Мукет шаерысь лыктэм анай-атайёс, юрттэ асьтэлэн нылпиостылы

1, 2. а) Кыӵе шуг-секытэн пумисько мукет шаерысь лыктэмъёслэн нылпиоссы? б) Кыӵе юанъёсты ми эскеромы таяз статьяын?

«ПИЧИ дыръям, семьяямы но кенешын мон вераськисько вал анай-атаелэн кылынызы, кудъёсыз мукет шаерысь лыктӥзы,— тодаз вае Джошуа нимо вын-агай.— Нош куке мон школае мынӥ, та шаерысь кыл мыным матынгес луиз. Кӧня ке ар ортчыса, мон со кылын гинэ вераськыны кутски. Соин ик кенешлэн пумиськонъёсаз мон номыре валатэк пуки, нош анай-атаелэн калык сямъёссы мыным мурт кадь потыны кутскизы». Джошуалэн югдурез мукет нылпиослы но тодмо луэ, соос но сыӵе югдуре сюро.

² Туннэ 240 миллионлэсь тросгес адямиос мурт шаерын уло. Тӥ но соос пӧлын ке, но тӥляд нылпиосты вань ке, кызьы тӥ соослы юрттыны быгатӥськоды, соос озьы ик тӥляд духовной нылпиосты но мед луозы шуыса, кудъёсыз «зэмлык бордын уло»? (3 Иоанн 4). Кызьы мукетъёсыз юрттыны быгато та удысын?

АНАЙ-АТАЙЁС, УМОЙ ПРИМЕР ВОЗЬМАТЭ

3, 4. а) Кызьы анай-атайёс нылпиоссылы умой пример возьматыны быгато? б) Мае анай-атайёс нылпиоссылэсь возьманы кулэ ӧвӧл?

³ Анай-атайёс, тодады возе, тӥ умой пример возьматыны кулэ шуыса. Со юрттоз нылпиостылы пырак улонэ нуись сюресэз бырйыны. Нылпиосты адӟо ке, тӥ Эксэйлыкез нырысетӥ интые пуктӥськоды шуыса, соос Иеговалы оскиськыны дышетско но оско, со соослэн кулэяськонъёссы сярысь сюлмаськоз шуыса (Матф. 6:33, 34). Соин ик узырлык сьӧры эн уйиське. Дась луэ Инмарен кусыпъёсты понна ваньбурдэс сётыны, нош ваньбур понна Инмарен кусыпъёстэс эн палэнтэ. Тырше пунэмаськытэк улыны. Улонады валтӥсез мед луоз инмысь узырлыкез утчан, яке Иеговалы ярамон луон; ваньбурез яке «адямиослэсь данъямзэс» эн утчалэ. (Лыдӟы Марклэсь 10:21, 22; Иоанн 12:43.)

⁴ Ужъёс пӧлы эн вые, нылпиостылы но дырдэс висъялэ. Оскытэ нылпиостэс, тӥ шумпотӥськоды шуыса, куке соос ужпум куто улонзэс Иеговалы сӥзьыны, нош уг тыршо дано луыны яке ваньбур люканы — асьсэлы-а, тӥледлы-а. Та дуннеын тросэз малпало, нылпиослы сюлмаськыны кулэ, анай-атайёссы номырлы но ёрмытэк мед улозы шуыса. Тӥ озьы эн малпалэ. Эн вунэтэ: «нылпиос анай-атайёссылы ваньбур люканы кулэ ӧвӧл, анай-атайёс нылпиослы ваньбур люканы кулэ» (2 Кор. 12:14).

КЫЗЬЫ КЫЛЭЗ ТОДЫМТЭЕН ГЕРӞАСЬКЕМ ШУГ-СЕКЫТЪЁСТЫ ВОРМОНО

5. Малы анай-атайёслы нылпиосынызы Иегова сярысь вераськоно?

⁵ Кызьы Библиын азьло ик верамын вал ини, Инмарлэн организацияз «вань кылъёсын вераськись калыкъёс пӧлысь» адямиос лыкто (Зах. 8:23). Нош нылпиосты тӥлесьтыд кылдэс уг валало ке, тӥледлы секыт луоз соосты зэмлыклы дышетыны. Тужгес но кулэ луись Библиез дышетон, кудӥз тӥляд куке но вал яке луоз ай,— со нылпиосыныды дышетон. Соослы, пырак улон понна, Иегова сярысь тодон-валан басьтоно (Иоанн 17:3). Соин ик вераське соосын Библиысь зэмлыкъёс сярысь котькуд тупась учыре. (Лыдӟы Кыкетӥ Законэз 6:6, 7.)

