Oy kʼusi mas toj lek la jpas kanal

LI JKUXLEJAL TOʼOXE

Te lichʼi ta stiʼilaltik Tampere ta Finlandia, jaʼ jun lum ti lek yox xchiʼuk ti xchʼijlan noʼoxe. Muʼyuk yakʼojik tajek ta yoʼonton relijion li kutsʼ kalale, pe tsots skʼoplal chilik ti lekuk jtalelalkutike xchiʼuk ti xichanunajkutik leke. Li jmeʼe ta Alemania likem, jaʼ yuʼun kʼalal bikʼitun toʼoxe, chikʼotilan ta Alemania, yuʼun jaʼ te nakalik li jmoltot xchiʼuk jyayae.

Toj lek chkil li tajimole, ta jbikʼtal onoʼox ta jchanilan junantik. Pe kʼalal 14 xa ox jabilale, jaʼ la jtʼuj li tajimol ta tenise. Kʼalal la jta 16 jabile, ta jchanilan chib oxib velta ta kʼakʼal. Chib velta ta kʼakʼal oy buchʼu chchanubtasun, li ta bat kʼakʼale jtuk xa ta jchan. Toj lek chkil ti kʼu yelan li tajimol ta tenise, yuʼun chakʼ abtejuk jnopbentik xchiʼuk jbekʼtaltik. Akʼo mi lek chkaʼi chilokʼ xchiʼuk li kamigotake xchiʼuk ti chkuchʼ junuk servesa bakʼintike, mu bakʼin la jlajes drogaetik mi jaʼuk la jchan yakubel. Jaʼ batem-o ta koʼonton li tenise, yuʼun jaʼ li kʼusi mas tsots skʼoplal chkil ta jkuxlejale.

Kʼalal 17 xa ox jabilale, lik tajinkun li ta torneo yuʼun ATP.a Epal torneo la jpas kanal, vaʼun lik yojtikinikun li ta jlumale. Kʼalal 22 toʼox jabil kichʼoje, te xa ox jkʼoplal li ta 50 ta voʼ jtajimoletik ta tenis ti mas lek xtojobik ta spʼejel balumile.

Ta skoj ti jchanoj lek li tajimol ta tenise, epal jabil li-ay ta yantik lum ti toj alakʼik sbae, pe laj kakʼ venta xtok ti toj ep vokoliletike, jech kʼuchaʼal li drogaetike, li yikʼubtasel balumile xchiʼuk li elekʼe. Kʼalal li-aykutik ta Estados Unidose, laj kichʼkutik albel ti oy bu mu stakʼ xibatkutik ta xanbal li ta mukʼta jteklumetike, yuʼun toj xibalik sba. Chkat-o koʼonton ta skoj taje. Jech xtok, akʼo mi ta jkʼupin tajek li kʼusi yakalun spasele, pe muʼyuk maʼ ti jun koʼonton chkaʼi kʼalal chnel jujun kʼakʼale.

TI KʼU YELAN LA SJEL JKUXLEJAL LI VIVLIAE

Li jnovia ti Sanna sbie yakal xa ox chchan Vivlia xchiʼuk li stestigotak Jeovae. Labal sba laj kil ti lek chil relijion li jnoviae, pe muʼyuk chopol laj kil ti chchane. Li nupunkutik ta 1990, li kajnile pas ta stestigo Jeova ta 1991. Akʼo mi muʼyuk kakʼoj ta koʼonton li relijione, pe jchʼunoj ti oy Diose. Chvul ta jol ti toj lek xchan Vivlia li jyaya ta Alemaniae xchiʼuk ti la xchanubtasun ta spasel orasione.

Jun velta kʼalal laj yikʼunkutik batel ta snaik jun nupultsʼakal ti jaʼik stestigotak Jeovae, li Kari ti jaʼ li malalile laj yakʼbun kil li albil kʼop ta Vivlia ti chalbe skʼoplal li «slajebal xa kʼakʼale» (2 Timoteo 3:1-5). Toj labal sba laj kil, yuʼun jaʼ te laj kakʼ venta ti te chalbe skʼoplal kʼu yuʼun sokem tajek li balumile. Li kʼakʼal taje, muʼyuk xa bu laj kalbekutik mas skʼoplal li relijione. Pe lik jloʼiltabekutik mas skʼoplal li chanubtaseletik ta Vivliae xchiʼuk oy lek srasonal chkaʼi skotol li kʼusi ta jchane. Ta skoj ti mu noʼox xi xokobe, nom staj ta jchankutik, pe muʼyuk lubtsaj li Karie. Tstakbun talel kartaetik sventa stakʼbun li kʼusitik ta jakʼbe kʼalal ta jchankutik li Vivliae. Laj kakʼ venta ti jamal ta aʼiel kʼu yelan tstakʼ Vivlia li kʼusitik tsots skʼoplal ta jakʼbe jbatike. Ta kʼunkʼun laj kaʼibe smelolal li kʼusi tsots skʼoplal chal sliklej li Vivliae: ti chakʼ kʼotuk ta pasel kʼusi tskʼan yoʼonton Dios li Ajvalilal yuʼune. Toj kʼotel ta koʼonton kʼalal la jchan ti Jeova sbi li Diose xchiʼuk ti ep kʼusitik spasoj ta jtojolaltike (Salmo 83:18). Li kʼusi mas toj labal sba laj kile jaʼ li pojelale, yuʼun maʼuk noʼox laj yichʼ akʼel sventa chichʼ chʼunel junuk mantal, jaʼ svinajeb ti skʼanojutik li Diose (Juan 3:16). La jchan xtok ti xuʼ xijkʼot ta yamigo li Diose xchiʼuk ti xuʼ xijkuxi ta jun paraiso ti bu jun xa noʼox koʼontontike (Santiago 4:8). Vaʼun xi lik jakʼbe jbae: «¿Kʼuxi xuʼ xkakʼ ta ilel ti ta jtoj ta vokol skotol taje?».

