2 | «Te mukʼul oʼtanil ya yakʼ te Biblia»

TE BIBLIA JICH YA YAL: «Spisil te bin la yichʼ tsʼibayel jilel ta namey kʼinal, la yichʼ tsʼibayel swenta ay bin ya yakʼ jnoptik, ay bin ya jmaliytik ta skaj te ya xkujch kuʼuntik sok te smukʼul koʼtantik te ya yakʼbotik te sJun Diose» (ROMANOS 15:4).

Te bin ya skʼan ya yal

Te Biblia ya yakʼbotik smukʼul koʼtantik, ya skoltayotik yuʼun ya xkujch kuʼuntik sok ya yakʼbotik kiptik yuʼun ma jaʼuk ya xbajt ta koʼtantik snopel te bin ma xyakʼ smukʼul koʼtantik. Jaʼnix jich yaloj ta jamal te nopol ya xchʼay bael te bintik ya yakʼ jmel koʼtantike.

¿Bin-utʼil ya skoltayotik?

Stalelnanix-a te ay baeltik ya jmel koʼtantike, pero te machʼatik tsakbilik ta tulan mel-oʼtan o ansiedad jichniwan ya yaʼiy sbaik ta jujun kʼajkʼal. ¿Bin-utʼil ya xjuʼ ya xkoltayotik yuʼun te Bibliae?

Te Biblia bayal bin ya yakʼ ta nopel te lek kaʼiy jbatik yuʼune (Filipenses 4:8). Ta swenta-abi ya xjuʼ ya skoltayotik ta stael lamalkʼinal sok ya skoltayotik ta skomel te bin yaʼiyel ya kaʼiy jbatike (Salmo 94:18, 19).
Te Biblia ya skoltayotik te kʼalal ya xtal ta koʼtantik te maʼyuk jkʼoplaltike (Lucas 12:6, 7).
Bayal ejemploetik ta Biblia te ya skoltayotik ta snaʼel te maba jtukel ayotik sok te ya xkʼot ta yoʼtan ta lek te Dios te bin yaʼiyel ya kaʼiy jbatik (Salmo 34:18; 1 Juan 3:19, 20).
Te Diose yaloj ta jamal ta Biblia te maba ya xtalix ta koʼtantik te bin ya yakʼ jwokoltike (Isaías 65:17; Apocalipsis 21:4). Teme yakotik ta sitintayel jun wokolil te ya yutsʼin jpensartik sok te ya yakʼ jmel koʼtantike, te bin yaloj ta jamal te Diose ya xjuʼ ya yakʼbotik kiptik yuʼun ya xkujch kuʼuntik.

¿Bin-utʼil ya xkoltayot yuʼun te Biblia? Jessica

Te bin-utʼil ya yutsʼinon te tulan mel-oʼtan

«Te kʼalal 25 kaʼbilal-a, ay bin kʼax ta jtojol te la yutsʼinbon te jpensar sok la staik ta ilel te doctoretik te kichʼoj tulan mel-oʼtan. Ta repentenax ya xtal ta koʼtan te wokolil kʼax ta jtojol sok bayal ya yutsʼinon. Te doctoretik la scholbonik kaʼiy te ta skaj te ay bintik ma lek kʼax ta jtojol ay bin ma lek ya xtal ta jpensar yuʼun. Ta swenta-abi la stsakon tulan mel-oʼtan. La skʼan la kichʼ jun tratamiento sok te ya xkʼopojon sok jtul doctor te jaʼ especialista, te ya skoltayon ta snaʼel sok ta skomel te bintik ma lek ya xtal ta jpensar te bayal ya yutsʼinone».

Te bin-utʼil ya skoltayon te Biblia

«Te kʼalal ya xbatsʼej te tulan mel-oʼtane, ya yakʼbon xiwel, ma jnaʼ bin ya jpas sok ma x-och jwayel. Ta jujun ajkʼabal ma jnaʼix bin ya jpas yuʼun ta skaj te ma xjuʼ kuʼun skomel te ay bayal bintik ma lek ya xtal ta jpensare. Pero jich bitʼil ya yal te Salmo 94:19, te Dios ya yakʼbotik smukʼul koʼtantik sok slamalil koʼtantik te kʼalal ay bintik ya xkʼopoj koʼtantik yuʼun. Jich yuʼun ta stsʼeel te jwayib la kakʼ jpajk jBiblia sok chʼin libreta te banti jtsʼibayoj te textoetik yuʼun Biblia te ya yakʼbon smukʼul koʼtan. Jich yuʼun te kʼalal maba ya x-och jwayel-a jaʼ ya yakʼbon smukʼul koʼtan te sKʼop te Diose.

»Te Biblia ya stijbotik koʼtantik ta spʼajel spisil te bintik ya xtal ta jpensartik te ma pajaluk sok te bin ya snop te Diose. Ta sjajchibal ya jnop-a te maʼyuk jkʼoplal sok te ma snujpʼuk te ay machʼa ya yakʼbon kil skʼuxul yoʼtane. Pero la jta ta ilel te ma jichuk ya yakʼ ta nopel te Bibliae, melel te Diose jaʼ jich kʼoem te bitʼil jtul Tatil te ay skʼuxul yoʼtan, te ya snaʼ yoʼbolil jbatik sok te ya smel yoʼtan ta jtojoltike. Kʼunkʼun juʼ kuʼun skomel te bintik ma lek ya xtal ta jpensare. Jich jajch kil jba te bin-utʼil ya yilon te Diose. Jaʼ-abi jaʼ skoltayojon yuʼun maba ya jnop te maʼyuk jkʼoplal ta oʼtanile.

»Koʼtanukix te ya xkʼot yorail te maʼyuk bin ya xtalix ta jpensartik te ya yutsʼinotike. Jnaʼoj te ya xlaj skʼoplal ta pajel chaʼbej te chamel ini, jaʼ-abi ya yakʼbon kip yuʼun ya jmulanxan te jkuxlejal jaʼto te kʼalal ya sta yorail te ya xlaj skʼoplal te tulan mel-oʼtane».