Chtoy stojol li kʼusitik ta jmantike | ¿Kʼusi chal li Vivliae?

«Chkil jvokoltik yan velta ta takʼin. Jaʼ yantik chtoy stojol li kʼusitik chtun kuʼuntike, pe jaʼ jutuk ti kʼu yepal ta jpastik kanale». Taje jaʼ li kʼusi laj yal li presidente yuʼun li Banco Mundial ta junio ta 2022.

Li Fondo Monetario Internacionale chal ti «yantik chtoy stojol li gasolina xchiʼuk li kʼusitik ta jlajestike. Ta skoj taje, mas to chil˗o svokolik li lumetik ti chʼabal stakʼinike».

Li Vivliae tskoltautik ta yaʼibel smelolal kʼu yuʼun ti jech chkil tsots jvokoltik ta takʼine, chal kʼusi xuʼ jpastik xchiʼuk li kʼusi lek chtal ta jelavele.

Chtoy stojol kʼusitik li «ta slajebal xa kʼakʼale»

•  Li Vivliae chal ti kuxulutik li «ta slajebal xa kʼakʼale» (2 Timoteo 3:1).

• Jaʼ jech chkʼot ta pasel kʼalal chtoy stojol li kʼusitike, yuʼun mu snaʼik kʼusi chkʼot ta pasel ta tsʼakal xchiʼuk tsvul yoʼontonik ti mu xmakʼlin yuʼun li yutsʼ yalalike.

•  Li slivroal Apokalipsise laj onoʼox yal ti chtoy tajek stojol li jveʼeltike. Li Apokalipsis 6:6 chal ti jaʼ noʼox xman˗o jun litro trigo xchiʼuk oxib litro sevada li stojolik ta jun kʼakʼal abtele.

Mi chakʼan chanabe mas skʼoplal ta sventa li slajebal kʼakʼal xchiʼuk li albil kʼop chal ta slivroal Apokalipsise, kʼelo li video ti xi sbie: Lik sokuk tal jkuxlejaltik li ta 1914 xchiʼuk li mantal ti xi sbie: «¿Kʼusi skʼoplal li jkajlejetik ta kaʼ chal Apokalipsise?».

Chlaj skʼoplal li vokolil ta takine

•  «Ta xlik svaʼan snaik sventa te chnakiik, ta stsʼun s˗uvaik sventa tslobeik sat. Muʼyuk bu tsvaʼanik naetik ti yan˗o xa buchʼu te chnakie mi jaʼuk tstsʼunolajik ti yan-o xa buchʼu tslajesbe sate» (Isaias 65:21, 22).

•  «Ch˗ayan ep kʼusitik stakʼ lajesel li ta balumile, li ta joljolvitse solel busul ti kʼusi stakʼ lajesele» (Salmo 72:16).

•  «Xi chal li Jeovae: ‹Ta skoj ti ilbajinbilik li buchʼutik oy xa onoʼox svokolike, ta skoj ti tsjikʼ yoʼonton li buchʼu abol sbaike, chitots sventa oyuk kʼusi jpas ta stojolalik›» (Salmo 12:5).a

Li Diose poʼot xa slajesbe skʼoplal li povreal ta spʼejel balumile. Sventa xanaʼ kʼuxi ta spase, kʼelo li mantal ti xi sbie: «¿Mi chkʼot yorail ti parejo xa jkuxlejaltike?».

Li Vivliae xuʼ skoltaot yoʼ xanaʼ kʼusi chapas ta skoj ti chmuy stojol li kʼusitike. ¿Kʼuxi xuʼ skoltaot? Chakʼbot tojobtaseletik sventa xanaʼ kʼuxi xuʼ xatunes lek li atakʼine (Proverbios 23:4, 5; Eklesiastes 7:12). Mi chakʼan chanabe mas skʼoplale, kʼelo li mantal ti xi sbie: «Lekuk xatunes atakʼin» xchiʼuk «¿Kʼuxi xuʼ xijkuxi akʼo mi jutuk jtakʼintik?».