6. Кыӵе пайда вае нылпиостылы тӥлесьтыд кылдэс тодэмзы? (Учке статья кутсконысь туспуктэмез.)

⁶ Со шаерысь кылэз, кытын тӥ улӥськоды, нылпиосты асьсэос дышетыны быгатозы, кылсярысь, школаын. Нош соос тӥлесьтыд кылдэс мед дышетозы шуыса, тӥледлы соосын ӵемгес ас кылыныды вераськыны кулэ. Соку нылпиосты тӥледлы сюлэмзэс усьтыны быгатозы. Со сяна, нылпиосты кык кылэз тодӥзы ке, со юрттоз соослы тодон-валанзэс паськытатыны но мукет адямиосын капчиен огкыл шедьтыны. Озьы ик, азьланяз соос ужан-тыршонэ тросгес пыриськыны быгатозы, вылды. «Макем бадӟым шумпотон вае мукет кылын вераськись кенешын ужан-тыршон! — шуэ Каролина, кудӥзлэн анаез но атаез мукет шаерысь лыктэмын.— Мыным туж кельше юрттыны отын, кытын ивортӥсьёс уг тырмо!»

7. Мар карыны тӥ быгатысалды, нылпидылы мукет кыл матынгес луысал ке?

⁷ Куддыръя мукет шаерысь лыктэм адямиослэн нылпиоссы выль улон интыысьтызы сямъёслы дышо, выль кылэз дышето но соослэн уг поты ни анай-атайзылэн вордскем кылынызы вераськемзы. Соослы со кылэз валаны но секытгес луэ. Тӥляд но сыӵе югдур кылдӥз ке, быгатысалды-а тӥ выль кылэз ӧжыт ке но дышетыны? Озьы тӥ валаны быгатоды, мар сярысь верасько нылпиосты, мар соослы кельше но кыӵе уж сёто школаын. Со сяна, тӥ быгатоды дышетӥсьёсынызы вераськыны. Ваньмыз со юрттоз тӥледлы нылпиостэс зэмлыклы дышетыны. Веранэз ӧвӧл, выль кылэз дышетон понна, кулэ дыр, кужым но зӥбыт-востэм сям. Нош малпалэ ай, пиналды кыӵе ке муген кылэмысь дугдысал ке, ӧд дышетысалды-а тӥ жестовой кылэз, соин вераськон понна? Озьы ик тыршоно ӧвӧл-а со пиналды понна но, кудӥз мукет кылэз умойгес вала?a

8. Кызьы тӥ нылпиостылы юрттыны быгатӥськоды, мукет кылын умой уд ке вераськиське?

⁸ Вераны кулэ, куд-ог анай-атайёслы туж секыт выль кылэз дышетыны но соин капчиен вераськыны. Со куддыръя люкетэ анай-атайёслы нылпиоссылы Библиысь зэмлыкез вераны (2 Тим. 3:15). Тӥляд но сыӵе ик югдурды ке, тӥ быгатӥськоды юрттыны нылпиостылы Иеговаез яратыны. Тани мар вера Шан нимо тӧро: «Милям анаймы туж шуген вераськиз со кылын, кудзэ ми умойгес валаськомы вал. Нош апае, сузэре но мон туж урод вераськиськомы вал солэн кылыныз». Со ватса: «Нош адӟыса, кызьы анаймы Библиез дышетэ, вӧсяське но каре ваньзэ, мае быгатэ, котькуд арняе семьяен йыбырттонэз ортчытон понна, ми валаськомы вал, Иегова сярысь тодон-валан басьтыны туж кулэ шуыса».

9. Мар карыны быгато анай-атайёс, соос адӟо ке, нылпиосынызы Библиез дышетыны кык кылын умойгес луоз шуыса?

⁹ Куд-ог нылпиосты Иегова сярысь зэмлыклы дышетыны умойгес луоз кык кылын. Малы? Малы ке шуоно одӥг кылын соос верасько школаын, нош мукетыныз — доразы. Соин ик куд-ог анай-атайёс, нылпиоссэс дышетон понна, уже куто печатлам публикациосты, аудиогожтэмъёсты но фильмъёсты кык кылын ик. Кызьы адӟиське, мукет шаерысь лыктэм анай-атайёслы, нылпиоссылы Иеговаен кусыпъёссэс юнматыны юрттон понна, трос дыр но кужым быдтоно луэ.

