Иисус периослэсь кужмогес

ТОДӤСЬКОД НА-А, кызьы Инмарлэн одӥг кылчинэз Шайтан Дьявол луиз? ~ Солэн умойтэм малпанъёсыз кылдӥзы но, со Инмарлы пумит султӥз. Солэн потӥз, солы мед йыбыртъялозы шуыса. Нош мукет кылчинъёс Шайтан пала кариськизы-а? ~ Бен. Библиын соос Шайтанлэн кылчинъёсыз, яке периос, шуыса нимамын (Усьтӥськон 12:9).

Нош та урод кылчинъёс, яке периос, Инмарлы оско-а? ~ Соос оско, Инмар вань шуыса. Со сярысь Библиын но верамын (Иаков 2:19). Но али соос дыр-р-р! куалекъяса, кышкаса уло. Малы ке шуоно соос тодо, Инмар соосты вань урод ужъёссы понна кыл кутытоз шуыса. Нош мар соос лэсьтӥзы? ~

Библиын верамын, соос инмысь музъем вылэ васькизы но пиосмуртъёс кариськыса улыны кутскизы шуыса. Соослэн музъем вылысь чебер кышномуртъёсын кӧламзы потӥз (Улон-вылон 6:1, 2; Иуда 6). Мар тон тодӥськод пиосмурт кышномуртэн кӧлан сярысь? ~

Пиосмурт но кышномурт ӵош кӧлало, куке соослэн кусыпъёссы туж матын луо. Собере анай пушкын нылпи будыны кутске. Нош кылчинъёс кинэн ке ӵош кӧланы кылдытэмын ӧй вал. Инмарлэн потэ, карт но кышно гинэ ӵош мед кӧлалозы шуыса. Малы ке шуоно, соослэн нылпизы вордӥськиз ке, соос быгатозы сое будэтыны.

Кылчинъёс пиосмуртъёс кариськыса музъем вылын кышномуртъёсын кӧланы кутскизы. Со кышномуртъёслэн нылпиоссы вордскылӥзы. Соос туж бадӟымесь но туж лекесь будӥзы. Соос адямиосты ултӥяса, вӧсь карыса возизы. Музъемез вань лек адямиослэсь сузян понна, Инмар музъем вылэ бадӟым ву лэзё шуиз. Со Ноез косӥз ковчег, яке бадӟым корабль, лэсьтыны, отын шонер улӥсь адямиос утиськыны мед быгатозы шуыса. Быдӟым Дышетӥсь вераз, туж кулэ шуыса тодамы возьыны, мар вал Ву тудӟон дыръя (Улон-вылон 6:3, 4, 13, 14; Лука 17:26, 27).

Тодӥськод-а, мар луиз урод кылчинъёсын Ву тудӟон дыръя? ~ Соос адями мугоръёссэс кельтӥзы но инме тубизы. Но соос Инмарлэн кылчинъёсыз луыны уг быгато ни вал, соин ик соос Шайтанлэн кылчинъёсыз, яке периос, луизы. Нош мар луиз соослэн нылпиосынызы, туж бадӟым адямиосын? ~ Соос Ву тудӟонын быризы. Озьы ик Ву тудӟонын быризы вань адямиос, кудъёсыз Инмарлэсь ӧз кылзӥське.

Ву тудӟон бере Инмар периослы адямиос кариськыны ӧз лэзьы ни. Ми периосты адӟыны ум быгатӥське. Но соос быгато косыны адямиосты лек ужъёс лэсьтыны. Али периос тужгес но лекесь, малы ке шуоно соос инмысь музъем вылэ сэрпалтэмын.

Тодӥськод-а, малы ми периосты ум адӟиське? ~ Малы ке шуоно соослэн мугорзы адямиослэн кадь ӧвӧл. Но периос вань. Библиын верамын, Шайтан вань адямиослэсь «визьзэс туга» шуыса, нош периос солы юртто (Усьтӥськон 12:9, 12).

Быгатозы-а Шайтан но солэн периосыз милемыз пӧяны? ~ Быгатозы, ми ӧм ке чаклаське. Но соослэсь кышкано ӧвӧл. Быдӟым Дышетӥсь вераз: «Шайтанлэн монэн кузёяськыны кужымез ӧвӧл». Ми Инмарен эшъяськимы ке, со милемыз утёз Шайтанлэсь но, солэн периосызлэсь но (Иоанн 14:30).

