Бодун туттунуп билири. Иегованың ээ көрүүшкүнүн ол чокка чедип алыры болдунмас

«Бир катап төрелим оол мээң-биле маргыжа берген. Ынчан ону сегирип алгаш, боостаалап эгелээн мен. Ону өлүрүксеп турган мен» (Пол).

«Бажыңга бичии-ле чүүл дээш, дораан хорадай бээр турган мен. Холумга чүү туттунар болдур — уругларымның ойнаарактарын, эт-септи — шуптузун буза шавар турган мен» (Марко).

Бис таанда кайыын ынчап баар бис, ынчалза-даа шуптувуска чамдыкта бодун туттунары берге. Ооң кол чылдагааны дээрге Ада́мдан, бир дугаар кижиден, салгап алган бачыдывыс-тыр (Рим. 5:12). Пол, Марко дээн ышкаш кылыктыг улуска бодун туттунары берге. А чамдык улуска боттарының дүвүрелдерин чагырары база шупту чүвени эки кылдыр көөрү берге. Өскелери эр-херээжен чорук дугайында сагыштан ыравас бодалдар-биле, арага ижиксээр азы наркотик тыртыксаар күзел-биле туржуп чоруур.

Бодун туттунуп билбес кижи чуртталгазын үреп ап болур. Ынчалза-даа ону болдурбас дизе, чүнү канчаар херек? «Сүлдениң үре-түңнели» болур шынарны, бодун туттунар чорукту, сайзырадыр болза эки (Гал. 5:22, 23). Аңаа хамаарыштыр үш айтырыгны сайгарыптаалыңар: 1) бодун туттунуп билир чорук дээрге чүл ол? 2) Ол чүге дыка чугула? 3) Ол шынарны канчаар сайзырадырыл? Бодун туттунары биске берге апарза, чүнү канчаарын база сайгарар бис.

БОДУН ТУТТУНУП БИЛИР ЧОРУК ДЕП ЧҮЛ ОЛ?

Бодун туттунуп билир кижи тывылган-на күзээшкининге белен алыспас. Ол Бурганны хомудадыпкы дег чүнү-даа чугаалавас база кылбас.

Иисус — бодун туттунуп билир чоруктуң кайгамчык үлегери-дир. Библияда: «Христосту дорамчылап турда, Ол дорамчылал-биле харыылаваан. Хилинчек көрүп тургаш, Ол кымга-даа кыжанмаан, а чөптүг Шииткекчиге бүрүнү-биле ынанган» — дээн (1 Пет. 2:23). Иисус шак ындыг туттунуп билир чорукту дайзыннары ону хилинчек чагызынга азып кааш, кочулап турда көргүскен (Мф. 27:39—44). Ооң мурнунда шажын башкарыкчылары Иисусту бодунуң-на «сөзүнге сылдаглап, канчап тудуп алырын дугуржуп» алырга, ол оларның-биле маргышпаан (Мф. 22:15—22). А кажан иудейлер килеңнээнинден Иисусту даштар-биле согар деп турда, ол удур харыылавайн, «ажытталы бергеш, Бурганның өргээзинден үнүп чоруй барган» (Ин. 8:57—59). Иисус бодун туттунарынга хамаарыштыр кайгамчык үлегерни көргүскен!

Бис база Иисус ышкаш, алдынып шыдаар бис бе? Ийе. Пётр элчин: «Христос Боду силер дээш хилинчек көрген база Ооң изин истезиннер дээш, үлегерин силерге арттырып каан» — деп бижээн (1 Пет. 2:21). Бачыттыг-даа болзувусса, Христостуң изин истеп, бодувусту туттунарын кызып чоруур бис. Ол шынар чүге чугула?

БОДУН ТУТТУНУП БИЛИРИ ЧҮГЕ ЧУГУЛА?

Бодун туттунуп билбес болза, Иегованың ээ көрүүшкүнүн чедип алыры болдунмас. Бурганга хөй чыл ишти бараалгап турар-даа болзувусса, чүнү чугаалап, канчаар алдынып турарывысты кичээнгейге албас болзувусса, Ооң-биле найыралывысты чидирип ап болур бис.

Моисей «чер кырында кижи төрелгетенниң иштинде эң биче сеткилдиг кижи турган» (Сан. 12:3). Ол он-он чылдар дургузунда израильчилерниң хомудалдарын шыдамыккай дыңнап келген. Ынчалза-даа бир катап ол бодун туттунуп шыдавайн барган. Израильчилер ижер суг четпес дээш база катап хорадап эгелээрге, Моисей ажына берген. Ол оларга: «Үймээнчи улус, дыңнаңар, бо чалымдан силерге сугдан аксып берээли бе?» — деп хорадап чугаалаан (Сан. 20:2—11).

Моисей туттунуп чадап каан. Иегова хаядан сугну бээрге, ол Ону алдаржытпаан (Ыд. ыр. 105:32, 33). Иегова ол дээш Моисейни Аазаттынган черже киирбээн (Сан. 20:12). Ынчан ол туттунуп шыдавааны дээш, чуртталгазының төнчүзүнге чедир хараадаан чадавас (Ы. х. к. 3:23—27).

