Slikeb loʼil

Li livro Tekstoetik ti tskoltautike jaʼ sventa jtatik ta anil tekstoetik ti tskoltautik kʼalal oy kʼusi ta jnuptan ta jkuxlejaltike. Jech xtok, jaʼ tskoltautik sventa jtatik tekstoetik yoʼ jpatbetik yoʼonton yantik xchiʼuk jkoltatik sventa lekuk kʼusi xkʼot ta nopel yuʼunik ti jaʼuk jech xichʼik ta mukʼ li Jeovae. Jaʼ noʼox saʼo ti bu chakʼan chanabe smelolale, vaʼun te chatabe sjakʼobiltak xchiʼuk te chchapbe smelolal junantik loʼiletik ta Vivlia (kʼelo li rekuadro «Kʼuxi ta tunesel li vun liʼe»). Te chata tekstoetik ti tspat koʼontontike xchiʼuk tojobtaseletik ti te lokʼem talel ta Skʼop Diose. Jech xtok, te chata beiltaseletik ta Vivlia ti jtunel avuʼune xchiʼuk ti xuʼ xakolta-o yantike.

Kʼuxi ta tunesel li vun liʼe

Sventa xata li kʼusi chakʼan chasaʼe, tsʼibao li ta saʼobil o li ta lupae. O mi moʼoje, tʼujo ti bu chakʼan chanabe skʼoplale. Li ta livro liʼe, yichʼoj pasel ta vukvokʼ: Kʼopetik, Kʼusitik chichʼ pasel, Tsobobbail, Jkuxlejaltik, Utsʼ alalil, Kʼusitik ta mantal xchiʼuk Jtalelaltik. Xuʼ van te xata li kʼusi yakal chasaʼe. Mi la anetʼ junuk li ta svukvokʼale, ep me kʼusitik te cholol chlokʼ talel. Tʼujo ti bu junukal chakʼan chachane. Mi mu xanaʼ bu junukal oy li ta svukvokʼale, netʼo ti bu chal Skotol, vaʼun te chchol talel skotol li kʼusitik yichʼoj tale. Li ta jujun temae, oy yichʼoj subtituloetik ti lek ikʼ tsʼibabile, jlome ta sjakʼobil, jlome maʼuk. Laje, saʼo li tekstoetik ti te tsʼibabil ta yolon ti lek ikʼ tsʼibabil eke, vaʼun nopbo lek smelolal kʼuxi te tsakal skʼoplal li tekstoetik xchiʼuk li subtituloe. Ta junantik temaetike yichʼoj chʼakel ta jujuvokʼ sventa xata ta anil li kʼusi chakʼan chanabe mas skʼoplale. Jech xtok, ta jlom tekstoetike xi chale: «Kʼelo xtok». Taje te to chalbe mas smelolal li kʼusi chakʼan chanabe skʼoplale. Ep ta veltae xi chal xtoke: «Loʼiletik ta Vivlia ti tskoltautike», li ta yolone te yichʼoj tal tekstoetik, te chalbe jutuk smelolal o te chal kʼusi chakʼ jchantik. Taje jaʼ tskoltaot ta yaʼibel smelolal li tekstoetike.

Li ta vun liʼe, muʼyuk me te chal skotol tekstoetik ti te chchapbe skʼoplal li jujutos kʼusi chakʼan chanabe smelolale, jaʼ noʼox tskoltaot sventa xasabe batel mas skʼoplal (Pr 2:1-6). Sventa xanabe to batel mas smelolale, kʼelo li tekstoetik ti bu chtakvan batel li chʼin letraetike (referencias marginales) xchiʼuk li notaetik li ta Biblia de estudio ta españole. Jech xtok, mi chakʼan to chanabe batel mas smelolal junuk tekstoe, kʼelo li Saʼobil sventa xchanik mas li stestigotak Jeovae o li Índice de las publicaciones Watch Tower. Tuneso li vunetik ti mas to achʼ lokʼemike sventa jaʼuk xakʼel li kʼusitik jaʼ to slokʼele.

Oy ta koʼontonkutik ti skoltaot li livro liʼe sventa x-ayan mas yojtikinobil avuʼun, ti xavaʼibe smelolale xchiʼuk ti xata apʼijil li ta Skʼop Diose. Kʼalal chachan batel li vun liʼe, mas to chachʼun ti «kuxul li skʼop Diose» xchiʼuk ti oy sjuʼele (Ebr 4:12).