Lik jnop kʼusi yakal ta jpas xchiʼuk li jkuxlejale. Li ta Vivliae la jchan ti jaʼ mas chakʼ muyubajel kʼalal voʼotik oy kʼusi chkakʼtike, vaʼun lokʼ ta koʼonton yalbel yantik li kʼusi jchʼunoje (Echos 20:35). Ta skoj ti jchanoj lek li tajimol ta tenise, chibat ta torneoetik xchiʼuk te van 200 kʼakʼal nom oyun ta jna jujun jabil. Li kʼusi mas tsots skʼoplal chil li kutsʼ kalale jaʼ ti ta jchan tajimole, li kʼusitik ta jpas jujun kʼakʼale xchiʼuk li jchanune. Laj kakʼ venta ti skʼan jel li jkuxlejale.

Jnaʼoj ti mu skotolikuk chaʼibeik smelolal ti chkikta komel li tajimol ta skoj relijione. Pe jaʼ tsots skʼoplal laj kaʼi ti xuʼ xkojtikin mas li Jeovae xchiʼuk ti xuʼ xikuxi sbatel osile. Jaʼ xkom to sbalil laj kaʼi kʼusiuk premioal xuʼ jpas kanal li ta tenise, jaʼ yuʼun muʼyuk vokol laj kaʼi stʼujel li kʼusi ta jpase. Jpʼel ta koʼonton muʼyuk ta jchikinta li kʼusi chalik yantike, yuʼun jaʼ li kʼusi kʼot ta nopel kuʼune. Jun teksto ti la skoltaun sventa stsal kuʼun li sujel chkichʼ albel sventa li tajimole jaʼ li Salmo 118:6 ti xi chale: «Li Mucʼul Diose liʼ xchiʼinojun, jech muʼyuc chixiʼ. ¿Cʼusi xuʼ yuʼun chispasbicun li cristianoetique?».

Junantik empresae laj yalbeikun ti chakʼbeikun takʼin sventa xuʼ xitajin-o xchiʼuk ti jun koʼonton xikuxi batel jayibuk jabile. Pe kʼotem xa ox ta nopel kuʼun li kʼusi ta jpase. La jpʼaj li kʼusi laj yalbeikune, ta tsʼakale laj kikta li tajimol ta ATP. Laj kakʼbe-o yipal xchanel Vivlia xchiʼuk laj kichʼ voʼ ta 2 yuʼun julio ta 1994.

KʼUSITIK SBALIL JTAOJAN

Li voʼone mu persauk tsots kʼusi la jnuptan sventa xlik kakʼ ta koʼonton li Diose. Jech xtok, muʼyuk toʼox yakalun saʼel li kʼusi melele. Yuʼun ta jnop ti lek li jkuxlejale xchiʼuk ti oy kuʼun skotol li kʼusi chtun kuʼune. Akʼo mi muʼyuk jmalaoj, jaʼ to kakʼ venta ti oy srasonal ti kʼu yuʼun pasbilutike, yileluke te onoʼox smalaojun li kʼusi melel chal Vivliae. Muʼyuk jnopoj ti xuʼ jun yutsil jkuxlejal jech kʼuchaʼal li avie, ti jmoj oyun xchiʼuk li kutsʼ kalale. Xchiʼuk ta jtoj tajek ta vokol ti la xchanik jtalelal li oxvoʼ jnichʼnabe, yuʼun jaʼ la stsʼakliik li Kristoe maʼuk li tajimole.

Ta to jkʼupin li tajimol ta tenise xchiʼuk jaʼ ta jta-o stojol jveʼel. Yuʼun abtejemun ta xchanubtasel li jtajimoletike xchiʼuk oy jbainoj skʼelel jun club de tenis. Maʼuk xa batem ta koʼonton li tajimole. Voʼnee epal ora ta jchan sventa mas lekuk xitajin xchiʼuk ti xikʼot ta kampeone. Pe avie, jcholmantalun ta tsʼakal ora xchiʼuk jaʼ ta jchʼakbe yorail sventa jkolta yantik ta yojtikinel li beiltaseletik ta Vivlia xchiʼuk ti xakʼ ta xkuxlejalike, yuʼun jaʼ la sjelbun li jkuxlejale. Ximuyubaj tajek ti jaʼ mas tsots skʼoplal chkil ti jaʼuk-o kamigo li Diose xchiʼuk ti xkalbe batel yantik ti oy kʼusi mas toj kʼupil sba chtal ta tsʼakale (1 Timoteo 6:19).