КЫӴЕ КЕНЕШЕЗ БЫРЪЁНО?

10. а) Кин семьяын ужпум кутыны кулэ, кыӵе кенеше ветлоно? б) Мар кароно сыӵе ужпум кутэмлэсь азьло?

¹⁰ Мукет шаерысь лыктэмъёс уло ке кыдёкын вордскем кылынызы вераськись Адӟись-Ивортӥсьёслэсь, соослы ветлоно со кенеше, кытын верасько та шаерысь кылын (Пс. 145:9). Нош соослы матын вань ке кенеш, кудӥзлэн пумиськонъёсыз ортчо соослэн вордскем кылынызы? Соку малпаськыны кулэ, кыӵе кенеше ветлыны умойгес луоз. Ваньзэ умой малпаса, вӧсяськыса но кышноеныз но нылпиосыныз кенешыса, семьялэн йырызлы ужпум кутоно (1 Кор. 11:3). Эскеромы, мае солы лыдэ басьтоно.

11, 12. а) Кенешлэн пумиськонъёсаз нылпи тодон-валан басьтыны мед быгатоз шуыса, одно ик-а кылэз умой тодоно? Валэктэ. б) Малы куд-ог нылпиослэн анай-атайзылэсь кылзэс дышетэмзы уг поты?

¹¹ Анай-атайёслы валаны тыршоно, мар зэмзэ ик кулэ нылпиоссылы. Веранэз ӧвӧл, нылпилы, Библиысь зэмлыкез умойгес валан понна, кенешын арняяз кӧня ке час дышетскем гинэ уг тырмы. Но тани мар сярысь малпаське: куке нылпи кенешысь программаез кылзэ со кылын, кудзэ со умой вала, пумиськонын пукыса гинэ но, со трос тодон-валан басьтэ. Куддыръя со малпамдылэсь тросгес вала. Нош нылпи кылэз умой уг тоды ке, кенешын пукыса гинэ, со тодон-валан уз басьты. (Лыдӟы 1 Коринфъёслы 14:9, 11.) Со сяна, анай кылыз нылпилы матысь луэмысь но сюлмаз пыӵамысь дугдыны быгатэ. Куд-ог нылпиос пумиськонын эскеронэ пырисько но сцена вылысен анай-атайзылэн кылынызы верасько, нош верамзы сюлмысьтызы уг поты.

¹² Нылпилэн сюлмаз, кыл сяна, пыӵало на калык сямъёс но религия. Со сярысь Джошуа но вераны быгатэ, кудӥзлэн кылъёсыз вылӥынгес гожтэмын вал. Солэн Эстер апаез вера: «Нылпиос ярато ке анай-атайзылэсь кылзэс, соос ярато соослэсь калык сямъёссэс но религизэс». Нош нылпиослы анай-атайзылэн калык сямъёссы мурт кадь пото ке, соослы озьы ик мурт кадь потэ соослэн кылзы но, осконзы но. Мар соку кароно?

13, 14. а) Малы мукет шаерысь лыктэм семья ужпум кутӥз ветлыны со кенеше, кудаз та шаерысь кылын верасько? б) Мар каризы одӥг кузпалъёс, духовно юн кылён понна?

¹³ Христиан анай-атайёс понна нылпиоссылэн духовной тазалыксы, асьсэлэн мыл потонъёссы сярысь, вылӥынгес луэ (1 Кор. 10:24). Самьюэл, Джошуалэн но Эстерлэн атайзы, вера: «Кыӵе кылын нылпиосмы Библиысь зэмлыкъёсты умойгес валало шуыса тодон понна, ми соос сьӧры учкыса улӥмы. Со сяна, ми визьлык курыса вӧсяськимы на. Ми малпаськомы вал, милям кылынымы ортчытӥськись кенешъёсы ветлыса, нылпиосмы пайда басьто шуыса, нош со озьы вылымтэ. Куке ми сое валамы, ми ужпум кутӥмы мукет кенеше потыны. Ми ваньмы ялан кенешъёсы ветлӥмы но тодытон уже пыриськимы. Озьы ик кенешысьтымы вын-агайёсты но сузэр-апайёсты дорамы нуназеяны ӧтьылӥмы яке кытчы ке соосын ӵош ветлылӥмы. Солы луыса милям нылпиосмы матэгес тодматскизы кенешысь огъя оскисьёсынымы. Нош со сяна, соос Иеговаез, Инмарез кадь гинэ ӧвӧл, нош асьсэлэсь Атайзэс но Эшсэс кадь тодыны быгатӥзы. Ми малпаськомы, со соослы кулэгес вал, милесьтым кылмес тодэм сярысь».

