¿Mi jaʼik van jun secta li stestigotak Jeovae?

Li stestigounkutik Jeovae maʼukunkutik jun secta. Jaʼunkutik yajchankʼop Kristo ti chkakʼkutik persa spasel li kʼusi laj yal komel Jesuse xchiʼuk chkakʼ ta jkuxlejalkutik.

¿Kʼusi li sectae?

Ep kʼusitik chalik ta sventa li sectae. Jkʼeltik batel chaʼtosuk xchiʼuk ti kʼu yuʼun maʼuk secta li stestigotak Jeovae.

• Junantike chalik ti jaʼ la jun achʼ relijion ti la xchʼak sba lokʼel tal ta jun relijione. Li stestigounkutik Jeovae mu jaʼuk to la jlikeskutik jun achʼ relijion. Yuʼun jaʼ jech ta jpaskutik kʼuchaʼal la spasik li baʼyel yajchankʼoptak Kristoe xchiʼuk li chanubtasel laj yakʼik ti lokʼem ta Vivliae (2 Timoteo 3:​16, 17). Jchʼunojkutik ti chal ta Vivlia ti kʼu yelan skʼan xichʼ ichʼel ta mukʼ li Diose.

• Yantik xtoke chalik ti jaʼ la jtsob krixchanoetik ti xibal sbaik ti jaʼ noʼox tstsʼakliik jun jnitvanej ta relijione. Li stestigounkutik Jeovae muʼyuk ta jtsʼaklikutik junuk krixchano, yuʼun jchʼunojkutik li kʼusi laj yal Jesus liʼe: «Jun noʼox li Jnitvanej avuʼunike, jaʼ li Kristoe» (Mateo 23:10).

Li jrelijionkutike skoltaojunkutik xchiʼuk skoltaoj li yan krixchanoetik eke. Yuʼun kʼalal ta jcholbekutik mantale chiktaik pasel li kʼusi chopole, jech kʼuchaʼal li yakubele xchiʼuk slajesel drogae. Jech xtok, chichanubtasvankutik ta skʼelel xchiʼuk stsʼibael vun, ta skoj taje ta smiyonal xa noʼox krixchanoetik xchanojik vun. Ta jkoltakutik xtok li buchʼutik chil svokolik ta skoj nojelal ta voʼ, nikel o yan kʼusitike. Chkakʼkutik persa ti bu kʼalal xuʼ kuʼunkutik ta yakʼel ta ilel slekil koʼontonkutik ta stojolal li yantike, jech kʼuchaʼal la spas li Jesuse (Mateo 5:​13-​16).