Чыыш Библия өөренип турар кижиге канчаар дузалап болур?

1, 2. Библия өөренип турар кижиге сугга суктуруп алырынга кым дузалап болур?

«БИБЛИЯНЫ өөренири меңээ солун турган. Алыс шын ында деп билип турган мен. Ынчалза-даа чүгле чыышта акы-угбалар-биле аралажып эгелээш, чуртталгам өскертип, сугга суктуруп алган мен» — деп, Фиджиден Эми үлешкен. Библия өөренип турар кижиге чыышта акы-угбалар дузалаар болза, ооң Бурган-биле найыралы быжыгар деп Эминиң сөстеринден көскү.

² Суртаалчы кижи бүрүзү чыыштың өзүлдезинге үлүг-хуузун киирип болур (Эф. 4:16). Вануатада чурттап чоруур Лейлани дээр доктаамал эгелекчи угбавыс мынчаар үлешкен: «Төлдү бүдүн суур өстүрер деп чугааны Библия өөренип турар улуска база хамаарыштырып болур деп бодаар мен. Алыс шынның оруунга туруп алырынга кижиге колдуунда чыыш дузалаар». Төлдү ада-иези, чоок төрелдери, өг-бүлениң эш-өөрү база башкылары кижизидип турар. Олар төлдү өөредип, сорулгаларын чедип алырынга дузалап турар. Суртаалчы кижи бүрүзү Библия өөренип турар кижиге сүмени кадып, ону сорук киирип, аңаа эки үлегер бооп болур. Оларның деткимчези аңаа сугга суктуруп алырынга дузалап турар (У. ч. 15:22).

3. Ана, Дорин болгаш Лейланиниң сөстери силерни чүү чүвеге өөредип турар?

³ Библейжи кичээлдер эрттирип турар суртаалчыга чыышта акы-угбаларның дузазы дыка херек. Молдовадан тускай эгелекчи Ана мынча дээн: «Өөреникчиниң бүзүрелин быжыктырарынга дыка хөй күжениишкиннер херек, чаңгыс кижи ону кылып шыдавас». Ооң сөстери-биле Молдовадан тускай эгелекчи Дорин база чөпшээрежип турар: «Мээң угаанымга кирбес бодалды акы-угбалар өөреникчимниң чүрээнге чедир чугаалаптар чорду». А Лейлани: «Ха-дуңмавыстың Библия өөренип турар кижиге ынакшылы болгаш сагыш човангыры бисти, шынап-ла, Иегованың чону деп көргүзүп турар» — дээн (Ин. 13:35).

4. Бо статьяга чүнү сайгарар бис?

⁴ Ынчалза-даа силерге мындыг айтырыг тургустунуп болур: «Акы-угбаларның өөредип турар улузунга канчаар дузалап болур мен?» Ынчангаш бо айтырыгларны сайгарыптаалыңар: силерни библейжи кичээлче чалаарга база өөреникчи чыыштарже барып эгелээрге, чүнү канчап болур силер? удуртукчулар өөренип турар улустуң бүзүрелин быжыктырарынга база сугга суктуруп алырынга канчаар дузалап болур?

БИБЛЕЙЖИ КИЧЭЭЛГЕ

5. Силерни библейжи кичээлче чалаар болза, чүнү канчап болур силер?

⁵ Өөренип турар кижиге Бурганның Сөзүн эки билип алырынга дузалаар кол харыысалга — ону өөредип турар кижиде. Бир эвес ол силерни библейжи кичээлче чалаар болза, аңаа дузалаар болзуңарза эки (Эккл. 4:9, 10). Ону канчаар кылып болур?

6. Силерни библейжи кичээлче чалаар болза, Чугаалар 20:18-те дүрүмнү канчаар ажыглап болур силер?

⁶ Библейжи кичээлге эки белеткенип алыңар. Баштай библейжи кичээл эрттирип турар суртаалчыдан бо айтырыгларның харыызын билип алыңар: «Кымны өөредир бис? Кандыг теманы сайгарар силер? Өөреникчиңге бо темадан чүнү өөредип алыксап тур сен? Чүнүң дугайында чугаалажып болур база чүнү айтырбас болза эки? Өөреникчиңниң бүзүрелин быжыктырарынга канчаар дузалап болур мен?» (Номчуптуңар: Чугаалар 20:18.) Чугаажок, библейжи кичээл эрттирип турар кижи өөреникчизиниң хууда чуртталгазын чугаалавас боор. Ынчалза-даа ооң чугаалаан чүүлү силерге белеткенип алырынга дузалаар. Бо арганы ажыглап турар Джой дээр миссионер угбавыс: «Баш удур сайгарып алырга, чалап алган угбам азы акым өөреникчимни эки бодап билип, чүнү чугаалаарын билир боор» — дээн.