¹⁴ Самьюэл ватса на: «Духовно юн кылён понна, ми кышноеным ветлӥмы на со кенешъёсы, кытын милям кылынымы верасько. Солы трос дыр кошке вал но туж жадиськомы вал ке но, ми туж тау кариськомы Иеговалы, со милесьтым тыршеммес бакель кариз шуыса! Милям куинез ик нылпиосмы Иеговалы вань дырзэс сётыса ужало-тыршо».

МАР КАРОНО АСЬСЭЛЫ НЫЛПИОСЛЫ

15. Малы Кристина мукет кенеше потыны ужпум кутӥз?

¹⁵ Бадӟымгес будыса, куд-ог нылпиос валало, соос Иеговалы умойгес ужаны-тыршыны быгатозы шуыса, ветлӥзы ке со кенеше, кытын верасько соослы валамонгес кылын. Соос ужпум куто ке мукет кенеше потыны, анай-атайёслы малпано ӧвӧл, нылпиоссы соосты уг ярато шуыса. Кристина нимо сузэр тодаз вае: «Мон анай-атаелэсь кылзэс ӧжыт тодӥсько вал ке но, кенешлэн пумиськонъёсаз туж ӧжытсэ валасько вал. Куке мыным 12 арес вал, мон ветлӥ конгрессэ, кудӥз ортчытӥськиз со кылын, кудӥныз мон школаын вераськи. Соку мон нырысьсэ валай: со, мае мон кылӥ,— зэмлык! Мон кутски вӧсяськыны со кылын но вералляй Иеговалы ваньзэ, мар вал мынам сюлмам. Со мынэсьтым улонме воштӥз» (Ап. уж. 2:11, 41). Бадӟымгес будэм бераз Кристина анай-атаеныз вераськиз но мукет кенеше потыны ужпум кутӥз. Со вера: «Куке мон Иегова сярысь тодыны кутски со кылын, кудӥныз вераськи школаын, со мынэсьтым мылкыдме ӝутӥз Иеговалы тросгес тыршыны». Ӝоген Кристина пионер луыса ужаны-тыршыны кутскиз.

16. Малы Надя нимо сузэр шумпотэ, мукет кенеше ӧз поты шуыса?

¹⁶ Егит христианъёс, потэ-а тӥляд ветлэмды со кенеше, кытын верасько со шаерлэн кылыныз, кытын тӥ улӥськоды? Потэ ке, юалэ асьтэлэсь: малы мынам отчы ветлэме потэ? Юрттоз-а со мыным Иегова доры матэ кариськыны? (Иак. 4:8). Яке тӥляд анай-атайёстылэн бурд улысьтызы кошкемды но улондэс капчиятэмды потэ-а? «Куке ми ваньмы, апае, мон, кык сузэръёсы но выны, быдэ вуэмын ӧй вал на, милям потэммы потӥз со кенеше, кудаз та шаерысь кылын вераськизы»,— вера Вефильын тыршись Надя. Но солэн анаез но атаез тодо вал, нылпиоссылы со Иеговаен матэ кариськыны уз юртты шуыса. Надя ватса на: «Али ми туж тау кариськомы анай-атаймылы, соос туж тыршизы шуыса милемыз асьсэ кылзылы дышетыны но ӧз лэзе соку мукет кенеше потыны. Со улонмес тыр кариз, но милям тросгес луонлыкъёсмы кылдӥзы мукет адямиослы юрттыны Иеговаен тодматскыны».

КЫЗЬЫ МУКЕТЪЁСЫЗ ЮРТТЫНЫ БЫГАТО

17. а) Кинэ Иегова косӥз нылпиосты дышетыны? б) Кинлы вазиськыны быгато анай-атайёс, юрттэт курыса, нылпиоссэс зэмлыклы дышетон понна?