Периос косыны быгато милемыз урод ужъёс лэсьтыны. Кыӵеоссэ? Ойдо малпаськомы. Кыӵе урод ужъёс лэсьтӥзы периос музъем вылын? ~ Ву тудӟон азьын соос кышномуртъёсын кӧлазы. Нош озьы лэсьтыны кылчинъёслы уг яра вал. Периослы кельше, куке адямиос Инмарлэн ӵош кӧлан сярысь законэзлэсь уг кылзӥсько. Кызьы тон малпаськод, кинъёс гинэ ӵош кӧланы быгато? ~ Шонер, карт но кышно гинэ.

Туннэ куд-ог нылпиос ог-огенызы кӧланы кутско. Но озьы лэсьтыны уг яра. Библия вера мугор люкетъёс сярысь, кудъёссэ Иегова сётӥз нылпиосты вордыны (Кыкетӥ Закон 23:1). Куд-ог пияшъёс но нылашъёс со мугор люкетъёссэс ог-огзылэсь кутыло. Нош периос солы туж шумпото, малы ке шуоно озьы лэсьтыны Инмар кузпалъяськем адямиослы гинэ лэзиз. Периос туж шумпото, куке адямиос лэсьто сое, мае Иегова уг лэзьы. Нош милям периосты шумпоттэмы уг поты, озьы ведь? ~

Нош эшшо периослы кельше, куке адямиос ог-огзэс ултӥяса но вӧсь карыса возё (Псалтирь 10:5). Ӵапак озьы асьсэды возизы туж бадӟым адямиос, периослэн пиоссы. Нош Иегова сыӵе ужъёсты адӟемпотостэм каре.

Озьы ик периос адямиосты кышкатыны ярато. Соос кулэмъёслэн тусынызы возьматӥсько яке соослэн куараенызы верасько. Озьы периос тыршо адямиосты пӧяны, соос мед оскозы, адями кулэм бере солэн лулыз кытын ке улэ но улэп адямиосын вераське шуыса. Озьы адямиос оскыны кутско пӧртмаськонлы но ишанлы.

Милемлы туж сак луоно, Шайтан но солэн периосыз милемыз медаз пӧялэ шуыса. Библия вера, Шайтан ассэ умоен возьматыны тырше, ми мед оскомы, со умой кылчин шуыса. Озьы ик лэсьто солэн периосыз но (2 Коринфъёслы 11:14, 15). Но, зэмзэ вераса, периос туж лекесь. Ойдо тодомы, кызьы периос косо милемыз асьсэос кадь лекесь луыны.

Малпаськы, мар дышетэ адямиосты лек луыны но кинэн ке кӧланы озьы, кызьы Инмарлы уг яра. Кытысь адямиос тодо периос сярысь но пӧртмаськон сярысь? ~ Зэм, телевизор учкыса, компьютерен шудыса, Интернетын пукыса. Кызьы тон малпаськод, сыӵе ужъёс кинлы ярало — Инмарлы яке Шайтанлы но солэн периосызлы? ~

Кызьы тон малпаськод, кинлэн потэ, ми ваньзэ уродзэ гинэ мед учкомы но мед кылзомы шуыса? ~ Зэм, Шайтанлэн но солэн периосызлэн. Соин ик, мар кароно тыныд но, мыным но? ~ Кулэ лыдӟыны, кылзыны но учкыны сое, мар милемлы пайда вае но мар юрттэ Иеговалы ужаны-тыршыны. Тон малпамъя, мар отчы пыре? ~

Ми лэсьтӥськомы ке сое, мар шонер луэ, периослэсь милемлы кышкано ӧвӧл. Иисус соослэсь трослы кужмогес. Периос асьсэос Иисуслэсь кышкало. Одӥг пол соос кышкаса веразы, Иисус соосты быдтыны лыктӥз шуыса (Марк 1:24). Макем ми шумпотомы, куке Иисус Шайтанэз но солэсь периоссэ быдтоз! Озьы ведь? ~ Нош али ми оскыны быгатӥськомы, Иисуслэн но солэн Атаезлэн эшъёсыз луимы ке, Иисус милемыз периослэсь утёз шуыса.