7. Библейжи кичээлче силерни чалаан болза, аңаа белеткенип алыры чүге чугула?

⁷ Силерни библейжи кичээлче чалаан болза, сайгарар материалды эки белеткеп алыңар (Эзра 7:10). Дорин мынча дээн: «Библейжи кичээлче чалап алган акым азы угбам белеткенип алырга, дыка өөрүүр мен. Ол меңээ дыка улуг дуза-дыр». Ол ышкаш силерниң ийилдириңерниң белеткенип алганыңарны өөреникчи эскерип каар чадавас. Шак ынчаар аңаа эки үлегер көргүзер силер. Бир эвес материалды эки сайгарып алыр үеңер чок болза, оода кичээлдиң кол бодалдары-биле таныжып алыңар.

8. Библейжи кичээлдерге мөргүлдериңер чүнүң ачызында тода болур?

⁸ Мөргүл — библейжи кичээлдиң чугула кезээ болганда, силерни мөргүүрүн дилеп болур. Ынчангаш чүнү чугаалаарын эрте дээре боданып алыңар. Ынчан мөргүлүңер өөреникчиге ажыктыг боор (Ыд. ыр. 140:2). Япониядан Ханаэ ооң кичээлинге кээп турган угбавыстың мөргүлдерин ам-даа сактып чоруур. «Угбавыстың мөргүлүнден ол Иегованың чоок өңнүү деп көскү турган. Оон мен база Бурган-биле ындыг чоок хамаарылгалыг болуксай берген мен. Мээң адымны мөргүлдерге адаарга, меңээ ынак деп миннип турган мен» — деп, ол үлешкен.

9. Библейжи кичээл эрттирип турар кижини деткииринге Иаков 1:19-та сүме силерге канчаар дузалаар?

⁹ Библейжи кичээл эрттирип турар кижини деткиңер. Нигериядан Омамуйови дээр тускай эгелекчи мынча дээн: «Эки дузалакчы темадан өскээр чардыкпас боор. Ол библейжи кичээлди эрттирбейн турар мен деп билип, артык чүве чугаалавас». Ынчаарга кажан база чүнү чугаалаарын кайыын билип алырыл? (У. ч. 25:11). Кичээл эрттирип турар кижини база өөреникчини эки дыңнаар болзуңарза, херек бодалды үезинде чугаалаар силер. (Номчуптуңар: Иаков 1:19.) Аңаа бодамчалыг чорук херек. Силер библейжи кичээл эрттирип турар кижини үзе кирип, хөй чүве чугаалап азы өске теманы кайыын-на көдүрүп туруп бээр силер. Ынчалза-даа бир кыска бодалды азы чижекти чугаалап, чок болза, өөреникчи бир бодалды билип алзын дээш, айтырыг салып болур силер. Чамдыкта библейжи кичээл үезинде ажыыңар чок ышкаш сагындырып болур. Ынчаар боданыры шын эвес. Чүге дизе силер өөреникчини мактап, аңаа кичээнгей көргүзер болзуңарза, ооң бүзүрели быжыгар.

10. Бодуңарның дугайында чугаалап тургаш, өөреникчиге канчаар дузалап болур силер?

¹⁰ Бодуңарның дугайында чугаалаңар. Болдунар болза, өөреникчиге алыс шынны канчаар билип алганыңарны, кандыг бергелерге таварышканыңарны азы Иегованың силерге канчаар дузалаанын кысказы-биле чугаалап болур силер (Ыд. ыр. 77:4, 7). Канчап билир, силерниң чугааңар өөреникчиге ажыктыг бооп, ооң бүзүрелин быжыктырып, сугга суктурарынче оттурар чадавас. Азы ол бергелерни канчаар ажып эртерин билип алыр (1 Пет. 5:9). Бразилиядан доктаамал эгелекчи Габриел мынча дээн: «Акы-угбалар боттарының дугайында чугаалаарга, Иегова бистиң кандыг бергелерге таваржып турарывысты көрүп турар деп билип каан мен. Олар бергелерни ажып эртипкен болганда, мен база шыдаар мен».

ЧЫЫШКА

11, 12. Чыышка келген өөреникчилерни чүге чылыг-чымчак хүлээр ужурлуг бис?

