¿Kʼusi oy ta yoʼonton Dios ta jtojolaltik?
LI TA periodiko, ta television, ta radio xchiʼuk ta internete nopolik noʼox chkaʼibetik skʼoplal majbail, paskʼop xchiʼuk terrorismo. Yikʼaluk van yakal chavil avokol ta skoj chamel o ti cham junuk avutsʼ avalale.
Xi xajakʼbe abae:
¿Mi jaʼ li kʼusi tskʼan Dios ta jtojolal xchiʼuk ta stojolal li kutsʼ kalale?
¿Bu xuʼ jta koltael sventa xkuch kuʼun li jvokole?
¿Mi chkʼot van skʼakʼalil ti oy jun oʼontonal ta balumile?
Tspat koʼontontik li kʼusi tstakʼbutik li Vivliae.
LI VIVLIAE CHCHANUBTASVAN LI KʼUSITIK LABAL SBA TSPAS DIOS TA STOJOLAL LI KRIXCHANOETIKE
Muʼyuk xa buchʼu kʼusi kʼux chaʼi, muʼyuk xa buchʼu chyijub mi jaʼuk chcham (Apokalipsis 21:4).
«Ta xpʼitomajik kʼuchaʼal teʼtikalchij li koxoetike» (Isaias 35:6).
«Chjam satik li maʼsatetike» (Isaias 35:5).
Chchaʼkuxiik li buchʼutik chamemike (Juan 5:28, 29).
«Mi junuk jnaklej ta balumil xi chale: ‹Toj ipun›» (Isaias 33:24).
«Ch-ayan ep kʼusitik stakʼ lajesel li ta balumile» (Salmo 72:16).
XUʼ TSKOLTAOT LI VIVLIAE
Yikʼaluk van chanop ti mu meleluk li kʼusi laj xa achan li ta slikebaltik livro liʼe. Pe li Diose yaloj ta jamal ti poʼot tsjel li kʼusitik oy ta balumile, li Vivliae chalbutik kʼu yelan tspas.
Li Vivlia xtoke chalbutik kʼuxi xuʼ xijmuyubajutik li avie. Nopo ta sventa li kʼusi chavat-o avoʼontone. Yikʼaluk van yakal chavil avokol ta avutsʼ avalal, ta takʼin, ta chamel o ta skoj ti cham avutsʼ avalale. Li Vivliae xuʼ tskoltaot sventa xkuch avuʼun li vokoliletik taje. Jech xtok, tspat avoʼonton kʼalal tstakʼ li sjakʼobiltak liʼe:
¿Kʼu yuʼun chkil jvokoltik?
¿Kʼuxi xuʼ xkuch kuʼuntik li jvokoltike?
¿Kʼuxi xuʼ xmuyubaj li kutsʼ kalaltike?
¿Kʼusi chkʼot ta jtojolaltik kʼalal chijchame?
¿Mi ta jchaʼkʼeltik li buchʼutik chamem kuʼuntike?
¿Kʼu yuʼun xuʼ jchʼuntik ti chkʼot ta pasel skotol li kʼusi yaloj tspas Diose?
Mi yakal chachan li livro liʼe, jaʼ svinajeb ti chakʼan chavaʼibe smelolal kʼusi chchanubtasvan li Vivliae. Jaʼ tskoltaot li livro liʼe. Ta jujun parafoe oy sjakʼobil ti tskoltaot ta yaʼibel smelolal li Vivliae. Ta smiyonal krixchanoetik tskʼupinik xchiʼinel ta loʼil stestigotak Jeova ta sventa li Vivliae. Toj lek mi jech oy ta avoʼonton eke. Akʼo skoltaot Jeova ti jech chavakʼ avipal ta yaʼibel smelolal kʼusi chchanubtasvan li Vivliae.