3 | Te bin kʼax ta skuxlejal te j-abatetik yuʼun Dios

TA BIBLIA YA JTATIK: Bayal ants winiketik te lek yoʼtanik te jich la yaʼiy sbaik-euk «te bin-utʼil ya kaʼiy jbatike» (Santiago 5:17).

Te bin ya skʼan ya yal

Te Biblia ya yalbey skʼoplal bayal ta tul ants winiketik te yanyantik te bin yaʼiyel la yaʼiy sbaike. Teme ya jkʼopontik te bintik kʼax ta stojolike, yaniwan jtatik jtuluk te jich la yaʼiy sba-euk te bitʼil ya kaʼiy jbatike.

¿Bin-utʼil ya skoltayotik?

Jpisiltik ya jkʼantik te yakuk xkʼot ta yoʼtanik te yantik te bin yaʼiyel ya kaʼiy jbatike. Kʼaxtoxan–a teme stsakojotik te chamel te ya yutsʼin jpensartik. Teme ya jkʼopontik te bin yaʼiyel la yaʼiy sbaik sok te bin kʼax ta stojolik te ants winiketik ta namey kʼinal, jichniwan ya kaʼiy jbatik-euk te bin-utʼil la yaʼiy sbaike. Jaʼ ini ya xjuʼ ya skoltayotik yuʼun ya jtatik ta ilel te ma jtukeltikuk te ya xkʼax jwokoltik ta skaj te ansiedad, te tulan mel-oʼtan sok te bintik ya xkʼopoj koʼtantik yuʼune.

Te Biblia ya scholbey skʼoplal chaʼoxtul winiketik te ma la snaʼik te bin la spasik sok te maʼyukix yip la yaʼiy sbaik. ¿Aybal jich anopoj: «Ma xjuʼix kuʼun, ya jkʼan ya xlajonix»? Jaʼ jich la yaʼiy sbaik te Moisés, te Elías sok te David (Números 11:14; 1 Reyes 19:4; Salmos 55:4).
Te Biblia ya yalbey skʼoplal ta swenta te Ana te kʼaxto la smel yoʼtan ta skaj te ma xjuʼ ya sta yale sok te ya xlabanot yuʼun te yan yinam te smamalale (1 Samuel 1:6, 10).
Ayniwan jich ya awaʼiy aba-euk te bin-utʼil la yaʼiy sba te Job, manchukme bayal schʼuunel yoʼtan, kʼax la smel yoʼtan sok jich la yal: «Ya quihlay te jcuxlejal, ma jcʼan ya xcuxajon spisil ora» (Job 7:16).

Spisil te ants winiketik ini, juʼ yuʼunik stsalel te bin ma lek ya xtal ta spensarik, jaʼnix jich ya xjuʼ kuʼuntik-euk teme ya jkʼayinbeytik te stalelike.

¿Bin-utʼil ya xkoltayot yuʼun te Biblia? Kevin

Te bin-utʼil ya yutsʼinon te trastorno Bipolar

«Te kʼalal ayix 50 kaʼbilal-ae, la stabonik jun chamel te trastorno bipolar sbiil (jaʼ jun chamel te ya yakʼ te oranax ya xjelon te bin yaʼiyel ya kaʼiy jbatike). Ay baeltik te ya kaʼiy te ya xjuʼ kuʼun spasel spisil te bintik ya jkʼan ta Balumilale. Pero ay baeltik ya kaʼiy te tojolnax te kuxulone».

Te bin-utʼil ya skoltayon te Biblia

«Jaʼ jich ya kaʼiy jba te bin-utʼil la yaʼiy sba te jpuk-kʼop Pedro. Ay baeltik te ma lek la yaʼiy sba yuʼun ta swenta te ay banti chʼaye. Pero ma jaʼuk bajt ta yoʼtan snopilanel-abi, la sle koltayel ta stojol te yamigotak te ya smel yoʼtanik ta stojole. Ta skaj te trastorno bipolar ay ma lekuk ya xkʼax kuʼun te jujun kʼajkʼale, ay baeltik te jaʼnax ya xbajt ta koʼtan snopilanel te banti ya xchʼayon te jich ya kaʼiy te maʼyuk jkʼoplale. Pero jich bin-utʼil te Pedro, kʼunkʼun la jnop te bin-utʼil ya xjuʼ ya skoltayonik te kamigotak ta yorail-abi, jaʼ ya skoltayonik yuʼun maba ya xchebaj koʼtan sok te ya jpasxan tulane.

»Jaʼnix jich ya jnop ta swenta te bin yaʼiyel la yaʼiy sba te Ajwalil David. Bayal buelta kʼaxto la smel yoʼtan yuʼun ta swenta te bin kʼax ta stojol sok ma lek la yaʼiy sba yuʼun ta skaj te banti chʼaye. Ay jich ya kaʼiy jba–euk, ay ma lek ya kaʼiy jba yuʼun te bin la jpas o te bin la kale. Jaʼ yuʼun ya yakʼbon smukʼul koʼtan te bin la stsʼibay te David ta Salmo 51. Ta versículo 3, jich la yal: «Como ya jnaʼ te cʼaxun-cʼop cuʼun, spisil ora ay ta jtojol te jmule». Jich ya kaʼiy jba te kʼalal ayon ta tulan mel-oʼtane, spisil-ora jaʼ ya xtal ta koʼtan te banti ya xchʼayone. Te kʼalal jich ya kaʼiy jbae, ya jnop ta koʼtan te bin la yal te David ta versículo 10: «¡Dios cuʼun, pasbon ta sac te coʼtane, achʼubtesbon coʼtan te stalel toj ay!». Jteb ma pajaluk sok te bin ya jkʼanbey te Diose, ya jkʼanbey te ayuk tseʼelil koʼtan. Ta slajibal, te versículo 17 ya yakʼbon bayal slamalil koʼtan. Jich ya yal: «Ma ba yac apʼaj, Dios cuʼun, te machʼa pichʼil yoʼtan soc te ya smel yoʼtan». Jujun buelta te ya jkʼopone ya xjul ta koʼtan te kʼuxon ta yoʼtan te Jehová.

»Ya stsakxan yip te smukʼul koʼtan kʼalal ya jnop ta swenta te ejemploetik ini sok te bin yakʼojbon te Diose. Te bitʼil jnaʼoj te smelelil te bintik jamal yaloj te Biblia ya skoltayon yuʼun ya xkujch kuʼun te jwokol sok te maba ya xchebaj koʼtane».