¹¹ Өөреникчи кижи Бурган-биле найыралын быжыктырып, сугга суктуруп алыр дизе, чыыштарже баар ужурлуг (Евр. 10:24, 25). Ол чыышка бир дугаар кээрге, ооң улаштыр кээр күзели бар боор кылдыр, кижи бүрүзү үлүг-хуузун киирип болур. Канчаар?

¹² Өөреникчини чылыг-чымчак хүлээп алыңар (Рим. 15:7). Өөреникчи моон-даа соңгаар чыыштарже келиксээр кылдыр, ону өөрүшкүлүг уткуп, ооң-биле таныжып алыңар. Ынчалза-даа чугаалажып тургаш, ону эпчоксундуруптар айтырыгларны салбаңар. Өөреникчиниң дугайында чүгле ону өөредип турар кижи сагыш човаар ужурлуг деп бодаваңар. Чүге дизе ол Хурал залында ам-даа келбээн азы чыыштың бир-ле ажыл-херээн кылып турар чадавас. Ынчангаш өөреникчиге кичээнгейни көргүзүңер. Ооң кайы хире ажыктыын каш чыл бурунгаар сугга суктуруп алган хуралдың дузалакчызы Дмитрий мынчаар тайылбырлаан: «Хурал залының чанынга бир дугаар чедип келгеш, эпчоксунуп турумда, бир акый мени көрүп кааш, Хурал залынче чалаан. Ында акы-угбалар мээң-биле чылыг-чымчак мендилежип, хүлээп алган. Ону көргеш, аажок кайгаан мен! Безин ындыг чыыштар хүннүң-не болган болза деп бодап турган мен. Ооң мурнунда ындыг ынакшылды каяа-даа көрбээн мен».

13. Бистиң алдынып турарывыс өөреникчи кижиге кандыг салдарлыг боор?

¹³ Эки үлегерни көргүзүңер. Силерниң алдынып турарыңар өөреникчини алыс шынны тып алганынга бүзүредип болур (Мф. 5:16). Молдовада Виталий дээр доктаамал эгелекчи мынча дээн: «Акы-угбаларның бо делегейде улустан ылгалдыг кылдыр амыдырап, алдынып турарын көргеш, Бурганның чону ындыг болур ужурлуг деп билип каан мен».

14. Силерниң үлегериңер өөреникчиге бүзүрелин улаштыр быжыктырарынга канчаар дузалаар?

¹⁴ Өөреникчи сугга суктурар дизе, билип алган билиглерин амыдыралынга ажыглаар ужурлуг. Ону кылыры белен эвес. Ынчалза-даа библейжи дүрүмнерниң силерге кайы хире ажыктыын ол көргеш, боду база ажыглаксай бээр чадавас (1 Кор. 11:1). Мурнунда чугаалашканывыс Ханаэ үлешкен: «Мээң чаа-ла билип ап турган билиглеримни акы-угбалар амыдыралында ажыглап чоруур. Мен олардан бот-боттарывысты канчаар деткижерин, өршээрин, ынакшылды көргүзерин өөренип алган мен. Олар өскелерниң дугайында база чүгле экини чугаалаар. Оон мен олар ышкаш болуксай берген мен».

15. Чугаалар 27:17-ден алырга, өөреникчи чыышка кээрге, чүге ооң-биле чоок найыралдажып алыр болза эки?

¹⁵ Өөреникчи-биле найыралдажып алыңар. Ол чыышка кээрге-ле, аңаа кичээнгейни көргүзүңер (Флп. 2:4). Ооң-биле чоок найыралдажып алыр дээш, Библияны кайы хире өөренип турарын, өг-бүлезин база ажыл-агыйын сонуургап айтырыңар. Ынчалза-даа аңаа эпчок айтырыгларны салбаңар. Ол ышкаш ону кылган өскерлиишкиннери дээш мактаңар. Ооң-биле ынчаар чугаалажыр болзуңарза, чоок таныжып алыр силер. Бо бүгү аңаа бүзүрелин быжыктырып, сугга суктуруп алырынга дузалаар. (Номчуптуңар: Чугаалар 27:17.) Ханаэ ам доктаамал эгелекчи. Чыышка чаа-ла барып эгелээн үезин ол мынчаар сактып чугаалаар: «Чыыштан чаа эш-өөрлүг апаргаш, хуралдың боорун четтикпейн манап, шылап-даа тургаш, хуралче чедип кээр турган мен. Чаа эш-өөрүм-биле үе эрттирери дыка аянныг боорга, эрги эштерим-биле эдеришпейн барган мен. Иеговага болгаш акы-угбаларымга ынак апарган болгаш, сугга суктуруп алган мен».

