¿Mi poʼot van xlik mukʼta paskʼop ta spʼejel balumil? | ¿Kʼusi chal li Vivliae?

Li echʼem talel 30 jabile ep krixchanoetik tsnopik ti lek xa xil sbaik li mukʼtik lumetike xchiʼuk ti mas to la chlekub batele. Pe jel xa snopbenik li avie, jech kʼuchaʼal xi chal kaʼitik junantik aʼyejetik liʼe:

•  «Chakʼ xiʼel mi x-epaj batel mas paskʼop li ta Gazae, yuʼun yakalik ta paskʼop li Israel xchiʼuk Hizbulá li ta tsʼak te ta lum Libanoe» (Reuters, 6 yuʼun enero ta 2024).

•  «Li Irane tstsak yaʼi ta kʼop li Occidentee, spasoj ta jmoj sjolik xchiʼuk Rusia xchiʼuk China. Oy jayibuk grupo ti jaʼ yuʼun Iran ti lek yabtejebik ti yakal tstsakik ta kʼop jayibuk lumetike, ta anil noʼox ti jech lik spas sventa tslajes yaʼi epal krixchanoetike» (The New York Times, 7 yuʼun enero ta 2024).

•  «Ta skoj ti jech-o tstsak ta kʼop Ucrania li Rusiae, jech-o yakal chakʼbe svokol» (UN News, 11 yuʼun enero ta 2024).

•  «Yantik x-epaj stakʼin xchiʼuk soltarotak li Chinae, li Taiwane xtoyet tajek chaʼi sba ta skoj li slumale xchiʼuk muʼyuk lek xil sbaik li Pekín xchiʼuk Washingtone, taje xuʼ me jaʼ xlik-o paskʼop yuʼunik» (The Japan Times, 9 yuʼun enero ta 2024).

¿Mi oy kʼusi chal Vivlia ta sventa ti mu lekuk xil sbaik li mukʼtik lumetik avie? ¿Mi xuʼ van xlik-o mukʼta paskʼop ta spʼejel balumil ta skoj li kʼusitik chkʼotanuk ta pasele?

Yaloj xa onoʼox Vivlia li kʼusi yakal chkʼot ta pasele

Li Vivliae yaloj onoʼox ti ch-ayan ep paskʼop ti jaʼ chchʼayes li «jun oʼontonal» ta balumile, pe muʼyuk yaloj buchʼu junukal lum tslikes li paskʼope (Apokalipsis 6:4).

Li ta slivroal Daniele laj yal ti ta «slajebal kʼakʼale» tstsak sbaik ta kʼop li mukʼtik lumetik ta spʼejel balumil ti skontrainoj sbaike o sventa xakʼik ta ilel ti buchʼu mas tsots yuʼunike. Te chakʼik ta ilel ti ep tajek yajsoltaroike xchiʼuk te tslajes ep skʼulejalik, jaʼ xkaltik, ti tslajes ep stakʼinike (Daniel 11:40, 42, 43).

Poʼot xa xlik jun paskʼop

Li Vivliae chal ti tsok batel tajek li kuxlejal yoʼ to mu xlekube. Xi xa onoʼox laj yal li Jesuse: «Chtal mukʼta tsatsal vokolil ti muʼyuk bu jech kʼotem-o ta pasel kʼalal lik tal li balumil kʼalal to avie, muʼyuk jech kʼotem-o ta pasel» (Mateo 24:21). Li «mukʼta tsatsal vokolil» taje jaʼ te chlaj li ta paskʼop ta Armajedone, «li ta paskʼop ta smukʼta kʼakʼalil Dios ti jaʼ li Buchʼu skotol xuʼ yuʼune» (Apokalipsis 16:14, 16).

Li ta Armajedone maʼuk sventa tslajes li krixchanoetike, yuʼun jaʼ sventa tskolta. Li ta paskʼop taje jaʼ te chichʼ lajesel li ajvaliletik ta skoj ti ep staoj smulik ta skoj li vokoliletik chakʼ li paskʼope. Mi oy ta avoʼonton chanabe skʼoplal kʼuxi chakʼ talel lekilal sbatel osil li Armajedone, kʼelo li mantaletik ti xi sbie:

•  “¿Kʼusi jaʼ li Armajedone?”

•  “¡Jaʼ jun lekil aʼyej mi vul tal li Armajedone!”