Оон чүнү өөренип ап болур бис? Алыс шынны шагда-ла билир-даа болзувусса, бодун шын эвес алдынып азы бисти бужургандырар улус-биле кажан-даа хүндүткел чок чугаалашпас ужурлуг бис (Эф. 4:32; Кол. 3:12). Назылап улгадырга, бодун туттунары берге бооп болур. Ындыг-даа болза, Моисейниң чижээн кезээде сактып чоруулуңар. Туттунуп шыдавайн барганывыс дээш, Иеговага шынчы бараалгап чораан чылдарывыстың хилис баарын күзевес бис. Ол чугула шынарны канчаар сайзырадырыл?

БОДУН ТУТТУНУП БИЛИР ЧОРУКТУ КАНЧААР САЙЗЫРАДЫРЫЛ?

Бургандан ыдыктыг сүлдени дилеңер. Чүге? Бодун туттунуп билир чорук — Бурганның ыдыктыг сүлдезиниң үре-түңнелиниң бир кезии-дир. Иеговадан ыдыктыг сүлдени дилээр болзувусса, Ол биске ону бээр (Лк. 11:13). Иегова бодувусту туттунарынга херек күштү ыдыктыг сүлдезин таварыштыр берип болур (Флп. 4:13). Оон аңгыда Бурган биске ыдыктыг сүлдениң үре-түңнелиниң өске-даа шынарларын (чижээ, ынакшылды) сайзырадырынга дузалаар. Оларның ачызында биске туттунуп билири берге эвес боор (1 Кор. 13:5).

Туттунуп шыдавайн баар хире байдалдардан дезип чоруңар. Чижээ, мөзү-шынар чок чүүлге таваржы берип болур сайтыларже кирбеңер. Ол ышкаш Бурганның хөңнү чок чүүлдерин алдаржыткан оюн-тоглаага киришпеңер (Эф. 5:3, 4). Дорт чугаалаар болза, кижини шын эвес орукче чыгаптар шупту чүүлдерден дезип чоруңар (У. ч. 22:3; 1 Кор. 6:12). Чижээ, самыыралга белен алзыптар кижи ынакшыл дугайында фильмнерни көрбес база номнарны номчувас деп шиитпирлеп болур.

Ол сүмени эдерери берге чадавас. Ынчалза-даа бар шаавыс-биле кызар болзувусса, бодувусту туттунарынга херек күштү Иегова бээр (2 Пет. 1:5—8). Ол бодалдарывысты, сөстеривисти, кылдыныгларывысты тудуп өөрениринге дузалаар. Кырында чугаалашканывыс Пол болгаш Марко-биле шак ындыг болган. Олар килеңин чавырып өөренип алган. Ам өске акывыстың чижээн көрээлиңер. Ол машина мунуп чорааш, бо-ла хорадап үнер, безин өске чолаачылар-биле алгыжа бээр турган. Ол чүнү канчалган? Акывыс үлешкен: «Хүннүң-не кызып мөргүп турган мен. Бодун канчаар туттунарын сайгарган статьяларны номчуп, аңаа хамаарышкан библейжи шүлүктерни доктаадып ап турган мен. Ам ол шынарны бир чыл ишти сайзырадып-даа турар болзумза, бодун туттунары кайы хире чугула дээрзин даң бажында-ла бодумга сагындырар-дыр мен. Оон ыңай орукка далашпас дээш, бажыңымдан эртежик үнерин кызар чордум».

ТУТТУНУП ШЫДАВАЙН БАРЗА, КАНЧААР?

Чамдыкта туттунуп шыдавайн баар бис. Ындыг үеде Иеговага мөргүүрү ыянчыг бооп болур. Ынчалза-даа шак ол үеде биске мөргүл чүден артык чугула. Ынчангаш Иеговага дүрген-не мөргүңер. Бургандан дузаны болгаш өршээлди чаннып дилеп, ол частырыгны кажан-даа катаптавас дээш хөөнненип алыңар (Ыд. ыр. 50:11—13). Иегова силерни дыңнавайн баар деп бодаваңар (Ыд. ыр. 101:18). Иоанн элчин Бурганның Оглунуң «төккен ханы бисти кандыг-даа бачыттан арыглаар» деп биске сагындырып турар (1 Ин. 1:7; 2:1; Ыд. ыр. 85:5). Өскелер бистерге удур каш-даа катап бачыт үүлгетсе, Иегова оларны өршээринче деткип турар. Ынчан Бурган база бисти өршээр (Мф. 18:21, 22; Кол. 3:13).

Моисей бодун туттунуп шыдавайн баарга, Иегова аажок муңгараан. Ынчалза-даа Ол ону өршээпкен. Библияда Моисейни кайгамчык улуг бүзүрелдиг кижи деп адаан (Ы. х. к. 34:10—11; Евр. 11:24—28). Частырыы дээш Моисей Аазаттынган черже кирбээн-даа болза, Иегова ону черге дываажаңга диргискеш, мөңге амыдыралды хайырлаар. Ынчангаш бодун туттунуп билир чорукту улаштыр сайзырадыр болзувусса, бисти база шак ындыг келир үе манаар! (1 Кор. 9:25).