¹⁷ Нылпиосты зэмлыклы дышетыны Иегова анай-атайёсты косӥз, нош песянайёсты но песятайёсты яке мукет адямиосты ӧз. (Лыдӟы Мадёнъёсты 1:8; 31:10, 27, 28.) Озьы ке но, анай-атайёслы, кудъёсыз та шаерысь кылэз уг тодо, нылпиоссылэсь сюлэмзэс вырӟытон понна, юрттэт кулэ луоз, вылды. Анай-атайёс сыӵе юрттэт курыса вазисько ке, со уг возьматы, соос асьсэлэсь ужзэс мукетъёсызлы кельто шуыса. Нош со возьматэ, соослэн нылпиоссэс дышетэмзы потэ шуыса озьы, кызьы Иегова вера (Еф. 6:4). Кылсярысь, анай-атайёс тӧроослы вазиськыны но визь-кенеш курыны быгато, кызьы семьяен йыбырттонэз ортчытъяно яке кызьы нылпиоссылы умой эшъёс шедьтоно.

18, 19. а) Кызьы христианъёс, кудъёсызлэн Иеговаен юн кусыпъёссы, егитъёсызлы юрттыны быгато? б) Мар кароно азьланяз но анай-атайёслы?

¹⁸ Анай-атайёс, семьяен йыбырттон ортчытыкузы, куддыръя мукет семьяосты доразы ӧтьыны быгато. Со сяна, тросэз быдэ вуымтэос Иеговаен кусыпъёссэс юнмато, эшъяськыса соосын, кинъёслэн Иеговаен юн кусыпъёссы, но кинъёс соосты сьӧразы ужан-тыршонэ басьто яке ваньмон дырзэс ӵош ортчыто (Мад. 27:17). Шан, кудӥзлэн кылъёсыз вылӥынгес гожтэмын вал, тодаз вае: «Мон туж умой тодӥсько на вын-агайёсты, кудъёсыз мон сярысь сюлмаськизы. Куке соос юрттӥзы мыным кенешлэн пумиськонъёсаз сётэм ужъёсме дасяны, мон котьку малы ке вылезлы дышетски. Эшшо мыным туж кельше вал соосын ӵош шутэтскыны».

¹⁹ Нош анай-атайёс кенешысь кыӵе ке вын-агаез яке сузэр-апаез нылпиоссылы юрттыны куризы ке? Сыӵе учыре туж кулэ, со вын-агайёс но сузэр-апайёс нылпиослы асьсэлэсь анай-атайзэс гажаны мед юрттозы шуыса. Соослы котьку анай-атайёссы сярысь умоен верано но соослэсь ужзэс ас вылазы басьтоно ӧвӧл. Озьы ик чакласьконо, нокин но соослэсь кусыпъёссэс шонертэм медаз вала шуыса (1 Пётр 2:12). Анай-атайёс мукетъёсызлэсь юрттэт курыны быгато ке но, соос асьсэос кыл куто нылпиоссэс Библиысь зэмлыклы дышетон но визьнодан понна. Соослы тодыны кулэ, кызьы вын-агайёс но сузэр-апайёс юртто соослэн нылпиоссылы, озьы ик асьсэлы но соосты дышетоно.

20. Кызьы анай-атайёс нылпиоссылы юрттыны быгато Иеговалы оскымон ужась-тыршисьёс луыны?

²⁰ Анай-атайёс, Иеговалэсь юрттэтсэ куре но лэсьтэ ваньзэ, мае быгатӥськоды. (Лыдӟы 2 Паралипоменонэз 15:7.) Нылпиостылы Иеговаен эшъяськыны юрттон понна, дась луэ асьтэ мыл потонъёстылэсь куштӥськыны. Тырше, кӧня быгатӥськоды, Инмарлэн Кылыз соослэн сюлмазы мед пыӵалоз шуыса. Оске, тӥляд нылпиосты Иеговалы оскымон ужась-тыршисьёс луозы шуыса. Куке соос Библиысь возетъёсъя улыны кутскозы но тӥлесьтыд адӟем карозы, тӥ шӧдоды сое ик, мае шӧдӥз апостол Иоанн, кудӥз аслаз духовной нылпиосыз сярысь вераз: «Мынам нылпиосы зэмлык бордын уло шуыса кылӥсько ке, мон понна солэсь бадӟымез шумпотон ӧвӧл» (3 Иоанн 4).