16. Өөреникчи бодун чыыштың кежигүнү кылдыр минниринге оон ыңай канчаар дузалап болур?

¹⁶ Өөреникчи бүзүрелин быжыктырып, чуртталгазын өскертип турар болза, аңаа чыыштың кежигүнү кылдыр минниринге дузалаңар. Чижээ, ону бажыңыңарже чалаңар (Евр. 13:2). Молдовадан Денис мынча дээн: «Кадайым-биле Библияны өөренип эгелей бээривиске, акы-угбалар бисти кады дыштанырынче чалаар турган. Иегованың оларны канчаар деткип турганын чугаалаарга, сорук кирип турган бис. Оларның-биле чоок эдеришкеш, кайгамчык мөңге амыдыралды аазаан Иегова Бурганга бараалгаар күзеливис күштелген». А өөреникчи суртаалчы апаар болза, аңаа канчаар дузалап болур бис? Ону суртаалче чалаңар. Бразилиядан Диегу үлешкен: «Акылар мени суртаалче бо-ла алыр турган. Бот-боттарын эки билчип алыр оон өске арга-даа чок боор оң. Суртаал үезинде мен олардан дыка хөйнү өөренип, Иегова биле Иисуска оон-даа чоок апарган мен».

УДУРТУКЧУЛАРНЫҢ ДУЗАЗЫ

17. Удуртукчулар өөреникчилерге канчаар дузалап болур?

¹⁷ Өөреникчилерге үени үндүрүңер. Ынчаар кылыр болзуңарза, өөреникчиниң Бурган-биле хамаарылгазы быжыгып, безин сугга суктурар күзели тыптып кээр. Ол Хурал залынга кээрге, аңаа үени үндүрүп шыдаар силер бе? Ол чыышка харыылап эгелээн болза, аңаа өөрүнчүг боор кылдыр, ооң адын сактып алырын кызыңар. Ооң библейжи кичээлинче ажыл-херээңерни өскертип-даа тургаш, кызып барыңар. Нигериядан Джеки дээр эгелекчи угбавыс мынча дээн: «Библейжи кичээлче хуралдың удуртукчузун чалап алырымга, өөреникчилерим аажок кайгаар. Өг-бүлези-биле өөренип турар бир эр кижи мынча дээн: „Мээң пасторум көңгүс ындыг эвес. Ол чүгле акша төлеп бээр бай улусче баар“». Ам ол эр кижи чыыштарже барып эгелээн.

18. Ажыл-чорудулга 20:28-те сөстерни удуртукчулар канчаар ажыглап болур?

¹⁸ Библейжи кичээлдер эрттирип турар улусту өөредип, деткиңер. Удуртукчулар, силерде акы-угбаларны дуржулгалыг суртаалчылар болгаш башкылар кылдыр өөредир харыысалга бар. (Номчуптуңар: Ажыл-чорудулга 20:28.) Акы-угбалар силерниң мурнуңарга библейжи кичээл эрттиреринден ыядыр болза, эрттирип болуруңарны чугаалаңар. Джеки: «Удуртукчулар өөреникчилеримниң кайы хире чоруп турарын бо-ла айтырар. Олар меңээ библейжи кичээлди эрттиреринге дузалаар ажыктыг сүмелерни берип турар» — дээн. Удуртукчуларның кичээлдер эрттирип турар акы-угбаларга дузазы кедергей улуг (1 Фес. 5:11). Джеки уламчылаан: «Удуртукчулар мени деткип, күжениишкиннеримни үнелеп турарын чугаалаарга, меңээ дыка өөрүнчүг. Оларның мактал сөстери изиг хүнде соок суг ышкаш. Ооң ачызында өөреникчилер белеткээр күзелим күштелип, сорук кирер чордум» (У. ч. 25:25).

19. Бистиң кижи бүрүзү кандыг өөрүшкүнү миннип болур?

¹⁹ Библейжи кичээл эрттирбейн-даа турар болзувусса, өөренип турар улустуң бүзүрелин быжыктырып болур бис. Библейжи кичээл үезинде артык чүве чугаалавайн, чүгле ажыктыг бодалдар-биле үлежип, дузавыс кадар бис. Өөреникчи Хурал залынга кээрге, ооң-биле чоок таныжып ап, аңаа эки үлегерни көргүзээлиңер. Хуралдың удуртукчулары өөреникчиге үезин үндүрүп, кичээл эрттирип турар акы-угбаларны өөредип, мактап болур. Улус Иеговага ынак апарып, Аңаа бараалгап эгелээринге, бичии-даа бол, киирип турар үлүүвүс дээш аажок өөрүүр-дүр бис!