Кызьы спорт пайда вае, озьы ик ужез яратон но пайда ваёз али но, вуонояз но
ЕГИТЪЁСЛЫ
11-тӥ визь-кенеш. Ужез яраты
МАЕ СО ВОЗЬМАТЭ
Ужез яратӥсь адями ужлэсь уг кышка. Солэн ужез сокем синмаськымон ӧвӧл ке но, со яратэ ужзэ, малы ке шуоно солэн аслыз коньдон поттэмез потэ но мукетъёсызлы юрттэмез.
МАЛЫ СО КУЛЭ
Потэ-а, уг-а, но улонын трос мае ке лэсьтоно луэ. Та дуннеын тросэзлэн ужамзы уг поты. Нош тон ужез яратӥд ке, тросгес пайда басьтод (Екклесиаст 3:13).
«Умой ужаськод ке, асэныд данъяськиськод но шумпотон басьтӥськод. Сое валан юрттӥз мыным ужез яратыны. Со сяна, ужлэсь кышкасьтэм муртэ мукетъёсыз но ярато» (Рейон).
БИБЛИЫСЬ ВИЗЬ-КЕНЕШ: «Котькудӥз но уж табыш сётэ» (Мадёнъёс 14:23).
МАР КАРЫНЫ ЛУОЗ
Уждэ яратыны тыныд улӥын сётэм визь-кенешъёс юрттозы.
Дышетскы уждэ умой быдэстыны но шумпотон басьтыны. Мае гинэ тон уд лэсьтӥськы — корка котырысь уждэ быдэстӥськод-а, дорысь уждэ лэсьтӥськод-а яке ужад ужаськод,— ваньзэ мылысь-кыдысь лэсьты. Кыӵе ке ужез умой быдэстӥд ке, малпаськы, кызьы со ужез эшшо но умойгес но ӝоггес быдэстыны быгатысалыд. Лэсьтэм ужед умой пӧрмиз ке, тон бадӟым шумпотон басьтод.
БИБЛИЫСЬ ВИЗЬ-КЕНЕШ: «Адӟид-а тон ас удысаз кужмо ужась муртэ? Со мурт эксэйёс азьын сылоз, огшоры адямиос азьын со уз сылы» (Мадёнъёс 22:29).
Мукетъёсыз сярысь но малпаськы. Тон уждэ тыршыса быдэсъяськод ке, ӵем дыръя со мукетъёсызлы но пайда вае. Кылсярысь, корка котырысь ужъёстэ рос-прос быдэсъяса, тон анай-атаедлэсь ужзэс капчиятӥськод.
БИБЛИЫСЬ ВИЗЬ-КЕНЕШ: «Басьтон сярысь, сётыны умойгес» (Апостолъёслэн ужъёссы 20:35).
Тросгес лэсьты. Ӧжытсэ лэсьтыса гинэ, сюлмыд медаз буйга. Куремзылэсь тросгес лэсьтыны тыршы. Тон ачид, нокин косытэк, тросгес лэсьтыны тыршид ке, соку тон аслыд ачид кузё луод (Матфей 5:41).
БИБЛИЫСЬ ВИЗЬ-КЕНЕШ: «Но тынэсьтыд мылкыддэ тодытэк, номыр но лэсьтэме ӧз поты. Тынад ӟеч ужед кужмысь карытэмын медаз луы, аслад ӟеч мылкыд каремедъя лэсьтэмын мед луоз» (Филимонлы 14).
Ужась адямиос ужлэсь эсэпсэ тодо. Соос уг азьтэмъясько, но со дыре ик ужаны но, шутэтскыны но быгато.
БИБЛИЫСЬ ВИЗЬ-КЕНЕШ: «Секыт ужаса, духез-лулэз курадӟытыса-куректытыса кык кырым тыр люкатозь, ӟечгес луоз каньыл мылкыдын одӥг кырым люканы» (Екклесиаст 4:6).