Epal takʼin la slajesik ta sventa li abtejebaletik sventa paskʼope | ¿Kʼusi chal li Vivliae?

Li ta 2022, laj yichʼ lajesel 2,24 biyon dólar sventa li abtejebaletik sventa paskʼop ta spʼejel balumile. Taje jaʼ ta skoj ti la stsak ta kʼop Ucrania li Rusiae. Li ta avril ta 2023, xi laj yal li Instituto Internacional de Estocolmo de Investigación para la Paz (SIPRI) ta sventa li kʼusi kʼot ta pasel ta 2022:

•  Li ta Europae «epaj 13 por ciento ti kʼu yepal laj yichʼ tojel li abtejebaletik sventa paskʼope. Li slajeb velta jech kʼot ta pasele jaʼ ta 1991».

•  «Li Rusiae jaʼ toʼox svoʼobal lum ti mas ep slajesoj takʼine. Pe ta skoj ti epaj 9.2 por ciento ti kʼu yepal la slajesik takʼin ta sventa li abtejebaletik sventa paskʼope, kʼot ta yoxibal lum ti mas ep slajesoj takʼine».

•  Li ta spʼejel balumile, li Estados Unidose jaʼ li lum ti mas ep slajesoj takʼin ta sventa li abtejebaletik sventa paskʼope. Yuʼun jaʼ «slajesoj 39 por ciento».

Xi laj yal li Doktor Nan Tian ti jaʼ tskolta sba ta stsʼibael li aʼyej yuʼun SIPRI: «Ti epajem ti kʼu yepal laj yichʼ lajesel takʼin ta sventa li abtejebaletik sventa paskʼope jaʼ svinajeb ti yantik xa sok li balumile».

Li Vivliae yaloj xa onoʼox ti tstsak sbaik ta kʼop li mukʼtik tsatsal lumetike, pe chal xtok ti bu xuʼ jtatik jun oʼontonale.

Albil xa onoʼox ti ch˗epaj li paskʼope

•  Li Vivliae chal ti ta slajebal xa kʼakʼal kuxulutike (Daniel 8:19).

•  Li slivroal Daniele yaloj xa onoʼox ti chlik stsak sbaik ta kʼop li mukʼtik tsatsal lumetike, yuʼun tskʼan tspasvanik ta mantal. Ta skoj li paskʼop taje, slajesojik epal takʼin (Daniel 11:40, 42, 43).

Mi chakʼan to chanabe mas skʼoplal li albil kʼop liʼe, kʼelo li video Ti kʼuxi kʼotem ta pasel li albil kʼop ta Daniel 11.

¿Kʼuxi xuʼ jtatik li jun oʼontonale?

•  Li Vivliae ta xal ti Diose tslajesbe skʼoplal li ajvaliletik ta balumile. «Tsvaʼan jun ajvalilal ti muʼyuk bu chichʼ chʼaybel˗o skʼoplale. Li ajvalilal taje muʼyuk ch˗och ta skʼob junuk jteklum. Jaʼ bikʼitik tslilin xchiʼuk tslajesbe skʼoplal skotol li ajvalilaletik taje, vaʼun stuk xa noʼox te chkom sbatel osil» (Daniel 2:44).

•  Li Jeovaa Diose jutuk xa skʼan spas li kʼusi mu spas yuʼun li krixchanoetike, jaʼ ti chakʼ tal jun oʼontonal ta sbatel osile. ¿Kʼuxi tspas taje? Jaʼ tstunes li Ajvalilal svaʼanoj ta vinajel sventa xchʼaybe skʼoplal li abtejebaletik sventa paskʼope xchiʼuk ti xchʼaybe skʼoplal li milbaile (Salmo 46:8, 9).

Mi chakʼan chanabe mas skʼoplal kʼusi tspas li Ajvalilal yuʼun Diose, kʼelo li mantal ti xi sbie: «Li Ajvalilal yuʼun Diose chakʼ talel jun oʼontonal».