черни манап турар бис. Аңаа улус чөптүг-шынныг амыдырал-биле амыдыраар» — дээн (2 Пет. 3:13). Эрги дээр биле чер, өскээр чугаалаарга, бузуттуг чазактар болгаш оларны деткип турар кижилер моон соңгаар турбас. Ынчаарга оларның орнун чүү солуптар? «Чаа дээр биле чаа чер». Ол дээрге чаа чазак биле аңаа чагыртыр кижи төрелгетенниң чаа ниитилели-дир. Ол чазактың чагырыкчылары Иисус Христостуң башкарылгазы-биле, корум-чурумнуң Бурганы болур, Иегованың шынарларын долузу-биле илередир (1 Кор. 14:33). Ынчап кээрге, чаа ниитилелге корум-чурум тергиидээр. Аңгы-аңгы айтырыгларны чөптүг-шынныг эр улус шиитпирлээр (Ыд. ыр. 44:17). Оларны Иисус Христос биле ооң 144000 кады чагырар башкарыкчылары удуртур. Бодап безин көрүңер даан, амгы үеде бар бузуттуг организацияларның орнунга чаңгыс чөптүг шынныг организация турар!

КАРЖЫ ХЕРЕКТЕР

10. Чурттап турар чериңерде кандыг каржы херектер нептерээнил? Силерге болгаш чоок улузуңарга ол кандыг салдар чедирип турарыл?

¹⁰ Каржы херектер чуртталгавысче кандыг салдар чедирип турар? Бис хоойлу-дүрүм сагывас, мегечи, самыыраан, дерзии чорук нептерээн делегейде чурттап турар бис. Ада-иелерге ылаңгыя берге, чүге дээрге олар ажы-төлүн бо хамык бузуттан камгалаар дээш, дыка хөй күш үндүрүп турар. Оюн-тоглаалар Иегованың эки-бакка хамаарыштыр негелделерин хажыдып, каржы херектерни бир-ле солун чүүл дег көргүзүп турар (Иса. 5:20). Ынчалза-даа шынчы христианнар ындыг көрүштү деткивейн турар. Иегованың негелделерин тоовас кижилер аразынга олар бар-ла шаа-биле Бурганга бердинген бооп артарын кызып турар.

11. Иегованың Содом биле Гоморраны узуткаанындан кандыг түңнел үндүрүп болур?

¹¹ Иегова кандыг хемчег алырыл? Бузуттуг чорук нептерээн Содом биле Гоморраны Бурган канчапканыл, көрээлиңер. (2 Пётр 2:6—8 номчувут.) Чөптүг-шынныг Лот улустуң хоойлу-дүрүм чок үүлгедиглерин көргеш, хинчектенип турган. Иегова ол черде шупту хоорайларны узуткааны-биле чүгле бузуттуг чорукту соксаткан эвес, а «келир үениң бачыттыг улузу-биле чүү болу берип боорун» көргүскен. Иегова удавас бо делегейни шиидип эгелээш, шак ынчаар бүгү бузуттуң когун үзер.

12. Черге дываажаңга чүнү кылыксаар-дыр силер?

¹² Каржы херектерниң орнун чүү солуптар? Черге дываажаңга солун чүүлдер эмгежок боор! Черни дываажаң кылдыр болбаазырадып, боттарывыска болгаш чоок улузувуска өөрүшкүлүү-биле бажың тудуп турарывысты сагыштаалап көрүңер даан. Чок болза сая-сая дирлип келген улус-биле таныжып-билчип, оларга Иегованың негелделерин болгаш Ооң кижилер-биле кандыг хамаарылгалыг турганын билип алырынга дузалап турарывысты бодап көрүңер (Иса. 65:21, 22; Аж.-ч. 24:15). Кижи бүрүзү Иегованы алдаржыдар база бодунга улуг өөрүшкү эккээр хөй ажыл-херектерни кылыр.

ААРЫШКЫ, ӨЛҮМ БОЛГАШ ХИЛИНЧЕК

13. Эрликтиң, Ада́м биле Еваның үймээни кандыг коргунчуг уржуктарга чедиргенил?

¹³ Аарышкы, өлүм болгаш хилинчек биске кандыг салдар чедирип турарыл? Бузуттуг кижилер болгаш организациялар бүдүн черде хора чедирип турар. Түңнелинде чер болганда аарышкы, өлүм болгаш хилинчек бооп турар. Бистиң кайы-бирээвис дайын, аш-чут, аарыг-аржык, язы-сөөк ылгаар чорук, өлүм-чидим меңээ хора чедирбеди деп чугаалап шыдаар бе? Бо бүгү биске дөмей-ле салдарны чедирген. Чер кырында мындыг коргунчуг байдал — Эрликтиң, Ада́м биле Еваның Иеговага удур үндүрген үймээниниң уржуктары-дыр. Оларның үймээниниң уржуктарын кижи бүрүзү бодунга көрүп чоруур.

14. Аарышкы, өлүм болгаш хилинчек-биле чүү болур?

¹⁴ Иегова кандыг хемчег алырыл? Чижээ, Иегова дайыннарны соксадырын аазаап турар. (Ырлар 45:9, 10 номчувут.) Аарыг-аржык-биле чүү болур? Олар моон соңгаар турбас (Иса. 33:24). Иегова өлүмнү канчаптарыл? Өлүмнү Ол кезээ-мөңгеде чок кылып каар (Иса. 25:8). Ол ышкаш ядыы-түреңги чорук база турбас (Ыд. ыр. 71:12—16). Чуртталгавысты баксырадып, аарышкы болгаш хилинчек чедирип турар бүгү чүвени Бурган чок кылып каар. Иегованың ачызында бо делегейниң багай хөөнү биске моон соңгаар салдар чедирип шыдавас боор. Эрликтиң болгаш ооң буктарының салдары ис чок чиде бээр (Эф. 2:2).

15. Армагеддон соонда чүү чиде бээр?

¹⁵ Дайыннар, аарыг-аржык болгаш өлүм чок делегейни сагыштаалап көрүңер даан. Шериглер, дайынчы корабльдар болгаш хыдыкчы самолёттар чок. Ок-чепсек-даа, дайыннарны сагындырып турар тураскаалдар-даа турбас. Эмнелгелер-даа, эмчилер-даа, медицина камгаладылгазы-даа, моргтар-даа, хөөрлер-даа чок болур. Кем-херек үүлгедиишкиннери болбас болгаш, шагдаалар-даа, сигнализациялар-даа турбас. Ол хамаанчок шооча, дүлгүүрлер безин чок болур чадавас. Дүвүренчиг бодалдар болгаш сагышсыралдар чуртталгавысты моон соңгаар караңгылатпас.

16, 17. а) Армагедонну ажып эртиптер улус чүнү миннирил? Чижектен чугаалаңар. б) Чүнүң ачызында бо делегейниң узуткаашкынының үезинде камгалалдыг артарывыска чигзинмейн барып болур бис?

¹⁶ Шупту багай чүве эртип каарга, чуртталга канчаар өскерли бээрил? Шупту чүве ындыг апаар деп бүзүрээри белен эвес бооп болур. Бис бо делегейде үр чурттап турар болгаш, долгандыр болуп турар багай чүүлдерге чаңчыгып калган чадавас бис. Чижээ, демир-орук станциязының чанында чурттап турар кижи поездилерниң даажын чоорту эскербестеп каар. Азы хоорайның бок төгер чериниң чанында чурттап турар кижи ооң бак чыдынга чоорту өөренип каар. Бис ындыг улуска дөмей апарган бис. Ынчалза-даа чуртталгавысты хораннап турар чүүлдерниң шуптузун ап кааптар болза, дыка-ла хостуг, чиик апаар ийик!

¹⁷ Ырлар 36:11-де: «А биче сеткилдиг улус чер-чуртту салгап алгаш, чаагай чоруктуң элбээнге таалаар» — дээн. Кандыг кончуг аянныг чоор! Бурган шак ындыг чуртталганы кижи бүрүзүнге күзеп турар. Ынчангаш бо сөөлгү аар-берге хүннерде Иегова-биле чоок хамаарылгаңарны кадагалаар дээш база Ооң организациязын кагбас дээш, бар-ла шааңар-биле шупту чүвени кылыңар. Идегелиңерни үнелеңер, ооң дугайында бодаңар, ол кезээде угааныңарга болгаш чүрээңерге чорзун. Арга тыптып кээрге-ле, идегелиңерниң дугайында өске улуска чугаалап чоруңар (1 Тим. 4:15, 16; 1 Пет. 3:15). Ооң ачызында бо делегейниң узуткаашкынының үезинде камгалалдыг артарыңарга чигзинмейн барып болур силер. Ынчан черге дываажаңга кезээ-мөңгеде сеткил ханып чурттаар силер!